ಹೊಸದಿಲ್ಲಿ: ಯಾವುದೇ ಸನ್ನಿವೇಶದಲ್ಲಿ ಪಂದ್ಯದ ದಿಕ್ಕು ಬದಲಾಯಿಸುವ ಸಾಮರ್ಥ್ಯ ಹೊಂದಿರುವ ಅವರ ಕ್ಯಾಚ್ ಬಿಟ್ಟಾಗ ಭಯಾನಕ ಅನುಭವ ಉಂಟಾಗಿತ್ತು ಎಂದು ನ್ಯೂಜಿಲೆಂಡ್ ಹಿರಿಯ ವೇಗಿ ಇತ್ತೀಚೆಗೆ ಹೇಳಿಕೊಂಡಿದ್ದಾರೆ. ಸೌಥ್‌ಹ್ಯಾಂಪ್ಟನ್‌ನಲ್ಲಿ ಇತ್ತೀಚೆಗೆ ಮುಕ್ತಾಯವಾಗಿದ್ದ ಮಹತ್ವದ ಪಂದ್ಯದ ಆರನೇ ದಿನ ಕ್ರೀಸ್‌ಗೆ ಬಂದಿದ್ದ ರಿಷಭ್‌ ಪಂತ್ ಆರಂಭದಲ್ಲಿಯೇ ಕೈಲ್‌ ಜೇಮಿಸನ್ ಎಸೆತದಲ್ಲಿ ಸ್ಲಿಪ್‌ನಲ್ಲಿ ಕ್ಯಾಚ್ ಕೊಟ್ಟಿದ್ದರು. ಆದರೆ, ಟಿಮ್ ಸೌಥೀ ಸುಲಭ ಕ್ಯಾಚ್ ಅನ್ನು ಕೈ ಚೆಲ್ಲಿದ್ದರು. ಇದರ ಪರಿಣಾಮ ಅವರು 41 ರನ್‌ ಗಳಿಸಿದ್ದರು. ಅಂತಿಮವಾಗಿ ಟ್ರೆಂಟ್‌ ಬೌಲ್ಟ್‌ ಬೌಲಿಂಗ್‌ನಲ್ಲಿ ಅನಗತ್ಯ ಹೊಡೆತಕ್ಕೆ ಕೈ ಹಾಕಿ ಪಂತ್ ಔಟ್‌ ಆದರು. ಅಂತಿಮವಾಗಿ ನ್ಯೂಜಿಲೆಂಡ್ ತಂಡ ಎಂಟು ವಿಕೆಟ್‌ಗಳ ಗೆಲುವು ಪಡೆಯಿತು. ಆ ಮೂಲಕ 2000ರ ವರ್ಷದ ಬಳಿಕ ಇದೇ ಮೊದಲ ಬಾರಿ ನ್ಯೂಜಿಲೆಂಡ್ ತಂಡ ಐಸಿಸಿ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿತು. ಪಂದ್ಯದಲ್ಲಿ ಐದು ವಿಕೆಟ್‌ ಕಬಳಿಸಿದ್ದ ಟಿಮ್ ಸೌಥೀ, ಪ್ರಥಮ ಇನಿಂಗ್ಸ್‌ನಲ್ಲಿ ನಿರ್ಣಾಯಕ 30 ರನ್‌ ಗಳಿಸಿ ತಂಡದ 32 ರನ್‌ಗಳ ಮುನ್ನಡೆಗೆ ನೆರವಾಗಿದ್ದರು. ಹೌರಾಕಿ ಬ್ರೇಕ್‌ಫಾಸ್ಟ್‌ನಲ್ಲಿ ಮ್ಯಾಟ್ & ಜೆರ್ರಿ ಅವರೊಂದಿಗೆ ಮಾತನಾಡಿದ ಟಿಮ್ ಸೌಥೀ, ಕ್ರಿಕೆಟ್ ಮೈದಾನದಲ್ಲಿ ಕ್ಯಾಚ್ ಕೈ ಚೆಲ್ಲುವುದು ಅತ್ಯಂತ ಕೆಟ್ಟ ಅನುಭವ ಎಂದು ಹೇಳಿದ್ದಾರೆ. "ರಿಷಭ್‌ ಪಂತ್ ಕೇವಲ 5 ರಿಂದ 6 ಓವರ್‌ಗಳಲ್ಲಿ ಪಂದ್ಯದ ದಿಕ್ಕನ್ನು ಬದಲಾಯಿಸುತ್ತಾರೆ. ಅವರ ಆಟದ ಸ್ವಭಾವವೇ ಆ ರೀತಿ ಇದೆ. ಕ್ಯಾಚ್ ಕೈ ಚೆಲ್ಲಿದ್ದರಿಂದ ಪಂದ್ಯದಲ್ಲಿ ಸೋಲು ಅನುಭವಿಸಬಹುದೆಂಬ ಭೀತಿ ನನಗೆ ಬಲವಾಗಿ ಕಾಡುತ್ತಿತ್ತು. ಆದರೆ ಅವರು ಕೈಲ್‌ ಜೇಮಿಸನ್ ಎಸೆತದಲ್ಲಿ ಔಟಾಗುತ್ತಿದ್ದಂತೆ ನೆಮ್ಮದಿಯಾಯಿತು. ಆದರೆ, ಕ್ಯಾಚ್ ಬಿಟ್ಟಾಗ ನನಗೆ ಭಯಾನಕ ಭಾವನೆ ಉಂಟಾಗುತ್ತಿತ್ತು. ಸಹ ಆಟಗಾರರಿಗೆ ಹಿನ್ನಡೆ ತಂದುಕೊಡುತ್ತಿದ್ದೇನೆಂದು ನನಗೆ ಆ ಕ್ಷಣದಲ್ಲಿ ಅನಿಸಿತ್ತು," ಎಂದು ಸೌಥೀ ತಿಳಿಸಿದರು. ಬಾಲಕಿಯ ಕ್ಯಾನ್ಸರ್‌ ಹೋರಾಟಕ್ಕೆ ಜೆರ್ಸಿ ಹರಾಜಿಗಿಟ್ಟ ಸೌಥೀ ಕ್ಯಾನ್ಸರ್‌ ವಿರುದ್ಧ ಹೋರಾಡುತ್ತಿರುವ ಎಂಟು ವರ್ಷದ ಬಾಲಕಿಗೆ ಆರ್ಥಿಕ ನೆರವು ನೀಡುವ ಸಲುವಾಗಿ ನ್ಯೂಜಿಲೆಂಡ್ ತಂಡದ ಹಿರಿಯ ವೇಗಿ ಟಿಮ್ ಸೌಥೀ ಹಣಾಹಣಿಯಲ್ಲಿ ಧರಿಸಿದ್ದ ಒಂದು ಜೆರ್ಸಿಯನ್ನು ಹರಾಜಿಗೆ ಇಟ್ಟಿದ್ದಾರೆ. ಸೌಥ್‌ಹ್ಯಾಂಪ್ಟನ್‌ನಲ್ಲಿ ಫೈನಲ್‌ ಪಂದ್ಯವಾಡಿದ್ದ ನ್ಯೂಜಿಲೆಂಡ್ ತಂಡದ ಎಲ್ಲಾ ಆಟಗಾರರ ಸಹಿ ಇರುವುದು ಈ ಜೆರ್ಸಿಯ ವಿಶೇಷತೆ. 32ರ ಪ್ರಾಯದ ವೇಗಿ ತಮ್ಮ ಅಧಿಕೃತ ಇನ್‌ಸ್ಟಾಗ್ರಾಮ್‌ ಖಾತೆಯಲ್ಲಿ ಜೆರ್ಸಿ ಚಿತ್ರವನ್ನು ಶೇರ್‌ ಮಾಡುವ ಮೂಲಕ ಈ ವಿಷಯವನ್ನು ಪ್ರಕಟಿಸಿದ್ದಾರೆ. ಕಿವೀಸ್‌ ವೇಗಿಯ ಈ ಪ್ರಯತ್ನವನ್ನು ಹಲವು ಅಭಿಮಾನಿಗಳು ಮುಕ್ತಕಂಠದಿಂದ ಗುಣಗಾನ ಮಾಡಿದ್ದಾರೆ. ಕ್ಯಾನ್ಸರ್‌ನಿಂದ ಬಳಲುತ್ತಿರುವ ಹಾಲ್ಲೀ ಬೀಟಿಯಾಗೆ ಸಹಾಯ ಮಾಡಲು ಮುಂದಾಗಿರುವ ಟಿಮ್ ಸೌಥೀ, ಯಾರಾದರೂ ಈ ಜೆರ್ಸಿಯನ್ನು ಬಿಡ್‌ ಮಾಡುವ ಮೂಲಕ ಬಾಲಕಿಯ ಕುಟುಂಬದವರ ಕಠಿಣ ಸಂದರ್ಭದಲ್ಲಿ ಕೈ ಜೋಡಿಸಿ ಎಂದು ಅಭಿಮಾನಿಗಳಿಗೆ ಮನವಿ ಮಾಡಿಕೊಂಡಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3hlgrEY
