ಹೊಸದಿಲ್ಲಿ:ದೇಶಾದ್ಯಂತ ಕೊರೊನಾ ಕೇಕೆಯ ನಡುವೆ ಜನತೆಗೆ ತುಸು ನೆಮ್ಮದಿಯ ಸುದ್ದಿ ನೀಡಿದೆ. ಈ ಬಾರಿ ಮುಂಗಾರಿನಲ್ಲಿ ವಾಡಿಕೆಯ ಅಥವಾ ಸಾಮಾನ್ಯಕ್ಕಿಂತ ಹೆಚ್ಚಿನ ಮಳೆಯಾಗುವ ನಿರೀಕ್ಷೆಯಿದೆ ಎಂದು ಹವಾಮಾನ ಇಲಾಖೆ ಭವಿಷ್ಯ ನುಡಿದಿದೆ. ''ದೇಶದಲ್ಲಿ ಶೇ. 75ರಷ್ಟು ಮಳೆಗೆ ಕಾರಣವಾಗುವ ನೈರುತ್ಯ ಮಾರುತಗಳು ಈ ಬಾರಿ ವಾಡಿಕೆಯ ಮಳೆ ಸುರಿಸಲಿವೆ. ಕೆಲವು ಬೆರಳೆಣಿಕೆ ರಾಜ್ಯಗಳನ್ನು ಹೊರತುಪಡಿಸಿ, ಉಳಿದೆಲ್ಲೆಡೆ ದೀರ್ಘಕಾಲೀನ ಸರಾಸರಿಯ (ಎಲ್ಪಿಎ) ಶೇ. 98ರಷ್ಟು ಮಳೆಯಾಗಲಿದೆ. ಇದು ದೇಶದ ಜನತೆಯ ಪಾಲಿಗೆ ಶುಭ ಸುದ್ದಿ. ಕೃಷಿ ಉತ್ಪಾದನೆ ಹೆಚ್ಚಳಕ್ಕೆ ಇದು ಕಾರಣವಾಗಲಿದೆ,'' ಎಂದು ಭೂ ವಿಜ್ಞಾನ ಸಚಿವಾಲಯದ ಕಾರ್ಯದರ್ಶಿ ಎಂ. ರಾಜೀವನ್ ತಿಳಿಸಿದ್ದಾರೆ. ''ಮುಂಗಾರು ಮಾರುತಗಳ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುವ 'ಎಲ್ ನಿನೊ' ರಚನೆಯಾಗುವ ಸಾಧ್ಯತೆ ಕಡಿಮೆಯಿದೆ. ಹೀಗಾಗಿ ಮಳೆಯ ಕೊರತೆಯ ಸಂಭವವಿಲ್ಲ. ಕಳೆದ ಎರಡು ಬಾರಿಯೂ ನಿರೀಕ್ಷೆಗಿಂತಲೂ ಹೆಚ್ಚಿನ ಮಳೆಯಾಗಿದೆ,'' ಎಂದು ಅವರು ಹೇಳಿದ್ದಾರೆ. ಆರ್ಥಿಕತೆಗೂ ಸಹಾಯಕಕೃಷಿ ಮತ್ತು ಕೃಷಿ ಸಂಬಂಧಿತ ಚಟುವಟಿಕೆಗಳೇ ಭಾರತದ ಆರ್ಥಿಕತೆಯ ಚಾಲಕ ಶಕ್ತಿಗಳಾಗಿದ್ದು, ಉತ್ತಮ ಮುಂಗಾರು ಮಳೆಯು ಅರ್ಥವ್ಯವಸ್ಥೆಯ ಚೇತರಿಕೆಗೂ ನೆರವಾಗಲಿದೆ. ''ಉತ್ತಮ ಮುಂಗಾರಿನಿಂದ ಕೃಷಿ ಉತ್ಪಾದನೆ ಹೆಚ್ಚುವುದಲ್ಲದೆ, ಕೋವಿಡ್ನಿಂದಾಗಿ ಗ್ರಾಮೀಣ ಪ್ರದೇಶಗಳಲ್ಲಿ ಸೊರಗಿರುವ ಬೇಡಿಕೆ ಹೆಚ್ಚಳಕ್ಕೂ ನೆರವಾಗಲಿದೆ,'' ಎಂದು ಅರ್ಥಶಾಸ್ತ್ರಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ದೇಶದ ಬಹುತೇಕ ಭಾಗವು ಕೃಷಿ ಮತ್ತು ಜಲಾಶಯಗಳ ಭರ್ತಿಗೆ ನಾಲ್ಕು ತಿಂಗಳ ಮುಂಗಾರು ಮಳೆಯನ್ನೇ ನೆಚ್ಚಿಕೊಂಡಿದೆ. 5 ರಾಜ್ಯಗಳಲ್ಲಿ ಕಡಿಮೆ ಒಡಿಶಾ, ಜಾರ್ಖಂಡ್, ಪೂರ್ವ ಉತ್ತರ ಪ್ರದೇಶ, ಅಸ್ಸಾಂ ಮತ್ತು ಮೇಘಾಲಯದಲ್ಲಿ ವಾಡಿಕೆಗಿಂತಲೂ ಕಡಿಮೆ ಮಳೆಯಾಗುವ ನಿರೀಕ್ಷೆಯಿದೆ. ಆದರೆ ದಕ್ಷಿಣ ಭಾರತ ಸೇರಿದಂತೆ ದೇಶದ ಉಳಿದೆಲ್ಲೆಡೆ ಉತ್ತಮ ಅಥವಾ ಸಾಮಾನ್ಯಕ್ಕಿಂತಲೂ ಹೆಚ್ಚಿನ ಮಳೆಯಾಗಲಿದೆ. ಮುಂದಿನ ನಾಲ್ಕು ತಿಂಗಳ ಕಾಲ ಮಾಸವಾರು ಮುನ್ಸೂಚನೆಯನ್ನು ಹವಾಮಾನ ಇಲಾಖೆಯು ಒದಗಿಸಲಿದೆ ಎಂದು ರಾಜೀವನ್ ತಿಳಿಸಿದ್ದಾರೆ. ಮುಂಗಾರು ಮಾಪನ
- 90-96: ವಾಡಿಕೆಗಿಂತ ಕಡಿಮೆ
- 96-104: ವಾಡಿಕೆ ಮಳೆ
- 104-110: ವಾಡಿಕೆಗಿಂತ ಹೆಚ್ಚು
- 110ಕ್ಕಿಂತ ಅಧಿಕ: ಅತಿವೃಷ್ಟಿ
from India & World News in Kannada | VK Polls https://ift.tt/3uX4Lxk
