ಅಮೆರಿಕ-ಚೀನಾ ನಡುವಿನ ಶೀತಲ ಸಮರದಿಂದ ದೂರವಿದ್ದಷ್ಟು ನಿಮಗೆ ಒಳ್ಳೆಯದು ಎಂದು ಭಾರತಕ್ಕೆ ಎಚ್ಚರಿಕೆ ನೀಡುವ ದುಸ್ಸಾಹಸ ಮಾಡಿದ್ದ ಚೀನಾ ಇದೀಗ ಇಂಗು ತಿಂದ ಮಂಗನಂತಾಗಿದೆ. ಚೀನಾಗೆ ನೇರ ಉತ್ತರ ಕೊಡುವ ಬದಲು ಕೇವಲ ಒಂದು ದೂರವಾಣಿ ಕರೆ ಮಾಡಿದ ಪ್ರಧಾನಿ ಮೋದಿ, ತಮ್ಮ ನಿಲುವೇನು ಎಂಬುದನ್ನು ಪರೋಕ್ಷವಾಗಿ ಚೀನಾಗೆ ಮನದಟ್ಟು ಮಾಡಿಕೊಟ್ಟಿದ್ದಾರೆ. ಅಮೆರಿಕ ಅಧ್ಯಕ್ಷರಿಗೆ ಕರೆ ಮಾಡಿದ ಪ್ರಧಾನಿ ಮೋದಿ ಈ ಮೂಲಕ ಭಾರತದ ಸಾರ್ವಭೌಮತ್ವ ಚೀನಾದ ಧಮ್ಕಿಗಳಿಗೆ ಎಂದಿಗೂ ಬಗ್ಗುವುದಿಲ್ಲ ಎಂಬ ಸಂದೇಶ ರವಾನಿಸಿದ್ದಾರೆ. ಟ್ರಂಪ್ ಅವರಿಗೆ ಮೋದಿ ಮಾಡಿದ ಕರೆ ಚೀನಾದಲ್ಲಿ ಸುನಾಮಿ ಅಲೆಯನ್ನೇ ಎಬ್ಬಿಸಿದ್ದು, ಇದೀಗ ಎರಡು ಶಕ್ತಿಶಾಲಿ ದೇಶಗಳನ್ನು ಏಕಕಾಲದಲ್ಲಿ ಎದುರಿಸಬೇಕಾದ ಇಕ್ಕಟ್ಟಿನಲ್ಲಿ ಸಿಲುಕಿದೆ. ತನ್ನ ಮತ್ತು ಭಾರತದ ನಡುವಿನ ಗಡಿ ಸಮಸ್ಯೆಯಲ್ಲಿ ಅಮೆರಿಕ ಬರುವುದಿಲ್ಲ, ತನ್ನ ಮತ್ತು ಅಮೆರಿಕ ನಡುವಿನ ಶೀತಲ ಸಮರದಲ್ಲಿ ಭಾರತ ಮಧ್ಯ ಪ್ರವೇಶಿಸುವುದಿಲ್ಲ ಎಂದೇ ಬಗೆದಿದ್ದ ಚೀನಾಗೆ, ತನ್ನ ಯೋಜನೆ ತಲೆಕೆಳಗಾಗುತ್ತಿರುವುದು ಸ್ಪಷ್ಟವಾಗಿ ಕಾಣುತ್ತಿದೆ. ಪ್ರಧಾನಿ ಮೋದಿ ಹಾಗೂ ಟ್ರಂಪ್ ದೂರವಾಣಿ ಮಾತುಕತೆ ಹಾಗೂ ಇದರಿಂದ ಚೀನಾದ ಮೇಲೆ ಬೀರಿರುವ ವ್ಯತಿರಿಕ್ತ ಪರಿಣಾಮವನ್ನು ಗಮನಿಸುವುದಾದರೆ...ಅಮೆರಿಕ-ಚೀನಾ ನಡುವಿನ ಶೀತಲ ಸಮರದಲ್ಲಿ ಅಮೆರಿಕದ ಪರವಾಗಿ ನಿಲ್ಲಬೇಡಿ ಎಂದು ಚೀನಾ ನೇರವಾಗಿಯೇ ಭಾರತಕ್ಕೆ ಎಚ್ಚರಿಕೆ ನೀಡಿತ್ತು. ಸಾರ್ವಭೌಮ ರಾಷ್ಟ್ರವೊಂದು ತನಗೆ ಸರಿ ಹೊಂದುವ ವಿದೇಶಾಂಗ ನೀತಿಯನ್ನು ಅನುಸರಿಸುತ್ತದೆ ಎಂಬ ಸತ್ಯದ ಅರಿವಿದ್ದೂ ಚೀನಾ ಈ ಎಚ್ಚರಿಕೆ ನೀಡುವ ದುಸ್ಸಾಹಸ ಮಾಡಿತ್ತು.
