ಕೊಲಂಬೊ: ಅಂತಾರಾಷ್ಟ್ರೀಯ ಪಂದ್ಯಕ್ಕೆ ಸಿದ್ದರಾಗುತ್ತಿರುವ ಭಾರತ ತಂಡದ ಯುವ ಆಟಗಾರರಿಗೆ ತಾಂತ್ರಿಕ ಸಲಹೆಗಳನ್ನು ನೀಡಿದ್ದು ತುಂಬಾ ತಡವಾಯಿತು ಎಂದು ಹೆಡ್‌ ಕೋಚ್‌ ರಾಹುಲ್‌ ದ್ರಾವಿಡ್‌ ವಿರುದ್ಧ 1-2 ಅಂತರದಲ್ಲಿ ಟಿ20 ಸರಣಿ ಸೋಲಿನ ಬಳಿಕ ಹೇಳಿದರು. ಇಲ್ಲಿನ ಆರ್‌ ಪ್ರೇಮದಾಸ ಕ್ರೀಡಾಂಗಣದಲ್ಲಿ ಗುರುವಾರ ರಾತ್ರಿ ನಡೆದಿದ್ದ ಪಂದ್ಯದಲ್ಲಿ ಮೊದಲು ಬ್ಯಾಟ್‌ ಮಾಡಿದ್ದ ಭಾರತ ತಂಡ, ವಾನಿಂದು ಹಸರಂಗ ಸ್ಪಿನ್‌ ಮೋಡಿಗೆ ನಲುಗಿ ತನ್ನ ಪಾಲಿನ 20 ಓವರ್‌ಗಳಿಗೆ 8 ವಿಕೆಟ್‌ ನಷ್ಟಕ್ಕೆ 81 ರನ್‌ಗಳಿಗೆ ಸೀಮಿತವಾಗಿತ್ತು. ಬಳಿಕ ಗುರಿ ಹಿಂಬಾಲಿಸಿದ ಶ್ರೀಲಂಕಾ 14.3 ಓವರ್‌ಗಳಿಗೆ ಮೂರು ವಿಕೆಟ್‌ ಕಳೆದುಕೊಂಡು 82 ರನ್‌ ಗಳಿಸಿ 7 ವಿಕೆಟ್‌ ಸುಲಭ ಗೆಲುವು ಪಡೆದಿತ್ತು. ಆ ಮೂಲಕ ಚುಟುಕು ಸರಣಿ ಮುಡುಗೇರಿಸಿಕೊಂಡಿತು. ಕೃಣಾಲ್‌ ಪಾಂಡ್ಯಗೆ ಕೋವಿಡ್‌-19 ಪಾಸಿಟಿವ್‌ ಬಂದಿದ್ದರಿಂದ ಪ್ರವಾಸಿಗರಿಗೆ ಭಾರಿ ಹಿನ್ನಡೆಯಾಯಿತು. ಏಕೆಂದರೆ, ಸ್ಪಿನ್‌ ಆಲ್‌ರೌಂಡರ್‌ ಸಂಪರ್ಕ ಹೊಂದಿದ್ದ ಹಾರ್ದಿಕ್‌ ಪಾಂಡ್ಯ ಸೇರಿ ಪ್ರಮುಖ 8 ಆಟಗಾರರು ಐಸೋಲೇಷನ್‌ಗೆ ಒಳಗಾಗಿದ್ದರಿಂದ ಕೊನೆಯ ಎರಡು ಟಿ20 ಪಂದ್ಯಗಳಲ್ಲಿ ಆಡಲು ಸಾಧ್ಯವಾಗಿರಲಿಲ್ಲ. ಈ ಹಿನ್ನೆಲೆಯಲ್ಲಿ ಬೆಂಚ್‌ ಆಟಗಾರರಿಗೆ ಅವಕಾಶ ನೀಡಲಾಗಿತ್ತು. ಆದರೆ, ಯುವ ಆಟಗಾರರು ಸಿಂಹಳೀಯರ ವಿರುದ್ಧ ಪುಟಿದೇಳುವಲ್ಲಿ ವಿಫಲರಾಗಿದ್ದರು. ಪೋಸ್ಟ್‌ ಮ್ಯಾಚ್‌ ಪ್ರೆಸ್‌ ಕಾನ್ಫೆರೆನ್ಸ್‌ನಲ್ಲಿ ಮಾತನಾಡಿದ ರಾಹುಲ್‌ ದ್ರಾವಿಡ್‌, "ಅಂತಾರಾಷ್ಟ್ರೀಯ ಪಂದ್ಯ ಆಡುವುದಕ್ಕೂ ಮುನ್ನ ಯುವ ಆಟಗಾರರಿಗೆ ತಾಂತ್ರಿಕ ಸಲಹೆ ನೀಡಿದ್ದು ತುಂಬಾ ತಡವಾಯಿತು. ಸಹಜವಾಗಿ, ನಾವು ಐದು ಬ್ಯಾಟ್ಸ್‌ಮನ್‌ಗಳು ಮತ್ತು ಆರು ಬೌಲರ್‌ಗಳೊಂದಿಗೆ ಹೇಗೆ ಆಡಬೇಕು, ಇನ್ನಿಂಗ್ಸ್ ಹೇಗೆ ಬೆಳೆಸಬೇಕು ಎಂಬಂತಹ ತಂತ್ರಗಳನ್ನು ನಾವು ಚರ್ಚೆ ನಡೆಸಿದ್ದೆವು. ಮೊದಲು