ಹೊಸದಿಲ್ಲಿ: ಭಾರತ ತಂಡ ಇತ್ತೀಚೆಗಷ್ಟೇ ಶ್ರೀಲಂಕಾ ವಿರುದ್ಧ ಸೀಮಿತ ಓವರ್‌ಗಳ ಕ್ರಿಕೆಟ್ ಸರಣಿಗಳಲ್ಲಿ ಪೈಪೋಟಿ ನಡೆಸಿದೆ. ತಲಾ ಮೂರು ಪಂದ್ಯಗಳ ಒಡಿಐ ಸರಣಿಯಲ್ಲಿ ಭಾರತ ತಂಡ ಜಯ ದಾಖಲಿಸಿದರೆ, ಅಷ್ಟೇ ಪಂದ್ಯಗಳ ಟಿ20 ಕ್ರಿಕೆಟ್ ಸರಣಿಯಲ್ಲಿ ಆತಿಥೇಯ ಶ್ರೀಲಂಕಾ ಜಯ ತನ್ನದಾಗಿಸಿಕೊಂಡಿತು. ಅಂದಹಾಗೆ ಈ ಸರಣಿ ಎರಡೂ ತಂಡಗಳಿಗೆ ಅತ್ಯಂತ ಮಹತ್ವದ್ದಾಗಿತ್ತು. ಪ್ರಮುಖವಾಗಿ ಭಾರತ ತಂಡ ಈ ಸರಣಿ ಮೂಲಕ ಮುಂಬರುವ ಟೂರ್ನಿಗೆ ಕೆಲ ಪ್ರತಿಭಾನ್ವಿತ ಯುವ ಆಟಗಾರರನ್ನು ಹೆಕ್ಕುವ ಲೆಕ್ಕಾಚಾರ ಹೊಂದಿತ್ತು. ಒಡಿಐ ಮತ್ತು ಟಿ20 ಸರಣಿಗಳಲ್ಲಿ ಭಾರತ ತಂಡದ ಲೆಗ್‌ ಸ್ಪಿನ್ನರ್‌ಗಳಾದ ಯುಜ್ವೇಂದ್ರ ಚಹಲ್ ಮತ್ತು ರಾಹುಲ್ ಚಹರ್‌ ಮನಮೋಹಕ ಪ್ರದರ್ಶನ ನೀಡಿದ್ದು, ವಿಶ್ವಕಪ್ ತಂಡದಲ್ಲಿ ತಮ್ಮ ಸ್ಥಾನವನ್ನು ಬಹುತೇಕ ಖಾತ್ರಿ ಪಡಿಸಿಕೊಂಡಿದ್ದಾರೆ. ತಂಡದಲ್ಲಿನ ಮತ್ತೊಬ್ಬ ಸ್ಪಿನ್ನರ್ ಸ್ಥಾನಕ್ಕೆ ಮತ್ತು ನಡುವೆ ಭಾರಿ ಪೈಪೋಟಿಯಿದ್ದು, ಈ ಬಗ್ಗೆ ಮಾತನಾಡಿರುವ ಶ್ರೀಲಂಕಾದ ದಿಗ್ಗಜ ಮುತ್ತಯ್ಯ ಮರಳೀಧರನ್ ಭಾರತ ತಂಡಕ್ಕೆ ಸೂಕ್ತ ಸ್ಪಿನ್ನರ್ ಯಾರೆಂದು ಹೆಸರಿಸಿದ್ದಾರೆ. "ನನ್ನ ಪ್ರಕಾರ ಮುಂದಿನ ಐಪಿಎಲ್‌ ಟೂರ್ನಿ ವರೆಗೂ ಭಾರತ ತಂಡ ಕಾಯಬೇಕಾಗುತ್ತದೆ. ಏಕೆಂದರೆ ಯುಎಇನಲ್ಲಿ ಐಪಿಎಲ್‌ನ ಎರಡನೇ ಚರಣ ನಡೆಯಲಿದ್ದು, ಆಟಗಾರರ ಪ್ರದರ್ಶನ ಅನುಗುಣವಾಗಿ ಟಿ20 ವಿಶ್ವಕಪ್‌ಗೆ ತಂಡ ಆಯ್ಕೆ ಮಾಡಿಕೊಳ್ಳಬೇಕು. ಈಗಲೇ ಆಯ್ಕೆ ಮಾಡುವುದಾದರೆ ನನ್ನ ಪ್ರಕಾರ ಕುಲ್ದೀಪ್‌ ಯಾದವ್ ಅವರನ್ನೇ ತೆಗೆದುಕೊಳ್ಳಬೇಕು. ಏಕೆಂದರೆ ಅವರು ವಿಕೆಟ್‌ ಟೇಕಿಂಗ್ ಬೌಲರ್‌ ಆಗಿ ಗುರುತಿಸಿಕೊಂಡಿದ್ದಾರೆ. ದುರದೃಷ್ಟವಶಾತ್‌ ಐಪಿಎಲ್‌ ಟೂರ್ನಿಯಲ್ಲಿ ಅವರಿಗೆ ಆಡುವ ಹೆಚ್ಚು ಅವಕಾಶಗಳು ಸಿಗುತ್ತಿಲ್ಲ," ಎಂದು ಮುತ್ತಯ್ಯ ಮರಳೀಧರನ್ ಅಭಿಪ್ರಾಯ ಪಟ್ಟಿದ್ದಾರೆ. "ವರುಣ್ ಚಕ್ರವರ್ತಿ ಅತ್ಯುತ್ತಮ ಬೌಲರ್‌. ಟೀಮ್ ಇಂಡಿಯಾಗೆ ಮುಂಬರುವ ವಿಶ್ವಕಪ್‌ನಲ್ಲಿ ಉತ್ತಮ ಆಯ್ಕೆ ಕೂಡ ಆಗುತ್ತಾರೆ. ಐಪಿಎಲ್‌ನಲ್ಲೂ ಅವರಿಗೆ ಹೆಚ್ಚು ಅವಕಾಶಗಳು ಸಿಗುತ್ತಿವೆ. ಆದರೆ, ಅಜಂತಾ ಮೆಂಡಿಸ್‌ ಅಥವಾ ಸುನಿಲ್‌ ನರೈನ್‌ ಅವರ ಹಂತಕ್ಕೆ ತಲುಪಲು ವರುಣ್‌ಗೆ ಇನ್ನು ಸಾಕಷ್ಟು ಸಮಯ ಬೇಕು. ಮೆಂಡಿಸ್‌ ಮತ್ತು ನರೈನ್‌ ಬ್ಯಾಟ್ಸ್‌ಮನ್‌ಗಳನ್ನು ತಬ್ಬಿಬ್ಬು ಮಾಡುತ್ತಿದ್ದ ಬೌಲರ್‌ಗಳು. ಆ ರೀತಿಯ ಸಾಮರ್ಥ್ಯ ವರುಣ್ ಅವರಲ್ಲಿ ಈವರೆಗೆ ಕಾಣಲು ಸಿಕ್ಕಿಲ್ಲ. ಆದರೂ ಉತ್ತಮ ಬೌಲರ್‌, ಅಷ್ಟೇ ಉತ್ತಮ ಪ್ರದರ್ಶನಗಳನ್ನು ನೀಡಿದ್ದಾರೆ," ಎಂದು ಮುರಳಿ ಹೇಳಿದ್ದಾರೆ. ಯುಎಇ ಮತ್ತು ಒಮಾನ್‌ ಆತಿಥ್ಯದಲ್ಲಿ ಈ ವರ್ಷ ಐಸಿಸಿ ಟಿ20 ಕ್ರಿಕೆಟ್ ವಿಶ್ವಕಪ್ ಟೂರ್ನಿ ನಡೆಯಲಿದೆ. ಭಾರತದಲ್ಲಿ ಈ ಟೂರ್ನಿಯ ಆಯೋಜನೆ ಆಗಬೇಕಿತ್ತಾದರೂ, ಕೊರೊನಾ ವೈರಸ್‌ ಕಾರಣ ಯುಎಇ ಅಂಗಣದಲ್ಲಿ ನಡೆಸಲು ಬಿಸಿಸಿಐ ಮುಂದಾಗಿದೆ. ಐಪಿಎಲ್‌ನ ಎರಡನೇ ಚರಣ ಸೆಪ್ಟೆಂಬರ್‌ 19ರಂದು ಆರಂಭವಾಗಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3ylmFMb
