ಬೆಂಗಳೂರು: ಕಾವೇರಿ ನದಿ ಪುನರುಜ್ಜೀವನಕ್ಕಾಗಿ ಈಶಾ ಫೌಂಡೇಷನ್‌ ಕೈಗೆತ್ತಿಕೊಂಡಿರುವ ನದಿ ಪಾತ್ರದಲ್ಲಿ 242 ಕೋಟಿ ಸಸಿಗಳನ್ನು ನಡೆಸುವ '' ಯೋಜನೆ ಪ್ರಶ್ನಿಸಿದ್ದ ಪಿಐಎಲ್‌ ವಿಚಾರಣೆಯನ್ನು ಪೂರ್ಣಗೊಳಿಸಿರುವ ತೀರ್ಪು ಕಾಯ್ದಿರಿಸಿತು. ವಕೀಲ ಎ. ವಿ. ಅಮರನಾಥನ್‌ ಸಲ್ಲಿಸಿದ್ದ ಪಿಐಎಲ್‌ ಅನ್ನು ಹೈಕೋರ್ಟ್‌ ಸ್ವಯಂಪ್ರೇರಿತ ಪಿಐಎಲ್‌ ಆಗಿ ಪರಿವರ್ತಿಸಿಕೊಂಡು ವಿಚಾರಣೆ ನಡೆಸುತ್ತಿದೆ. ಹಂಗಾಮಿ ಸಿ.ಜೆ. ಸತೀಶ್‌ಚಂದ್ರ ಶರ್ಮಾ ನೇತೃತ್ವದ ವಿಭಾಗೀಯಪೀಠ ಬುಧವಾರ ಅರ್ಜಿದಾರರು, ಸರಕಾರದ ಪರ ಹಾಗೂ ಪ್ರಕರಣದಲ್ಲಿ ನ್ಯಾಯಾಲಯಕ್ಕೆ ಸಹಕರಿಸಲು ನೇಮಕಗೊಂಡಿರುವ ಅಮಿಕಸ್‌ ಕ್ಯೂರಿ ಅವರ ವಾದ-ಪ್ರತಿವಾದವನ್ನು ಆಲಿಸಿ ತೀರ್ಪು ಕಾಯ್ದಿರಿಸಿತು. ವಾದ ಆಲಿಸಿದ ಬಳಿಕ ನ್ಯಾಯಪೀಠ, ''ಯೋಜನೆಗೆ ಹಣ ಸಂಗ್ರಹಿಸುತ್ತಿರುವುದು ಸ್ವಯಂಪ್ರೇರಿತವೋ, ಕಡ್ಡಾಯವೋ? ಸರಕಾರಿ ಜಾಗದಲ್ಲಿ ಗಿಡ ನಡೆಸುವುದು ಅಪರಾಧವೇ? ಅದನ್ನು ತಡೆಯುವುದಕ್ಕೆ ಯಾವುದಾದರೂ ಕಾನೂನು ಇದೆಯೇ?'' ಎಂದು ಪ್ರಶ್ನಿಸಿತು. ಅದಕ್ಕೆ ಉತ್ತರಿಸಿದ ಅಮಿಕಸ್‌ ಕ್ಯೂರಿ ''ಹಣ ಸಂಗ್ರಹ ಸ್ವಯಂಪ್ರೇರಿತ. ಸರಕಾರಿ ಜಾಗದಲ್ಲಿ ಗಿಡ ನೆಡಬಹುದು, ಆದರೆ ಅದಕ್ಕೆ ಅನುಮತಿ ಪಡೆಯಬೇಕಾಗುತ್ತದೆ,'' ಎಂದರು. ಆಗ ನ್ಯಾಯಪೀಠ'' ಪ್ರತಿವಾದಿ ಟ್ರಸ್ಟ್‌ ಆಗಿರುವುದರಿಂದ ಅದು ಸಂಗ್ರಹಿಸುವ ಹಣ ಮತ್ತು ಖರ್ಚು ಮಾಡುವ ಹಣಕ್ಕೆ ಲೆಕ್ಕಪತ್ರವಿರುತ್ತದೆ. ಒಂದು