ಹೊಸದಿಲ್ಲಿ: ಭಾರತ ಹಾಗೂ ಇಂಗ್ಲೆಂಡ್ ನಡುವೆ ನಾಲ್ಕನೇ ಟೆಸ್ಟ್ ಪಂದ್ಯ ಆರಂಭವಾಗಲು ಇನ್ನು ಒಂದು ದಿನ ಮಾತ್ರ ಬಾಕಿಯಿದೆ. ಆದರೂ ಮೂರನೇ ಪಂದ್ಯವಾಡಿದ್ದ ನರೇಂದ್ರ ಮೋದಿ ಕ್ರಿಕೆಟ್ ಕ್ರೀಡಾಂಗಣದ ಪಿಚ್ ಬಗೆಗಿನ ಟೀಕೆಗಳು ಮಾತ್ರ ಇನ್ನು ನಿಂತಿಲ್ಲ. ಇದೀಗ ಪಾಕಿಸ್ತಾನ ತಂಡದ ಮಾಜಿ ನಾಯಕ ಇಂಜಮಾಮ್ ಉಲ್‌-ಹಕ್‌ ಕೂಡ ಪಿಚ್ ಬಗ್ಗೆ ಖಾರವಾಗಿ ಮಾತನಾಡಿದ್ದಾರೆ. ಅಹ್ಮದಾಬಾದ್‌ನಲ್ಲಿ ನೂತನವಾಗಿ ನಿರ್ಮಾಣವಾಗಿದ್ದ ವಿಶ್ವದ ದೊಡ್ಡ ಕ್ರಿಕೆಟ್ ಸ್ಡೇಡಿಯಂ ಬಗ್ಗೆ ಸಾಕಷ್ಟು ನಿರೀಕ್ಷೆಗಳಿದ್ದವು. ಆದರೆ, ಇಲ್ಲಿ ನಡೆದಿದ್ದ ಪಿಂಕ್‌-ಬಾಲ್‌ ಟೆಸ್ಟ್ ಕೇವಲ ಎರಡೇ ದಿನಗಳಲ್ಲಿ ಮುಗಿಯುವ ಮೂಲಕ ಎಲ್ಲಾ ನಿರೀಕ್ಷೆಗಳು ತಲೆ ಕೆಳಗಾಗಿದ್ದವು. ಸ್ಪಿನ್ನರ್‌ಗಳ ನೆರವಿನಿಂದ ಭಾರತ ತಂಡ 10 ವಿಕೆಟ್‌ಗಳಿಂದ ಗೆಲುವು ಪಡೆದಿತ್ತು. ಇದರ ಬೆನ್ನಲ್ಲೆ ಪಿಚ್ ಬಗ್ಗೆ ವಿಶ್ವದಾದ್ಯಂತ ಮಾಜಿ ಹಾಗೂ ಹಾಲಿ ಕ್ರಿಕೆಟಿಗರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು. ಮೂರನೇ ಪಂದ್ಯವಾಡಿದ್ದ ಪಿಚ್ ಬಗ್ಗೆ ಮಾಜಿ ಕ್ರಿಕೆಟಿಗರಾದ ಮೈಕಲ್‌ ವಾನ್‌, ಡೇವಿಡ್‌ ಲಾಯ್ಡ್‌, ಶೊಯೆಬ್‌ ಅಖ್ತರ್‌, ವಿವಿಯನ್‌ ರಿಚರ್ಡ್ಸ್ ಸೇರಿದಂತೆ ಹಲವರು ಕ್ರಿಕೆಟಿಗರು ತಮ್ಮದೇ ಆದ ಅಭಿಪ್ರಾಯವನ್ನು ಹೊರಹಾಕಿದ್ದರು. ಇದರಲ್ಲಿ ಕೆಲವರು ಪಿಚ್ ಅನ್ನು ಕಟುವಾಗಿ ಟೀಕಿಸಿದ್ದರು. ಇದೀಗ ಪಾಕಿಸ್ತಾನ ತಂಡದ ಮಾಜಿ ನಾಯಕ ಇಂಜಮಾಮ್ ಉಲ್‌-ಹಕ್‌ ಕೂಡ ಅಹಮದಾಬಾದ್‌ ಪಿಚ್ ಬಗ್ಗೆ ಟೀಕಿಸಿದ್ದಾರೆ. ಇಂತಹ ಪಿಚ್‌ಗಳು ಟೆಸ್ಟ್ ಕ್ರಿಕೆಟ್‌ಗೆ ಆರೋಗ್ಯಕರವಲ್ಲ. ಕೇವಲ ಎರಡೇ ದಿನಗಳಲ್ಲಿ ಪಂದ್ಯ ಮುಗಿದಿದೆ ಎಂಬುದನ್ನು ಅರಗಿಸಿಕೊಳ್ಳಲು ಸಾಧ್ಯವಿಲ್ಲ. ಹಾಗಾಗಿ ಐಸಿಸಿ ಮೊಟೆರಾ ವಿಕಚ್‌ ವಿರುದ್ಧ ಕ್ರಮಕೈಗೊಳ್ಳಬೇಕು ಎಂದು ಆಗ್ರಹಿಸಿದ್ದಾರೆ. "ಎರಡೇ ದಿನಗಳಲ್ಲಿ ಪಂದ್ಯ ಮುಗಿಯುತ್ತದೆ ಎಂದು ಯಾರೂ ಯೋಚನೆ ಮಾಡಿರಲಿಲ್ಲ. ಭಾರತ ತಂಡದ ಉತ್ತಮ ಪ್ರದರ್ಶನ ತೋರಿದೆಯೇ? ಅಥವಾ ವಿಕೆಟ್‌ ವರ್ತನೆ ಸರಿ ಇರಲಿಲ್ಲವೇ? ಇಂತಹ ವಿಕೆಟ್‌ಗಳು ಟೆಸ್ಟ್ ಕ್ರಿಕೆಟ್‌ನ ಭಾಗವಾಗಬೇಕೆ? ಭಾರತ ತಂಡ ಉತ್ತಮ ಪ್ರದರ್ಶನ ತೋರಿದೆ ಎಂದು ಭಾವಿಸುತ್ತೇನೆ. ಕಳೆದ ಆಸ್ಟ್ರೇಲಿಯಾ ಟೆಸ್ಟ್ ಸರಣಿಯಲ್ಲಿಯೂ ಅತ್ಯುತ್ತಮ ಪ್ರದರ್ಶನ ನೀಡಿತ್ತು. ಇಂಗ್ಲೆಂಡ್ ವಿರುದ್ಧ ಮೊದಲ ಪಂದ್ಯ ಸೋತಿದ್ದ ಭಾರತ, ಎರಡನೇ ಟೆಸ್ಟ್ ಪಂದ್ಯದಲ್ಲಿ ಅದ್ಭುತವಾಗಿ ಕಮ್‌ಬ್ಯಾಕ್‌ ಮಾಡಿತ್ತು. ಆದರೆ, ಏನೇ ಹೇಳಿ ಟೆಸ್ಟ್ ಕ್ರಿಕೆಟ್‌ಗೆ ಇಂತಹ ಪಿಚ್‌ಗಳು ಒಳ್ಳೆಯದಲ್ಲ," ಎಂದು ಹೆಳಿದರು. "ಟಿ20 ಸ್ಕೋರ್‌ಕಾರ್ಡ್‌ ಅಹಮದಾಬಾದ್‌ ಟೆಸ್ಟ್ ಪಂದ್ಯಕ್ಕಿಂತ ಉತ್ತಮವಾಗಿದೆ. ಐಸಿಸಿ ಖಂಡಿತಾ ಇಲ್ಲಿನ ಪಿಚ್ ವಿರುದ್ಧ ಕ್ರಮ ಕೈಗೊಳ್ಳಬೇಕು. ಟೆಸ್ಟ್ ಪಂದ್ಯ ಕೇವಲ ಎರಡೇ ಎರಡು ದಿನಗಳಲ್ಲಿ ಅಂತ್ಯವಾಗಿದೆ ಎಂದರೆ ಏನರ್ಥ? ಒಂದೇ ದಿನದಲ್ಲಿ 17 ವಿಕೆಟ್‌ಗಳು ಬಿದ್ದಿವೆ, ಇಲ್ಲಿ ಏನು ನಡೆಯುತ್ತಿದೆ? ಸರಿ ಸ್ಪಿನ್‌ ವಿಕೆಟ್‌ ಮಾಡಿದ್ದೀರಿ ಒಪ್ಪಿಕೊಳ್ಳುತ್ತೇನೆ, ಆದರೆ, ಇದಕ್ಕಿಂತಲೂ ಕೆಟ್ಟದಾಗಿ ಪಿಚ್ ವರ್ತಿಸಿದೆ," ಎಂದು ಪಾಕ್‌ ಮಾಜಿ ನಾಯಕ ಬೇಸರ ವ್ಯಕ್ತಪಡಿಸಿದ್ದಾರೆ. ಟೆಸ್ಟ್ ಪಂದ್ಯಗಳಿಗೆ ಇಂತಹ ಪಿಚ್‌ಗಳಿಗೆ ಅನುಮತಿ ನೀಡಬಾರದು ಎಂದ ಇಂಜಮಾಮ್, ಭಾರತ ಹಾಗೂ ವೆಸ್ಟ್ ಇಂಡೀಸ್‌ ನಡುವಿನ 1997ರ ಬಾರ್ಬಡೋಸ್‌ ಟೆಸ್ಟ್ ಪಂದ್ಯವನ್ನು ಸ್ಮರಿಸಿಕೊಂಡರು. ಆ ವೇಳೆ 120 ರನ್‌ ಗುರಿ ಹಿಂಬಾಲಿಸಿದ್ದ ಪ್ರವಾಸಿ ತಂಡ ಕೇವಲ 81 ರನ್‌ಗಳಿಗೆ ಆಲೌಟ್‌ ಆಗಿತ್ತು. "ಅಹಮದಾಬಾದ್‌ನಂತಹ ಪಿಚ್‌ಗಳಲ್ಲಿ ಟೆಸ್ಟ್ ಪಂದ್ಯಗಳನ್ನು ಆಯೋಜಿಸಬಾರದು. ಉಪ-ಖಂಡಗಳಲ್ಲಿ ಆಡಲು ಬಂದಾಗ, ಸ್ಪಿನ್‌ ಸ್ನೇಹಿ ಪಿಚ್‌ಗಳನ್ನು ಸಿದ್ದಪಡಿಸಲಾಗಿರುತ್ತದೆ. ಆದರೆ, ಇಷ್ಟರ ಮಟ್ಟಿಗೆ ಕೆಟ್ಟದಾಗಿ ಎಂದು ನಾನು ನಿರೀಕ್ಷೆ ಮಾಡಿರಲಿಲ್ಲ. 1997ರಲ್ಲಿ ಇದೇ ರೀತಿ ವೆಸ್ಟ್ ಇಂಡೀಸ್‌ನಲ್ಲಿ ಪಿಚ್ ಸಜ್ಜುಗೊಳಿಸಲಾಗಿತ್ತು. 120 ರನ್‌ ಗುರಿ ಹಿಂಬಾಲಿಸಿದ್ದ ಭಾರತ ತಂಡ 81 ರನ್‌ಗೆ ಆಲೌಟ್‌ ಆಗಿತ್ತು. ಪಿಂಕ್‌-ಬಾಲ್‌ ಟೆಸ್ಟ್ ಪಂದ್ಯ ನೋಡಿದರೆ, ನನಗೆ ಬಾರ್ಬಡೋಸ್‌ ಪಂದ್ಯ ನೆನಾಪಾಗುತ್ತದೆ," ಎಂದರು. "ಪಾರ್ಟ್ ಟೈಮ್‌ ಸ್ಪಿನ್ನರ್‌ ಐದು ವಿಕೆಟ್‌ ಸಾಧನೆ ಮಾಡಿದ್ದಾರೆಂದರೆ, ಪಿಚ್ ಸ್ಥಿತಿಯ ಬಗ್ಗೆ ನೀವೇ ಊಹಿಸಿಕೊಳ್ಳಿ. ರೂಟ್‌ 8 ರನ್‌ ನೀಡಿ 5 ವಿಕೆಟ್‌ ಪಡೆದಿರುವಾಗ, ಆರ್‌ ಅಶ್ವಿನ್‌ ಹಾಗೂ ಅಕ್ಷರ್‌ ಪಟೇಲ್‌ ಅವರನ್ನು ಏಕೆ ಶ್ಲಾಘಿಸಿಬೇಕು? ಟೆಸ್ಟ್ ಪಂದ್ಯ ಎಂದ ಮೇಲೆ, ಮೈದಾನ, ಪಿಚ್, ಅಂಪೈರ್‌ಗಳು, ರೆಫರಿ ಸೇರಿ ಎಲ್ಲವೂ ತುಂಬಾ ಮುಖ್ಯ. ಟೆಸ್ಟ್ ಮ್ಯಾಚ್‌ ಎಂದಿಗೂ ಟೆಸ್ಟ್ ಮ್ಯಾಚ್‌ ರೀತಿಯೇ ಇರಬೇಕು. ಭಾರತ ತಂಡಕ್ಕೆ ಆಸ್ಟ್ರೇಲಿಯಾಕ್ಕಿಂತ ಇಂಗ್ಲೆಂಡ್ ವಿರುದ್ಧದ ಗೆಲುವು ಅಷ್ಟೊಂದು ತೃಪ್ತಿ ಸಿಕ್ಕಿಲ್ಲ ಎಂದು ಭಾವಿಸುತ್ತೇನೆ," ಎಂದು ಇಂಜಮಾಮ್ ಉಲ್‌-ಹಕ್‌ ತಿಳಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3baBIPF
