ಟೋಕಿಯೋ: ಜಪಾನಿನ ಈ ನಗರದಲ್ಲಿ ಇನ್ನು ಮುಂದೆ ಕಸವೇ ಇರೋದಿಲ್ವಂತೆ...! 2020ರ ವೇಳೆಗೆ ಜಪಾನಿನ ಕಮಿಕಟ್ಸು ನಗರವನ್ನು ತ್ಯಾಜ್ಯಮುಕ್ತ ನಗರವಾಗಿ ಘೋಷಿಸಲು ಅಲ್ಲಿನ ಸರಕಾರ ಸಿದ್ಧತೆ ಮಾಡಿಕೊಂಡಿದೆ. ಈ ನಗರದಲ್ಲಿ ಉತ್ಪತ್ತಿಯಾಗುವ ತ್ಯಾಜ್ಯಗಳನ್ನು 45 ಪ್ರತ್ಯೇಕ ವಿಭಾಗಗಳಲ್ಲಿ ವರ್ಗೀಕರಣ ಮಾಡಿ ಪ್ರತಿಯೊಂದನ್ನೂ ಸಮರ್ಪಕವಾಗಿ ಮರುಬಳಕೆಗೆ ಯೋಗ್ಯವಾಗುವಂತೆ ರೀಸೈಕಲ್ ಮಾಡಲಾಗುತ್ತದೆ. ಪ್ಲಾಸ್ಟಿಕ್ ಅಥವಾ ಲೋಹ, ಕಾಗದ- ಇತ್ಯಾದಿ ಕಸಗಳನ್ನು ಮರು ಸಂಸ್ಕರಣೆ ಮಾಡಲಾಗುತ್ತದೆ. 2020ರ ವೇಳೆಗೆ '' ನಗರವಾಗಿ ಪರಿವರ್ತನೆಗೊಳ್ಳುವ ಯೋಜನೆಯನ್ನು ಕಮಿಕಟ್ಸು ನಗರಾಡಳಿತ ಹಾಕಿಕೊಂಡಿದೆ. ಈ ನಗರದ 1,500 ಮಂದಿ ನಿವಾಸಿಗಳು ಸ್ವಯಂ ಎಲ್ಲ ತ್ಯಾಜ್ಯಗಳನ್ನು ವಿಂಗಡಣೆ ಮಾಡಿಕೊಂಡು ಸ್ಥಳೀಯ ತ್ಯಾಜ್ಯ ಸಂಸ್ಕರಣಾ ಘಟಕಕ್ಕೆ ತಂದೊಪ್ಪಿಸುತ್ತಿದ್ದಾರೆ. ತಲೆದಿಂಬಿನಿಂದ ತೊಡಗಿ ಟೂಥ್ ಬ್ರಶ್ ವರೆಗೆ ಎಲ್ಲ ಬಗೆಯ ತ್ಯಾಜ್ಯಗಳನ್ನು ವರ್ಗೀಕರಿಸುವ ವ್ಯವಸ್ಥೆ ಇಲ್ಲಿದೆ. 2020ರ ವೇಳೆಗೆ ಎಲ್ಲ ತ್ಯಾಜ್ಯಗಳನ್ನು ಮರು ಸಂಸ್ಕರಣೆ ಮಾಡುವ ಮೂಲಕ ನಗರದಲ್ಲಿ ತ್ಯಾಜ್ಯವೇ ಉಳಿಯದಂತೆ ನೋಡಿಕೊಳ್ಳುವ ಗುರಿಯನ್ನು ಸ್ಥಳೀಯಾಡಳಿತ ಹೊಂದಿದೆ ಎಂದು ಎಎಫ್ಪಿ ವರದಿ ಮಾಡಿದೆ. ಪ್ಲಾಸ್ಟಿಕ್ ಚೀಲಗಳು ಮತ್ತು ಬಾಟಲಿಗಳಂತಹ ವಸ್ತುಗಳನ್ನು ನಿವಾಸಿಗಳು ಮರು ಸಂಸ್ಕರಣೆಗೆ ನೀಡುವ ಮುನ್ನ ತೊಳೆದು ಸ್ವಚ್ಛಗೊಳಿಸ ಬೇಕಿರುವುದು ಸ್ವಲ್ಪ ಸಂಕೀರ್ಣ ಪ್ರಕ್ರಿಯೆಯಾಗಿದೆ. ತ್ಯಾಜ್ಯ ವಿಂಗಡಣಾ ಪ್ರದೇಶದಲ್ಲಿ ಪ್ರತಿ ತ್ಯಾಜ್ಯ ವಿಭಾಗಗಳಿಗೆ ಪ್ರತ್ಯೇಕ ಲೇಬಲ್ ಸಹಿತ ಬಾಕ್ಸ್ಗಳನ್ನು ಇರಿಸಲಾಗಿದೆ. ಒಂದ್ಉ ತ್ಯಾಜ್ಯ ವಸ್ತುವಿನ ವಿವಿಧ ಭಾಗಗಳು ಬೇರೆ ಬೇರೆ ವರ್ಗೀಕರಣಕ್ಕೆ ಸೇರುವುದಾದರೆ ಅವುಗಳನ್ನು ಪ್ರತ್ಯೇಕಿಸಿ ಅದಕ್ಕಾಗಿಯೇ ಮೀಸಲಿಟ್ಟ ಕಂಟೈನರ್ ಗಳಿಗೆ ಹಾಕಬೇಕಾಗುತ್ತದೆ. ಒಂದು ಪ್ರಕರಣದಲ್ಲಿ, ವ್ಯಕ್ತಿಯೊಬ್ಬ ಒಂದು ಶೆಲ್ಫ್ ಅನ್ನು ರೀಸೈಕ್ಲಿಂಗ್ ಘಟಕಕ್ಕೆ ತಂದಿದ್ದ. ಅದರಿಂದ ಲೋಹ ಮತ್ತು ಮರದ ಭಾಗಗಳನ್ನು ಪ್ರತ್ಯೇಕಿಸಲು ಸುತ್ತಿಗೆಯನ್ನೂ ಹೊತ್ತುಕೊಂಡು ಬರಬೇಕಾಯಿತು. ಕಮಿಕಟ್ಸು ಈ ವರೆಗೆ ಯಾವತ್ತೂ 'ಶೂನ್ಯ ತ್ಯಾಜ್ಯ' ಅಭಿಯಾನ ನಡೆಸಿರಲಿಲ್ಲ. 2000ರಲ್ಲಿ ದಹನಕ್ರಿಯೆ ಸ್ಥಾವರಗಳಲ್ಲಿ ಒಂದು ನಿರ್ದಿಷ್ಟ ಮಾಲಿನ್ಯ ನಿಯಂತ್ರಣ ಮಾನದಂಡ ಅನುಸರಿಸದ ಕಾರಣ ತ್ಯಾಜ್ಯಗಳನ್ನು ಸುಡುವ ಬದಲು ಮರು ಸಂಸ್ಕರಣೆಗೆ ಈ ನಗರದ ಜನ ಒಲವು ತೋರಿದರು. 'ತ್ಯಾಜ್ಯಗಳನ್ನು ದಹಿಸಿದ ಬಳಿಕ ಮರು ಸಂಸ್ಕರಣೆ ಮಾಡಬಹುದು ಎಂದು ನಾವು ಯೋಚಿಸಿದ್ದೆವು. ಆದರೆ ಸುಡುವುದಕ್ಕಿಂತ ರೀಸೈಕಲ್ ಮಾಡುವುದೇ ಅಗ್ಗವಾಗುತ್ತದೆ' ಎಂದು ನಗರಾಡಳಿತದ ಆಧಿಕಾರಿ ಮಿಡೋರಿ ಸುಗಾ ಸುದ್ದಿಸಂಸ್ಥೆಗೆ ತಿಳಿಸಿದರು. ಪ್ರಸ್ತುತ ಈ ನಗರ ತನ್ನ ಒಟ್ಟು ತ್ಯಾಜ್ಯ 286 ಟನ್ಗಳಲ್ಲಿ ಶೇ 80ರಷ್ಟನ್ನು ರೀಸೈಕಲ್ ಮಾಡುತ್ತಿದೆ. ಶೀಘ್ರವೇ 'ಶೂನ್ಯ ತ್ಯಾಜ್ಯ'ದ ಕನಸು ನನಸಾಗುವ ಸಾಧ್ಯತೆಯಿದೆ ಎಂದು ಅವರು ತಿಳಿಸಿದರು. ಬಹುತೇಕ ಅಭಿವೃದ್ಧಿ ಹೊಂದಿದ ದೇಶಗಳಲ್ಲಿ ಒಬ್ಬ ವ್ಯಕ್ತಿ ಉತ್ಪಾದಿಸುವ ತ್ಯಾಜ್ಯಕ್ಕಿಂತ ಕಡಿಮೆ ತ್ಯಾಜ್ಯವನ್ನು ಉತ್ಪಾದಿಸುತ್ತಿದೆ. ಹಾಗಿದ್ದರೂ ಪ್ಲಾಸ್ಟಿಕ್ ತ್ಯಾಜ್ಯದ ಪ್ರಮಾಣ ಅಮೆರಿಕಕ್ಕಿಂತ ಸ್ವಲ್ಪವೇ ಕಡಿಮೆಯಿದೆ.
from India & World News in Kannada | VK Polls http://bit.ly/2JgHGj1
