ಕೊಲಂಬೊ: ವಿರುದ್ಧ ಎರಡನೇ ಟಿ20 ಪಂದ್ಯದಲ್ಲಿ 4 ವಿಕೆಟ್‌ಗಳಿಂದ ಸೋಲು ಅನುಭವಿಸಿದ ಬಳಿಕ ಮಾತನಾಡಿದ ನಾಯಕ ಶಿಖರ್ ಧವನ್, ಕಡಿಮೆ ಮೊತ್ತದ ರೋಚಕ ಪಂದ್ಯದಲ್ಲಿ ನಮಗೆ ಒಬ್ಬ ಬ್ಯಾಟ್ಸ್‌ಮನ್‌ ಕಡಿಮೆಯಾಗಿದ್ದರು ಎಂದು ಹೇಳಿಕೊಂಡಿದ್ದಾರೆ. ಕೋವಿಡ್‌-19 ಪಾಸಿಟಿವ್‌ ಬಂದಿದ್ದ ಕೃಣಾಲ್‌ ಪಾಂಡ್ಯ ಅವರೊಂದಿಗೆ ಸಂಪರ್ಕ ಹೊಂದಿದ್ದ ಪೃಥ್ವಿ ಶಾ, ಸೂರ್ಯಕುಮಾರ್‌ ಯಾದವ್, ಮನೀಶ್‌ ಪಾಂಡೆ ಹಾಗೂ ಇಶಾನ್‌ ಕಿಶನ್ ಅವರು ಐಸೋಲೇಷನ್‌ಗೆ ಒಳಗಾಗಿದ್ದರಿಂದ ಬುಧವಾರದ ಪಂದ್ಯದಲ್ಲಿ ಕಣಕ್ಕೆ ಇಳಿದಿರಲಿಲ್ಲ. ಕಳೆದ 24 ಗಂಟೆಗಳಲ್ಲಿ ಎರಡು ಬಾರಿ ಕೋವಿಡ್‌ ನೆಗೆಟಿವ್‌ ಬಂದ ಹೊರತಾಗಿಯೂ ಈ ಎಂಟು ಆಟಗಾರರು ಸೆಲ್ಫ್‌ ಐಸೋಲೇಷನ್‌ಗೆ ಒಳಗಾಗಿದ್ದಾರೆ ಎಂದು ಈ ಹಿಂದೆ ಬಿಸಿಸಿಐ ತಿಳಿಸಿತ್ತು. ಅಂದಹಾಗೆ, ಭಾರತ ಹಾಗೂ ಶ್ರೀಲಂಕಾ ನಡುವಿನ ಎರಡನೇ ಟಿ20 ಪಂದ್ಯ ಮಂಗಳವಾರವೇ ನಡೆಯಬೇಕಿತ್ತು. ಆದರೆ, ಟೀಮ್‌ ಇಂಡಿಯಾ ಕ್ಯಾಂಪ್‌ನಲ್ಲಿ ಸ್ಪಿನ್ನರ್ ಆಲ್‌ರೌಂಡರ್‌ ಕೃಣಾಲ್‌ ಪಾಂಡ್ಯಗೆ ಕೊರೊನಾ ಸೋಂಕು ತಗುಲಿರುವುದು ಸ್ಪಷ್ಟವಾಗಿದ್ದ ಹಿನ್ನೆಲೆಯಲ್ಲಿ ಪಂದ್ಯವನ್ನು ಬುಧವಾರ ಆಯೋಜಿಸಲಾಗಿತ್ತು . ಪಂದ್ಯದ ಬಳಿಕ ಪೋಸ್ಟ್‌ ಮ್ಯಾಚ್ ಪ್ರೆಸೆಂಟೇಷನ್‌ನಲ್ಲಿ ಮಾತನಾಡಿದ ಶಿಖರ್ ಧವನ್, "ಇಂದು (ಬುಧವಾರ) ಇಲ್ಲಿನ ಪಿಚ್‌ನಲ್ಲಿ ಹೆಚ್ಚಿನ ಟರ್ನ್‌ ಇತ್ತು ಹಾಗೂ ಚೆಂಡು ನಿಂತು ಬರುತ್ತಿತ್ತು. ನಮ್ಮ ಕಡೆ ಒಬ್ಬ ಬ್ಯಾಟ್ಸ್‌ಮನ್‌ ಕಡಿಮೆ ಇದ್ದಾರೆಂಬುದು ನಮಗೆ ಮೊದಲೇ ಗೊತ್ತಿತ್ತು. ಆದರೂ ನಾವು ಒಂದು ಹಂತದಲ್ಲಿ ಇನ್ನಿಂಗ್ಸ್ ಅನ್ನು ಅಚ್ಚುಕಟ್ಟಾಗಿ ನಿರ್ಮಿಸಿದ್ದೆವು. ಆದರೆ, ಅಂತಿಮವಾಗಿ ನಮಗೆ 10 ರಿಂದ 15 ರನ್‌ಗಳು ಕಡಿಮೆಯಾಗಿವೆ. ಇದು ಫಲಿತಾಂಶದಲ್ಲಿ ತುಂಬಾ ವ್ಯತ್ಯಾಸವನ್ನುಂಟು ಮಾಡಿದೆ," ಎಂದು ಹೇಳಿದರು. ಮೊದಲು ಬ್ಯಾಟ್‌ ಮಾಡಿದ್ದ ಭಾರತ ತಂಡಕ್ಕೆ ಆರಂಭಿಕರಾದ ಶಿಖರ್ ಧವನ್ ಹಾಗೂ ಋತುರಾಜ್‌ ಗಾಯಕ್ವಾಡ್‌ ಜೋಡಿ, ಆರಂಭಿಕ 7 ಓವರ್‌ಗಳಿಗೆ 49 ರನ್‌ ಗಳಿಸುವ ಮೂಲಕ ಉತ್ತಮ ಆರಂಭ ತಂದುಕೊಟ್ಟಿದ್ದರು. ಗಾಯಕ್ವಾಡ್‌ ವಿಕೆಟ್‌ ಒಪ್ಪಿಸಿದ ಬಳಿಕ ಇಲ್ಲಿನ ವಿಕೆಟ್‌ ತುಂಬಾ ನಿಧಾನಗತಿಯಿಂದ ತಿರುಗಿತ್ತು ಹಾಗೂ ಬ್ಯಾಟಿಂಗ್‌ಗೆ ತುಂಬಾ ಕಠಿಣವಾಗಿತ್ತು. ಆದರೂ ತನ್ನ ಪಾಲಿನ 20 ಓವರ್‌ಗಳಿಗೆ 5 ವಿಕೆಟ್‌ ಕಳೆದುಕೊಂಡರೂ ಭಾರತ 132 ರನ್‌ ಕಲೆ ಹಾಕಿತು. ಪ್ರವಾಸಿಗರ ಪರ ಧವನ್(40) ಟಾಪ್‌ ಸ್ಕೋರರ್ ಎನಿಸಿಕೊಂಡರು. ಎದುರಾಳಿ ತಂಡಕ್ಕೆ ಕಡಿಮೆ ಮೊತ್ತದ ಗುರಿ ನೀಡಿದ ಹೊರತಾಗಿಯೂ ಕೊನೆಯ ಓವರ್‌ವರೆಗೂ ಪಂದ್ಯವನ್ನು ಉಳಿಸಿಕೊಂಡಿದ್ದ ಭಾರತದ ಬೌಲರ್‌ಗಳನ್ನು ಧವನ್ ಗುಣಗಾನ ಮಾಡಿದರು. ವರುಣ್‌ ಚಕ್ರವರ್ತಿ, ಕುಲ್ದೀಪ್‌ ಯಾದವ್ ಹಾಗೂ ರಾಹುಲ್ ಚಹರ್‌ ಪರಿಣಾಮಕಾರಿಯಾಗಿ ಬೌಲ್‌ ಮಾಡಿದ್ದರು. ಆ ಮೂಲಕ ಕೊನೆಯ 12 ಎಸೆತಗಳಲ್ಲಿ ಶ್ರೀಲಂಕಾ ತಂಡಕ್ಕೆ 20 ರನ್‌ ಬೇಕಾಗಿರುವ ಸನ್ನಿವೇಶವನ್ನು ತಂದಿದ್ದರು. ಆದರೆ, ಸಿಕ್ಕ ಅವಕಾಶವನ್ನು ಸದುಪಯೋಗಪಡಿಸಿಕೊಂಡ ಆತಿಥೇಯರು ಇನ್ನೂ ಎರಡು ಎಸೆತಗಳು ಬಾಕಿ ಇರುವಾಗಲೇ ಗೆಲುವಿನ ನಗೆ ಬೀರಿದರು. "ನಮ್ಮ ಹುಡುಗರ ಬಗ್ಗೆ ನನಗೆ ನಿಜಕ್ಕೂ ಹೆಮ್ಮೆ ಅನಿಸುತ್ತಿದೆ. ಹಿನ್ನಡೆಯ ಮನಸ್ಥಿತಿಯನ್ನುಅವರು ಎಂದೂ ತೋರಿಸಲೇ ಇಲ್ಲ. ಕೊನೆಯ ಓವರ್‌ವರೆಗೂ ಪಂದ್ಯವನ್ನು ತೆಗೆದುಕೊಂಡ ಹುಡಗರಿಗೆ ಹ್ಯಾಟ್ಸ್‌ ಆಫ್‌," ಎಂದು ಶಿಖರ್ ಧವನ್ ಸಹ ಆಟಗಾರರನ್ನು ಮುಕ್ತಕಂಠದಿಂದ ಗುಣಗಾನ ಮಾಡಿದರು. ಮೂರು ಪಂದ್ಯಗಳ ಟಿ20 ಸರಣಿಯಲ್ಲಿ ಸದ್ಯ 1-1 ಸಮಬಲ ಕಾಯ್ದುಕೊಂಡಿರುವ ಭಾರತ ಹಾಗೂ ಶ್ರೀಲಂಕಾ ತಂಡಗಳು, ಇಂದು (ಗುರುವಾರ) ಮೂರನೇ ಹಾಗೂ ಸರಣಿ ನಿರ್ಣಾಯಕ ಹಣಾಹಣಿಯಲ್ಲಿ ಕಾದಾಟ ನಡೆಸಲಿವೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3BM1Snf
