ಮುಂಬಯಿ: ಕೋವಿಡ್-19 ಬಿಕ್ಕಟ್ಟು ಮತ್ತು ಲಾಕ್ಡೌನ್ ಪರಿಣಾಮ ಕಳೆದ ಎರಡು ತಿಂಗಳಿನಿಂದ ಸ್ಥಗಿತವಾಗಿರುವ ಆರ್ಥಿಕ ಚಟುವಟಿಕೆಗಳಿಗೆ ಚೈತನ್ಯ ತುಂಬಲು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಶುಕ್ರವಾರ ಅನಿರೀಕ್ಷಿತವಾಗಿ ತನ್ನ ಅಲ್ಪಾವಧಿಯ ಸಾಲದ ಬಡ್ಡಿ ದರವನ್ನು (ರೆಪೊ) ಶೇ.4.4ರಿಂದ ಶೇ.4ಕ್ಕೆ ಕಡಿತಗೊಳಿಸಿದೆ. ಕಳೆದ ಮಾರ್ಚ್ 27ರಂದೂ ದರ ಕಡಿತಗೊಳಿಸಲಾಗಿತ್ತು. ಇದರ ಪರಿಣಾಮ ಗೃಹಸಾಲ, ವಾಹನ ಸಾಲ, ಕಾರ್ಪೊರೇಟ್ ಸಾಲಗಳ ಇಎಂಐ ಇಳಿಕೆಯಾಗಲಿದೆ. ಆದರೆ, ನಿಶ್ಚಿತ ಠೇವಣಿಗಳ ಬಡ್ಡಿ ದರಗಳೂ ಇಳಿಕೆಯಾಗಲಿವೆ. ಹಾಗಾಗಿ ಮುಖ್ಯವಾಗಿ ಹಿರಿಯ ನಾಗರಿಕರಿಗೆ ಮತ್ತು ಪಿಂಚಣಿದಾರರಿಗೆ ಬಡ್ಡಿ ಆದಾಯ ಕಡಿಮೆಯಾಗಲಿರುವುದು ಕಳವಳಕ್ಕೆ ಕಾರಣವಾಗಿದೆ. ಕಳೆದ ಮಾರ್ಚ್ ನಂತರ ಎರಡನೇ ಬಾರಿಗೆ ರೆಪೊ ದರವನ್ನು ಇಳಿಸಲಾಗಿದೆ. ಶೇ.4ರ ರೆಪೊ ದರವು 2000ರಿಂದೀಚೆಗೆ ಅತ್ಯಂತ ಕಡಿಮೆ ಮಟ್ಟದ ಬಡ್ಡಿ ದರವಾಗಿದೆ. ರಿವರ್ಸ್ ರೆಪೊ ದರವನ್ನೂ ಶೇ.3.75ರಿಂದ ಶೇ.3.35ಕ್ಕೆ ಕಡಿತಗೊಳಿಸಲಾಗಿದೆ. ಇಎಂಐ ವಿನಾಯಿತಿ: ಎಲ್ಲ ಅವಧಿ ಸಾಲಗಳ ಇಎಂಐ ಮರು ಪಾವತಿಯ ಅವಧಿಯನ್ನು ಜೂನ್ 1ರಿಂದ ಆಗಸ್ಟ್ 31ಕ್ಕೆ ಮುಂದೂಡಿದೆ. ಕೊರೊನಾ ಸಂಕಟದ ಕಾರಣ ಸಾಲದ ಇಎಂಐ ಕಟ್ಟಲು ಕಷ್ಟ ಎಂಬ ಕಾರಣದಿಂದ ಈಗಾಗಲೇ ಏಪ್ರಿಲ್ನಿಂದ ಮೇ ತನಕ ಮುಂದೂಡಲಾಗಿತ್ತು. ಆದರೆ, ಹಣ ಕೈಯಲ್ಲಿದ್ದರೆ ಇಎಂಐ ಕಟ್ಟುವುದು ಸೂಕ್ತ. ಏಕೆಂದರೆ ಈ ಅವಧಿಯ ಬಡ್ಡಿ ಮುಂದೆ ಹೊರೆಯಾಗುತ್ತದೆ. ಲಾಭ ವರ್ಗಾಯಿಸದ ಬ್ಯಾಂಕ್: ಉದ್ದಿಮೆ ವಲಯ ಹಾಗೂ ಜನ ತಮ್ಮ ಸಾಲಗಳ ಬಡ್ಡಿ ದರ ಇಳಿಕೆಯ ನಿರೀಕ್ಷೆಯಲ್ಲಿದ್ದಾರೆ. ಹೀಗಿದ್ದರೂ ಆರ್ಬಿಐ ರೆಪೊ ದರ ಕಡಿತ ಮಾಡಿದಾಗಲೆಲ್ಲ ಬ್ಯಾಂಕ್ಗಳೂ ಅದೇ ಮಾದರಿಯಲ್ಲಿ ಸಾಲದ ಬಡ್ಡಿ ದರ ಇಳಿಸುತ್ತಿಲ್ಲ. ಆರ್ಬಿಐ ವಿನಾಯಿತಿಯ ಸಂಪೂರ್ಣ ಲಾಭವನ್ನು ಗ್ರಾಹಕರಿಗೆ ವರ್ಗಾಯಿಸುತ್ತಿಲ್ಲ ಎಂಬ ದೂರಿದೆ. ಹಿರಿಯರೇನು ಮಾಡಬೇಕು?