ಹೊಸದಿಲ್ಲಿ: ಜಾರ್ಖಂಡ್‌ನಲ್ಲಿ ನಡೆದ ಸಾಮೂಹಿಕ ಹಲ್ಲೆಯಿಂದ ಯುವಕ ಬಲಿಯಾಗಿರುವ ಪ್ರಕರಣ ನಿಜಕ್ಕೂ ನೋವು ತರಿಸಿದೆ. ಆದರೆ ಈ ಒಂದು ಘಟನೆಯಿಂದಾಗಿ ಇಡೀ ರಾಜ್ಯವನ್ನು ದೂಷಿಸುವುದು ಸರಿಯಲ್ಲ ಎಂದು ಪ್ರಧಾನಮಂತ್ರಿ ನರೇಂದ್ರ ಮೋದಿ ತಿಳಿಸಿದ್ದಾರೆ. ರಾಷ್ಟ್ರಪತಿ ಭಾಷಣದ ಮೇಲಿನ ವಂದನಾ ನಿರ್ಣಯಕ್ಕೆ ಪ್ರಧಾನಿ ನರೇಂದ್ರ ಮೋದಿ ರಾಜ್ಯಸಭೆಯಲ್ಲಿ ಉತ್ತರ ನೀಡಿದರು. ಪ್ರತಿಪಕ್ಷಗಳು ಆಡಳಿತ ಪಕ್ಷವನ್ನು ಸದಾ ದೂಷಣೆ ಮಾಡುವುದನ್ನೇ ಅಭ್ಯಾಸ ಮಾಡಿಕೊಂಡಿದೆ. ಜಾರ್ಖಂಡ್‌ನಲ್ಲಿ ಇತ್ತೀಚೆಗೆ ಗುಂಪು ಹಲ್ಲೆ ಪ್ರಕರಣದಲ್ಲಿ ಯುವಕ ಬಲಿಯಾಗಿದ್ದು ನೋವು ತರಿಸಿದೆ. ಇದಕ್ಕಾಗಿ ಇಡೀ ರಾಜ್ಯವನ್ನೇ ದೋಷಿಯ ಸ್ಥಾನದಲ್ಲಿ ನಿಲ್ಲಿಸುವುದು ಸರಿಯಲ್ಲ ಎಂದರು. ಜಾರ್ಖಂಡ್‌ ಈಗ ಗುಂಪು ಹಲ್ಲೆಯ ಕೇಂದ್ರ (ಲಿಂಚಿಂಗ್‌ ಹಬ್‌) ಎಂದು ಕೆಲವರು ಹೇಳುತ್ತಿದ್ದಾರೆ. ಇದು ನಿಜಕ್ಕೂ ತಪ್ಪು. ಈ ರೀತಿಯ ಹೇಳಿಕೆಗಳಿಂದಾಗಿ ಇಡೀ ರಾಜ್ಯವನ್ನೇ ಅವಮಾನಿಸಲಾಗುತ್ತಿದೆ ಎಂದು ಮೋದಿ ತಿಳಿಸಿದರು. ಕಾಂಗ್ರೆಸ್‌ನ ಹಿರಿಯ ನಾಯಕ ಗುಲಾಂ ನಬಿ ಆಜಾದ್‌ ಅವರ ದೃಷ್ಟಿ ಈಗ ಮಬ್ಬಾಗಿದೆ. ಏಕೆಂದರೆ ಅವರು ಎಲ್ಲವನ್ನೂ ಈಗ ರಾಜಕೀಯದ ಕನ್ನಡಕ ಧರಿಸಿ ನೋಡುತ್ತಿದ್ದಾರೆ. ಇಂಥವರಿಗೆ ಗಾಲಿಬ್‌ ಒಂದು ಮಾತು ಹೇಳಿದ್ದಾರೆ. 'ದೂಲ್‌ ಚೆಹರೆ ಪೆ ತಿ, ಆಯ್ನಾ ಸಾಫ್‌ ಕರ್ತಾ ರಹಾ' (ಮುಖದ ಮೇಲೆ ದೂಳು ಇತ್ತು. ಆದರೆ ಅವರು ಕನ್ನಡಿಯನ್ನು ಒರೆಸುತ್ತಿದ್ದ) ಎಂದು ನರೇಂದ್ರ ಮೋದಿ ತಮ್ಮದೇ ಶೈಲಿಯಲ್ಲಿ ಚಾಟಿ ಬೀಸಿದರು.
from India & World News in Kannada | VK Polls https://ift.tt/31TSTOG
