ಹೊಸದಿಲ್ಲಿ: ನೆರೆಮನೆಯಲ್ಲಿ ವಾಸಿಸುತ್ತಿದ್ದ ವಿವಾಹಿತ ಮಹಿಳೆಯನ್ನು ಮದುವೆಯಾಗುವ ದುರುದ್ದೇಶ ಹೊಂದಿದ್ದ ವ್ಯಕ್ತಿಯೊಬ್ಬ ಆಕೆಯ ಪತಿಯನ್ನೇ ಕೊಲೆಗೈದ ಅಮಾನವೀಯ ಘಟನೆ ರಾಷ್ಟ್ರ ರಾಜಧಾನಿಯಲ್ಲಿ ನಡೆದಿದೆ. ಆರೋಪಿಯನ್ನು ಕುಲ್ಕೇಶ್ ಎಂದು ಗುರುತಿಸಲಾಗಿದ್ದು, ಆತ ಕಾರ್ಖಾನೆಯೊಂದರಲ್ಲಿ ಕೆಲಸ ಮಾಡುತ್ತಿದ್ದ. ಆತನಿಂದ ಕೊಲೆಯಾದ ದಲ್ಬಿರ್ ಕೂಡ ಅದೇ ಕಾರ್ಖಾನೆಯಲ್ಲಿ ಕೆಲಸ ಮಾಡುತ್ತಿದ್ದ. ಅವರಿಬ್ಬರು ಪಶ್ಚಿಮ ದಿಲ್ಲಿಯ ಮೋಹನ್ ಗಾರ್ಡನ್‌ನಲ್ಲಿ ವಾಸವಾಗಿದ್ದು ಕಳೆದೊಂದು ವರ್ಷದಿಂದ ಸ್ನೇಹಿತರಾಗಿದ್ದರು. ಒಮ್ಮೆ ಸ್ನೇಹಿತನ ಮನೆಗೆ ಬಂದಿದ್ದ ಕುಲ್ಕೇಶ ಆತನ ಪತ್ನಿ ಪೂಜಾ ಮೇಲೆ ಮೋಹಿತನಾದ. ಅಂದಿನಿಂದ ಆಗಾಗ ಅವರ ಮನೆಗೆ ಬರುತ್ತಲೇ ಇದ್ದ ಆತ ಆಕೆಗೆ ಬಗೆ ಬಗೆಯ ಉಡುಗೊರೆ ತಂದುಕೊಟ್ಟು ಒಲಿಸಿಕೊಳ್ಳಲು ಯತ್ನಿಸಿದ. ಈ ಬಗ್ಗೆ ತಿಳಿದ ಕೂಡಲೇ ದಲ್ಬಿರ್ ಆತನನ್ನು ಮನೆಗೆ ಬರದಂತೆ ತಡೆದ. ಸೋಮವಾರ ರಾತ್ರಿ ಪೂಜಾ ಪರಿಚಿತ ಮದುವೆಗೆ ಹೋದಾಗ ಕುಲ್ಕೇಶ ದಲ್ಬಿರ್‌ನನ್ನು ಹತ್ತಿರದಲ್ಲೇ ಹಾಗು ಹೋಗಿದ್ದ ರೈಲು ಹಳಿ ಬಳಿ ಕರೆದೊಯ್ದ. ಮೂತ್ರ ಬರುತ್ತಿದೆ, ಇಲ್ಲೆ ಕಾದಿರು ಎಂದು ಹೇಳಿ ಪೊದೆ ಮರೆಗೆ ಹೋದಂತೆ ನಟಿಸಿದ. ಬಳಿಕ ದೊಡ್ಡದಾದ ಕಲ್ಲೊಂದನ್ನು ಎತ್ತಿಕೊಂಡು ಹಿಂದಿನಿಂದ ದಲ್ಬಿರ್ ಮೇಲೆ ದಾಳಿ ಮಾಡಿದ. ಆತ ಪ್ರಜ್ಞೆ ಕಳೆದುಕೊಂಡಾಗ ರೈಲು ಹಳಿಯ ಮೇಲೆ ಮಲಗಿಸಿ ದೂರದಲ್ಲಿ ನಿಂತ. ಆತನ ಮೈಮೇಲೆ ರೈಲು ಹರಿದು ಹೋದಾಗ ಪೊಲೀಸರಿಗೆ ಕರೆ ಮಾಡಿ ಸ್ನೇಹಿತ ರೈಲು ಅಪಘಾತದಲ್ಲಿ ಸಾವನ್ನಪ್ಪಿದ ಎಂದು ಕಥೆ ಕಟ್ಟಿದ. ಆತನ ಪತ್ನಿ ಮರಳಿ ಬಂದಾಗ ಆಕೆಯನ್ನು ಸಂತೈಸುವ ನಾಟಕವಾಡಿದ. ಅನುಮಾನದ ಮೇಲೆ ತನಿಖೆ ಕೈಗೊಂಡ ಪೊಲೀಸರು ಕೊನೆಯದಾಗಿ ಆತನಿಗೆ ಫೋನ್ ಕರೆ ಮಾಡಿದ್ದ ಕುಲ್ಕೇಶ್‌ನನ್ನು ವಿಚಾರಣೆಗೊಳಪಡಿಸಿದರು. ಆತನ ಶರ್ಟ್ ಮೇಲೆ ರಕ್ತದ ಕಲೆಗಳಿದ್ದು, ಅದು ಹೇಗಾಯಿತೆಂದು ಕೇಳಿದಾಗ ಆತ ಗೊಂದಲಕಾರಿ ಉತ್ತರ ನೀಡಿದ. ಕೊನೆಗೂ ತಪ್ಪನ್ನು ಒಪ್ಪಿಕೊಂಡ ಆತ ಪೂಜಾ ನನ್ನನ್ನು ಮದುವೆಯಾಗಲು ನಿರಾಕರಿಸಿದ್ದಳು. ಪತಿಯನ್ನು ತ್ಯಜಿಸಲು ಆಕೆ ಒಪ್ಪಿರಲಿಲ್ಲ. ಹೀಗಾಗಿ ಹೇಗಾದರೂ ಮಾಡಿ ಆಕೆಯನ್ನು ಪಡೆಯಲು ಗೆಳೆಯನನ್ನು ಕೊಂದೆ ಎಂದು ಒಪ್ಪಿಕೊಂಡಿದ್ದಾನೆ.
from India & World News in Kannada | VK Polls https://ift.tt/2ILxaAY
