ಮಂಜುನಾಥ ನಾಗಲೀಕರ್ ಬೆಂಗಳೂರು ಬೆಂಗಳೂರು: ಯುದ್ಧ ಮತ್ತು ಸಂದಿಗ್ಧ ಪರಿಸ್ಥಿತಿಯಲ್ಲಿ ಶತ್ರುಗಳಿಗೆ ಗೊತ್ತಾಗದಂತೆ ದಾಳಿ ನಡೆಸುವುದೇ ಹೊಸ ತಲೆಮಾರಿನ ಆಧುನಿಕ ಯುದ್ಧತಂತ್ರ. ಎದುರಾಳಿಗಳನ್ನು ಹಿಮ್ಮೆಟ್ಟಿಸುವುದರ ಜತೆಗೆ, ಪಡೆಗಳ ಜೀವಹಾನಿ ತಪ್ಪಿಸುವ ಉದ್ದೇಶದಿಂದ (ಎಚ್ಎಎಲ್) 'ಕಾಂಬ್ಯಾಟ್ ಏರ್ ಟೀಮಿಂಗ್ ಸಿಸ್ಟಮ್' (ಸಿಎಟಿ) ಯೋಜನೆಯ ಭಾಗವಾಗಿ 'ವಾರಿಯರ್' ಡ್ರೋನ್ ಅಭಿವೃದ್ಧಿಪಡಿಸುತ್ತಿದೆ. ಮೊದಲ ಬಾರಿಗೆ ಇದರ ಮಾದರಿಯನ್ನು 'ಏರೋ ಇಂಡಿಯಾ-2021'ನ ಎಚ್ಎಎಲ್ ಹಾಲ್ನಲ್ಲಿ ಪ್ರದರ್ಶನಕ್ಕಿಡಲಾಗಿದೆ. ತನ್ನ ಹಾರಾಟ ಮತ್ತು ಇರುವಿಕೆಯನ್ನು ಮರೆಮಾಚಿ ಗೌಪ್ಯವಾಗಿ ಶತ್ರು ಪ್ರದೇಶದೊಳಗೆ ನುಗ್ಗಿ ಗುರಿ ಸಾಧಿಸಿ ಸುರಕ್ಷಿತವಾಗಿ ವಾಪಸ್ ತನ್ನ ನೆಲೆಗೆ ಬರುವಂತೆ 'ವಾರಿಯರ್' ಅನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ. ಬಹು ನಿರೀಕ್ಷೆಯ ಈ ಡ್ರೋನ್ನ 'ಪ್ರೋಟೋಟೈಪ್' ಮುಂದಿನ ಮೂರು ವರ್ಷಗಳಲ್ಲಿ ಸಿದ್ಧವಾಗಿ ಹಾರಾಡುವ ನಿರೀಕ್ಷೆ ಇದೆ. ಡ್ರೋನ್ ಅಭಿವೃದ್ಧಿಗೆ ಸಂಪೂರ್ಣವಾಗಿ ಎಚ್ಎಎಲ್ ಹಣ ಹೂಡಿಕೆ ಮಾಡಲಿದೆ. ತೇಜಸ್ನಿಂದ ನಿಯಂತ್ರಣ ವಾರಿಯರ್ ಡ್ರೋನ್, ತೇಜಸ್ ಯುದ್ಧ ವಿಮಾನದ ಪೈಲಟ್ನಿಂದ ನಿಯಂತ್ರಿಸಲ್ಪಡುತ್ತದೆ. ಅಂದರೆ ತೇಜಸ್ ವಿಮಾನ ಮತ್ತು ವಾರಿಯರ್ ಡ್ರೋನ್ ಒಟ್ಟಿಗೇ ಹಾರಾಟ ಆರಂಭಿಸುತ್ತವೆ. ಈ ವೇಳೆ ತೇಜಸ್ನಲ್ಲಿ ಕುಳಿತ ಪೈಲಟ್ 'ವಾರಿಯರ್' ನಿಯಂತ್ರಿಸುತ್ತಾರೆ. ನಿಗದಿತ ಗುರಿ ಮೇಲೆ ದಾಳಿ ಕುರಿತು ತೇಜಸ್ ಪೈಲಟ್ ನಿರ್ಧರಿಸುತ್ತಾರೆ. ತೇಜಸ್ ವಿಮಾನದ ಪೈಲಟ್ ಒಂದಕ್ಕಿಂತ ಹೆಚ್ಚು ವಾರಿಯರ್ಗಳನ್ನು ನಿಯಂತ್ರಿಸಬಲ್ಲರು. ಇನ್ನು ತೇಜಸ್ ಮತ್ತು ವಾರಿಯರ್ ತಂಡವಾಗಿ ಹಾರಾಟ ನಡೆಸುವ ಕಾರಣ ಶತ್ರು ರಾಷ್ಟ್ರಗಳ ದಾಳಿಯಿಂದ ಪೈಲಟ್ ಇರುವ ತೇಜಸ್ ರಕ್ಷಣೆ ಸಾಧ್ಯವಿದೆ ಎಂದು ಎಚ್ಎಎಲ್ನ ಅಧಿಕಾರಿ ತಿಳಿಸಿದರು. ಕ್ಷಿಪಣಿ ದಾಳಿ ಸಾಮರ್ಥ್ಯ ಕ್ಷಿಪಣಿ ಹೊತ್ತೊಯ್ಯಬಲ್ಲ ಡ್ರೋನ್, ಆಕಾಶದಲ್ಲಿ ಹಾರಾಡುವ ಶತ್ರು ವಿಮಾನಗಳು ಮತ್ತು ನೆಲದ ಮೇಲಿನ ಗುರಿಗಳ ಮೇಲೆ ದಾಳಿ ನಡೆಸಬಲ್ಲದು. 'ಇದು ಸಂಪೂರ್ಣವಾಗಿ ರಹಸ್ಯ ಡ್ರೋನ್ ಆಗಿರದಿದ್ದರೂ, ರಾಡಾರ್ಗಳ ಕಣ್ತಪ್ಪಿಸಬಲ್ಲದು. ರಾಡಾರ್ಗಳ ಕಣ್ಣಿಗೆ ಬೀಳುವ ಸಾಧ್ಯತೆ ಕಡಿಮೆ ಎನ್ನುತ್ತಾರೆ ಎಚ್ಎಎಲ್ ಅಧಿಕಾರಿಗಳು.
from India & World News in Kannada | VK Polls https://ift.tt/2YKW0s5
