ಎಜ್‌ಬಾಸ್ಟನ್‌: ಭಾರತ ಕ್ರಿಕೆಟ್ ತಂಡಕ್ಕೆ ನಲವತ್ತನಾಲ್ಕು ವರ್ಷಗಳ ವಿಶ್ವಕಪ್‌ ಇತಿಹಾಸದಲ್ಲಿ ಬಹುಶಃ ಇಂಥದ್ದೊಂದು ಸುಸಂದರ್ಭ ಎದುರಾಗಿರಲಿಲ್ಲ. ಇದಕ್ಕೆ ಭಾರತೀಯ ಬಳಗ ಬ್ರಿಟಿಷರಿಗೆ ಧನ್ಯವಾದ ಹೇಳಲೇಬೇಕಿದೆ. ಅಖಂಡ ಭಾರತ ವಿಭಜನೆಗೊಂಡು 7 ದಶಕಗಳ ಬಳಿಕ, ಭೌಗೋಳಿಕವಾಗಿಯಲ್ಲದಿದ್ದರೂ ಭಾವನಾತ್ಮಕವಾಗಿ ಭಾರತ ಮತ್ತು ಪಾಕಿಸ್ತಾನವನ್ನು ಆಂಗ್ಲರು ಮತ್ತೆ ಒಂದುಗೂಡಿಸುತ್ತಿದ್ದಾರೆ(!). ವಿರಾಟ್‌ ಕೊಹ್ಲಿ ನೇತೃತ್ವದ ಭಾರತ ಮತ್ತು ಸರ್ಫರಾಜ್‌ ಅಹಮದ್‌ ಸಾರಥ್ಯದ ಪಾಕಿಸ್ತಾನ ತಂಡಗಳ ನಡುವೆ ಭಾನುವಾರ ಎಜ್‌ಬಾಸ್ಟನ್‌ನಲ್ಲಿ ನಡೆಯಲಿರುವ ವಿಶ್ವಕಪ್‌ ಪಂದ್ಯದ ವೇಳೆ ಪಾಕಿಸ್ತಾನೀಯರು 'ಇಂಡಿಯಾ, ಇಂಡಿಯಾ' ಎಂದು ಕೊಹ್ಲಿ ಪಡೆಗೆ ಬೆಂಬಲ ವ್ಯಕ್ತಪಡಿಸುವುದರಲ್ಲಿ ಅನುಮಾನವೇ ಇಲ್ಲ. ಅಷ್ಟೇ ಅಲ್ಲ; ಶ್ರೀಲಂಕಾ ಮತ್ತು ಬಾಂಗ್ಲಾದೇಶದ ಕ್ರಿಕೆಟ್ ಅಭಿಮಾನಿಗಳೂ ಪಾಕ್‌ ಅಭಿಮಾನಿಗಳ ದನಿಗೆ ದನಿಗೂಡಿಸಲಿದ್ದಾರೆ. ಹೆಚ್ಚೂಕಡಿಮೆ 72 ವರ್ಷಗಳ ಹಿಂದೆ ಇದೇ ರೀತಿ ನೆರೆಹೊರೆಯವರು ಒಗ್ಗಟ್ಟು ಪ್ರದರ್ಶಿಸಿದ್ದರು. ಇದೀಗ ಅಂಥದ್ದೇ ಒಗ್ಗಟ್ಟಿನ ಪ್ರದರ್ಶನವಾಗಲಿದೆ. ಅಂದು ಬ್ರಿಟಿಷರನ್ನು ಭಾರತದಿಂದ ಓಡಿಸಲು ಕೈಗೊಂಡ ಒಗ್ಗಟ್ಟು. ಈಗಿನದು ಇಂಗ್ಲೆಂಡ್‌ ತಂಡವನ್ನು ವಿಶ್ವಕಪ್‌ ಸೆಮಿಫೈನಲ್‌ ಸ್ಪರ್ಧೆಯಿಂದ ಹೊರಗಟ್ಟುವ ಉದ್ದೇಶದ್ದು. ನಾಲ್ಕು ಸೆಮಿಫೈನಲ್‌ ಸ್ಥಾನಗಳಲ್ಲಿ ಆಸ್ಪ್ರೇಲಿಯಾ, ನ್ಯೂಜಿಲೆಂಡ್‌ ಮತ್ತು ಭಾರತಕ್ಕೆ ಮೂರು ಸ್ಥಾನ ಬಹುತೇಕ ಖಾತರಿಯಾಗಿವೆ. ಇನ್ನೊಂದು ಸ್ಥಾನಕ್ಕೆ ಇಂಗ್ಲೆಂಡ್‌, ಪಾಕಿಸ್ತಾನ, ಬಾಂಗ್ಲಾದೇಶ ಮತ್ತು ಶ್ರೀಲಂಕಾ ನಡುವೆ ಪೈಪೋಟಿ ಏರ್ಪಟ್ಟಿದೆ. ಪಾಕಿಸ್ತಾನ 8 ಪಂದ್ಯಗಳಲ್ಲಿ 9 ಅಂಕ ಹೊಂದಿದ್ದರೆ, ಬಾಂಗ್ಲಾದೇಶ (7 ಪಂದ್ಯ) ಮತ್ತು ಶ್ರೀಲಂಕಾ (7 ಪಂದ್ಯ) ತಲಾ 7 ಅಂಕ ಹೊಂದಿವೆ. ಇಂಗ್ಲೆಂಡ್‌ 7 ಪಂದ್ಯಗಳಲ್ಲಿ 8 ಅಂಕ ಕಲೆಹಾಕಿದೆ. ಬಲಿಷ್ಠ ಬ್ಯಾಟಿಂಗ್‌ ಕ್ರಮಾಂಕ ಹೊಂದಿರುವ ಇಂಗ್ಲೆಂಡ್‌ ಅಪಾಯಕಾರಿ ತಂಡವೆಂಬುದರಲ್ಲಿ ಎರಡು ಮಾತೇ ಇಲ್ಲ. ಅಕಸ್ಮಾತ್‌ ಭಾನುವಾರದ ಪಂದ್ಯದಲ್ಲಿ ಇಂಗ್ಲೆಂಡ್‌ ತಂಡ ಗೆದ್ದರೆ 10 ಅಂಕಗಳೊಂದಿಗೆ ಸೆಮಿಫೈನಲ್‌ಗೆ ಇನ್ನಷ್ಟು ಹತ್ತಿರವಾಗಲಿದೆ. ಸೋತರೆ ಸೆಮಿಫೈನಲ್ಸ್‌ ಸ್ಪರ್ಧೆಯಿಂದ ಬಹುತೇಕ ಹೊರಬೀಳಲಿದೆ. ಆಗ ತಮಗೆ ಅವಕಾಶದ ಬಾಗಿಲು ತೆರೆಯಬಹುದು ಎಂಬುದು ಏಷ್ಯಾದ ಮೂರು ತಂಡಗಳ ಲೆಕ್ಕಾಚಾರ. ಕೊಹ್ಲಿ ಪಡೆಗೆ ಪರೋಕ್ಷ ಬೆಂಬಲ ನೀಡುತ್ತಿರುವುದು ಇದೇ ಕಾರಣಕ್ಕಾಗಿ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2XbAsS3
