ಕೊಲಂಬೊ: ತಲಾ ಒಂದೊಂದು ಪಂದ್ಯದಲ್ಲಿ ಗೆದ್ದು ಟಿ20 ಸರಣಿಯಲ್ಲಿ 1-1 ಸಮಬಲ ಕಾಯ್ದುಕೊಂಡಿರುವ ಭಾರತ ಹಾಗೂ ತಂಡಗಳು ಇಂದು(ಗುರುವಾರ) ಮೂರನೇ ಹಾಗೂ ನಿರ್ಣಾಯಕ ಹಣಾಹಣಿಯಲ್ಲಿ ಕಾದಾಟ ನಡೆಸಲು ಸಜ್ಜಾಗುತ್ತಿವೆ. ಉಭಯ ತಂಡಗಳ ಜಿದ್ದಾಜಿದ್ದಿಗೆ ಇಲ್ಲಿನ ಆರ್‌ ಪ್ರೇಮದಾಸ ಕ್ರೀಡಾಂಗಣದಲ್ಲಿ ವೇದಿಕೆ ಸಿದ್ದವಾಗಿದೆ. ಕಳೆದ ಮಂಗಳವಾರ ಕೃಣಾಲ್‌ ಪಾಂಡ್ಯಗೆ ಕೋವಿಡ್-19 ಪಾಸಿಟಿವ್‌ ಬಂದಿತ್ತು ಹಾಗೂ ಅವರ ಜೊತೆ ಸಂಪರ್ಕ ಹೊಂದಿದ್ದ ಹಾರ್ದಿಕ್‌ ಪಾಂಡ್ಯ, ಪೃಥ್ವಿ ಶಾ, ಮನೀಶ್‌ ಪಾಂಡೆ, ಸೂರ್ಯಕುಮಾರ್‌ ಯಾದವ್‌ ಸೇರಿದಂತೆ ಒಟ್ಟು ಎಂಟು ಆಟಗಾರರನ್ನು ಐಸೋಲೇಷನ್‌ಗೆ ಕಳುಹಿಸಲಾಗಿತ್ತು. ಈ ಹಿನ್ನೆಲೆಯಲ್ಲಿ ಬುಧವಾರದ ಪಂದ್ಯಕ್ಕೆ ಇವರೆಲ್ಲರೂ ಅಲಭ್ಯರಾಗಿದ್ದರು. ಹಾಗೆಯೇ ಇಂದಿನ ಪಂದ್ಯದಿಂದಲೂ ದೂರ ಉಳಿಯಲಿದ್ದಾರೆ. ಕೃಣಾಲ್‌ ಸೇರಿದಂತೆ ಒಟ್ಟು 9 ಆಟಗಾರರ ಅನುಪಸ್ಥಿತಿಯಲ್ಲಿ ಬುಧವಾರದ ಪಂದ್ಯದಲ್ಲಿ ಕಣಕ್ಕೆ ಇಳಿದಿದ್ದ ಭಾರತ ತಂಡ, ಬ್ಯಾಟಿಂಗ್‌ ವೈಫಲ್ಯದಿಂದ ಶ್ರೀಲಂಕಾ ವಿರುದ್ಧ 4 ವಿಕೆಟ್‌ಗಳಿಂದ ಸೋಲು ಅನುಭವಿಸಿತ್ತು. ಭಾರತ ತಂಡದ ಪರ ನಾಯಕ ಶಿಖರ್‌ ಧವನ್‌ 40 ರನ್ ಗಳಿಸಿ ವೈಯಕ್ತಿಕ ಗರಿಷ್ಠ ಸ್ಕೋರರ್‌ ಎನಿಸಿಕೊಂಡಿದ್ದರು. ಧವನ್‌ ಜೊತೆ ಒಂದು ಹಂತದಲ್ಲಿ ಉತ್ತಮವಾಗಿ ಆಡುತ್ತಿದ್ದ ಋತುರಾಜ್‌ ಗಾಯಕ್ವಾಡ್‌, 21 ರನ್ ಗಳಿಸಿ ಏಳನೇ ಓವರ್‌ನಲ್ಲಿ ವಿಕೆಟ್‌ ಒಪ್ಪಿಸಿದ್ದರು. ಆದರೆ, ಮೂರನೇ ಕ್ರಮಾಂಕದಲ್ಲಿ ಕ್ರೀಸ್‌ಗೆ ಬಂದಿದ್ದ ದೇವದತ್‌ ಪಡಿಕ್ಕಲ್‌ ತಮ್ಮ ಚೊಚ್ಚಲ ಅಂತಾರಾಷ್ಟ್ರೀಯ ಟಿ20 ಪಂದ್ಯದಲ್ಲಿ 23 ಎಸೆತಗಳಿಗೆ ಒಂದು ಸಿಕ್ಸರ್‌ ಹಾಗೂ ಒಂದು ಬೌಂಡರಿಯೊಂದಿಗೆ 29 ರನ್ ಗಳಿಸಿದ್ದರು. ಆ ಮೂಲಕ ತಂಡಕ್ಕೆ ಭರವಸೆ ಮೂಡಿಸಿದ್ದರು. ಆದರೆ, ವಾನಿಂದು ಹಸರಂಗ ಎಸೆತದಲ್ಲಿ ಕ್ಲೀನ್‌ ಬೌಲ್ಡ್ ಆದರು. ಅಂತಿಮವಾಗಿ ಭಾರತ 132 ರನ್‌ಗಳಿಗೆ ಸೀಮಿತವಾಗಿತ್ತು. 133 ರನ್ ಗುರಿ ಹಿಂಬಾಲಿಸಿದ್ದ ಶ್ರೀಲಂಕಾ ತಂಡ 6 ವಿಕೆಟ್‌ ಕಳೆದುಕೊಂಡು ಗೆಲುವಿನ ದಡ ಸೇರಿತು. ಆ ಮೂಲಕ ಟಿ20 ಸರಣಿಯನ್ನು 1-1 ಸಮಬಲ ಸಾಧಿಸಿತು. ಭಾರತದ ಸ್ಪಿನ್‌ ದಾಳಿಯನ್ನು ಸಮರ್ಥವಾಗಿ ನಿಭಾಯಿಸಿದ್ದ ಧನಂಜಯ ಡಿ ಸಿಲ್ವಾ ಅಜೇಯ 40 ರನ್ ಗಳಿಸಿ ತಂಡವನ್ನು ಕೊನೆಯ ಓವರ್‌ನಲ್ಲಿ ಗೆಲ್ಲಿಸಿದ್ದರು. ವಾತಾವರಣ, ಪಿಚ್‌ ರಿಪೋರ್ಟ್: ಕೊಲಂಬೊದಲ್ಲಿ ಮೋಡ ಮುಸುಕಿದ ವಾತಾವರಣ ಮುಂದುವರಿದಿದ್ದು, 28 ಡಿಗ್ರಿ ಸೆಲ್ಸಿಯಸ್‌ ಉಷ್ಣಾಂಶವಿದೆ. ಹಾಗಾಗಿ, ಮೂರನೇ ಪಂದ್ಯದ ವೇಳೆ ಮಳೆ ಬರುವ ಸಾಧ್ಯತೆ ಅಲ್ಪ ಪ್ರಮಾಣದಲ್ಲಿದೆ. ಇನ್ನು ಪಿಚ್‌ ರಿಪೋರ್ಟ್ ಬಗ್ಗೆ ಹೇಳಬೇಕೆಂದರೆ, ಇಲ್ಲಿನ ವಿಕೆಟ್‌ ಈಗಾಗಲೇ ನಿಧಾನಗತಿಗೆ ಮಾರ್ಪಟ್ಟಿದೆ. ಚೆಂಡು ಹೊಳಪು ಕಳೆದುಕೊಂಡ ಬಳಿಕ ಸ್ಪಿನ್ನರ್‌ಗಳಿಗೆ ಈ ಪಿಚ್‌ ಹೆಚ್ಚು ಸಹಕಾರಿಯಾಗಲಿದೆ ಹಾಗೂ ಚೆಂಡು ಹೆಚ್ಚಿನ ತಿರುವು ಪಡೆದುಕೊಳ್ಳಲಿದೆ. ಉಭಯ ತಂಡಗಳ ಸಂಭಾವ್ಯ ಪ್ಲೇಯಿಂಗ್ XI ಭಾರತ ತಂಡದ 9 ಮಂದಿ ಆಟಗಾರರು ಈಗಾಗಲೇ ಐಸೋಲೇಷನ್‌ಗೆ ಒಳಗಾಗಿದ್ದು, ಅವರು ಇನ್ನುಳಿದ ಎರಡು ಪಂದ್ಯಗಳಿಂದ ದೂರ ಉಳಿಯಲಿದ್ದಾರೆಂದು ಭಾರತ ತಂಡದ ಹೆಡ್‌ ಕೋಚ್‌ ರಾಹುಲ್‌ ದ್ರಾವಿಡ್‌ ಬುಧವಾರ ಪಂದ್ಯದ ಸಮಯಲ್ಲಿ ಹೇಳಿದ್ದರು. ಎರಡನೇ ಪಂದ್ಯವಾಡಿದ ಅದೇ ತಂಡವೇ ಇಂದು