ಬೆಂಗಳೂರು: ಸಿಎಂ ಸ್ಥಾನಕ್ಕೆ ಬಳಿಕ ಹಂಗಾಮಿ ಸಿಎಂ ಆಗಿರುವ ಯಡಿಯೂರಪ್ಪ ಮಂಗಳವಾರ ಶಾಂತಚಿತ್ತರಾಗಿ ಸಹಜ ರೀತಿಯಲ್ಲೇ ದಿನ ಕಳೆದರು. ಬೆಳಗಿನ ವಾಯುವಿಹಾರ, 'ಕಾವೇರಿ' ಆವರಣದಲ್ಲಿರುವ ಗೋವುಗಳ ಆರೈಕೆ, ಭೇಟಿಗೆ ಬಂದ ಗಣ್ಯರೊಂದಿಗೆ ಮಾತುಕತೆ ಉಪಾಹಾರ ಎಲ್ಲವೂ ಸಹಜವಾಗಿಯೇ ನಡೆಯಿತು. ಹಲವು ನಾಯಕರು, ಮಾಜಿ ಸಚಿವರಾದ ಬಸವರಾಜ ಬೊಮ್ಮಾಯಿ, ಮುರುಗೇಶ್‌ ನಿರಾಣಿ, ಎಂ.ಪಿ. ರೇಣುಕಾಚಾರ್ಯ ಸೇರಿದಂತೆ ಹಲವು ನಾಯಕರು, ಪ್ರಮುಖರೊಂದಿಗೆ ಮಾತುಕತೆ ನಡೆಸಿದರು. ಸ್ವಪಕ್ಷೀಯರು ಮಾತ್ರವಲ್ಲದೆ, ಕಾಂಗ್ರೆಸ್‌ನ ಸಿ.ಎಂ. ಇಬ್ರಾಹಿಂ, ಜೆಡಿಎಸ್‌ನ ಸಾ.ರಾ. ಮಹೇಶ್‌, ಬಿಎಸ್‌ಪಿ ಉಚ್ಚಾಟನೆಗೊಂಡಿರುವ ಎನ್‌.ಮಹೇಶ್‌ ಕೂಡ ಯಡಿಯೂರಪ್ಪ ಅವರನ್ನು ಭೇಟಿಯಾಗಿ ಸಮಾಲೋಚಿಸಿದರು. ಸಂಜೆ ಹೊತ್ತಿಗೆ ರಾಜ್ಯ ಬಿಜೆಪಿ ಉಸ್ತುವಾರಿ ಅರುಣ್‌ ಸಿಂಗ್‌, ರಾಜ್ಯ ಬಿಜೆಪಿ ಅಧ್ಯಕ್ಷ ನಳಿನ್‌ ಕುಮಾರ್‌ ಕಟೀಲ್‌ ಭೇಟಿಯಾಗಿ ಮಾತುಕತೆ ನಡೆಸಿದರು. ನಂತರ ಕೇಂದ್ರ ಸಚಿವರಾದ ಧರ್ಮೇಂದ್ರ ಪ್ರಧಾನ್‌, ಕಿಶನ್‌ರೆಡ್ಡಿ ಅವರನ್ನು ಯಡಿಯೂರಪ್ಪ ಅವರ ನಿವಾಸಕ್ಕೆ ತೆರಳಿ ಚರ್ಚೆ ನಡೆಸಿದರು. 15 ನಿಮಿಷ ತಡವಾಗಿ ಎದ್ದ ಬಿಎಸ್‌ವೈ ಯಡಿಯೂರಪ್ಪ ಅವರ ಮಂಗಳವಾರದ ದಿನಚರಿ ಬಗ್ಗೆ ಮಾಹಿತಿ ಹಂಚಿಕೊಂಡ ಹಿರಿಯ ಪುತ್ರಿ ಪದ್ಮಾವತಿ, ಮಂಗಳವಾರವೂ ತಂದೆಯವರ ದಿನಚರಿ ಎಂದಿನಂತೆಯೇ ಸಹಜವಾಗಿತ್ತು. ಸಾಮಾನ್ಯವಾಗಿ ಬೆಳಗ್ಗೆ 6ರಿಂದ 6.30ರೊಳಗೆ ಏಳುತ್ತಾರೆ. ಮಂಗಳವಾರ 10- 15 ನಿಮಿಷ ತಡವಾಯಿತು. ನಂತರ ಪತ್ರಿಕೆಗಳನ್ನು ಓದಿ ವಾಕಿಂಗ್‌ ಮುಗಿಸಿದರು. ಬೆಳಗಿನ ಉಪಾಹಾರವನ್ನು ಭೇಟಿಗೆ ಬಂದವರೊಂದಿಗೆ ಸೇವಿಸುವುದು ವಾಡಿಕೆ. ಅದರಂತೆ ಮಂಗಳವಾರ ಹಿರಿಯರಾದ ಬಸವರಾಜ ಬೊಮ್ಮಾಯಿ, ಮುರುಗೇಶ್‌ ನಿರಾಣಿ, ರೇಣುಕಾಚಾರ್ಯ ಅವರೊಂದಿಗೆ ಉಪಾಹಾರ ಸೇವಿಸಿದರು. ಮಧ್ಯಾಹ್ನ 1.30ಕ್ಕೆ ಊಟ ಮುಗಿಸಿ ಅರ್ಧ ಗಂಟೆ ವಿಶ್ರಾಂತಿ ಪಡೆದರು. ಬಳಿಕ ಅಧಿಕಾರಿಗಳೊಂದಿಗೆ ಮಾತುಕತೆ ನಡೆಸಿ ಸಂಜೆ ಇನ್ನಷ್ಟು ಗಣ್ಯರನ್ನು ಭೇಟಿಯಾದರು ಎಂದು ವಿವರಿಸಿದರು. ''ಸಿಎಂ ಸ್ಥಾನಕ್ಕೆ ರಾಜೀನಾಮೆ ನೀಡಿದ ಬಳಿಕವೂ ಅವರಲ್ಲಿ ಯಾವುದೇ ಬದಲಾವಣೆ ಕಾಣುತ್ತಿಲ್ಲ. ಅದು ಅವರ ಶಕ್ತಿ. ಯಾವುದನ್ನೇ ಆಗಲಿ ಉತ್ತಮ ರೀತಿಯಲ್ಲಿ ಸ್ವೀಕರಿಸುತ್ತಾರೆ. ನಾವು ಗಮನಿಸಿದಂತೆ ಅವರು ನಮ್ಮ ಬಳಿ ಚರ್ಚಿಸಿದ್ದನ್ನೇ ಮಾಧ್ಯಮಗಳಿಗೂ ಹೇಳುತ್ತಾರೆ. ಅಂದರೆ ಒಳಗೊಂದು ಹೊರಗೊಂದು ಅವರಲ್ಲಿ ಇಲ್ಲ. ಅದು ನಮಗೆ ಹೆಮ್ಮೆಯ ವಿಷಯ,'' ಎಂದು ಹೇಳಿದರು. ''ತಂದೆಯವರು ಬಹಳ ದೃಢ ಮನಸ್ಸಿನವರು. ಆದರೆ ಸೋಮವಾರ ಭಾಷಣ ಮಾಡುವಾಗ ಹಿಂದಿನದ್ದೆಲ್ಲಾನೆನಪಾಗಿ ಭಾವುಕರಾಗಿದ್ದಾರೆ. ಅವರು ಮೇಲ್ನೋಟಕ್ಕೆ ಬಿಗು ಮನಸ್ಸಿನವರಂತೆ ಕಂಡರೂ ಮನಸ್ಸು ಬಹಳ ಮೃದು,'' ಎಂದು ತಿಳಿಸಿದರು. ''ನಮ್ಮ ಬಳಿ ಮಾತನಾಡುವಾಗಲು ಪಕ್ಷದಿಂದ ಎಲ್ಲ ಒಳ್ಳೆಯದಾಗಿದೆ. ಮಾಡುವುದಕ್ಕೆ ಇನ್ನೂ ಬೇಕಾದಷ್ಟು ಕೆಲಸವಿದ್ದು, ಅದರಲ್ಲಿ ತೊಡಗಿಸಿಕೊಳ್ಳುವುದಾಗಿ ಹೇಳಿದ್ದರು. ಸೋಮವಾರ ಕಾರ್ಯಕ್ರಮಕ್ಕೆ ಹೊರಡುವಾಗಲೂ ಸಹಜವಾಗಿಯೇ ಇದ್ದರು. ಮನಸ್ಸಿನಲ್ಲಿ ಎಷ್ಟೇ ಒತ್ತಡವಿದ್ದರೂ ಹೊರಗೆ ತೋರಿಸಿಕೊಳ್ಳುವುದಿಲ್ಲ. ಇತ್ತೀಚೆಗೆ ಸ್ವಲ್ಪ ಮಾತು ಕಡಿಮೆ ಮಾಡಿದ್ದರು. ಸೋಮವಾರ ಮಧ್ಯಾಹ್ನ ಮನೆಗೆ ನಗುಮುಖದಲ್ಲಿ ಬಂದರೂ ಸ್ವಲ್ಪ ಭಾವುಕಾಗಿದ್ದು ಕಂಡಿತು. ಊಟ ಸೇವಿಸಿ ಸ್ವಲ್ಪ ಹೊತ್ತು ವಿಶ್ರಾಂತಿ ಪಡೆದರು,'' ಎಂದು ಮಾತು ಮುಗಿಸಿದರು.
from India & World News in Kannada | VK Polls https://ift.tt/3BXn5L4
