ಹೊಸದಿಲ್ಲಿ: ಟೀಮ್ ಇಂಡಿಯಾದಲ್ಲಿ ಸ್ಟಾರ್‌ ಆಲ್ರೌಂಡರ್ ಅವರ ಸ್ಥಾನವನ್ನು ದೀಪಕ್‌ ಚಹರ್‌ ಹಾಗೂ ಭುವನೇಶ್ವರ್ ಕುಮಾರ್ ತುಂಬಬಲ್ಲರು ಎಂದು ಭಾರತ ತಂಡದ ಮಾಜಿ ನಾಯಕ ಹಾಗೂ ಬ್ಯಾಟಿಂಗ್‌ ದಿಗ್ಗಜ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ತಮ್ಮ ಸ್ಪೋಟಕ ಬ್ಯಾಟಿಂಗ್‌ ಹಾಗೂ ಚಾಣಾಕ್ಷತನದ ಬೌಲಿಂಗ್‌ ಮೂಲಕ ಹಲವು ಬಾರಿ ಭಾರತ ತಂಡವನ್ನು ಗೆಲ್ಲಿಸಿರುವ ಹಾರ್ದಿಕ್‌ ಪಾಂಡ್ಯ, ಪ್ರಸ್ತುತ ಫಾರ್ಮ್‌ ಕಳೆದುಕೊಂಡಿದ್ದಾರೆ. ಬೆನ್ನು ಶಸ್ತ್ರ ಚಿಕಿತ್ಸೆ ಪಡೆದ ಬಳಿಕ ಹಾರ್ದಿಕ್‌, ನಿಯಮಿತವಾಗಿ ಬೌಲಿಂಗ್‌ ಮಾಡದೇ ಇರುವುದು ಕೂಡ ಆಲ್‌ರೌಂಡರ್‌ಗೆ ಹಿನ್ನಡೆ ತಂದೊಡ್ಡಿದೆ. ಈ ಕಾರಣದಿಂದಲೇ ಅವರನ್ನು ಇಂಗ್ಲೆಂಡ್‌ ಪ್ರವಾಸಕ್ಕೆ ಆಯ್ಕೆ ಮಾಡಿರಲಿಲ್ಲ. ಶ್ರೀಲಂಕಾ ವಿರುದ್ಧ ಇತ್ತೀಚೆಗೆ ಮುಕ್ತಾಯವಾಗಿದ್ದ ಮೂರು ಪಂದ್ಯಗಳ ಓಡಿಐ ಸರಣಿಯಲ್ಲಿಯೂ ಹಾರ್ದಿಕ್‌ ಪಾಂಡ್ಯ ಬ್ಯಾಟಿಂಗ್‌ ಹಾಗೂ ಬೌಲಿಂಗ್‌ನಲ್ಲಿ ವೈಫಲ್ಯ ಅನುಭವಿಸಿದ್ದರು. ಎರಡನೇ ಪಂದ್ಯದಲ್ಲಿ ಬ್ಯಾಟಿಂಗ್‌ಗೆ ಅವಕಾಶ ಪಡೆದುಕೊಂಡ ಹಾರ್ದಿಕ್‌ ಡಕೌಟ್‌ ಆಗಿದ್ದರು. ಹಾಗೆಯೇ ಮೂರನೇ ಹಾಗೂ ಅಂತಿಮ ಹಣಾಹಣಿಯಲ್ಲಿ ಎಲ್‌ಬಿಡಬ್ಲ್ಯು ಬಲೆಗೆ ಬಿದ್ದಿದ್ದರು. ಇನ್ನು ಟಿ20 ಸರಣಿಯ ಮೊದಲನೇ ಪಂದ್ಯದಲ್ಲಿಯೂ ಅವರ ಬ್ಯಾಟ್‌ನಿಂದ ಹೇಳಿಕೊಳ್ಳುವಂತಹ ರನ್‌ಗಳು ಮೂಡಿ ಬಂದಿರಲಿಲ್ಲ. ಡೆತ್‌ ಓವರ್‌ಗಳಲ್ಲಿ ಕ್ರೀಸ್‌ಗೆ ಬಂದಿದ್ದ ಬರೋಡ ಮೂಲದ ಆಟಗಾರ, ಕೇವಲ 10 ರನ್‌ಗಳಿಗೆ ಸೀಮಿತರಾಗಿದ್ದರು. ಇದರ ಹೊರತಾಗಿಯೂ ಭಾರತ 38 ರನ್‌ಗಳಿಂದ ಗೆಲುವು ಕಸಿದುಕೊಂಡಿತ್ತು. ಈ ಹಿಂದೆ ಏಕಾಂಗಿಯಾಗಿ ತಂಡವನ್ನು ಗೆಲ್ಲಿಸುತ್ತಿದ್ದ ಹಾರ್ದಿಕ್‌ ಇತ್ತೀಚಿನ ದಿನಗಳಲ್ಲಿ ಕಳಪೆ ಆಟದಿಂದ ಟೀಮ್ ಮ್ಯಾನೇಜ್‌ಮೆಂಟ್‌ಗೆ ನಿರಾಸೆ ಮೂಡಿಸುತ್ತಿದ್ದಾರೆ. ಹಾಗಾಗಿ, ಹಾರ್ದಿಕ್‌ ಪಾಂಡ್ಯ ಕುರಿತು ನಿರಾಶಾದಾಯಕ ವಿಷಯ ತಿಳಿಸಿದ ಸುನೀಲ್‌ ಗವಾಸ್ಕರ್‌, ಭಾರತ ತಂಡದಲ್ಲಿ ಹಾರ್ಡ್‌ ಹಿಟ್‌ ಆಲ್ರೌಂಡರ್ ಸ್ಥಾನವನ್ನು ತುಂಬಬಲ್ಲ ಇಬ್ಬರು ಆಟಗಾರರನ್ನು ಹೆಸರಿಸಿದ್ದಾರೆ. ಸ್ಪೋರ್ಟ್ಸ್‌ ತಕ್‌ ಜೊತೆ ಮಾತನಾಡಿರುವ ಗವಾಸ್ಕರ್‌, "ಹಾರ್ದಿಕ್‌ ಪಾಂಡ್ಯಗೆ ತಂಡದಲ್ಲಿ ಬ್ಯಾಕ್‌-ಅಪ್‌ ಇದೆ. ನೀವು ಇತ್ತೀಚಿಗೆ ದೀಪಕ್‌ ಚಹರ್‌ ಅವರ ಪ್ರದರ್ಶನವನ್ನು ನೋಡಿದ್ದೀರಿ. ತಾವು ಕೂಡ ಆಲ್ರೌಂಡರ್ ಎಂಬ ಸಂದೇಶವನ್ನು ಅವರು ಸಾರಿದ್ದಾರೆ. ಅಲ್ಲದೆ, ಮೂರು ವರ್ಷಗಳ ಹಿಂದೆ ಶ್ರೀಲಂಕಾ ವಿರುದ್ಧದ ಪಂದ್ಯದಲ್ಲಿ , ಧೋನಿ ಜೊತೆ ಎಂತಹ ಬ್ಯಾಟಿಂಗ್‌ ಪ್ರದರ್ಶನ ತೋರಿದ್ದರು ಎಂಬುದು ಎಲ್ಲರಿಗೂ ಗೊತ್ತಿದೆ. ಆದರೂ ಅವರಿಗೆ ಸರಿಯಾದ ಅವಕಾಶಗಳನ್ನು ನೀಡಲಾಗಿಲ್ಲ," ಎಂದು ಬೇಸರ ವ್ಯಕ್ತಪಡಿಸಿದರು. "ಭುವನೇಶ್ವರ್ ಕುಮಾರ್ ಅಂದು ಆಡಿದ್ದ ಸನ್ನಿವೇಶ ಶ್ರೀಲಂಕಾ ವಿರುದ್ಧದ ಎರಡನೇ ಓಡಿಐ ಪಂದ್ಯದಲ್ಲಿ ನಿರ್ಮಾಣವಾಗಿತ್ತು. ಆದರೆ, ಭುವನೇಶ್ವರ್ ಕುಮಾರ್ ಅವರಿಗಿಂತ ಮೇಲಿನ ಕ್ರಮಾಂಕದಲ್ಲಿ ಬ್ಯಾಟಿಂಗ್‌ಗೆ ಇಳಿದಿದ್ದ ದೀಪಕ್‌ ಚಹರ್‌, ಯಾರೂ ನಿರೀಕ್ಷೆ ಮಾಡದ ರೀತಿಯಲ್ಲಿ ಬ್ಯಾಟ್‌ ಮಾಡಿ ಭಾರತಕ್ಕೆ ರೋಚಕ ಜಯ ತಂದುಕೊಟ್ಟಿದ್ದರು," ಎಂದು ಹೇಳಿದರು. ದೀಪಕ್‌ ಚಹರ್‌ ಇತ್ತೀಚೆಗೆ ಶ್ರೀಲಂಕಾ ವಿರುದ್ಧ ಎರಡನೇ ಓಟಿಐ ಪಂದ್ಯದಲ್ಲಿ ಅಜೇಯ 69 ರನ್‌ ಗಳಿಸಿ ಭಾರತಕ್ಕೆ ಗೆಲುವು ತಂದುಕೊಟ್ಟಿದ್ದರು. ಆ ಮೂಲಕ ತಾನು ಕೂಡ ಆಲ್ರೌಂಡರ್ ಎಂಬುದನ್ನು ಸಾಬೀತುಪಡಿಸಿದ್ದರು. ಮತ್ತೊಂದೆಡೆ ಭುವನೇಶ್ವರ್ ಕುಮಾರ್ ಸಿಕ್ಕ ಸೀಮಿತ ಅವಕಾಶಗಳಲ್ಲಿ ಮೂರು ಟೆಸ್ಟ್ ಅರ್ಧಶತಕಗಳು ಹಾಗೂ ಒಂದು ಓಡಿಐ ಅರ್ಧಶತಕ ಗಳಿಸಿದ್ದಾರೆ. ಅಲ್ಲದೆ, ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ 42.75ರ ಸರಾಸರಿಯಲ್ಲಿ ರನ್‌ ಗಳಿಸಿದ್ದಾರೆ. "ಈ ಇಬ್ಬರು ಕೂಡ ಆಲ್‌ರೌಂಡರ್‌ಗಳು ಎಂದು ಯಾರೂ ಅಂದುಕೊಂಡಿರಲಿಲ್ಲ. ಇವರಲ್ಲಿಯೂ ಕೂಡ ಬ್ಯಾಟಿಂಗ್‌ ಪ್ರತಿಭೆ ಇದೆ. ಭುವನೇಶ್ವರ್ ಕುಮಾರ್ ಅವರನ್ನು ನೋಡುವುದಾದರೆ, ಅವರು 2-3 ವರ್ಷಗಳಿಂದ ತಂಡದಲ್ಲಿ ಏನು ಮಾಡಿದ್ದಾರೆಂಬುದು ಎಲ್ಲರಿಗೂ ಗೊತ್ತಿದೆ. ಸಿಕ್ಕ ಸೀಮಿತ ಅವಕಾಶಗಳಲ್ಲಿ ಮಿಂಚಿರುವ ಭುವಿ, ಮುಂದಿನ ಇನ್ನಷ್ಟು ಅವಕಾಶಗಳಿಗೆ ಅರ್ಹರಾಗಿದ್ದಾರೆ," ಎಂದಿದ್ದಾರೆ. "ಪ್ರಸ್ತುತ ಟೀಮ್ ಇಂಡಿಯಾದಲ್ಲಿ ಹಾರ್ದಿಕ್‌ ಪಾಂಡ್ಯ ಫಾರ್ಮ್‌ ಕಳೆದುಕೊಂಡಿದ್ದಾರೆ. ಹಾಗಾಗಿ ತಂಡದಲ್ಲಿ ದೀಪಕ್‌ ಚಹರ್‌ ಹಾಗೂ ಭುವನೇಶ್ವರ್ ಕುಮಾರ್ ಅವರಿಗೆ ಅವಕಾಶ ನೀಡಿದರೆ, ಅವರು ಆಲ್‌ರೌಂಡರ್‌ಗಳಾಗಿ ಬೆಳೆಯಲಿದ್ದಾರೆ," ಎಂದು ಸುನೀಲ್‌ ಗವಾಸ್ಕರ್‌ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3zDgBii
