ಹೊಸದಿಲ್ಲಿ: ಪ್ರಧಾನಿ ಮತ್ತು ಅವರ ಸಂಬಂಧ ಎಣ್ಣೆ-ಸೀಗೇಕಾಯಿಯಂತೆ ಎನ್ನುವುದನ್ನು ಅವರ ನಡುವಿನ ಹಾಗೂ ಮಾತಿನ ಸಂಘರ್ಷಗಳು ಪದೇ ಪದೇ ಸಾಬೀತುಪಡಿಸುತ್ತಿರುತ್ತದೆ. ಯಾಸ್ ಚಂಡಮಾರುತದಿಂದ ಪಶ್ಚಿಮ ಬಂಗಾಳದಲ್ಲಿ ಉಂಟಾದ ಹಾನಿಯನ್ನು ಪರಿಶೀಲಿಸಲು ಪ್ರಧಾನಿ ಮೋದಿ ತೆರಳಿದ್ದಾಗ ಮಮತಾ ಬ್ಯಾನರ್ಜಿ ಅವರು ಹಾನಿ ಹಾಗೂ ಪರಿಹಾರದ ಕುರಿತಾದ ತಮ್ಮ ವರದಿ ಸಲ್ಲಿಸಿ ತೆರಳಿದ್ದು, ಪರಾಮರ್ಶನಾ ಸಭೆಗೆ ಗೈರು ಹಾಜರಾಗಿದ್ದು ಭಾರಿ ವಿವಾದ ಸೃಷ್ಟಿಸಿತ್ತು. ಇದು ಕೇಂದ್ರ ಹಾಗೂ ಸರಕಾರಗಳ ನಡುವಿನ ಸಮರಕ್ಕೆ ಕಾರಣವಾಗಿತ್ತು. ಇದಕ್ಕೂ ಮುನ್ನ ವಿಧಾನಸಭೆ ಚುನಾವಣೆ ಈ ಇಬ್ಬರು ನಾಯಕರ ಕದನಕ್ಕೆ ಸಾಕ್ಷಿಯಾಗಿತ್ತು. ಆದರೆ ರಾಜಕೀಯದ ಹುಳಿ-ಸಿಹಿ ಸಂಬಂಧದಲ್ಲಿ ಪ್ರತಿ ಬಾರಿಯೂ ಮಾವಿನ ಹಣ್ಣಿನ ಕಾಲ ಬಂದಾಗ ಉಭಯ ನಾಯಕರ ಸಂಬಂಧ ರುಚಿ ಪಡೆದುಕೊಳ್ಳುತ್ತದೆ. ರಾಜಕೀಯ ಹಾಗೂ ಆಡಳಿತದ ವಿಚಾರದಲ್ಲಿ ಎಷ್ಟೇ ಕದನಗಳು ನಡೆದರೂ ಬಂಗಾಳದಲ್ಲಿ ಮಾವಿನ ಮರಗಳು ಹಣ್ಣಿನಿಂದ ತುಂಬಿಕೊಂಡಾಗ ಅದರಲ್ಲೊಂದಿಷ್ಟು ಪಾಲನ್ನು ಪ್ರಧಾನಿ ಕಚೇರಿಗೆ ರವಾನಿಸುವುದನ್ನು ಮಮತಾ ಮರೆಯುವುದಿಲ್ಲ. ಬಂಗಾಳದ ಪ್ರಸಿದ್ಧ ಹಿಮಸಾಗರ್, ಮಾಲ್ಡಾ ಮತ್ತು ಲಕ್ಷ್ಮಣಭೋಗ್ ಮಾವಿನ ತಳಿಗಳನ್ನು ಆಯ್ದು ಪ್ರಧಾನಿ ಮೋದಿ ಅವರಿಗೆ ಮಮತಾ ಕಳೆದ ವಾರ ರವಾನಿಸಿದ್ದಾರೆ. ರಾಷ್ಟ್ರಪತಿ ರಾಮನಾಥ್ ಕೋವಿಂದ್, ಉಪ ರಾಷ್ಟ್ರಪತಿ ಎಂ ವೆಂಕಯ್ಯ ನಾಯ್ಡು, ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಮತ್ತು ಗೃಹ ಸಚಿವ ಅಮಿತ್ ಶಾ ಅವರಿಗೆ ಸಹ ಮಮತಾ ಕಳುಹಿಸಿದ್ದಾರೆ. ಜತೆಗೆ ಕಾಂಗ್ರೆಸ್ ಅಧ್ಯಕ್ಷೆ ಸೋನಿಯಾ ಗಾಂಧಿ ಹಾಗೂ ದಿಲ್ಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಕೂಡ ಮಾವಿನ ಹಣ್ಣು ಸ್ವೀಕರಿಸಿದ್ದಾರೆ. ರಾಜಕೀಯ ಹುಳಿ ಮತ್ತು ಮಾವಿನ ಸಿಹಿಮಮತಾ ಬ್ಯಾನರ್ಜಿ ಅವರ ಮಾವಿನಹಣ್ಣು ರಾಜತಾಂತ್ರಿಕತೆ ಕೇಂದ್ರ ಹಾಗೂ ರಾಜ್ಯ ಸರಕಾರಗಳ ನಡುವಿನ ಹುಳಿಯನ್ನು ಸಿಹಿ ಮಾಡುತ್ತದೆಯೇ ಎನ್ನುವುದು ಕುತೂಹಲ ಮೂಡಿಸಿದೆ. ಪಶ್ಚಿಮ ಬಂಗಾಳದಲ್ಲಿನ ರಾಜಕೀಯ ಹಿಂಸಾಚಾರ, ನಾರದಾ ಹಗರಣ, ಮುಖ್ಯ ಕಾರ್ಯದರ್ಶಿ ಅಲಪನ್ ಬಂಡೋಪಾಧ್ಯಾಯ ಅವರ ಹಠಾತ್ ವರ್ಗಾವಣೆ ವಿವಾದ, ರಾಜ್ಯಪಾಲ ಜಗದೀಪ್ ಧನಕರ್ ಮತ್ತು ಸರಕಾರದ ನಡುವಿನ ಗುದ್ದಾಟ ಮುಂತಾದ ರಾಜಕೀಯ ತಿಕ್ಕಾಟಗಳನ್ನು ಕಡಿಮೆ ಮಾಡುತ್ತದೆಯೇ ಎಂಬ ಪ್ರಶ್ನೆ ಹುಟ್ಟುಹಾಕಿದೆ. 2011ರಲ್ಲಿ ಮೊದಲ ಬಾರಿ ಮುಖ್ಯಮಂತ್ರಿಯಾದ ಸಂದರ್ಭದಿಂದಲೂ ಮಮತಾ ಬ್ಯಾನರ್ಜಿ ಅವರು ಕೇಂದ್ರ ಸರಕಾರ ಹಾಗೂ ಇತರೆ ಕೆಲವು ಗಣ್ಯರಿಗೆ ಪ್ರತಿ ವರ್ಷ ಮಾವಿನ ಹಣ್ಣು ರವಾನಿಸುವ ಅಭ್ಯಾಸ ಬೆಳೆಸಿಕೊಂಡಿದ್ದಾರೆ. ಕಲ್ಲು ಹಾಕಿದ ಸಿಹಿ ಕಳಿಸುತ್ತೇನೆ ಎಂದಿದ್ದ ದೀದಿಕಳೆದ ಲೋಕಸಭೆ ಚುನಾವಣೆಯ ಸಂದರ್ಭದ ಸಂದರ್ಶನವೊಂದರಲ್ಲಿ, ಮಮತಾ ಬ್ಯಾನರ್ಜಿ ಅವರು ತಮಗೆ ಪ್ರತಿವರ್ಷ ಕುರ್ತಾ ಹಾಗೂ ಬೆಂಗಾಲಿ ಸಿಹಿ ತಿಂಡಿಗಳನ್ನು ಕಳುಹಿಸುತ್ತಾರೆ ಎಂದು ಮೋದಿ ಅವರು ಹೇಳಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿದ್ದ ಮಮತಾ, 'ಹೌದು ನಾನು ಅವರಿಗೆ ಸಿಹಿ ಕಳುಹಿಸುತ್ತೇನೆ, ಆದರೆ ಲಡ್ಡಿನಲ್ಲಿ ಗೋಡಂಬಿ, ಒಣದ್ರಾಕ್ಷಿಗಳನ್ನು ಹಾಕುವಂತೆ ಸಿಹಿ ತಿನಿಸಿನಲ್ಲಿ ಕಲ್ಲುಗಳನ್ನು ತುಂಬಿಸಿ ಕಳಿಸುತ್ತೇನೆ. ಅದನ್ನು ತಿನ್ನುವಾಗ ಅವರ ಹಲ್ಲುಗಳು ಮುರಿದು ಹೋಗಲಿ' ಎಂದು ಖಾರವಾಗಿ ಹೇಳಿದ್ದರು.
from India & World News in Kannada | VK Polls https://ift.tt/3hqL6Ar
