ಹೊಸದಿಲ್ಲಿ: ಕೇವಲ 2,000 ರೂ.ಗಳ ಒಂದು ಸ್ಕೀಮ್‌ಗೆ ರೈತರು ತಮ್ಮನ್ನು ತಾವು ಮಾರಿಕೊಂಡಿದ್ದಾರೆ ಎನ್ನುವವರು ದೇಶದ ರೈತ ಸಮುದಾಯವನ್ನೇ ಅವಮಾನಿಸುತ್ತಿದ್ದಾರೆ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದರು. ರಾಜ್ಯಸಭೆಯಲ್ಲಿ ಬುಧವಾರ ಮಾತನಾಡಿದ ಅವರು, ಧೋರಣೆಗಳನ್ನು ಕಟುವಾಗಿ ಟೀಕಿಸಿದರು. ಕಾಂಗ್ರೆಸ್‌ನಲ್ಲಿರುವ ನನ್ನ ಮಿತ್ರರು ಗೆಲುವನ್ನಾಗಲಿ, ಸೋಲನ್ನಾಗಲಿ ಅರಗಿಸಿಕೊಳ್ಳಲು ಸಮರ್ಥರಾಗಿಲ್ಲ. ಇದು ಆರೋಗ್ಯಕರ ಪ್ರಜಾಪ್ರಭುತ್ವದ ಲಕ್ಷಣವೆಂದು ನಾನು ಪರಿಗಣಿಸುವುದಿಲ್ಲ ಎಂದು ಪ್ರಧಾನಿ ನುಡಿದರು. ಸದನದಲ್ಲಿ ಪ್ರಧಾನಿ ವಾಗ್ಝರಿಯ ಮುಖ್ಯಾಂಶಗಳು: 'ಒನ್ ನೇಷನ್, ಒನ್ ಎಲೆಕ್ಷನ್‌' (ಒಂದು ದೇಶ- ಒಂದು ಚುನಾವಣೆ) ಕಲ್ಪನೆಯನ್ನು ಕೆಲವರು ಒಪ್ಪಿಕೊಳ್ಳಲಿಕ್ಕಿಲ್ಲ. ಆದರೆ ಈ ಕಲ್ಪನೆಗಳು ಚರ್ಚೆಗೆ ಯೋಗ್ಯ ಎಂಬುದನ್ನು ಒಪ್ಪಿಕೊಳ್ಳಬೇಕು.: ಇವಿಎಂಗಳು ವಿರೋಧಿಸುವವರು ಬರೀ ಇವಿಎಂಗಳನ್ನು ಮಾತ್ರ ವಿರೋಧಿಸುತ್ತಿಲ್ಲ; ತಂತ್ರಜ್ಞಾನ, ಡಿಜಿಟಲ್ ಹಣ ವರ್ಗಾವಣೆ, ಆಧಾರ್‌, ಜಿಎಸ್‌ಟಿ, ಭೀಮ್ ಆ್ಯಪ್‌- ಎಲ್ಲವನ್ನೂ ವಿರೋಧಿಸುತ್ತಾರೆ. ಇಂತಹ ನಕಾರಾತ್ಮಕ ಧೋರಣೆ ಏಕೆ? ಇಂತಹ ಧೋರಣೆಯಿಂದಾಗಿಯೇ ಕೆಲವು ಪಕ್ಷಗಳು ಜನರ ವಿಶ್ವಾಸ ಗಳಿಸಲು ವಿಫಲವಾಗಿವೆ: ಪ್ರಧಾನಿ ಮೋದಿ. ಮತದಾರರು ಜಾಗೃತರಾಗಿದ್ದಾರೆ. ಲೋಕಸಭೆಯಲ್ಲಿ ಮಾತ್ರವಲ್ಲ, ರಾಜ್ಯಸಭೆಯಲ್ಲೂ ಏನು ನಡೆಯುತ್ತಿದೆ ಎಂಬುದನ್ನು ಅವರು ಬಲ್ಲರು. ಈ ಅಂಶಗಳನ್ನು ಮನದಲ್ಲಿಟ್ಟುಕೊಂಡೇ ಈ ಬಾರಿ ದೇಶದ ಜನತೆ ಮತ ಹಾಕಿದ್ದಾರೆ.: ಪ್ರಧಾನಿ ಮೋದಿ ನಾವು ಪ್ರಕ್ರಿಯೆಗಳನ್ನು ಸರಳಗೊಳಿಸಲು ಪ್ರಯತ್ನಿಸಿದ್ದೇವೆ. ಅದರಿಂದ ದೇಶದ ಜನತೆಗೆ ಲಾಭವಾಗಿದೆ. ಈಗ ನಮ್ಮ ವಿರೋಧಿಗಳು ನವ ಭಾರತವನ್ನು ದೂಷಿಸುತ್ತಿದ್ದಾರೆ. ಭಾರತ ಮತ್ತೆ ಹಿಂದಕ್ಕೆ ಮರಳಬೇಕೆಂದು ಅವರು ಬಯಸುತ್ತಿದ್ದಾರೆಯೆ ಎಂದು ಪ್ರಧಾನಿ ಮೋದಿ ತೀಕ್ಷ್ಣವಾಗಿ ಪ್ರಶ್ನಿಸಿದರು. ಹಳೆಯ ಭಾರತದಲ್ಲಿ ಸಂಪುಟದ ನಿರ್ಧಾರಗಳನ್ನೂ ಪತ್ರಿಕಾಗೋಷ್ಠಿಯಲ್ಲಿ ಹರಿದು ಹಾಕಲಾಗುತ್ತಿತ್ತು. ಹಳೆಯ ಭಾರತದಲ್ಲಿ ನೌಕಾಪಡೆಯನ್ನು ವೈಯಕ್ತಿಕ, ಖಾಸಗಿ ಪ್ರವಾಸಗಳಿಗೆ ಬಳಸಲಾಗುತ್ತಿತ್ತು. ಹಳೆಯ ಭಾರತದಲ್ಲಿ ಬಹಳಷ್ಟು ಹಗರಣಗಳು ನಡೆದಿದ್ದವು. ಹಳೆಯ ಭಾರತ ಟುಕ್ಡೇ ಟುಕ್ಡೇ ಗ್ಯಾಂಗ್ ಅನ್ನು ಬೆಂಬಲಿಸುತ್ತಿತ್ತೆ?: ಪ್ರಧಾನಿ ಪ್ರಶ್ನೆ. ಪ್ರತಿಯೊಂದನ್ನೂ ಅಣಕಿಸುವ ಪ್ರವೃತ್ತಿ ಕಾಂಗ್ರೆಸ್‌ನದ್ದು. ಅವರು ಯೋಗ ದಿನವನ್ನು ಅಣಕಿಸಿದರು, ಸ್ವಚ್ಛ ಭಾರತವನ್ನೂ ಅಣಕಿಸಿದರು. ಜಾರ್ಖಂಡ್‌ನಲ್ಲಿ ಗುಂಪು ಥಳಿತದ ಪ್ರಕರಣ ನನಗೆ ನೋವುಂಟುಮಾಡಿದೆ. ಅದರಿಂದ ಇತರರಿಗೂ ನೋವಾಗಿದೆ ಎಂದು ಹೇಳುವ ಮೂಲಕ ಜಾರ್ಖಂಡ್ ಥಳಿತ ಪ್ರಕರಣವನ್ನು ಪ್ರಧಾನಿ ಮೋದಿ ಖಂಡಿಸಿದರು. ನಾವು ಯಾವುದೇ ರೀತಿಯ ಹಿಂಸೆಯನ್ನು ಸಮರ್ಥಿಸುವುದಿಲ್ಲ. ನಮ್ಮ ಸರಕಾರ ನ್ಯಾಯವನ್ನು ಖಾತ್ರಿಪಡಿಸುತ್ತದೆ: ಪ್ರಧಾನಿ ಮೋದಿ. ರಾಜ್ಯಸಭೆಯ ಸದಸ್ಯರು ಜಾರ್ಖಂಡ್ ಅನ್ನು ಗುಂಪು ಥಳಿತದ ಕೇಂದ್ರ (ಲಿಂಚಿಂಗ್ ಹಬ್) ಎಂದು ಕರೆಯುವದೇಕೆ? ಇದು ಸರಿಯೆ? ಒಂದು ರಾಜ್ಯವನ್ನು ಅವರು ಅವಮಾನಿಸುವುದೇಕೆ?. ಜಾರ್ಖಂಡ್ ರಾಜ್ಯವನ್ನು ಅವಮಾನಿಸುವ ಹಕ್ಕು ನಮಗ್ಯಾರಿಗೂ ಇಲ್ಲ: ಪ್ರಧಾನಿ ಮೋದಿ. ಭಾರತ 5 ಲಕ್ಷ ಕೋಟಿ ಡಾಲರ್‌ಗಳ ಆರ್ಥಿಕತೆಯಾಗಿ ಬೆಳೆಯುವುದನ್ನು ಬಯಸದ ಯಾರೊಬ್ಬರೂ ಈ ಸದನದಲ್ಲಿ ಇರಲಾರರು ಎಂಬ ಭರವಸೆ ನನಗಿದೆ: ಪ್ರಧಾನಿ ಮೋದಿ. ರಚನಾತ್ಮಕ ಸಲಹೆಗಳನ್ನು ನೀಡಿ. ನಾವು ಎಲ್ಲರಿಗೂ ಮುಕ್ತವಾಗಿ ತೆರೆದುಕೊಂಡಿದ್ದೇವೆ. ಎಲ್ಲ ಬುದ್ಧಿವಂತರೂ ನಮ್ಮಲ್ಲೇ ಇದ್ದಾರೆ ಎಂಬ ನಂಬಿಕೆ ನಮ್ಮದಲ್ಲ: ಪ್ರಧಾನಿ ಮೋದಿ. 