ಪಾಟ್ನಾ: ದಿನದಿಂದ ದಿನಕ್ಕೆ ಬಿಹಾರ ವಿಧಾನಸಭಾ ಚುನಾವಣೆ ಕಣದ ಬಿಸಿ ಹೆಚ್ಚಾಗುತ್ತಿದ್ದು, ಮಾಜಿ ಸಿಎಂ ನೇತೃತ್ವದ ಎಚ್ಎಎಂ(ಎಸ್) ಗುರುವಾರ ಎನ್ಡಿಎಗೆ ಸೇರ್ಪಡೆಯಾಗಲಿದೆ. ಈ ಮೂಲಕ ಬಿಹಾರದಲ್ಲಿ ಮತ್ತೊಂದು ಬಾರಿ ಎನ್ಡಿಎ ಅಧಿಕಾರದ ಗದ್ದುಗೆ ಹಿಡಿಯುವುದು ಪಕ್ಕಾ ಎನ್ನುವ ವಿಶ್ಲೇಷಣೆಗಳು ರಾಜಕೀಯ ವಲಯದಲ್ಲಿ ಕೇಳಿ ಬರುತ್ತಿವೆ. ಬಿಹಾರ ಚುನಾವಣೆಯಲ್ಲಿ ಎಚ್ಎಎಂ(ಎಸ್) ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಒಕ್ಕೂಟದ ಭಾಗವಾಗುವ ಬಗ್ಗೆ ಅಧಿಕೃತವಾಗಿ ರಾಷ್ಟ್ರೀಯ ಮುಖ್ಯಸ್ಥ ಜೀತನ್ ರಾಮ್ ಮಾಂಝಿ ಗುರುವಾರ ಅಧಿಕೃತವಾಗಿ ಘೋಷಿಸಲಿದ್ದಾರೆ ಎಂದು ಪಕ್ಷದ ವಕ್ತಾರ ಡ್ಯಾನಿಶ್ ರಿಜ್ವಾನ್ ಹೇಳಿದ್ದಾರೆ. ಇನ್ನು, ಯಾವುದೇ ಪಕ್ಷದ ಜೊತೆ ಹಿಂದೂಸ್ತಾನಿ ಆವಂ ಮೋರ್ಚಾ ವಿಲೀನವಾಗುತ್ತಿಲ್ಲ. ಬದಲಾಗಿ ಅಕ್ಟೋಬರ್ - ನವೆಂಬರ್ನಲ್ಲಿ ನಡೆಯಲಿರುವ ವಿಧಾನಸಭಾ ಚುನಾವಣೆಯ ಭಾಗವಾಗಿ ಎನ್ಡಿಎ ಜೊತೆ ಕೈಜೋಡಿಸುತ್ತಿದ್ದೇವೆ ಎಂದು ರಿಜ್ವಾನ್ ಹೇಳಿದ್ದಾರೆ. ಮುಂದಿನ ಚುನಾವಣೆಯಲ್ಲಿ ನಮಗೆ ಎಷ್ಟು ಸೀಟು ನೀಡುತ್ತಾರೆ ಎಂಬುದು ನಮಗೆ ಸಮಸ್ಯೆ ಆಗುವುದಿಲ್ಲ. ನಾವು ಎನ್ಡಿಎ ಭಾಗವಾಗುತ್ತಿರುವುದು ಬಿಹಾರದ ಅಭಿವೃದ್ಧಿಗಾಗಿ ಎಂದು ಹೇಳಿದ್ದಾರೆ. ಎಚ್ಎಎಂ(ಎಸ್) ಪಕ್ಷ ಪ್ರಧಾನಿ ಹಾಗೂ ಮುಖ್ಯಮಂತ್ರಿ ಅವರ ಅಭಿವೃದ್ಧಿ ಕಾರ್ಯಗಳಿಗೆ ಬೆಂಬಲವಾಗಿ ನಿಲ್ಲುತ್ತದೆ ಎಂದು ರಿಜ್ವಾನ್ ಹೇಳಿದ್ದಾರೆ. ಆಗಸ್ಟ್ 20ರಂದು ಜೀತನ್ ರಾಮ್ ಮಾಂಝಿ ಆರ್ಜೆಡಿ, ಕಾಂಗ್ರೆಸ್, ಆರ್ಎಲ್ಎಸ್ಪಿ ಹಾಗೂ ವಿಐಪಿ ಪಕ್ಷಗಳಿದ್ದ ವಿಪಕ್ಷಗಳ ಕೂಟದಿಂದ 2.5 ವರ್ಷಗಳ ಸಂಬಂಧವನ್ನು ಮುರಿದುಕೊಂಡು ಹೊರಬಂದಿದ್ದರು.ಎಚ್ಎಎಂ(ಎಸ್) ಅಲ್ಲದೇ ಹಿರಿಯ ಜೆಡಿಯು ನಾಯಕ ಶರದ್ ಯಾದವ್ ಕೂಡ ಜೆಡಿಯು ಪಕ್ಷಕ್ಕೆ ಮರಳುವ ಸಾಧ್ಯತೆ ಇದೆ ಎನ್ನಲಾಗಿದ್ದು, ವಿಪಕ್ಷಗಳ ವಿರುದ್ಧ ಎನ್ಡಿಎ ಬಲವಾಗುತ್ತಿರುವುದು ಮೇಲ್ನೋಟಕ್ಕೆ ಸಾಬೀತಾಗುತ್ತಿದೆ.
from India & World News in Kannada | VK Polls https://ift.tt/34W2l89
