ಲಂಡನ್‌: ತಂಡದ ನಾಯಕ ಸರ್ಫರಾಜ್‌ ಅಹಮದ್‌ಗೆ ಸೆಮಿಫೈನಲ್ಸ್‌ಗೆ ದಾಂಗುಡಿಯಿಟ್ಟು ವಿಶ್ವಕಪ್‌ನಲ್ಲಿ ದಂಡಯಾತ್ರೆ ಮುಂದುವರಿಸುವ ಬಯಕೆ. ಆದರೆ, ಈ ಪಯಣದಲ್ಲಿ ಸಣ್ಣ ತಪ್ಪಿಗೂ ದೊಡ್ಡ ಬೆಲೆ ಕಟ್ಟಬೇಕಾಗುತ್ತದೆ. ಪಾಕ್‌ ತಂಡ ಇನ್ನು ಅಫಘಾನಿಸ್ತಾನ ಮತ್ತು ಬಾಂಗ್ಲಾದೇಶ ವಿರುದ್ಧ ಮಾತ್ರ ಆಡಲು ಬಾಕಿ. ಸರ್ಫರಾಜ್‌ ಬಳಗ ತನ್ನ ಸಾಮರ್ಥ್ಯ‌ಕ್ಕೆ ತಕ್ಕಂತೆ ಆಡಿದಲ್ಲಿ ಈ ತಂಡಗಳನ್ನು ಮಣಿಸುವುದು ಕಷ್ಟವೇನಲ್ಲ. ಆದರೆ, ಮುಗಿಲೆತ್ತರಕ್ಕೇರಿ, ಧುತ್ತನೆ ಪಾತಾಳ ಸೇರುವ ಪಾಕ್‌ನ ಆಟದ ಬಗ್ಗೆ ಗೊತ್ತಿರುವ ಎಲ್ಲರ ಮನದಲ್ಲೂ ಸಣ್ಣ ಅನುಮಾನವೊಂದು ಇದ್ದೇ ಇರುತ್ತದೆ. ಈ ಎಲ್ಲ ಕಾರಣಗಳಿಂದ ಇಂದು ನಡೆಯುವ ಪಾಕಿಸ್ತಾನ ಹಾಗೂ ಅಫಘಾನಿಸ್ತಾನ ಪಂದ್ಯಕ್ಕೆ ಪ್ರಾಮುಖ್ಯತೆ ಬಂದಿದೆ. ಆಡಿದ ಏಳೂ ಪಂದ್ಯಗಳಲ್ಲಿ ಸೋತಿರುವ ಆಫ್ಘನ್‌ ತಂಡಕ್ಕೆ ಇದು ಕೇವಲ ಒಂದು ಲೀಗ್‌ ಪಂದ್ಯ. ಆದರೆ, ಪಾಕಿಸ್ತಾನಕ್ಕಿದು 'ಮಾಡು ಇಲ್ಲವೇ ಮಡಿ' ಹೋರಾಟದ ಪ್ರಬಲ ಅಧ್ಯಾಯ. ಭಾರತದ ವಿರುದ್ಧ ಸೋಲಿನ ಬಳಿಕ ಪಾಕ್‌ ಆಟಗಾರರು ಚೇತರಿಸಿಕೊಂಡಿದ್ದಾರೆ. ಈ ಹಿಂದಿನ ನ್ಯೂಜಿಲೆಂಡ್‌ ವಿರುದ್ಧದ ಪಂದ್ಯದಲ್ಲಿ ಬಾಬರ್‌ ಅಜಂ (101) ಹಾಗೂ ಶಾಹಿನ್‌ ಅಫ್ರಿದಿ (28/3) ನೀಡಿದ ಪ್ರದರ್ಶನ, ಅದರಲ್ಲೂ ಹ್ಯಾರಿಸ್‌ ಸೊಹೈಲ್‌ ಕಳೆದೆರಡು ಪಂದ್ಯಗಳಲ್ಲಿ ತೋರಿದ ದಿಟ್ಟತನ ತಂಡದ ಪಾಲಿಗೆ ಖಂಡಿತಾ ವರವಾಗಿದೆ. ಇದು ಪುನರಾವರ್ತನೆಯಾದರೆ ಪಾಕ್‌ ಗೆಲುವು ಸಲೀಸು. ಏತನ್ಮಧ್ಯೆ, ಆಲ್‌ರೌಂಡ್‌ ಪ್ರದರ್ಶನದ ನಡುವೆಯೂ ಅಫಘಾನಿಸ್ತಾನದ ಆಟಗಾರರಿಗೆ ಗೆಲುವಿನ ರುಚಿ ಕಾಣಲು ಸಾಧ್ಯವಾಗುತ್ತಿಲ್ಲ. ಚೆನ್ನಾಗಿ ಆಡಿದರೂ, ಅನುಭವದ ಕೊರತೆಯಿಂದ ಪಂದ್ಯಗಳನ್ನು ಕೈಚೆಲ್ಲುತ್ತಲೇ ಹೋಗುತ್ತಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2IYkya4
