ಹೊಸದಿಲ್ಲಿ: ತಾಕತ್ತಿದ್ದರೆ ನನ್ನ ಸರಕಾರವನ್ನು ಉರುಳಿಸಿ ನೋಡೋಣ ಎಂದು ಮಧ್ಯ ಪ್ರದೇಶದ ಮುಖ್ಯಮಂತ್ರಿ ಕಮಲನಾಥ್ ಅವರು ಬಿಜೆಪಿಗೆ ಸವಾಲು ಹಾಕಿದ್ದಾರೆ. ಕಾರ್ಯಕ್ರಮವೊಂದರಲ್ಲಿ ಮಾತನಾಡುತ್ತಿದ್ದ ಕಮಲ್‌ನಾಥ್ ಅವರಿಗೆ ರಾಜ್ಯದ ಮಾಜಿ ಮುಖ್ಯಮಂತ್ರಿ ಶಿವರಾಜ್ ಸಿಂಗ್ ಚೌಹಾಣ್ ಮತ್ತು ನಾಯಕ ಕೈಲಾಸ್ ವಿಜಯ ವರ್ಗೀಯ ಅವರು ಯಾವುದೇ ಕ್ಷಣದಲ್ಲಿ ಕೈ ಸರಕಾರವನ್ನು ಉರುಳಿಸಬಲ್ಲೆವು ಎಂದು ಹೇಳಿದ್ದಕ್ಕೆ ಪ್ರತಿಕ್ರಿಯೆ ಕೇಳಲಾಯಿತು. ಅದಕ್ಕುತ್ತರಿಸಿದ ಕಮಲ್‌ನಾಥ್, ಅವರೇನು ನಮ್ಮ ಸರಕಾರದ ಮೇಲೆ ಕರುಣೆ ತೋರುತ್ತಿದ್ದಾರೆಯೇ? ಸರಕಾರ ಉರುಳಿಸಬಲ್ಲೆವು ಎಂದು ಹೇಳುತ್ತ ಕುಳಿತುಕೊಳ್ಳಬಾರದು. ಅವರೇಕೆ ದೊಡ್ಡ ದೊಡ್ಡ ಮಾತನ್ನಾಡುತ್ತಿದ್ದಾರೆ. ತಾಕತ್ತಿದ್ದರೆ ನಮ್ಮ ಸರಕಾರವನ್ನುರುಳಿಸುವ ಪ್ರಯತ್ನ ಮಾಡಬೇಕು, ಎಂದು ಹೇಳಿದ್ದಾರೆ. ಕಾಂಗ್ರೆಸ್‌ನ್ನು ಗೆಲ್ಲಿಸಿ ರಾಜ್ಯದ ಜನರು ತಮ್ಮ ಆಯ್ಕೆಯನ್ನು ಸ್ಪಷ್ಟ ಪಡಿಸಿದ್ದಾರೆ. ಸೋಲಿಂದ ಕಂಗೆಟ್ಟಿರುವ ಕಾರ್ಯಕರ್ತರ ಮನೋಬಲವನ್ನು ಹೆಚ್ಚಿಸಲು ಬಿಜೆಪಿ ನಾಯಕರು ಇಂತಹ ಮಾತುಗಳನ್ನಾಡುತ್ತಾರೆ ಎಂದು ಕಮಲ್‌ನಾಥ್ ಹೇಳಿದ್ದಾರೆ. ಲೋಕಸಭಾ ಚುನಾವಣೆಯಲ್ಲಿ ರಾಜ್ಯದಲ್ಲಿ ಕಾಂಗ್ರೆಸ್‌ನ ಕಳಪೆ ಪ್ರದರ್ಶನದ ಬಗ್ಗೆ ಪ್ರತಿಕ್ರಿಯಿಸಿದ ಅವರು, ಸಾರ್ವತ್ರಿಕ ಚುನಾವಣೆಯಲ್ಲಿ ಜನರು ನಮ್ಮನ್ನು ತಿರಸ್ಕರಿಸಿರುವುದನ್ನು ನಾನು ಒಪ್ಪಿಕೊಳ್ಳುತ್ತೇನೆ. ನಮ್ಮ ಮಾತನ್ನು ನಾವು ಜನರಿಗೆ ಮನವರಿಕೆ ಮಾಡಿಸುವುಲ್ಲಿ ವಿಫಲರಾದೆವು. ಚುನಾವಣೆ ರಾಷ್ಟ್ರೀಯವಾದ ವಿಷಯದ ಮೇಲೆ ಕೇಂದ್ರೀಕೃತವಾಯಿತು ಎಂದಿದ್ದಾರೆ. 231 ವಿಧಾನಸಭಾ ಸೀಟುಗಳಿರುವ ಮಧ್ಯ ಪ್ರದೇಶದಲ್ಲಿ ಕಾಂಗ್ರೆಸ್‌ನ 114 ಮತ್ತು ಬಿಜೆಪಿಯ 108 ಶಾಸಕರಿದ್ದಾರೆ. ಬಿಎಸ್‌ಪಿ 1 , ಸಮಾಜವಾದಿ ಪಕ್ಷದ 2 ಮತ್ತು 4 ಪಕ್ಷೇತರ ಶಾಸಕರ ಸಮರ್ಥನೆ ಪಡೆದುಕೊಂಡು ಸರಕಾರ ರಚಿಸಿದೆ.
from India & World News in Kannada | VK Polls https://ift.tt/2XeZ4cV
