ಹೊಸದಿಲ್ಲಿ: ಟೆಸ್ಟ್ ಕ್ರಿಕೆಟ್ನ 400 ರನ್ಗಳ ಸರದಾರ, ವೆಸ್ಟ್ ಇಂಡೀಸ್ ಮಾಜಿ ನಾಯಕ ಅವರು ಇಂದು 51 ನೇ ವಸಂತಕ್ಕೆ ಕಾಲಿಟ್ಟರು. ಅವರ ಜನುಮ ದಿನಕ್ಕೆ ಕ್ರಿಕೆಟ್ ದಿಗ್ಗಜರು ಸೇರಿದಂತೆ ಕ್ರಿಕೆಟ್ ಅಭಿಮಾನಿಗಳಿಂದ ಸೋಶಿಯಲ್ ಮೀಡಿಯಾದಲ್ಲಿ ಶುಭಾಶಯ ಸುರಿಮಳೆ ಹರಿದಿದೆ. ಬ್ರಿಯಾನ್ ಲಾರಾ ಎಂದಾಕ್ಷಣ ನಮಗೆ ತಟ್ಟನೆ ಮನಸಿಗೆ ಹೊಳೆಯುವುದು 400 ರನ್. ಹೌದು 2004ರಲ್ಲಿ ಇಂಗ್ಲೆಂಡ್ ನಾಲ್ಕು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ 4ನೇ ಹಾಗೂ ಕೊನೆಯ ಪಂದ್ಯದಲ್ಲಿ ಕ್ರಿಕೆಟ್ ದಂತಕತೆ ಲಾರಾ, 400 ರನ್ ಸಿಡಿಸಿ ವಿಶ್ವ ಕ್ರಿಕೆಟ್ನಲ್ಲಿ ಯಾರೂ ಮುರಿಯಲಾಗದ ದಾಖಲೆಯೊಂದನ್ನು ಮಾಡಿದ್ದರು. ಇಂದಿಗೂ ಈ ದಾಖಲೆ ಯಾರಿಂದಲೂ ಮುಟ್ಟಲು ಸಾಧ್ಯವಾಗಿಲ್ಲ. ಅಂದಿನಿಂದ ಲಾರಾ ಕ್ರಿಕೆಟ್ ಲೋಕದ ಆರಾಧ್ಯ ದೈವರಾಗಿ ಜನ ಮಾನಸದಲ್ಲಿ ಉಳಿದುಕೊಂಡರು. ಅಂದು ಅಂಟಿಗುವಾದಲ್ಲಿ ನಡೆದಿದ್ದ ಪಂದ್ಯದಲ್ಲಿ 98 ರನ್ಗಳಿಗೆ 2 ವಿಕೆಟ್ ಕಳೆದುಕೊಂಡು ವೆಸ್ಟ್ ಇಂಡೀಸ್ ಆರಂಭಿಕ ಆಘಾತ ಅನುಭವಿಸಿತ್ತು. ಈ ವೇಳೆ ಕ್ರೀಸ್ಗೆ ಆಗಮಿಸಿದ ಬ್ರಿಯಾನ್ ಲಾರಾ, ಅಂಗಳದಲ್ಲಿ ನೆರೆದಿದ್ದ ಅಪಾರ ಸಂಖ್ಯೆಯ ಅಭಿಮಾನಿಗಳನ್ನು ತಮ್ಮ ಸೊಗಸಾದ ಬ್ಯಾಟಿಂಗ್ನಿಂದ ರಂಜಿಸಿದ್ದರು. 