ಸೂರತ್: ದೇಶದ ಪ್ರಮುಖ ಪೋರ್ಟ್ ಆಗಿರುವ ಸೂರತ್ನ ಹಜೀರಾ ಬಂದರಿನಲ್ಲಿ ಭಾರೀ ಸಂಭವಿಸಿದೆ. ಇಲ್ಲಿರುವ ತೈಲ ಮತ್ತು ನೈಸರ್ಗಿಕ ಅನಿಲ ನಿಗಮ(ಒಎನ್ಜಿಸಿ)ದಲ್ಲಿ ಭಾರೀ ಸ್ಪೋಟವೊಂದು ಸಂಭವಿಸಿದೆ. ಮುಂಜಾನೆ ಸುಮಾರು ಮೂರು ಗಂಟೆಗೆ ಭಾರೀ ಸ್ಪೋಟದ ಶಬ್ಧವೊಂದು ಕೇಳಿಬಂದಿದೆ. ಈ ಹಿನ್ನೆಲೆ ಗುಜರಾತ್ನ ಪಟ್ಟಣದ ಜನರು ಬೆಚ್ಚಿಬಿದ್ದಿದ್ದಾರೆ. ಇನ್ನು ಶಬ್ಧ ಬಂದ ಕೆಲವೇ ಕ್ಷಣದಲ್ಲಿ ಬೆಂಕಿಯಾಡಲು ಆರಂಭಿಸಿದೆ. ಸ್ವಲ್ಪ ಹೊತ್ತಲ್ಲೇ ಹಜೀರಾ ಬಂದರಿನ ಆಕಾಶ ಸಂಫೂರ್ಣವಾಗಿ ಕೆಂಪಾಗಿ ಬದಲಾಗಿತ್ತು. ಇನ್ನು ಒಎನ್ಜಿಸಿ ಮೂಲಗಳ ಪ್ರಕಾರ ಒಂದು ಟರ್ಮಿನಲ್ನಲ್ಲಿ ಸ್ಪೋಟ ಸಂಭವಿಸಿದ್ದು ಬೆಂಕಿ ಆರಂಭವಾಗಿದೆ. ಈ ಬೆಂಕಿ ಮತ್ತೊಂದು ಟರ್ಮಿನಲ್ಗೆ ಹಬ್ಬಿತು ಎಂದು ತಿಳಿಸಿದ್ದಾರೆ. ಇನ್ನು ದೂರದಿಂದ ಭಾರೀ ಬೆಂಕಿ ಹರಡಿರುವ ವಿಡಿಯೊಗಳು, ಫೊಟೋಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದು ಬೆಚ್ಚಿಬೀಳುವಂತಿದೆ. ಇನ್ನು ಬೆಂಕಿ ಹಬ್ಬಿರುವ ಹಜೀರ ಬಂದರಿನ ಸುತ್ತಮುತ್ತ ಸುಮಾರು 10 ಕಿ.ಮೀ ದೂರದವರೆಗೆ ಗ್ಯಾಸ್ ವಾಸನೆ ಬರುತ್ತಿತ್ತು ಎಂದು ಸ್ಥಳೀಯರು ಅಲ್ಲಿನ ಮಾಧ್ಯಮಗಳಿಗೆ ಮಾಹಿತಿ ನೀಡಿದ್ದಾರೆ. ಆರಂಭದಲ್ಲಿ ಸ್ಥಳೀಯರು ಇದೊಂದು ಭೂಕಂಪನ ಎಂದು ಅಂದುಕೊಂಡಿದ್ದರು. ನಂತರ ಗ್ಯಾಸ್ ವಾಸನೆ ಬಂದಿದ್ದರಿಂದ ಭಯಗೊಂಡಿದ್ದಾರೆ. ಹಜೀರಾ ಬಂದರಿನಲ್ಲಿ ತೈಲ ಹಾಗೂ ಗ್ಯಾಸ್ಗೆ ಸಂಬಂಧಪಟ್ಟಂತೆ ಒಟ್ಟು 24 ಟರ್ಮಿನಲ್ಗಳಿದ್ದು ಈ ಘಟನೆಯಿಂದ ಎಚ್ಚೆತ್ತುಕೊಂಡು ಎಲ್ಲವನ್ನು ಬಂದ್ ಮಾಡಲಾಗಿದೆ ಎಂದು ತಿಳಿದುಬಂದಿದೆ. ಸದ್ಯ ಅಗ್ನಿಶಾಮಕ ದಳ ಸ್ಥಳಕ್ಕೆ ದೌಡಾಯಿಸಿದ್ದು ಬೆಂಕಿ ನಂದಿಸಲು ಹರಸಾಹಸ ಪಡುತ್ತಿದೆ. ಈ ಘಟನೆಯಿಂದ ಯಾರಿಗಾದರೂ ಸಾವು-ನೋವು ಸಂಭವಿಸಿದೆಯಾ? ಎಂದು ತಿಳಿದುಬಂದಿಲ್ಲ. ಇನ್ನು ಈ ಬಂದರಿನಲ್ಲಿ ರಿಲಯನ್ಸ್, ಕ್ರಿಬ್ಕೊ, ಎನ್ಟಿಪಿಸಿ, ಅದಾನಿ, ಶೆಲ್, ಲಾರ್ಸೆನ್ಟೌಬ್ರೊ, ಗೇಲ್, ಜಿಎಸ್ಇಜಿ, ಜಿಎಸ್ಪಿಸಿ ಸೇರಿ ಹಲವಾರು ಸ್ಥಾವರಗಳಿವೆ. ಗುಜರಾತ್ನ ತಪ್ತಿ ನದಿಯ ದಡದಲ್ಲಿರುವ ಈ ಹಜೀರ ಬಂದರು ಅರೇಬ್ಬಿ ಸಮುದ್ರದಿಂದ 8 ಕಿ.ಮೀ ದೂರದಲ್ಲಿದೆ. ಹೀಗಾಗಿ ಹಲವು ಅನುಮಾನಗಳಿಗೆ ಇದು ಎಡೆಮಾಡಿಕೊಟ್ಟಿದೆ.
from India & World News in Kannada | VK Polls https://ift.tt/3j4rORm
