ಟೋಕಿಯೋ (ಜಪಾನ್): ಭಾರತದ ಸ್ಟಾರ್‌ ಬ್ಯಾಡ್ಮಿಂಟನ್‌ ಆಟಗಾರ್ತಿ ಪಿವಿ ಸಿಂಧು, ಬ್ಯಾಡ್ಮಿಂಟನ್‌ ಮಹಿಳೆಯರ ಸಿಂಗಲ್ಸ್‌ ವಿಭಾಗದಲ್ಲಿ ಅಂತಿಮ ಎಂಟರ ಘಟ್ಟಕ್ಕೆ ಪ್ರವೇಶ ಮಾಡಿದ್ದಾರೆ. ಆ ಮೂಲಕ ಕ್ರೀಡಾಕೂಟದಲ್ಲಿ ಪದಕ ಗೆಲ್ಲುವ ವಿಶ್ವಾಸವನ್ನು ಇನ್ನಷ್ಟು ಗಟ್ಟಿ ಮಾಡಿಕೊಂಡಿದ್ದಾರೆ. ಗುರುವಾರ ಬೆಳಗ್ಗೆ ಮೂರನೇ ಕೋರ್ಟ್‌ನಲ್ಲಿ 41 ನಿಮಿಷಗಳ ಕಾಲ ನಡೆದಿದ್ದ ಮಹಿಳೆಯರ ಸಿಂಗಲ್ಸ್‌ ಪ್ರೀ ಕ್ವಾರ್ಟರ್ ಫೈನಲ್‌ ಹಣಾಹಣಿಯಲ್ಲಿ ಅಧಿಕಾರಯುತ ಪ್ರದರ್ಶನ ತೋರಿದ , ಡೆನ್ಮಾರ್ಕ್‌ನ ವಿರುದ್ಧ 21-15, 21-13 ಅಂತರದ ನೇರ ಗೇಮ್‌ಗಳಿಂದ ಗೆದ್ದು ಅಂತಿಮ ಎಂಟರ ಘಟ್ಟಕ್ಕೆ ಪ್ರವೇಶ ಮಾಡಿದ್ದಾರೆ. ಕಳೆದ ಪಂದ್ಯದ ಗೆಲುವಿನ ವಿಶ್ವಾಸದಲ್ಲಿ ಇಂದು ಕಣಕ್ಕೆ ಇಳಿದಿದ್ದ ಭಾರತದ ಆಟಗಾರ್ತಿ, ಮೊದಲನೇ ಗೇಮ್‌ನಲ್ಲಿಯೇ ಅದ್ಭುತ ಪ್ರದರ್ಶನ ತೋರಿ 11-6 ಅಂತರದಲ್ಲಿ ಮುನ್ನಡೆ ಗಳಿಸಿದ್ದರು. ನಂತರ ಅಲ್ಪ ವಿರಾಮದ ಬಳಿಕ ಕಣಕ್ಕೆ ಇಳಿದ ಪಿವಿ ಸಿಂಧು, ಆರು ಅಂಕಗಳ ಮೂಲಕ ಮೊದಲನೇ ಗೇಮ್‌ ಅನ್ನು 21-15ರ ಅಂತರದಲ್ಲಿ ಗೆದ್ದುಕೊಂಡರು. ಮೊದಲನೇ ಗೇಮ್‌ ಗೆಲುವಿನ ಲಯವನ್ನು ಮುಂದುವರಿಸಿದ ಭಾರತೀಯ ಆಟಗಾರ್ತಿ, ಎರಡನೇ ಗೇಮ್‌ನಲ್ಲಿ ಆರಂಭದಿಂದಲೇ ಡೆನ್ಮಾರ್ಕ್‌ನ ಬ್ರಿಚ್‌ಫೆಲ್ಟ್‌ ವಿರುದ್ಧ ಪ್ರಾಬಲ್ಯ ಸಾಧಿಸಿದರು. ಎರಡನೇ ಗೇಮ್‌ನ ವಿರಾಮದ ಹೊತ್ತಿಗೆ ಸಿಂಧೂ 5 ಅಂಕಗಳ ಮುನ್ನಡೆ ಗಳಿಸಿದ್ದರು. ನಂತರ, ಕೋರ್ಟ್‌ಗೆ ಮರಳಿದ ಡೆನ್ಮಾರ್ಕ್‌ ಆಟಗಾರ್ತಿ, ಲಾಂಗ್‌ ರ್ಯಾಲಿಗಳನ್ನು ಆಡುವ ಮೂಲಕ ಸಿಂಧೂಗೆ ಪ್ರಬಲ ಫೈಪೋಟಿ ನೀಡಿದ್ದರು. ಇದರ ಹೊರತಾಗಿಯೂ ಭಾರತೀಯ ಆಟಗಾರ್ತಿ, 21-13 ಅಂತರದಲ್ಲಿ ಎರಡನೇ ಗೇಮ್‌ ಗೆದ್ದು ಕ್ವಾರ್ಟರ್ ಫೈನಲ್ಸ್‌ಗೆ ಲಗ್ಗೆ ಇಟ್ಟರು. ರಿಯೋ ಒಲಿಂಪಿಕ್ಸ್‌ ಪದಕ ವಿಜೇತೆ ಪಿವಿ ಸಿಂಧೂ ಅವರು ಕ್ವಾರ್ಟರ್ ಫೈನಲ್‌ ಪಂದ್ಯದಲ್ಲಿ12ನೇ ಶ್ರೇಯಾಂಕಿತೆ ದಕ್ಷಿಣ ಕೊರಿಯಾದ ಗೇನ್ ಕಿಮ್ ಅಥವಾ ಜಪಾನ್‌ನ 4 ನೇ ಶ್ರೇಯಾಂಕಿತೆ ಅಕಾನೆ ಯಮಗುಚಿ ವಿರುದ್ಧ ಸೆಣಸಲಿದ್ದಾರೆ. ಇನ್ನು ಕಳೆದ ಪಂದ್ಯದಲ್ಲಿ ಪಿಂಧು, ಹಾಂಕಾಂಗ್‌ನ ಗ್ಯಾನ್‌ ಯೀ ಚೆಯಂಗ್‌ ವಿರುದ್ಧ 21-9 ಹಾಗೂ 21-16 ನೇರ ಗೇಮ್‌ಗಳಿಂದ ಗೆದ್ದು ಪ್ರೀ ಕ್ವಾರ್ಟರ್ ಫೈನಲ್ಸ್‌ಗೆ ಪ್ರವೇಶ ಮಾಡಿದ್ದರು. ಪ್ರೀ ಕ್ವಾರ್ಟರ್ ಫೈನಲ್ಸ್‌ಗೆ ಭಾರತದ ಅನುಭವಿ ಆರ್ಚರಿ ಪಟು ಆತನು ದಾಸ್‌ ಗುರುವಾರ ಬೆಳಗ್ಗೆ ದಕ್ಷಿಣ ಕೊರಿಯಾದ ಜಿನ್ಹ್ಯಾಕ್ ಒಹ್ ವಿರುದ್ಧ 6-5 ಅಂತರದಲ್ಲಿ ಗದ್ದು ಪ್ರೀ ಕ್ವಾರ್ಟರ್ ಫೈನಲ್ಸ್‌ಗೆ ತಮ್ಮ ಹೆಸರು ನೊಂದಾಯಿಸಿದ್ದಾರೆ. ಅತನು ದಾಸ್‌ ಹಾಗೂ ಒಹ್ ಜಿನ್ಹ್ಯಾಕ್ ನಡುವೆ ಇಂದಿನ ಪಂದ್ಯ ಜಿದ್ದಾಜಿದ್ದಿನಿಂದ ಕೂಡಿತ್ತು. ಆದರೆ, ಜಿನ್ಹ್ಯಾಕ್ ಮೊದಲನೇ ಸೆಟ್‌ನಲ್ಲಿ 26-25 ಅಂಕಗಳ ಮುನ್ನಡೆ ಪಡೆಯುವ ಮೂಲಕ 2 ಅಂಕ ಗಳಿಸಿದರು. ನಂತರ, ಎರಡು ಹಾಗೂ ಮುರನೇ ಸೆಟ್‌ಗಳಲ್ಲಿ ಈ ಇಬ್ಬರೂ 27-27 ಸಮಬ ಸಾಧಿಸಿ ತಲಾ ಒಂದೊಂದು ಅಂಕಗಳನ್ನು ಹಂಚಿಕೊಂಡರು. ನಾಲ್ಕನೇ ಸೆಟ್‌ನಲ್ಲಿ ಅದ್ಭುತವಾಗಿ ಕಮ್‌ಬ್ಯಾಕ್‌ ಮಾಡಿದ ಅತನು ದಾಸ್‌ 27-22 ಮುನ್ನಡೆ ಪಡೆದರು. ಆದರೆ, ಐದನೇ ಸೆಟ್‌ನಲ್ಲಿ ದಾಸ್‌ ಹಾಗೂ ಜಿನ್ಹ್ಯಾಕ್ ತಲಾ 28 ಅಂಕಗಳನ್ನು ಕಲೆ ಹಾಕಿದ್ದರಿಂದ ಇಬ್ಬರೂ 5-5 ಸಮಬಲ ಸಾಧಿಸಿದ್ದರು. ಆದ್ದರಿಂದ ಫಲಿತಾಂಶಕ್ಕಾ ಶೂಟೌಟ್‌ಗೆ ಮೊರೆ ಹೋಗಲಾಯಿತು. ಅದರಂತೆ ಶೂಟೌಟ್‌ನಲ್ಲಿ ಭಾರತದ ಆತನುದಾಸ್‌ 6-5 ಅಂತರದಲ್ಲಿ ಗೆದ್ದು ಪ್ರೀ ಕ್ವಾರ್ಟ್‌ ಫೈನಲ್ಸ್‌ ಪ್ರವೇಶ ಮಾಡಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/375UVPw
