ಬೆಂಗಳೂರು: ಕಳೆದ ಎರಡು ತಿಂಗಳಿಂದ ರಾಜ್ಯದಲ್ಲಿ ದರ ಏರಿಳಿತ ಕಾಣುತ್ತಿದೆ. ಆರಂಭವಾದ ಹೊತ್ತಲ್ಲಿ 30 ರೂಪಾಯಿ ದರವಿದ್ದರೂ ಕೋಳಿ ಯಾರಿಗೂ ಬೇಡವಾಗಿತ್ತು. ಆದರೆ ಇದೀಗ ಕೆಜಿ ಮಾಂಸದ ಬೆಲೆ 240 ರೂಪಾಯಿ ತಲುಪಿದೆ. ಕೊರೊನಾ ವೈರಸ್ ಕಾಣಿಸಿಕೊಂಡ ಆರಂಭದಲ್ಲಿ ಒಂದಷ್ಟು ಸುಳ್ಳು ಸುದ್ದಿಗಳು ಮತ್ತು ಹಕ್ಕಿ ಜ್ವರ ಪ್ರಭಾವದಿಂದ ಬೇಡಿಕೆ ದೊಡ್ಡ ಮಟ್ಟಕ್ಕೆ ಕುಸಿದಿತ್ತು. ಹೀಗಾಗಿ ಕೋಳಿ ದರವೂ ನೆಲಕಚ್ಚಿತ್ತು. ಆದರೆ ನಿಧಾನಕ್ಕೆ ಜನರು ಖರೀದಿಸಲು ಆರಂಭಿಸಿದರು. ಈಗ ಬೆಲೆ ಗಗನಕ್ಕೇರಿದೆ. ಆದರೆ ಮಾರುಕಟ್ಟೆ ಸಾಕಷ್ಟು ಸರಬರಾಜಿಲ್ಲ. “ಜನವರಿಯಲ್ಲಿ ಯಾರೋ ಕೋಳಿ ಮೂಲಕ ಕೋವಿಡ್-19 ಹರಡುತ್ತದೆ ಎಂದು ಗಾಳಿ ಸುದ್ದಿ ಹಬ್ಬಿಸಿದರು. ಬೆಲೆ ಪಾತಾಳಕ್ಕಿಳಿಯಿತು. ಹಲವು ಸಾಕಣೆದಾರರು ಕೊಳ್ಳುವವರಿಲ್ಲದೆ ಅನಿವಾರ್ಯವಾಗಿ ಕೋಳಿಗಳನ್ನು ಕೊಲ್ಲಬೇಕಾಯಿತು,” ಎನ್ನುತ್ತಾರೆ ಕರ್ನಾಟಕ ಕುಕ್ಕುಟೋದ್ಯಮಿಗಳ ಸಂಘದ ಮಂಜೇಶ್ ಕುಮಾರ್. ಒಂದು ಮರಿ ಕೋಳಿ ಬಲಿತು ದೊಡ್ಡದಾಗಲು 45 ರಿಂದ 60 ದಿನ ಬೇಕು. ಇದರಿಂದ ಕೋಳಿ ಮಾಂಸ ಪೂರೈಕೆಯಲ್ಲಿ ವ್ಯತ್ಯಯವಾಗಿದೆ ಎನ್ನುತ್ತಾರೆ ಅವರು. ಈಗ ಪೂರೈಕೆ ಆಗುತ್ತಿದ್ದರೂ, ಯಾರೂ ದರ ಇಳಿಕೆ ಮಾಡಲು ಸಿದ್ಧರಿಲ್ಲ ಎಂದು ವಿವರಿಸುತ್ತಾರೆ ಅವರು. ಲಾಕ್ಡೌನ್ ಇಲ್ಲದೇ ಇದ್ದಲ್ಲಿ ರಾಜ್ಯದಲ್ಲಿ ಇದು ಮದುವೆ ಸೀಸನ್ ಆಗಿರುತ್ತಿತ್ತು. ಈ ಸಂದರ್ಭದಲ್ಲಿ ಒಂದೇ ಬಾರಿ 200 ಕೆಜಿ ಮಾರಾಟವೂ ನಡೆಯುತ್ತಿತ್ತು ಎಂದು ನೆನಪಿಸಿಕೊಳ್ಳುತ್ತಾರೆ ಅವರು. ಹೀಗಿದ್ದೂ ಜೀವಂತ ಕೋಳಿಗೆ ಕೆ.ಜಿ. ಗೆ 170 ರೂ., ಹಾಗೂ ಮಾಂಸಕ್ಕೆ 240 ರೂ ದರವಿದೆ. ಇದೇ ವೇಳೆ ಮಾಂಸದ ದರವೂ ಭಾರಿ ಏರಿಕೆ ಕಂಡಿದೆ. ಇದಕ್ಕೂ ಕಾರಣ ಪೂರೈಕೆಯಲ್ಲಿನ ವ್ಯತ್ಯಯ. ಲಾಕ್ಡೌನ್ಗಿಂದ ಮೊದಲು ಮಟನ್ ದರ ಕೆ.ಜಿ.ಗೆ 650 ರಿಂದ 700 ರೂಪಾಯಿ ಇತ್ತು. ಇದೀಗ 800 ರೂಪಾಯಿ ತಲುಪಿದೆ. ರೈತರು ಸಂತೆಗಳಲ್ಲಿ ಮರಿ ಆಡುಗಳನ್ನು ಮಾರುತ್ತಿದ್ದರು. ನಾವು ಅದನ್ನು ಬೆಳೆಸಿ ಮಾರಾಟ ಮಾಡುತ್ತಿದ್ದೆವು. ಈಗ ಸಂತೆಗಳು ನಡೆಯುತ್ತಿಲ್ಲ. ಪೂರೈಕೆಯಲ್ಲಿ ವ್ಯತ್ಯವಾಗಿದೆ ಎನ್ನುತ್ತಾರೆ ಮಾಂಸದ ವ್ಯಾಪಾರಿ ದೀಕ್ಷಿತ್ ಎನ್. ಆದರೆ ಬೆಲೆ ಏರಿಕೆಯಿಂದ ಮಾರಾಟಕ್ಕೆ ಏನೂ ತೊಂದರೆಯಾಗಿಲ್ಲ ಎನ್ನುತ್ತಾರೆ ಅವರು. ಮಾಂಸ ಖರೀದಿಸುವವರು ಬಂದೇ ಬರುತ್ತಾರೆ ಎನ್ನುವುದು ಅವರ ಅನುಭವದ ಮಾತು.
from India & World News in Kannada | VK Polls https://ift.tt/2APV78J
