ಲೀಡ್ಸ್: ಶಹೀನ್‌ ಅಫ್ರಿದಿ ಅವರ ಶಿಸ್ತಿನ ದಾಳಿಯ ಜತೆಗೆ ಬಾಬರ್‌ ಅಜಮ್‌ ಮತ್ತು ಇಮಾದ್‌ ವಾಸಿಮ್‌ ಅವರ ಹೊಣೆಗಾರಿಕೆಯುತ ಬ್ಯಾಟಿಂಗ್‌ ನೆರವಿನಿಂದ ತಂಡ ವಿಶ್ವಕಪ್‌ ಟೂರ್ನಿಯ ರೌಂಡ್‌ ರಾಬಿನ್‌ ಲೀಗ್‌ ಪಂದ್ಯದಲ್ಲಿ ಅಫಘಾನಿಸ್ತಾನ ವಿರುದ್ಧ ಎರಡು ಎಸೆತಗಳು ಬಾಕಿ ಇರುವಂತೆಯೇ 3 ವಿಕೆಟ್‌ಗಳ ರೋಚಕ ಗೆಲುವು ದಾಖಲಿಸಿ, ತನ್ನ ಸೆಮಿಫೈನಲ್ಸ್‌ ಹಂತವನ್ನು ಜೀವಂತವಾಗಿರಿಸಿಕೊಂಡಿದೆ. ಇಲ್ಲಿನ ಹೆಡಿಂಗ್ಲೆ ಕ್ರೀಡಾಂಗಣದಲ್ಲಿ ಶನಿವಾರ ನಡೆದ ಪಂದ್ಯದಲ್ಲಿ ಟಾಸ್‌ ಗೆದ್ದು ಮೊದಲು ಬ್ಯಾಟ್‌ ಮಾಡಿದ ಆಫ್ಘನ್‌ ನಿಗದಿತ 50 ಓವರ್‌ಗಳಲ್ಲಿ 9 ವಿಕೆಟ್‌ ನಷ್ಟಕ್ಕೆ 227 ರನ್‌ ಕಲೆಹಾಕಿತು. ಗುರಿ ಬೆನ್ನಟ್ಟಿದ ಪಾಕಿಸ್ತಾನ 49.4 ಓವರ್‌ಗಳಲ್ಲಿ 7 ವಿಕೆಟ್‌ ಕಳೆದುಕೊಂಡು 230 ರನ್‌ ಗಳಿಸಿತ್ತು. ಪಾಕ್‌ ಪರ ಇಮಾದ್‌ ವಾಸಿಮ್‌ (49*) ಮತ್ತು ಬಾಬರ್‌ ಅಜಮ್‌ (45) ಜವಾಬ್ದಾರಿಯುತ ಬ್ಯಾಟಿಂಗ್‌ ನಡೆಸಿ ತಂಡವನ್ನು ಗೆಲುವಿನ ದಡ ಸೇರಿಸಿದರು. ಇದಕ್ಕೂ ಮುನ್ನ ಪಾಕ್‌ ಬೌಲರ್‌ಗಳಿಗೆ ಸಂಪೂರ್ಣ ಪ್ರಭುತ್ವ ಸಾಧಿಸಲು ಸಾಧ್ಯವಾಗದಿದ್ದರೂ ವೇಗಿ ಶಹೀನ್‌ ಅಫ್ರಿದಿ ಮಾತ್ರ ನಾಲ್ಕು ವಿಕೆಟ್‌ ಉರುಳಿಸುವ ಮೂಲಕ ಎದುರಾಳಿ ತಂಡಕ್ಕೆ ಕಡಿವಾಣ ಹಾಕಿದರು. ಬಿಸಿಲಿನ ತಾಪಕ್ಕೆ ಹೊಂದಿಕೊಳ್ಳಲು ತಿಣುಕಾಡಿದ ಆಫ್ಘನ್‌ ಬ್ಯಾಟ್ಸ್‌ಮನ್‌ಗಳು ಕೆಲವು ಕೆಟ್ಟ ಹೊಡೆತಗಳಿಗೆ ಯತ್ನಿಸಿ ನಿಯಮಿತವಾಗಿ ವಿಕೆಟ್‌ ಚೆಲ್ಲಿದರು. ಇದರ ನಡುವæಯೂ ಅಸ್ಘರ್‌ ಅಫ್ಘನ್‌ (42 ರನ್‌, 35 ಎಸೆತ) ಮತ್ತು ನಜೀಬುಲ್ಲಾ ಝದ್ರಾನ್‌ (42 ರನ್‌, 54 ಎಸೆತ) ಅಫಘಾನಿಸ್ತಾನ ಪರ ಗರಿಷ್ಠ ರನ್‌ ಕಲೆಹಾಕಿದರು. ಪಾಕಿಸ್ತಾನ ಪರ ಕರಾರುವಾಕ್‌ ದಾಳಿ ಸಂಘಟಿಸಿದ ಅಫ್ರಿದಿ, ತನ್ನ ಪಾಲಿನ ಹತ್ತು ಓವರ್‌ಗಳಲ್ಲಿ 47 ರನ್‌ ಬಿಟ್ಟುಕೊಟ್ಟು 4 ವಿಕೆಟ್‌ಗಳನ್ನು ತಮ್ಮ ಖಾತೆಗೆ ಸೇರಿಸಿಕೊಂಡರೆ, ಇಮಾದ್‌ ವಾಸಿಮ್‌ ಮತ್ತು ವಹಾಬ್‌ ರಿಯಾಜ್‌ ತಲಾ 2 ವಿಕೆಟ್‌ ತಮ್ಮದಾಗಿಸಿಕೊಂಡರು. ಸಂಕ್ಷಿಪ್ತ ಸ್ಕೋರ್‌ ಅಫಘಾನಿಸ್ತಾನ: 50 ಓವರ್‌ಗಳಲ್ಲಿ 9 ವಿಕೆಟ್‌ಗೆ 227 (ಅಸ್ಘರ್‌ ಅಫ್ಘನ್‌ 42, ನಜೀಬುಲ್ಲಾ ಝದ್ರಾನ್‌ 42, ರಹಮತ್‌ ಶಾ 35; ಶಹೀನ್‌ ಅಫ್ರಿದಿ 47ಕ್ಕೆ 4, ವಹಾಬ್‌ 29ಕ್ಕೆ 2, ಇಮಾದ್‌ ವಾಸಿಮ್‌ 48ಕ್ಕೆ 2). ಪಾಕಿಸ್ತಾನ: 49.4 ಓವರ್‌ಗಳಲ್ಲಿ 7 ವಿಕೆಟ್‌ಗೆ 230 (ಬಾಬರ್‌ 45, ಇಮಾದ್‌ 49*; ನಬಿ 23ಕ್ಕೆ 2, ಮುಜೀಬ್‌ 34ಕ್ಕೆ 2).
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2KMutkO