ಪ್ರಾಬಲ್ಯ ಕುಗ್ಗುವ ಭಯ: ಶೀತಲ ಸಮರದಲ್ಲಿ ಅಮೆರಿಕ ಪರ ನಿಲ್ಲದಂತೆ ಭಾರತಕ್ಕೆ ಚೀನಾ ಮನವಿ
ಚೀನಾದ ಈ ದುಸ್ಸಾಹಸಕ್ಕೆ ನೇರವಾಗಿ ಉತ್ತರ ನೀಡಲು ಹೋಗದ ಪ್ರಧಾನಿ ಮೋದಿ, ಅಮೆರಿಕ ಅಧ್ಯಕ್ಷರಿಗೆ ದೂರವಾಣಿ ಕರೆ ಮಾಡಿ ಮಾತನಾಡುವ ಮೂಲಕ ಪರೋಕ್ಷವಾಗಿಯೇ ಚೀನಾಗೆ ಎದಿರೇಟು ನೀಡಿದರು. ಈ ಮೂಲಕ ಭಾರತದ ಸಾರ್ವಭೌಮತ್ವದ ತಾಕತ್ತನ್ನು ಪ್ರದರ್ಶಿಸಿದರು.
ಅದರಂತೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ದೂರವಾಣಿ ಕರೆ ಮಾಡಿ ಮಾತನಾಡಿದ ಪ್ರಧಾನಿ ಮೋದಿ, ಪ್ರಮುಖವಾಗಿ ಭಾರತ-ಚೀನಾ ಗಡಿ ತಕರಾರು, ಅಮೆರಿಕದಲ್ಲಿ ಕಪ್ಪು ವರ್ಣೀಯನ ಹತ್ಯೆ ಮತ್ತು ಆ ಬಳಿಕದ ಹಿಂಸಾತ್ಮಕ ಪ್ರತಿಭಟನೆಗಳ ಕುರಿತು ಚರ್ಚೆ ನಡೆಸಿದರು.
ಈ ವೇಳೆ ಮುಂಬರುವ G-7 ಶೃಂಗಸಭೆಯಲ್ಲಿ ತಾವು ಭಾರತವನ್ನೂ ಆಹ್ವಾನಿಸಲಿರುವುದಾಗಿ ಟ್ರಂಪ್ ಸ್ಪಷ್ಟಪಡಿಸಿದರು. ಈ ಆಹ್ವಾನಕ್ಕೆ ಧನ್ಯವಾದ ಅರ್ಪಿಸಿದ ಪ್ರಧಾನಿ ಮೋದಿ, ಭಾರತ G-7 ಶೃಂಗಸಭೆಯನ್ನು ಎದುರು ನೋಡುತ್ತಿದೆ ಎಂದು ಹೇಳಿದರು.
ಅಮೆರಿಕ ಪರ ನಿಲ್ಲದಂತೆ ಚೀನಾ ಮನವಿಯ ಮರುದಿನವೇ ಮೋದಿ-ಟ್ರಂಪ್ ಮಾತುಕತೆ
ಉಭಯ ನಾಯಕರ ನಡುವೆ 25 ನಿಮಿಷಕ್ಕೂ ಹೆಚ್ಚುಕಾಲ ಮಾತುಕತೆ ನಡೆದಿದ್ದು, ವರ್ತಮಾನದ ಬೆಳವಣಿಗೆಗಳ ಕುರಿತು ಗಂಭಿರ ಚರ್ಚೆ ನಡೆದಿದೆ ಎನ್ನಲಾಗಿದೆ.
ಭಾರತದೊಂದಿಗೆ ಈಗಾಗಲೇ ಗಡಿ ತಕರಾರು ತೆಗೆದಿರುವ ಚೀನಾ, ಶೀತಲ ಸಮರದಲ್ಲಿ ನಿಮ್ಮ ಪಾತ್ರ ಏನೂ ಇಲ್ಲ ಎಂದು ಹೇಳುವ ಮೂಲಕ ಭಾರತದ ಸಾರ್ವಭೌಮತ್ವವನ್ನೂ ಕೆಣಕಿದೆ. ಅಸಲಿಗೆ ಅಮೆರಿಕ-ಚೀನಾ ನಡುವಿನ ಗುದ್ದಾಟದಲ್ಲಿ ಮಧ್ಯಪ್ರವೇಶಿಸಲು ಭಾರತ ಉತ್ಸುಕವೂ ಆಗಿರಲಿಲ್ಲ. ಆದರೆ ಚೀನಾದ ಈ ಎಚ್ಚರಿಕೆ ಭಾರತದ ಸಾರ್ವಭೌಮತೆಯನ್ನು ಕೆಣಕಿದ್ದು ಸುಳ್ಳಲ್ಲ.
