ವಾಷಿಂಗ್ಟನ್: ತಾಲಿಬಾನಿಗಳು ಯಾವುದೇ ಉಗ್ರ ಸಂಘಟನೆಯವರಲ್ಲ, ಅವರು ಕೇವಲ ಸಾಮಾನ್ಯ ನಾಗರಿಕರು ಎಂದು ಪಾಕಿಸ್ತಾನದ ಪ್ರಧಾನಿ ಹೇಳಿದ್ದಾರೆ. ಗಡಿಯಲ್ಲಿ ಮೂರು ಮಿಲಿಯನ್ ನಿರಾಶ್ರಿತರು ಇದ್ದಾರೆ. ಹೀಗಿರುವಾಗ ಅವರನ್ನು ದೇಶವು ಹೊಡೆದುರುಳಿಸಲು ಸಾಧ್ಯ ಎಂದಿದ್ದಾರೆ. ಪಿಬಿಎಸ್ ನ್ಯೂ ಅವರ್‌ಗೆ ನೀಡಿದ್ದ ಸಂದರ್ಶನದಲ್ಲಿ ಇಮ್ರಾನ್ ಖಾನ್, ಪಾಕಿಸ್ತಾನವು ಸುಮಾರು ಮೂರು ಮಿಲಿಯನ್ ಆಫ್ಘನ್ ನಿರಾಶ್ರಿತರಿಗೆ ಆಶ್ರಯ ನೀಡಿದೆ. ಅವರಲ್ಲಿ ಬಹುತೇಕ ಮಂದಿ ಹೋರಾಟಗಾರರು ಸೇರಿರುವ ಪಶ್ಟುನ್ಸ್ ಸಮುದಾಯದವರಾಗಿದ್ದಾರೆ ಎಂದು ಹೇಳಿದ್ದಾರೆ. 'ಈಗ 5 ಲಕ್ಷ ಜನರ ಕೆಲವು ಶಿಬಿರಗಳಿವೆ, 1 ಲಕ್ಷ ಜನರ ಶಿಬಿರಗಳಿವೆ. ತಾಲಿಬಾನಿಗಳು ಉಗ್ರ ಸಂಘಟನೆಗಳಲ್ಲ. ಅವರು ಸಾಮಾನ್ಯ ನಾಗರಿಕರು. ಈ ಶಿಬಿರಗಳಲ್ಲಿ ಆ ಸಂಘಟನೆಯ ಕೆಲವು ಜನರು ಇದ್ದರೆ, ಈ ಜನರನ್ನು ಹೇಗೆ ತಾನೆ ಹೊಡೆದುರುಳಿಸಲು ಸಾಧ್ಯ?' ಎಂದು ಪ್ರಶ್ನಿಸಿದ್ದಾರೆ. 'ಈ ಸುರಕ್ಷಿತ ಸ್ವರ್ಗಗಳು ಎಲ್ಲಿವೆ? ಪಾಕಿಸ್ತಾನದಲ್ಲಿ ಮೂರು ಮಿಲಿಯನ್ ನಿರಾಶ್ರಿತರಿದ್ದಾರೆ. ಅವರು ತಾಲಿಬಾನ್ ಎಂಬ ಒಂದೇ ಸಮುದಾಯಕ್ಕೆ ಸೇರಿದವರಾಗಿದ್ದಾರೆ' ಎಂದು ಪಾಕಿಸ್ತಾನವು ತಾಲಿಬಾನ್ ಉಗ್ರರ ಸುರಕ್ಷಿತ ಸ್ವರ್ಗ ಎಂಬ ಆರೋಪದ ಬಗ್ಗೆ ಇಮ್ರಾನ್ ಖಾನ್ ಪ್ರತಿಕ್ರಿಯಿಸಿದ್ದಾರೆ. 2001ರ ಸೆಪ್ಟೆಂಬರ್ 11ರಂದು ಅಮೆರಿಕದ ಪೆಂಟಗಾನ್ ಮೇಲೆ ನಡೆದ ದಾಳಿಯಲ್ಲಿ ಪಾಕಿಸ್ತಾನದ ಯಾವುದೇ ರೀತಿಯ ಪಾತ್ರ ಇಲ್ಲದಿದ್ದರೂ, ಅಫ್ಘಾನಿಸ್ತಾನದಲ್ಲಿ ನಡೆದ ಅಮೆರಿಕದ ಯುದ್ಧದಲ್ಲಿ ಸಾವಿರಾರು ಪಾಕಿಸ್ತಾನಿಯರು ಜೀವ ಕಳೆದುಕೊಳ್ಳುವಂತಾಯಿತು ಎಂದು ಹೇಳಿದ್ದಾರೆ. ಅಫ್ಘಾನಿಸ್ತಾನ ಸರಕಾರದ ವಿರುದ್ಧ ಕೃತ್ಯಗಳನ್ನು ನಡೆಸಲು ತಾಲಿಬಾನ್ ಉಗ್ರ ಸಂಘಟನೆಗೆ ಪಾಕಿಸ್ತಾನ ಆರ್ಥಿಕವಾಗಿ, ಸೇನೆಯ ಮೂಲಕ ಹಾಗೂ ಬೇಹುಗಾರಿಕೆ ಮಾಹಿತಿಗಳ ಮೂಲಕ ನೆರವು ನೀಡುತ್ತಿದೆ ಎಂಬ ಆರೋಪವಿದೆ. ಆದರೆ ಈ ಆರೋಪಗಳು ಶುದ್ಧ ಸುಳ್ಳು ಎಂದು ಇಮ್ರಾನ್ ಖಾನ್ ಹೇಳಿದ್ದಾರೆ.
from India & World News in Kannada | VK Polls https://ift.tt/3iYy5iD
