ಹೊಸದಿಲ್ಲಿ: ಕೊರೊನಾ ಸೋಂಕಿತರಿಲ್ಲದ ಆಸ್ಪತ್ರೆಗಳಲ್ಲಿ ಕೆಲಸ ಮಾಡುವ ಆರೋಗ್ಯ ಸೇವಾ ಸಿಬ್ಬಂದಿ ತಮಗೆ ಕೊರೊನಾ ಲಕ್ಷಣಗಳಿಲ್ಲದಿದ್ದರೂ ಮುನ್ನಚ್ಚರಿಕೆ ಕ್ರಮವಾಗಿ ವೈದ್ಯರ ಸಲಹೆ ಪಡೆದು ಹೈಡ್ರಾಕ್ಸಿಕ್ಲೊರೊಕ್ವಿನ್ (ಎಚ್ಸಿಕ್ಯೂ) ಔಷಧ ಬಳಸಬಹುದು ಎಂದು ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ () ತಿಳಿಸಿದೆ. ಮಲೇರಿಯಾ ನಿಯಂತ್ರಣದಲ್ಲಿ ಬಳಸುವ ಎಚ್ಸಿಕ್ಯೂ ಮಾತ್ರೆ ಅಥವಾ ಲಸಿಕೆಯನ್ನು ಕೊರೊನಾ ನಿಯಂತ್ರಣದಲ್ಲಿಯೂ ಬಳಸುವ ಸಂಬಂಧ ಐಸಿಎಂಆರ್ ಶನಿವಾರ ಪರಿಷ್ಕೃತ ಮಾರ್ಗಸೂಚಿ ಬಿಡುಗಡೆ ಮಾಡಿದೆ. ಆರೋಗ್ಯ ಸಿಬ್ಬಂದಿ ಮಾತ್ರವಲ್ಲದೆ ಕಂಟೈನ್ಮೆಂಟ್ ಝೋನ್ಗಳಲ್ಲಿ ನಿಗಾ ವ್ಯವಸ್ಥೆಯಲ್ಲಿರುವ ಸಿಬ್ಬಂದಿ, ಅರೆಸೈನಿಕ ಪಡೆಗಳ ಸಿಬ್ಬಂದಿ, ನರ್ಸ್ಗಳು ಕೂಡ ಸೋಂಕು ತಗುಲಿದ ಶಂಕೆ ವ್ಯಕ್ತವಾದಲ್ಲಿ ಲಕ್ಷಣರಹಿತವಾಗಿದ್ದರೂ ಹೈಡ್ರಾಕ್ಸಿಕ್ಲೊರೊಕ್ವಿನ್ ಸೇವನೆ ಮಾಡಬಹುದು ಎಂದು ಸೂಚಿಸಲಾಗಿದೆ. ಜತೆಗೆ, ಹೈಡ್ರಾಕ್ಸಿಕ್ಲೊರೊಕ್ವಿನ್ ಸೇವನೆ ಮಾತ್ರದಿಂದ ತಾವು ಕೊರೊನಾದಿಂದ ಸುರಕ್ಷಿತ ಎಂಬ ಪೊಳ್ಳು ವಿಶ್ವಾಸ ಬೇಡ ಎಂದು ಎಚ್ಚರಿಸಲಾಗಿದೆ. ಇದು ಕೇವಲ ಮುನ್ನೆಚ್ಚರಿಕೆ ಕ್ರಮ ಮಾತ್ರ ಎಂಬುದನ್ನು ಆರೋಗ್ಯ ಸೇವಾ ಸಿಬ್ಬಂದಿ ಗಮನದಲ್ಲಿಟ್ಟುಕೊಳ್ಳಬೇಕು ಎಂದು ಸ್ಪಷ್ಟಪಡಿಸಲಾಗಿದೆ. ಮಾರ್ಗಸೂಚಿ ಪ್ರಕಟಿಸುವುದಕ್ಕೂ ಮುನ್ನ ಏಮ್ಸ್, ನ್ಯಾಷನಲ್ ಸೆಂಟರ್ ಫಾರ್ ಡಿಸೀಸ್ ಕಂಟ್ರೋಲ್, ನ್ಯಾಷನಲ್ ಡಿಸಾಸ್ಟರ್ ಮ್ಯಾನೇಜ್ಮೆಂಟ್ ಅಥಾರಿಟಿ, ಡಬ್ಲುಎಚ್ಒ ಪ್ರತಿನಿಧಿಗಳ ಜತೆ ಐಸಿಎಂಆರ್ ಅಧಿಕಾರಿಗಳು ಸಭೆ ನಡೆಸಿದ್ದರು ಎಂದು ಮೂಲಗಳು ತಿಳಿಸಿವೆ.
