ಲಖನೌ: ವಾರ್ಷಿಕ 60-70 ಲಕ್ಷ ರೂಪಾಯಿ ಆದಾಯ ಹೊಂದಿರುವ ಉತ್ತರ ಪ್ರದೇಶದ ಆಲಿಗಢದಲ್ಲಿ ಕಚೋರಿ ಮಾರುವ ಮುಖೇಶ್ ಕುಮಾರ್ ವಾಸಿಸುವ ನಿವಾಸದ ಬಗ್ಗೆ ಕೇಳಿದರೆ ಆಶ್ಚರ್ಯವಾಗುತ್ತದೆ. ಹೌದು, ಲಕ್ಷಾಂತರ ರೂಪಾಯಿ ಸಂಪಾದನೆ ಇರುವ ಮುಖೇಶ್ ಅವರು ಕಿರಿದಾದ ರಸ್ತೆಯಲ್ಲಿ ದೂಳು, ಕಸದಿಂದ ಕೂಡಿರುವ ಕೇವಲ 225 ಚದರ ಅಡಿಯ ಶಿಥಿಲಗೊಂಡ ಮನೆಯಲ್ಲಿ ವಾಸವಾಗಿದ್ದಾರೆ. ಮುಖೇಶ್ ನಿವಾಸಕ್ಕೆ ಹೋಗುವ ರಸ್ತೆ ತುಂಬಾನೇ ಕಿರಿದಾಗಿದ್ದು, ಒಟ್ಟಿಗೆ ಮೂವರು ಜನ ನಡೆದು ಹೋಗಲು ಸಹ ಸಾಧ್ಯವಾಗುವುದಿಲ್ಲ. ಇನ್ನೂ ಇವರ ನಿವಾಸಕ್ಕೆ ಭೇಟಿ ನೀಡುವ ಜನರಿಗೆ ಕುರಲು ನಾಲ್ಕೈದು ಪ್ಲ್ಯಾಸ್ಟಿಕ್ ಕುರುಚಿಗಳನ್ನು ಬಿಟ್ಟರೆ, ಹಳೆಯ ಟಿವಿಎಸ್ ಮೊಪೆಡ್‌ ವಾಹನ ಹೊಂದಿದ್ದಾರೆ. ನಗರದ ಗುಲಾರ್ ರಸ್ತೆಯಲ್ಲಿರುವ ಮುಖೇಶ್ ನಿವಾಸ್, ಅವರ ಸುಪ್ರಸಿದ್ಧ ಕಚೋರಿ ಅಂಗಡಿಯಿಂದ ಕೇವಲ ಒಂದು ಕಿ.ಮೀ ಅಂತರದಲ್ಲಿದೆ. ವಾರದ ಹಿಂದಷ್ಟೇ ಅಧಿಕಾರಿಗಳು ಈ ಮನೆ ಮೇಲೆ ದಾಳಿ ನಡೆಸಿದ್ದರು. 12 ವರ್ಷದ ಹಿಂದೆ ಮುಖೇಶ್ ಕುಮಾರ್ ಅವರ ತಂದೆ ಮಖನ್ ಲಾಲ್ (75) ಅವರು 4/4 ಚದರ ಅಡಿಯ ಅಂಗಡಿಯನ್ನು ಬಾಡಿಗೆಗೆ ಪಡೆದು ಕಚೋರಿ ವ್ಯಾಪಾರ ಪ್ರಾರಂಭಿಸಿದ್ದರು. ಆದರೆ, ಜಿಎಸ್‌ಟಿ ಅಧಿಕಾರಿಗಳು ದಾಳಿ ನಡೆಸಿದ ಬಳಿಕ ಈ ಪುಟ್ಟ ಅಂಗಡಿ ಸಾಮಾಜಿಕ ಮಾಧ್ಯಮಗಳಲ್ಲಿ ಭಾರಿ ಸದ್ದು ಮಾಡುತ್ತಿದೆ. ನನಗೆ ಮೂವರು ಮಕ್ಕಳಿದ್ದು, ಪ್ರತಿಯೊಬ್ಬರು ಸ್ವಂತ ಮನೆ ಹೊಂದಿದ್ದಾರೆ. ಆದರೆ, ಆ ಮನೆಗಳು ಕೂಡ ನನ್ನ ಮನೆಯಂತೆ ಚಿಕ್ಕದಾಗಿವೆ ಎಂದು ಮಖನ್ ಲಾಲ್ ಹೇಳಿಕೊಂಡಿದ್ದಾರೆ. ಇವರು ಜಿಎಸ್‌ಟಿ ಅಡಿಯಲ್ಲಿ ನೋಂದಣಿ ಮಾಡಿರಲಿಲ್ಲ. ಇದುವರೆಗೆ ಯಾವುದೇ ತೆರಿಗೆ ಪಾವತಿಸಿರಲಿಲ್ಲ ಎಂದು ಮುಖೇಶ್‌ಗೆ ತೆರಿಗೆ ಇಲಾಖೆ ನೋಟಿಸ್‌ ನೀಡಿತ್ತು. ಜಿಎಸ್‌ಟಿ ನಿಯಮದ ಪ್ರಕಾರ, ಯಾವುದೇ ವ್ಯಾಪಾರದಲ್ಲಾಗಲೀ 40 ಲಕ್ಷ ರೂ. ಮತ್ತು ಅದಕ್ಕೂ ಮೀರಿದ ವಹಿವಾಟು ಇದ್ದಲ್ಲಿ ಜಿಎಸ್‌ಟಿ ನೋಂದಣಿ ಕಡ್ಡಾಯ. ಸಿದ್ಧಪಡಿಸಿದ ಆಹಾರ ಪದಾರ್ಥಗಳಿಗೆ ಶೇ.5ರಷ್ಟು ತೆರಿಗೆ ಅನ್ವಯವಾಗುತ್ತದೆ. ಸದ್ಯದ ನಿಯಮಗಳ ಪ್ರಕಾರ, ಮುಕೇಶ್‌ ಅವರು ಜಿಎಸ್‌ಟಿ ನೋಂದಣಿ ಮಾಡಿಸಬೇಕು ಹಾಗೂ ಒಂದು ವರ್ಷದ ತೆರಿಗೆಯನ್ನು ಪಾವತಿಸಬೇಕಾಗಿದೆ.
from India & World News in Kannada | VK Polls https://ift.tt/2XJaeeg