1984ರ ಸಿಖ್ ದಂಗೆ ಆರೋಪಿಗಳು ಇನ್ನೂ ಕಾಂಗ್ರೆಸ್‌ನಲ್ಲೇ ಇದ್ದಾರೆ. ಆ ಪಕ್ಷ ಮೊದಲು ಅವರ ವಿರುದ್ಧ ಕ್ರಮ ಕೈಗೊಂಡು ತನ್ನನ್ನು ತಾನು ಶುದ್ಧಪಡಿಸಿಕೊಳ್ಳಲಿ ಎಂದು ಮೋದಿ ಆಗ್ರಹಿಸಿದರು. ಗುಲಾಂ ನಬಿ ಆಜಾದ್ ಅವರಿಗೆ ದೃಷ್ಟಿ ಮಂದವಾದಂತೆ ತೋರುತ್ತದೆ. ಪ್ರತಿಯೊಂದನ್ನೂ ರಾಜಕೀಯದ ಕನ್ನಡಕದಿಂದಲೇ ಅವರು ನೋಡುತ್ತಾರೆ: ಪ್ರಧಾನಿ ಮೋದಿ. ಆಯುಷ್ಮಾನ್ ಭಾರತ್‌ ಅನ್ನು ಇನ್ನಷ್ಟು ಬಲಪಡಿಸಬೇಕಿದೆ. ಬಡವರು ಸುಲಭವಾಗಿ ಉತ್ತಮ ಗುಣಮಟ್ಟದ ಮತ್ತು ಕೈಗೆಟುಕುವ ಬೆಲೆಯ ಆರೋಗ್ಯ ಸೌಲಭ್ಯಗಳನ್ನು ಪಡೆಯಬೇಕಿದೆ: ಪ್ರಧಾನಿ ಮೋದಿ. ರಾಜೀವ್ ಗಾಂಧಿ ಅವರು ಅಸ್ಸಾಂನ ಎನ್‌ಆರ್‌ಸಿ ಒಪ್ಪಂದವನ್ನು ಒಪ್ಪಿಕೊಂಡಿದ್ದರು. ಆದರೆ ಬಳಿಕ ಸುಪ್ರೀಂ ಕೋರ್ಟ್ ಸೂಚನೆಯಂತೆ ನಾವು ಅದನ್ನು ಜಾರಿಗೊಳಿಸಿದ್ದೇವೆ: ಪ್ರಧಾನಿ ಮೋದಿ. ಹಾಗಾದರೆ ಎನ್‌ಆರ್‌ಸಿ ಜಾರಿಗೊಳಿಸಿದ ಕೀರ್ತಿಯನ್ನು ನೀವ್ಯಾಕೆ ತೆಗೆದುಕೊಳ್ಳುತ್ತಿಲ್ಲ? ಕಾಂಗ್ರೆಸ್‌ಗೆ ಪ್ರಧಾನಿ ಮೋದಿ ಪ್ರಶ್ನೆ. ಬಿಹಾರದ ಮುಜಫರ್‌ಪುರದಲ್ಲಿ ಮಿದುಳು ಜ್ವರದ ಸೋಂಕು ತಡೆಗಟ್ಟುವಲ್ಲಿ ಸರಕಾರಗಳು ವಿಫಲವಾಗಿವೆ ಎಂಬುದನ್ನು ಪ್ರಧಾನಿ ಮೋದಿ ಒಪ್ಪಿಕೊಂಡರು. ಬಿಹಾರದಲ್ಲಿ ಮಿದುಳು ಜ್ವರದಿಂದ ಸಂಭವಿಸಿದ ಸಾವುಗಳು ನಮಗೆ ನಾಚಿಕೆ ತರುವ ಸಂಗತಿಯಾಗಿದೆ. ನಾನು ಬಿಹಾರ ಸರಕಾರದ ಜತೆ ಸತತ ಸಂಪರ್ಕದಲ್ಲಿದ್ದೇನೆ. ಶೀಘ್ರವೇ ನಾವೆಲ್ಲರೂ ಸಂಘಟಿತವಾಗಿ ಈ ಬಿಕ್ಕಟ್ಟನ್ನು ಶಮನಗೊಳಿಸಲಿದ್ದೇವೆ: ಪ್ರಧಾನಿ ಮೋದಿ.
from India & World News in Kannada | VK Polls https://ift.tt/2YcGbbC