ಹಿರಿಯ ನಾಗರಿಕರ ಠೇವಣಿ ಮೇಲಿನ ಬಡ್ಡಿ ಕಡಿಮೆ ಆಗದಂತೆ ಕೆಲವು ಬ್ಯಾಂಕ್ಗಳು ಪ್ರತ್ಯೇಕ ಯೋಜನೆ ಹೊಂದಿವೆ. ಇದರ ಲಾಭ ಪಡೆಯಬಹುದು. ಹಿರಿಯ ನಾಗರಿಕರು ಎಲ್ಐಸಿಒ ನಿರ್ವಹಿಸುವ 'ಪ್ರಧಾನಮಂತ್ರಿ ವಯವಂದನ' ಯೋಜನೆಯಲ್ಲಿ ಹೂಡಿಕೆ ಮಾಡುವುದು ಸೂಕ್ತ. ಅದರಲ್ಲಿ ಶೇ.7.4ರ ಬಡ್ಡಿ ದರವಿದೆ. ಕಳೆದ ಮಾರ್ಚ್ನಿಂದ ಎರಡು ಸಲ ಆರ್ಬಿಐ ರೆಪೊ ದರ ಕಡಿತವಾದಂತಾಗಿದ್ದು, ಒಟ್ಟು ಶೇ.1.15ರಷ್ಟು ತಗ್ಗಿದೆ. ಹೀಗಾಗಿ ಹಿರಿಯ ನಾಗರಿಕರ ನಿಶ್ಚಿತ ಠೇವಣಿಗಳ ಬಡ್ಡಿ ದರ ಶೇ.1ರಷ್ಟು ಕಡಿತವಾಗುವ ನಿರೀಕ್ಷೆ ಇದೆ. - ಸಿ ಎ ರುದ್ರಮೂರ್ತಿ, ಆರ್ಥಿಕ ತಜ್ಞರು ಅಂಚೆ ಇಲಾಖೆ ಉಳಿತಾಯ ಆಕರ್ಷಕ: ಸದ್ಯದ ಪರಿಸ್ಥಿತಿಯಲ್ಲಿ ಅಂಚೆ ಇಲಾಖೆಯ ಉಳಿತಾಯ ಯೋಜನೆಗಳೇ ನಾಗರಿಕರಿಗೆ ಹೆಚ್ಚಿನ ಬಡ್ಡಿ ದರ ನೀಡುತ್ತವೆ. 5 ವರ್ಷ ಅವಧಿಯ ಉಳಿತಾಯ ಠೇವಣಿಗೆ ಶೇ.6.7ರ ಬಡ್ಡಿ ದೊರೆಯುತ್ತದೆ. 1 ವರ್ಷವಾದರೆ ಶೇ.5.5ರ ಬಡ್ಡಿ ಲಭ್ಯ. ಎಸ್ಬಿಐನಲ್ಲಿ ನಿಶ್ಚಿತ ಠೇವಣಿಗೆ ಹಾಲಿ ಬಡ್ಡಿ ದರ- 1 ವರ್ಷದಿಂದ 3 ವರ್ಷಗಳ ಅವಧಿಯ ಎಫ್.ಡಿಗೆ ಶೇ.5.5 - 3 ವರ್ಷದಿಂದ 10 ವರ್ಷಕ್ಕೆ: ಶೇ.5.7 (ಹಿರಿಯ ನಾಗರಿಕರಿಗೆ ಹೆಚ್ಚುವರಿ ಶೇ.0.5 ) ಅಂಚೆ ಇಲಾಖೆ - ಅಂಚೆ ಉಳಿತಾಯ ಯೋಜನೆಗಳಲ್ಲಿ ಹಿರಿಯ ನಾಗರಿಕರಿಗೆ ಬಡ್ಡಿ ದರ: ಶೇ.7.4 - ಅಂಚೆ ಇಲಾಖೆಯಲ್ಲಿ 5 ವರ್ಷಗಳ ಅವಧಿಯ ಠೇವಣಿಗೆ ಬಡ್ಡಿ ದರ: ವಾರ್ಷಿಕ ಶೇ.6.7 ಅಗತ್ಯವಿದ್ದರೆ ಮತ್ತಷ್ಟು ದರ ಕಡಿತಅಗತ್ಯವಿದ್ದರೆ ಭವಿಷ್ಯದಲ್ಲಿ ಮತ್ತಷ್ಟು ಬಡ್ಡಿ ದರ ಕಡಿತ ಘೋಷಿಸಲಾಗುವುದು ಎಂದು ಆರ್ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ತಿಳಿಸಿದ್ದಾರೆ. ಕೋವಿಡ್-19 ಬಿಕ್ಕಟ್ಟಿನ ಪರಿಣಾಮ 2020-21ರ ಸಾಲಿನಲ್ಲಿ(2020ರ ಏಪ್ರಿಲ್ನಿಂದ 2021ರ ಮಾರ್ಚ್ ತನಕ) ಜಿಡಿಪಿ ಬೆಳವಣಿಗೆಯ ಪ್ರಮಾಣ ಇಳಿಕೆಯಾಗುವ ನಿರೀಕ್ಷೆ ಇದೆ ಎಂದು ಆರ್ಬಿಐ ಮುನ್ನೋಟ ತಿಳಿಸಿದೆ. 2020-21ರ ಮೊದಲ ತ್ರೈಮಾಸಿಕ, ಅಂದರೆ ಏಪ್ರಿಲ್-ಜೂನ್ ಅವಧಿಯಲ್ಲಿ ಜಿಡಿಪಿ ಇಳಿಕೆಯಾದರೂ, ಜುಲೈ-ಸೆಪ್ಟೆಂಬರ್ ಅವಧಿಯಲ್ಲಿ ಸುಧಾರಣೆಯಾಗುವ ನಿರೀಕ್ಷೆ ಇದೆ ಎಂದು ಗವರ್ನರ್ ತಿಳಿಸಿದರು.
from India & World News in Kannada | VK Polls https://ift.tt/3bTfK0F