400 ರನ್ಗಳ ಮೈಲುಗಲ್ಲು ಸ್ಥಾಪಿಸಿದ ಲಾರಾ, ಅಂದಿನ ಇನಿಂಗ್ಸ್ನಲ್ಲಿ 43 ಬೌಂಡರಿಗಳು ಹಾಗೂ 4 ಅದ್ಭುತ ಸಿಕ್ಸರ್ಗಳು ಒಳಗೊಂಡಿದ್ದವು. ಬ್ರಿಯಾನ್ ಲಾರಾ ಅವರ 400 ರನ್ಗಳ ಸಹಾಯದಿಂದ ವೆಸ್ಟ್ ಇಂಡೀಸ್ 7 ವಿಕೆಟ್ಗಳ ನಷ್ಟಕ್ಕೆ 751 ರನ್ ದಾಖಲಿಸಿತ್ತು. ಅಂದು ಲಾರಾ, ಆಸ್ಟ್ರೇಲಿಯಾದ ಮಾಜಿ ಆಟಗಾರ ಮ್ಯಾಥ್ಯೂ ಹೇಡನ್ ಅವರ ವೈಯಕ್ತಿಕ ಗರಿಷ್ಠ ರನ್ ದಾಖಲೆಯನ್ನು ಮುರಿದಿದ್ದರು. 2003ರಲ್ಲಿ ಹೇಡನ್ ಜಿಂಬಾಬ್ವೆ ವಿರುದ್ಧ 380 ರನ್ ಗಳಿಸಿದ್ದರು. ಆ ಮೂಲಕ ಲಾರಾ ಅವರದ್ದೇ 1994ರಲ್ಲಿ ಗಳಿಸಿದ್ದ 375 ರನ್ಗಳ ಹಳೆಯ ದಾಖಲೆಯನ್ನು ಆಸಿಸ್ ಮಾಜಿ ಬ್ಯಾಟ್ಸ್ಮನ್ ಮುರಿದಿದ್ದರು. ಪ್ರಥಮ ಇನಿಂಗ್ಸ್ ಆರಂಭಿಸಿದ ಇಂಗ್ಲೆಂಡ್ ತಂಡ, ವೆಸ್ಟ್ ಇಂಡೀಸ್ ಮಾರಕ ದಾಳಿಯನ್ನು ಮೆಟ್ಟಿನಿಲ್ಲುವಲ್ಲಿ ಸಾಧ್ಯವಾಗಲಿಲ್ಲ. ಕೇವಲ 285 ರನ್ಗಳಿಗೆ ಪ್ರಥಮ ಇನಿಂಗ್ಸ್ ಅನ್ನು ಅಂತ್ಯಗೊಳಿಸಿತ್ತು. ಆದರೂ, ದ್ವಿತೀಯ ಇನಿಂಗ್ಸ್ನಲ್ಲಿ ನಾಯಕ ಮೈಕಲ್ ವಾನ್ ಗಳಿಸಿದ ಶತಕದ ನೆರವಿನಿಂದ ಇಂಗ್ಲೆಂಡ್ ಕೊನೆಯ ಟೆಸ್ಟ್ ಪಂದ್ಯವನ್ನು ಡ್ರಾ ಮಾಡಿಕೊಂಡಿತ್ತು. ವಿಂಡೀಸ್ ಕ್ರಿಕೆಟ್ ದಿಗ್ಗಜನ ಹುಟ್ಟುಹಬ್ಬದ ಪ್ರಯುಕ್ತ ಅವರ 1999ರ ಬಾರ್ಬಡೋಸ್ನಲ್ಲಿ ಆಸ್ಟ್ರೇಲಿಯಾ ವಿರುದ್ಧದ ಗಳಿಸಿದ್ದ 153 ರನ್ಗಳ ಮತ್ತೊಂದು ಶ್ರೇಷ್ಠ ಇನಿಂಗ್ಸ್ ಅನ್ನು ಸ್ಮರಿಸಿಕೊಳ್ಳಬಹುದು. ಈ ಪಂದ್ಯದಲ್ಲಿ ಆಸ್ಟ್ರೇಲಿಯಾ ತಂಡ, ವೆಸ್ಟ್ ಇಂಡೀಸ್ಗೆ 308 ರನ್ಗಳ ಗುರಿ ನೀಡಿತ್ತು. ಗುರಿ ಬೆಂಬೆತ್ತಿದ ವೆಸ್ಟ್ ಇಂಡೀಸ್, ಕೇವಲ 105 ರನ್ಗಳಿಗೆ 5 ವಿಕೆಟ್ಗಳನ್ನು