ಮೂರನೇ ಕಾದಾಟದಲ್ಲಿ ತೊಡಗಲಿದೆ. ಆದರೆ, ನವದೀಪ್ ಸೈನಿ ಗಾಯಕ್ಕೆ ತುತ್ತಾಗಿದ್ದು, ಅವರು ಅಲಭ್ಯರಾಗದ ಪಕ್ಷದಲ್ಲಿ ಅವರ ಸ್ಥಾನದಲ್ಲಿ ಅರ್ಷದೀಪ್‌ ಸಿಂಗ್ ಅಥವಾ ಇಶಾನ್‌ ಪೊರೆಲ್‌ ಅವರಲ್ಲಿ ಒಬ್ಬರು ಕಣಕ್ಕೆ ಇಳಿಯಲಿದ್ದಾರೆ. ಭಾರತ: ಶಿಖರ್‌ ಧವನ್‌ (ನಾಯಕ), ಋತುರಾಜ್‌ ಗಾಯಕ್ವಾಡ್‌, ದೇವದತ್‌ ಪಡಿಕ್ಕಲ್‌, ಸಂಜು ಸ್ಯಾಮ್ಸನ್‌(ವಿ.ಕೀ), ನಿತೀಶ್‌ ರಾಣಾ, ಭುವನೇಶ್ವರ್‌ ಕುಮಾರ್‌, ರಾಹುಲ್‌ ಚಹರ್‌, ನವದೀಪ್ ಸೈನಿ/ಇಶಾನ್‌ ಪೊರೆಲ್‌/ಅರ್ಷದೀಪ್‌ ಸಿಂಗ್, ಕುಲ್ದೀಪ್‌ ಯಾದವ್‌, ಚೇತನ್‌ ಸಕರಿಯಾ ಹಾಗೂ ವರುಣ್‌ ಚಕ್ರವರ್ತಿ ಶ್ರೀಲಂಕಾ ಮಾಡು ಇಲ್ಲವೇ ಮಡಿ ಪಂದ್ಯದಲ್ಲಿ ಗೆಲುವು ಸಾಧಿಸಿದ್ದ ಶ್ರೀಲಂಕಾ ತಂಡಕ್ಕೆ ಹಲವು ವರ್ಷಗಳ ಬಳಿಕ ಟಿ20 ಸರಣಿ ಜಯಿಸಲು ಇನ್ನು ಒಂದು ಮೆಟ್ಟಿಲು ಮಾತ್ರ ಬಾಕಿ ಇದೆ. ಕಳೆದ ಪಂದ್ಯದಲ್ಲಿ ಕಣಕ್ಕೆ ಇಳಿದಿದ್ದ ತಂಡವನ್ನೇ ನಾಯಕ ದಸೂನ್‌ ಶಾನಕ ಇಂದು(ಗುರುವಾರ) ಕಣಕ್ಕೆ ಇಳಿಸಲಿದ್ದಾರೆ. ಶ್ರೀಲಂಕಾ: ಅವಿಷ್ಕ ಫರ್ನಾಂಡೊ, ಮಿನೋದ್ ಭಾನುಕ (ವಿಕೆಟ್‌ಕೀಪರ್‌), ಧನಂಜಯ ಡಿ'ಸಿಲ್ವಾ, ಸಾದೀರ ಸಮರವಿಕ್ರಮ, ದಸುನ್ ಶನಕ (ನಾಯಕ), ರಮೇಶ್ ಮೆಂಡಿಸ್‌, ವಾನಿಂದು ಹಸರಂಗ, ಚಮಿಕ ಕರುಣಾರತ್ನೆ, ಇಸುರು ಉದಾನ, ಅಖಿಲ ಧನಂಜಯ, ದುಶ್ಮಾಂತ ಚಾಮೀರ. ಪಂದ್ಯದ ವಿವರ ಮುಖಾಮುಖಿ: ದಿನಾಂಕ, ಸಮಯ: ಜುಲೈ 29-2021, ರಾತ್ರಿ 08:00 ಗಂಟೆಗೆ ಸ್ಥಳ: ಆರ್‌ ಪ್ರೇಮದಾಸ ಕ್ರೀಡಾಂಗಣ, ಕೊಲಂಬೊ ನೇರ ಪ್ರಸಾರ: ಸೋನಿ ನೆಟ್‌ವರ್ಕ್‌
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3ydNqCj