ಬೌಲಿಂಗ್‌ ಆಯ್ಕೆ ಮಾಡಿಕೊಳ್ಳಬೇಕೇ ಎಂಬ ಬಗ್ಗೆಯೂ ಚರ್ಚೆ ನಡೆಸಿದೆವು. ಆದರೆ, ಕಳೆದ ಪಂದ್ಯದ ಅನುಭವದ ಆಧಾರದ ಮೇಲೆ ಮೊದಲು ಬ್ಯಾಟಿಂಗ್‌ ಆಯ್ಕೆ ಮಾಡಿಕೊಂಡೆವು," ಎಂದು ಹೇಳಿದರು. "ಕೇವಲ ಐದು ಬ್ಯಾಟ್ಸ್‌ಮನ್‌ಗಳ ಹೊರತಾಗಿಯೂ ಕಳೆದ ಪಂದ್ಯದಲ್ಲಿ ನಾವು ಮೊದಲು ಬ್ಯಾಟ್‌ ಮಾಡಿ ಉತ್ತಮವಾಗಿ ಇನಿಂಗ್ಸ್‌ ಕಟ್ಟಿದ್ದೆವು. ಆದರೆ, ಡೆತ್‌ ಓವರ್‌ಗಳಲ್ಲಿ ವೇಗವಾಗಿ ಬ್ಯಾಟ್‌ ಮಾಡಿದ್ದರೆ, 145 ರಿಂದ 150 ರನ್‌ಗಳ ವರೆಗೂ ದಾಖಲಿಸಬಹುದಿತ್ತು. ಆ ಮೂಲಕ ಪಂದ್ಯ ಗೆಲ್ಲುವ ಸಾಧ್ಯತೆ ಇತ್ತು," ಎಂದು ಕೋಚ್‌ ತಿಳಿಸಿದರು. ಭಾರತ ತಂಡದ ತಾಂತ್ರಿಕ ಯೋಜನೆಯನ್ನು ಸಮರ್ಥಿಸಿಕೊಂಡ ದ್ರಾವಿಡ್‌, ಶ್ರೀಲಂಕಾ ತಂಡದ ಬೌಲಿಂಗ್‌ ಪ್ರದರ್ಶನವನ್ನು ಮುಕ್ತಕಂಠದಿಂದ ಗುಣಗಾನ ಮಾಡಿದರು. "ಪಂದ್ಯಕ್ಕೂ ಮುನ್ನ ನಾವು ತಾಂತ್ರಿಕ ಸಂಗತಿಗಳ ಬಗ್ಗೆ ಚರ್ಚೆ ನಡೆಸಿದ್ದೆವು; ಅಂದರೆ, ವಿಕೆಟ್‌ ಯಾವ ರೀತಿ ಇದೆ, ನಾವು ಯಾವ ರೀತಿ ತಯಾರಿ ನಡೆಸಬೇಕು ಎಂಬಂತೆ ಯೋಜನೆ ರೂಪಿಸಿಕೊಂಡಿದ್ದೆವು. ಆದರೆ, ಕೆಲವೊಮ್ಮೆ ಅಂದುಕೊಂಡ ಯೋಜನೆ ಸಕಾರವಾಗುವುದಿಲ್ಲ. ಪಂದ್ಯ ಎಂದ ಮೇಲೆ ಏರಿಳಿತಗಳು ಇದ್ದೇ ಇರುತ್ತವೆ ಅಲ್ಲವೇ.. ಇದರರ್ಥ ನಮ್ಮ ಯೋಜನೆ ತಪ್ಪಾಗಿದೆ ಎಂದಲ್ಲ. ಬದಲಿಗೆ, ಶ್ರೀಲಂಕಾ ಬೌಲರ್‌ಗಳು ನಮಗಿಂತ ಅತ್ಯುತ್ತಮವಾಗಿ ಬೌಲ್‌ ಮಾಡಿದ್ದಾರೆ. ನಾವು ಕೆಲ ಎಸೆತಗಳನ್ನು ಸರಿಯಾಗಿ ಅರ್ಥ ಮಾಡಿಕೊಳ್ಳುವಲ್ಲಿ ವಿಫಲರಾಗಿದ್ದೇವೆ," ಎಂದರು. "ಕೇವಲ ಐದು ಬ್ಯಾಟ್ಸ್‌ಮನ್‌ಗಳೊಂದಿಗೆ ಕಣಕ್ಕೆ ಇಳಿದಾಗ, 25 ರನ್‌ಗಳಿಗೆ 4 ವಿಕೆಟ್‌ ಕಳೆದುಕೊಂಡರೆ ಖಂಡಿತಾ ತುಂಬಾ ಹಿನ್ನಡೆಯಾಗುತ್ತದೆ. ಪಂದ್ಯಕ್ಕೂ ಮುನ್ನ ತಾಂತ್ರಿಕ ಸಲಹೆಗಳ ಬದಲು ಮಾನಸಿಕ ಸಂಗತಿಗಳ ಬಗ್ಗೆ ನಾವು ಹೆಚ್ಚು ಚರ್ಚೆ ನಡೆಸಿದ್ದೆವು," ಎಂದು ರಾಹುಲ್‌ ದ್ರಾವಿಡ್‌ ಹೇಳಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3BSLq4x
