ವಾಷಿಂಗ್ಟನ್: ನಮ್ಮ ಸೌರಮಂಡಲದ ಕೇಂದ್ರ ಬಿಂದು . ಭೂಮಿಯೂ ಒಳಗೊಂಡಂತೆ 8 ಬೃಹತ್ ಗ್ರಹಕಾಯಗಳು, 218 ಉಪಗ್ರಹಗಳು, ಹಲವು ಕುಬ್ಜ ಗ್ರಹಗಳು, ಅಸಂಖ್ಯ ಕ್ಷುದ್ರಗ್ರಹಗಳನ್ನು ಸಲುಹುತ್ತಿರುವ ಭಾಸ್ಕರ, ಸೌರಮಂಡಲದ ಆಗು-ಹೋಗುಗಳಿಗೆ ಕಾರಣೀಭೂತನೂ ಹೌದು. ಭುಮಿಯ ಮೇಲಿನ ಸಕಲ ಜೀವರಾಶಿಗಳಿಗೂ ಸೂರ್ಯನೇ ಪ್ರಮುಖ ಆಧಾರ. ಸುಡುವ ಸೂರ್ಯನ ಕುರಿತು ಮಾನವನ ಕುತೂಹಲ ಇಂದು ನಿನ್ನೆಯದಲ್ಲ. ಸೂರ್ಯನಲ್ಲಿರುವುದೇನು ಎಂಬ ಪ್ರಶ್ನೆಗೆ ಸಾವಿರಾರು ವರ್ಷಗಳಿಂದ ಮಾನವ ಉತ್ತರ ಕಂಡುಕೊಳ್ಳುವ ಪ್ರಯತ್ನ ನಡೆಸುತ್ತಲೇ ಇದ್ದಾನೆ. ಆಧುನಿಕ ಖಗೋಳ ವಿಜ್ಞಾನ ಈ ಪ್ರಶ್ನೆಗಳಿಗೆ ಉತ್ತರವನ್ನೂ ನೀಡಿದೆ. ಆದರೂ ಸೂರ್ಯನ ಕುರಿತು ತಿಳಿದುಕೊಳ್ಳುವುದು ಇನ್ನೂ ಬಹಳಷ್ಟಿದ್ದು, ಈ ನಿಟ್ಟಿನಲ್ಲಿ ಖಗೋಳ ವಿಜ್ಞಾನಿಗಳು ತಮ್ಮ ಪ್ರಯತ್ನವನ್ನು ಮುಂದುವರೆಸಿದ್ದಾರೆ. ಅದರಂತೆ ಅಮೆರಿದ ಬಾಹ್ಯಾಕಾಶ ಸಂಸ್ಥೆ(ನಾಸಾ) ಕೂಡ ಸೂರ್ಯನ ಅಧ್ಯಯನದಲ್ಲಿ ನಿರತವಾಗಿದ್ದು, ಸೌರಮಂಡಲದ ಹಿರಿಯ ಸದಸ್ಯನ ಕುರಿತು ಅನೇಕ ಸಂಶೋಧನೆಗಳನ್ನು ಮಾಡಿದೆ. ಇತ್ತೀಚಿಗೆ ಸೂರ್ಯನ ಒಡಲಿನಿಂದ ಚಿಮ್ಮುವ ಸೌರ ಪ್ಲಾಸ್ಮಾದ ದೃಶ್ಯವನ್ನು ಸೆರೆಹಿಡಿದಿದ್ದು, ಕ್ಷಣಮಾತ್ರದಲ್ಲಿ ಅಗಾಧ ಪ್ರಮಾಣದ ಶಕ್ತಿ ಬಾಹ್ಯಾಕಾಶಕ್ಕೆ ಚಿಮ್ಮುತ್ತಿರುವ ಅದ್ಭುತ ದೃಶ್ಯ ಖಗೋಳ ಪ್ರಿಯರ ಗಮನ ಸೆಳೆದಿದೆ. ಸೌರ ಪ್ಲಾಸ್ಮಾದ ಈ ಬೃಹತ್ ಅಲೆಗಳು ಬಾಹ್ಯಾಕಾಶದಲ್ಲಿ ಗಂಟೆಗೆ ಸುಮಾರು 1 ಮಿಲಿಯನ್ ಮೈಲುಗಳು ಅಥವಾ 1,600,000 ಕಿ. ಮೀ. ವೇಗದಲ್ಲಿ ಚಲಿಸುತ್ತವೆ. ಕೊರೊನಲ್ ಮಾಸ್ ಎಜೆಕ್ಸನ್(ಸಿಎಂಇ) ಎಂದು ಕರೆಯಲ್ಪಡುವ ಈ ವಿದ್ಯಮಾನ ಕೆಲವೊಮ್ಮೆ ಭೂಮಿಗೂ ಹಾನಿ ಮಾಡುವ ಸಂಭವ ಇರುತ್ತದೆ. 2013ರಲ್ಲಿ ನಾಸಾದ ಸೌರ ಡೈನಾಮಿಕ್ಸ್ ಅಬ್ಸರ್ವೇಟರಿ (ಎಸ್‌ಡಿಒ)ಯ ತೀವ್ರ ನೇರಳಾತೀತ ಬೆಳಕಿನಲ್ಲಿ ಈ ಪ್ಲಾಸ್ಮಾ ಸ್ಪೋಟ ವಿದ್ಯಮಾನ ಸೆರೆಯಾಗಿದ್ದು, ಈ ದೃಶ್ಯ ಸೂರ್ಯನಲ್ಲಿರುವ ಅಗಾಧ ಶಕ್ತಿಯ ಪರಿಚಯ ಮಾಡಿಕೊಡುತ್ತದೆ. ಪ್ರಬಲ ಸೌರ ಸ್ಪೋಟಗಳು ಭೂಮಿಯ ಮೇಲಿನ ವಿದ್ಯುತ್ ವ್ಯವಸ್ಥೆಗೆ ಪೆಟ್ಟು ನೀಡಬಹುದಾಗಿದ್ದು, ಸಂವಹನ ಮತ್ತು ನ್ಯಾವಿಗೇಶನ್ ವ್ಯವಸ್ಥೆಗೂ ಧಕ್ಕೆ ತರಬಹುದು.
from India & World News in Kannada | VK Polls https://ift.tt/2WrTmcF