ಭಾರತ-ಚೀನಾ ಗಡಿಯಲ್ಲಿ ಕದನ ಕಾರ್ಮೋಡ; ಇಂಡಿಯಾ ತಂಟೆಗೆ ಹೋದರೆ ಸುಮ್ಮನಿರಲ್ಲ ಎಂದ ಅಮೆರಿಕ
ಇದೇ ಕಾರಣಕ್ಕೆ ಚೀನಾಗೆ ತನ್ನ ತಾಕತ್ತು ಪ್ರದರ್ಶಿಸಲೆಂದೇ ಪ್ರಧಾನಿ ಮೋದಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ಕರೆ ಮಾಡಿದ್ದಾರೆ. ಮೋದಿ-ಟ್ರಂಪ್ ನಡುವಿನ ಮಾತುಕತೆಯಿಂದ ಕಂಗಾಲಾಗಿರುವ ಚೀನಾ, ತನ್ನ ಯೋಜನೆಗಳೆಲ್ಲಾ ತಲೆಕೆಳಗಾಗುತ್ತಿರುವುದನ್ನು ಕಂಡು ಬೆಚ್ಚಿ ಬಿದ್ದಿದೆ. ಏನೋ ಮಾಡಲು ಹೋಗಿ ಇದೀಗ ಎರಡು ಶಕ್ತಿಶಾಲಿ ರಾಷ್ಟ್ರಗಳನ್ನು ಚೀನಾ ಎದುರು ಹಾಕಿಕೊಂಡಂತಾಗಿದೆ.
ಭಾರತಕ್ಕೆ ಚೀನಾದ ಎಚ್ಚರಿಕೆ, ಪ್ರಧಾನಿ ಮೋದಿ-ಟ್ರಂಪ್ ನಡುವಿನ ದೂರವಾಣಿ ಮಾತುಕತೆ ಈ ಮೂರೂ ದೇಶಗಳ ರಾಜತಾಂತ್ರಿಕ ಸಂಬಂಧವನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ದಿದೆ. ಗಡಿ ತಕರಾರಿನಿಂದ ಸಹಜವಾಗಿ ಭಾರತ-ಚೀನಾ ನಡುವಿನ ಸಂಬಂಧಕ್ಕೆ ತುಸು ಧಕ್ಕೆಯಾಗಿದ್ದು, ಈ ವಿಷಯದಲ್ಲಿ ಅಮೆರಿಕ ಭಾರತಕ್ಕೆ ಬೆಂಬಲ ಘೋಷಿಸಿ ಮತ್ತಷ್ಟು ಹತ್ತಿರವಾಗಿದೆ.
ಒಂಟಿಯಾಗುತ್ತಿದೆ ಚೀನಾ: ಸೈಲೆಂಟಾಗಿಯೇ ಅಮೆರಿಕ ಬೆಂಬಲ ಗಿಟ್ಟಿಸಿಕೊಂಡ ಮೋದಿ!
ಕೊರೊನಾ ವೈರಸ್ ಹಾವಳಿಗೆ ಚೀನಾ ಕಾರಣ ಎಂಬ ಸಿಟ್ಟು ಟ್ರಂಪ್ ಅವರಲ್ಲಿ ಇನ್ನೂ ಇದೆ. ಇದೇ ಕಾರಣಕ್ಕೆ ಚೀನಾ ವಿರುದ್ಧ ತಿರುಗಿ ಬಿದ್ದಿರುವ ಅಮೆರಿಕ, ಒಂದರ್ಥದಲ್ಲಿ ಶೀತಲ ಸಮರದಲ್ಲಿ ನಿರತವಾಗಿದೆ. ಇದು ಕೂಡ ಅಮೆರಿಕ-ಭಾರತದ ನಡುವಿನ ಸಂಬಂಧವನ್ನು ಮತ್ತಷ್ಟು ಹತ್ತಿರಕ್ಕೆ ತಂದಿದ್ದು, ಚೀನಾ ಒಂಟಿಯಾಗುತ್ತಿರುವುದು ಸ್ಪಷ್ಟ.
from India & World News in Kannada | VK Polls https://vijaykarnataka.com/news/india/pm-modi-call-to-donald-trump-is-consider-as-strategic-response-to-china/articleshow/76167941.cms
