: ಕೌಟುಂಬಿಕ ನ್ಯಾಯಾಲಯದಲ್ಲಿ ಕೆಲಸ ಮಾಡುತ್ತಿದ್ದ ಆ ಆಪ್ತ ಸಮಾಲೋಚಕರು ಹಿಂದೆಂದು ಕೂಡ ಇಂತಹ ವಿಲಕ್ಷಣ ಪ್ರಕರಣವನ್ನು ಕಂಡಿರಲಿಲ್ಲ. ಪತ್ನಿಯೊಂದಿಗೆ ಬಂದಿದ್ದ ಪತಿ ಮಹಾಶಯ ಆಕೆ ಕುಡಿಯಲು ಆರಂಭಿಸಬೇಕು, ಅದಕ್ಕಾಗಿ ಆಕೆಯನ್ನು ಕೌನ್ಸೆಲಿಂಗ್‌ಗೆ ಕರೆದುಕೊಂಡು ಬಂದಿದ್ದೇನೆ ಎಂದಾಗ, ಅಲ್ಲಿದ್ದವರೆಲ್ಲ ಸುಸ್ತೋ ಸುಸ್ತು. ಮಧ್ಯಪ್ರದೇಶದಲ್ಲಿ ಈ ವಿಚಿತ್ರ ಪ್ರಸಂಗ ನಡೆದಿದ್ದು, ಮಧ್ಯಮ ವರ್ಗದ ಆ ದಂಪತಿಯದು 10 ವರ್ಷಗಳ ದಾಂಪತ್ಯ. ಪತಿಗೆ ಇರುವ ಏಕೈಕ ಬಯಕೆ ಎಂದರೆ ತನ್ನ ಪತ್ನಿ ಮದ್ಯ ಸೇವಿಸಬೇಕೆಂಬುದು. ಮನೆಯಲ್ಲಿನ ಇತರ ಸದಸ್ಯರೆಲ್ಲ ಮದ್ಯ ಸೇವಿಸುತ್ತಾರೆ. ಪತ್ನಿ ಕೂಡ ಮದ್ಯ ಸೇವನೆಯನ್ನು ಆರಂಭಿಸಬೇಕು. ಕನಿಷ್ಠ ಪಕ್ಷ ವಿಶೇಷ ಸಮಾರಂಭ, ಔತಣಕೂಟಗಳಲ್ಲಾದರೂ ಆಕೆ ಕುಡಿಯಬೇಕು ಎಂಬುದು ಆತನ ಹೆಬ್ಬಯಕೆ. ಈ ರೀತಿಯ ಪ್ರಸಂಗವನ್ನು ನಾನು ನೋಡಿರುವುದು ಇದೇ ಮೊದಲು. ಅವರದೇನು ಬಹಳ ಶ್ರೀಮಂತ ಕುಟುಂಬವಲ್ಲ. ಆತನ ತಾಯಿ. ತಂದೆ, ಸಹೋದರ, ಸಹೋದರಿಯರು, ಚಿಕ್ಕಮ್ಮ, ಅತ್ತೆ, ಸಹೋದರ ಸಂಬಂಧಿಗಳು ಸಾಮಾಜಿಕ ಕಾರ್ಯಕ್ರಮಗಳಲ್ಲಿ ಕುಡಿಯುತ್ತಾರೆ. ಪತ್ನಿ ಮಾತ್ರ ಕುಡಿಯುವುದಿಲ್ಲ. ಮದುವೆಯಾದ ಆರಂಭದ ದಿನಗಳಲ್ಲಿ ಆಕೆ ಮದ್ಯದಿಂದ ದೂರವಿರುವುದು ಆತನಿಗೆನೂ ಬೇಸರವೆನಿಸಲಿಲ್ಲ. ಆದರೆ ನಿಧಾನವಾಗಿ ಕುಡಿ ಎಂದು ಕುಟುಂಬದ ಸದಸ್ಯರು ಒತ್ತಾಯಿಸಿದ್ದಾರೆ. ಆದರಾಕೆ ನಿರಾಕರಿಸಿದಾಗ ಪತಿ- ಪತ್ನಿ ನಡುವೆ ಜಗಳ ಆರಂಭವಾಗಿದೆ, ಎಂದು ಆಪ್ತ ಸಮಾಲೋಚಕಿ ಶೈಲ್ ಆವಸ್ತಿ ಹೇಳುತ್ತಾರೆ. ದಂಪತಿಗೆ ಮೂವರು ಮಕ್ಕಳಿದ್ದು, 9,6 ಮತ್ತು 4 ವರ್ಷ ವಯಸ್ಸಿನವರಾಗಿದ್ದಾರೆ. ಮದುವೆಯಾದ ಕೆಲ ತಿಂಗಳಲ್ಲೇ ಇಬ್ಬರ ನಡುವೆ ಮದ್ಯ ಕುಡಿಯುವ ವಿಚಾರಕ್ಕೆ ಜಗಳ ಆರಂಭವಾಗಿದ್ದು , ಅದು ತಾರಕಕ್ಕೇರಿದಾಗ ಪತ್ನಿ ಮಕ್ಕಳ ಸಮೇತ ತವರಿಗೆ ಹೋಗುತ್ತಿದ್ದಳು. ಮದ್ಯ ಕುಡಿಯುವುದಿರಲಿ, ಮುಟ್ಟಲು ಸಹ ಆಕೆ ಒಪ್ಪಿಕೊಳ್ಳುತ್ತಿರಲಿಲ್ಲ, ಕಾರಣ ಆಕೆಯ ಮನೆಯಲ್ಲಿ ಯಾರು ಕೂಡ ಮಾಡುತ್ತಿರಲಿಲ್ಲ. ಪತಿಯ ಮನೆಯಲ್ಲದು ಮೊದಲಿನಿಂದಲೂ ರೂಢಿಸಿಕೊಂಡು ಬಂದಿದ್ದರಿಂದ, ಆಕೆ ಎಂದಿಗೂ ಸಹ ಕುಡಿಯಬೇಡ ಎಂದವನನ್ನು ತಡೆಯಲಿಲ್ಲ. ಆದರೆ ಮನೆಯ ಸದಸ್ಯರು ಕುಡಿ ಎಂದು ಆಕೆಗೆ ಒತ್ತಾಯ ಮಾಡುವುದನ್ನು ಮಾತ್ರ ಬಿಡಲಿಲ್ಲ. ಆಕೆ ನಿರಾಕರಿಸಿದಾಗ ಜಗಳವಾಗುತ್ತಿತ್ತು. ಮಹಿಳೆ ಇಚ್ಛೆಗೆ ವಿರುದ್ಧವಾಗಿ ಆಕೆಗೆ ಒತ್ತಾಯಪೂರ್ವಕವಾಗಿ ಮದ್ಯ ಕುಡಿಸುವ ಪ್ರಯತ್ನ ನಿಲ್ಲಿಸಿ ಎಂದು ಆಪ್ತ ಸಮಾಲೋಚಕರು ಮನವರಿಕೆ ಮಾಡಿಸುವ ಪ್ರಯತ್ನ ಮಾಡುತ್ತಿದ್ದಾರೆ.
from India & World News in Kannada | VK Polls https://ift.tt/2X79Amc