ಕಳೆದುಕೊಂಡು ತೀವ್ರ ಸಂಕಷ್ಟಕ್ಕೆ ಸಿಲುಕಿತ್ತು. ಈ ವೇಳೆ ಕೊನೆಯವರೆಗೂ ಏಕಾಂಗಿಯಾಗಿ ಬ್ಯಾಟಿಂಗ್ ಮಾಡಿದ ಬ್ರಿಯಾನ್ ಲಾರಾ, ವೆಸ್ಟ್ ಇಂಡೀಸ್ಗೆ ಒಂದು ವಿಕೆಟ್ ಜಯ ತಂದುಕೊಟ್ಟಿದ್ದರು. ಅಂದಿನ ಟೆಸ್ಟ್ ಪಂದ್ಯದಲ್ಲಿ ಲಾರಾ ಶತಕ ಗಳಿಸಿದ್ದು ಬಿಟ್ಟರೆ ಮತ್ತೊಂದು ತುದಿಯಲ್ಲಿ 40 ರನ್ ಗಳಿಸಿದ್ದು ಎರಡನೇ ವೈಯಕ್ತಿಕ ಗರಿಷ್ಠ ರನ್ ಆಗಿತ್ತು. ಪ್ರಥಮ ದರ್ಜೆ ಕ್ರಿಕೆಟ್ನಲ್ಲೂ ಬ್ರಿಯಾನ್ ಲಾರಾ ವೈಯಕ್ತಿಕ ಗರಿಷ್ಠ ರನ್ ದಾಖಲೆಯನ್ನು ಹೊಂದಿದ್ದಾರೆ. 1994ರಲ್ಲಿ ಲಾರಾ ಎಜ್ಬಾಸ್ಟನ್ನಲ್ಲಿ ವಾರ್ಕ್ವಿಕ್ಶೈರ್ ಪರ ದುರ್ಹಾಮ್ ವಿರುದ್ಧ 501 ರನ್ ಸಿಡಿಸಿದ್ದರು. ಇದುವರೆಗೂ ಇಡೀ ವಿಶ್ವದಲ್ಲಿಯೇ ಪ್ರಥಮ ದರ್ಜೆ ಕ್ರಿಕೆಟ್ನಲ್ಲಿ ಲಾರಾ ವೈಯಕ್ತಿಕ ಗರಿಷ್ಠ ರನ್ ದಾಖಲೆಯನ್ನು ಯಾರೂ ಮುರಿಯಲೂ ಸಾಧ್ಯವಾಗಿಲ್ಲ. 2007ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಬ್ರಿಯಾನ್ ಲಾರಾ ವಿದಾಯ ಘೋಷಿಸಿದ್ದರು. ಎಡಗೈ ಬ್ಯಾಟ್ಸ್ಮನ್ 131 ಟೆಸ್ಟ್ ಹಾಗೂ 299 ಏಕದಿನ ಪಂದ್ಯಗಳಲ್ಲಿ ವೆಸ್ಟ್ ಇಂಡೀಸ್ ತಂಡವನ್ನು ಪ್ರತಿನಿಧಿಸಿದ್ದಾರೆ. ಒಟ್ಟಾರೆ, 22,358 ರನ್ಗಳು ಹಾಗೂ 53 ಶತಕಗಳೊಂದಿಗೆ ವಿಂಡೀಸ್ ದಿಗ್ಗಜ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಪೂರ್ಣ ವಿರಾಮ ಇಟ್ಟಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3aXI0yC