ವೇಳೆ ಏನಾದರೂ ವ್ಯತ್ಯಾಸವಾದರೆ ಅದನ್ನು ಪರಿಶೀಲಿಸಲು ಆದಾಯ ಇಲಾಖೆ ಮತ್ತಿತರ ಸಂಸ್ಥೆಗಳಿವೆ. ಹಾಗಾಗಿ ಹಣ ದುರುಪಯೋಗವಾಗುವ ಸಾಧ್ಯತೆ ಕಡಿಮೆ'' ಎಂದು ಹೇಳಿತು. ಈಶಾ ಫೌಂಡೇಷನ್‌ ಪರ ವಾದ ಮಂಡಿಸಿದ ಹಿರಿಯ ನ್ಯಾಯವಾದಿ ಉದಯ್‌ ಹೊಳ್ಳ, ''ಕಾವೇರಿ ನದಿ ಪುನರುಜ್ಜೀವನಕ್ಕಾಗಿ ಫೌಂಡೇಷನ್‌ ಕೈಗೊಂಡಿರುವ ಯೋಜನೆ 'ಕಾವೇರಿ ಕೂಗು'. ಇದಕ್ಕೆ ದಾನಿಗಳಿಂದ ಪ್ರತಿ ಮರಕ್ಕೆ 42 ರೂ. ಹಣ ಸಂಗ್ರಹಿಸಲಾಗುತ್ತಿದೆ,'' ಎಂದು ಹೇಳಿದರು. ಅಮಿಕಸ್‌ ಕ್ಯೂರಿ ಬಿ.ವಿ.ವಿದ್ಯುಲ್ಲತಾ, ''ಈಶಾ ಫೌಂಡೇಷನ್‌ ಒಂದು ಗಿಡಕ್ಕೆ 42 ರೂ.ನಂತೆ 253 ಕೋಟಿ ಮರಗಳಿಗೆ 10,626 ಕೋಟಿ ರೂ. ಹಣ ಸಂಗ್ರಹವಾಗುತ್ತದೆ. ಯೋಜನೆಗೆ ಅಷ್ಟು ಹಣದ ಅಗತ್ಯವಿಲ್ಲ. ಹಾಗಾಗಿ ಸಾವಿರಾರು ಕೋಟಿ ಹಣ ಸಂಗ್ರಹವಾದರೆ ದುರುಪಯೋಗವಾಗಬಹುದು, ಅದಕ್ಕೆ ಫೌಂಡೇಷನ್‌ನಿಂದ ಸ್ಪಷ್ಟನೆ ಕೋರಬೇಕು,'' ಎಂದರು. ಇದಕ್ಕೆ ಈಶಾ ಫೌಂಡೇಶನ್‌ ವಕೀಲರು ಆಕ್ಷೇಪ ಎತ್ತಿದರು. ಸರಕಾರ ಪರ ವಾದಿಸಿದ ಎಎಜಿ ಆರ್‌. ಸುಬ್ರಮಣ್ಯ, ''ಕಾವೇರಿ ಕೂಗು ಸರಕಾರದ ಯೋಜನೆಯಲ್ಲ ಎಂದು ಈಗಾಗಲೇ ಸ್ಪಷ್ಟಪಡಿಸಲಾಗಿದೆ. ಈಶಾ ಫೌಂಡೇಷನ್‌ ಸಲ್ಲಿಸಿದ್ದ ಪ್ರಸ್ತಾವಕ್ಕೆ ಸರಕಾರ ಒಪ್ಪಿಗೆ ನೀಡಿಲ್ಲ. ಸರಕಾರವೇ ನದಿ ಪಾತ್ರದಲ್ಲಿ ಅರಣ್ಯಾಭಿವೃದ್ಧಿಗೆ ಕ್ರಮ ಕೈಗೊಂಡಿದೆ,'' ಎಂದರು.
from India & World News in Kannada | VK Polls https://ift.tt/2WCa21P