ಪುಣೆಯ ವೈರಾಣು ಸಂಶೋಧನಾ ಇನ್ಸ್ಟಿಟ್ಯೂಟ್ನಲ್ಲಿ ಹೈಡ್ರಾಕ್ಸಿಕ್ಲೊರೊಕ್ವಿನ್ ಲಸಿಕೆಯನ್ನು ಕೊರೊನಾ ಸೋಂಕಿತರಿಗೆ ನೀಡಿ ಆ ಮೂಲಕ ಸೋಂಕಿನ ಪ್ರಮಾಣ ಕಡಿಮೆಯಾಗಿರುವುದನ್ನು ಖಚಿತಪಡಿಸಿಕೊಳ್ಳಲಾಗಿದೆ. ಅಡ್ಡಪರಿಣಾಮಗಳು ಇವೆ ಕೋವಿಡ್-19 ನಿಯಂತ್ರಣದ ರಾಷ್ಟ್ರೀಯ ಟಾಸ್ಕ್ಫೋರ್ಸ್ ಈಗಾಗಲೇ ಎಚ್ಸಿಕ್ಯೂ ಬಳಕೆಯನ್ನು 1,323 ಆರೋಗ್ಯ ಸೇವಾ ಸಿಬ್ಬಂದಿ ಮೇಲೆ ಪ್ರಯೋಗ ಮಾಡಿದ್ದು ಆ ಪೈಕಿ ಶೇ.8.9ರಷ್ಟು ಮಂದಿಗೆ ವಾಂತಿ, ಶೇ.7.3ರಷ್ಟು ಮಂದಿಗೆ ಬೆನ್ನು ನೋವು, ಶೇ.1.9ರಷ್ಟು ಮಂದಿಗೆ ಹೃದಯದ ಸಮಸ್ಯೆ ಮತ್ತು ಉಸಿರಾಟ ಸಮಸ್ಯೆಯಂಥ ಅಡ್ಡಪರಿಣಾಮಗಳು ಗೋಚರಿಸಿವೆ. ಆದರೆ ಹೊಸದಿಲ್ಲಿಯ ಮೂರು ಕೇಂದ್ರೀಯ ಆಸ್ಪತ್ರೆಗಳಲ್ಲಿ ಆರೋಗ್ಯ ಸಿಬ್ಬಂದಿಗೆ ಮುಂಚಿತವಾಗಿಯೇ ಎಚ್ಸಿಕ್ಯೂ ನೀಡಿ ನಡೆಸಿದ ಪರೀಕ್ಷೆಯಲ್ಲಿ ಕೋವಿಡ್-19 ಸೋಂಕು ತಗಲುವ ಸಾಧ್ಯತೆ ಕಡಿಮೆ ಎಂದು ಕಂಡು ಬಂದಿದೆ. ಎಚ್ಸಿಕ್ಯೂ ನೀಡದ ಸಿಬ್ಬಂದಿ ಬೇಗನೆ ಸೋಂಕಿಗೆ ತುತ್ತಾಗಿದ್ದಾರೆ. ಇದಲ್ಲದೆ ಏಮ್ಸ್ನಲ್ಲಿನ 334ರ ಪೈಕಿ 248 ಆರೋಗ್ಯ ಸೇವಾ ಸಿಬ್ಬಂದಿಗೆ ಮುನ್ನೆಚ್ಚರಿಕೆಯಾಗಿ ಎಚ್ಸಿಕ್ಯೂ ನೀಡಲಾಗಿತ್ತು. ಯಾರು ಸೇವಿಸಬಾರದು?15 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳು, ಗರ್ಭಿಣಿಯರು ಹಾಗೂ ಹೃದಯ ಸಮಸ್ಯೆಯುಳ್ಳವರು ಎಚ್ಸಿಕ್ಯೂ ಸೇವಿಸದಿರುವುದು ವಾಸಿ ಎಂದು ತಜ್ಞರು ತಿಳಿಸಿದ್ದಾರೆ.
from India & World News in Kannada | VK Polls https://ift.tt/2yw2Bgw
