ಟೋಕಿಯೋ (ಜಪಾನ್) : ಆರಂಭದಲ್ಲಿ 1-3 ಹಿನ್ನಡೆ ಅನುಭವಿಸಿದ್ದ ಮನ್ಪ್ರೀತ್ ಸಿಂಗ್ ನಾಯಕತ್ವದ ಭಾರತ ಪುರುಷರ ಹಾಕಿ ತಂಡ, ನಂತರ ಬಲಿಷ್ಠವಾಗಿ ಕಮ್ಬ್ಯಾಕ್ ಮಾಡಿ 5-4 ಅಂತರದಲ್ಲಿ ಜರ್ಮನಿ ವಿರುದ್ಧ ಗೆಲುವು ಸಾದಿಸಿತು. ಆಮೂಲಕ ಟೋಕಿಯೋ ಒಲಿಂಪಿಕ್ಸ್ ಕಂಚಿನ ಪದಕ ಮುಡಿಗೇರಿಸಿಕೊಂಡಿತು. ಇದರೊಂದಿಗೆ 41 ವರ್ಷಗಳ ಬಳಿಕ ಒಲಿಂಪಿಕ್ಸ್ ಕ್ರೀಡಾಕೂಟದಲ್ಲಿ ಪದಕದ ಸಾಧನೆ ಮಾಡಿತು. ಅಂದಹಾಗೆ, ಪಂದ್ಯದಲ್ಲಿ ಜರ್ಮನಿ ಫಾವರ್ಡ್ ಆಟಗಾರರ ಬೆಂಕಿ ಹೊಡೆತಗಳನ್ನು ತಡೆದು ಭದ್ರ ಕೋಟೆಯನ್ನೇ ನಿರ್ಮಿಸಿದ್ದ ಗೋಲ್ ಕೀಪರ್ ಶ್ರೀಜೇಶ್, ಭಾರತ ತಂಡದ ಐತಿಹಾಸಿಕ ಗೆಲುವಿನಲ್ಲಿ ಮಹತ್ತರ ಪಾತ್ರವಹಿಸಿದರು. ಆ ಮೂಲಕ ಅಪಾರ ಅಭಿಮಾನಿಗಳ ಪ್ರೀತಿಗ ಪಾತ್ರರಾದರು. ಭಾರತ ಹಾಕಿ ತಂಡ 1980ರಲ್ಲಿ ಕೊನೆಯ ಬಾರಿ ಒಲಿಂಪಿಕ್ಸ್ ಕ್ರೀಡಾಕೂಟದಲ್ಲಿ ಚಿನ್ನದ ಪದಕ ಗೆದ್ದುಕೊಂಡಿತ್ತು. ಇಂದು (ಗುರುವಾರ) ಕಂಚಿನ ಪದಕ ಗೆಲ್ಲುತ್ತಿದ್ದಂತೆ ಭಾರತ ತಂಡದ ಆಟಗಾರರ ಸಂಭ್ರಮ ಮುಗಿಲು ಮುಟ್ಟಿತು. ಅಲ್ಲದೆ, ಕೋಟ್ಯಾಂತರ ಅಭಿಮಾನಿಗಳ ಮೆಚ್ಚುಗೆಗೆ ಭಾರತ ಭಾಜನವಾಯಿತು. ಕಂಚಿನದ ಪದಕದ ನಿರೀಕ್ಷೆಯಲ್ಲಿ ಇಂದು(ಗುರವಾರ) ಬೆಳಗ್ಗೆ ಕಣಕ್ಕೆ ಇಳಿದ ಭಾರತ ತಂಡಕ್ಕೆ ಆರಂಭಿಕ ಎರಡನೇ ನಿಮಿಷದಲ್ಲಿ ಜರ್ಮನಿ ಗೋಲಿನ ಖಾತೆ ತೆರೆದು ಆಘಾತ ನೀಡಿತು. ಗೋಲು ಗಳಿಸಿ ಸಮಬಲ ಸಾಧಿಸಲು ಭಾರತ ಕಠಿಣ ಹೋರಾಟ ನಡೆಸಿದ ಹೊರತಾಗಿಯೂ ಮೊದಲನೇ ಕ್ವಾರ್ಟರ್ನಲ್ಲಿ ಜರ್ಮನಿ 1-0 ಮುನ್ನಡೆ ಕಾಯ್ದುಕೊಂಡಿತು. ನಂತರ ಎರಡನೇ ಕ್ವಾರ್ಟರ್ನ ಆರಂಭದಲ್ಲಿಯೇ ಭಾರತಕ್ಕೆ ಸಿಮ್ರಾನ್ಜೀತ್ ಗೋಲಿನ ಖಾತೆ ತೆರೆದು ಸಮಬಲ ತಂದುಕೊಟ್ಟರು. ಇದಾದ ಕೇವಲ 6 ನಿಮಿಷಗಳ ಅಂತರದಲ್ಲಿ ಜರ್ಮನಿ ಗೋಲು ಸಿಡಿಸಿ 2-1 ಮುನ್ನಡೆ ಪಡೆಯಿತು. ನಂತರ, ರಕ್ಷಣಾ ವಿಭಾಗದ ವೈಫಲ್ಯದಿಂದ ಭಾರತ, ಜರ್ಮನಿಗೆ ಮತ್ತೊಂದು ಗೋಲು ಬಿಟ್ಟುಕೊಟ್ಟಿತು. ಆ ಮೂಲಕ ಜರ್ಮನಿ 3-1 ಮುನ್ನಡೆ ಪಡೆಯಿತು. ಆದರೆ, ಹಾರ್ದಿಕ್ ಸಿಂಗ್ ಹಾಗೂ ಹರ್ಮನ್ಪ್ರೀತ್ ಸಿಂಗ್ ಅವರ ಎರಡು ಗೋಲುಗಳ ನೆರವಿನಿಂದ ಭಾರತ ಎರಡನೇಕ್ವಾರ್ಟರ್ ಅಂತ್ಯಕ್ಕೆ 3-3 ಸಮಬಲ ಸಾಧಿಸಿತು. ಮೂರನೇ ಕ್ವಾರ್ಟರ್ನಲ್ಲಿ ರೂಪಿಂದರ್ ಸಿಂಗ್ ಹಾಗೂ ಸಿಮ್ರಾನ್ಜೀತ್ ಅವರ ಗೋಲುಗಳ ನೆರವಿನಿಂದ ಭಾರತ ತಂಡ ಮೂರನೇ ಕ್ವಾರ್ಟರ್ ಅಂತ್ಯಕ್ಕೆ 5-3 ಮುನ್ನಡೆ ಸಾಧಿಸಿತು. ನಂತರ ನಾಲ್ಕನೇ ಕ್ವಾರ್ಟರ್ನಲ್ಲಿ ಒತ್ತಡದಲ್ಲಿ ಕಣಕ್ಕೆ ಇಳಿದ ಜರ್ಮನಿ ತಂಡ ಒಂದೇ ಒಂದು ಗೋಲು ಮಾತ್ರ ಗಳಿಸಲು ಶಕ್ತವಾಯಿತು. ನಿರ್ಣಾಯಕ ನಿಮಿಷಗಳಲ್ಲಿ ಭದ್ರ ಕೋಟೆಯನ್ನೇ ನಿರ್ಮಿಸಿದ್ದ ಗೋಲ್ ಕೀಪರ್ ಶ್ರೀಜೇಶ್, ಜರ್ಮನಿ ಫಾವರ್ಡ್ ಆಟಗಾರರ ಬೆಂಕಿ ಚೆಂಡುಗಳನ್ನು ತಡೆಯುವಲ್ಲಿ ಯಶಸ್ವಿಯಾದರು. ಅಂತಿಮವಾಗಿ ಭಾರತ 5-4 ಅಂತರದಲ್ಲಿ ಪಂದ್ಯವನ್ನು ತನ್ನ ತೆಕ್ಕೆಗೆ ಹಾಕಿಕೊಂಡಿತು. ಭಾರತ ಹಾಕಿ ತಂಡಕ್ಕೆ ಪ್ರಧಾನಿ ಮೋದಿ ಅಭಿನಂದನೆ: 41 ವರ್ಷಗಳ ಬಳಿಕ ಒಲಿಂಪಿಕ್ಸ್ ಕ್ರೀಡಾಕೂಟದಲ್ಲಿ ಪದಕ ಗೆದ್ದು ಐತಿಹಾಸಿಕ ಸಾಧನೆ ಮಾಡಿದ ಭಾರತ ಹಾಕಿ ತಂಡವನ್ನು ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಟ್ವಿಟರ್ನಲ್ಲಿ ಅಭಿನಂದನೆ ಸಲ್ಲಿಸಿದ್ದಾರೆ. "ಇದು ಐತಿಹಾಸಿಕ ಕ್ಷಣ! ಪ್ರತಿಯೊಬ್ಬ ಭಾರತೀಯನ ನೆನಪಿನಲ್ಲಿ ಉಳಿಯುವಂತಹ ದಿನ. ಕಂಚು ಮನೆಗೆ ತಂದ ನಮ್ಮ ಪುರುಷರ ಹಾಕಿ ತಂಡಕ್ಕೆ ಅಭಿನಂದನೆಗಳು. ಈ ಸಾಧನೆಯೊಂದಿಗೆ, ಅವರು ಇಡೀ ರಾಷ್ಟ್ರದ, ವಿಶೇಷವಾಗಿ ನಮ್ಮ ಯುವಕರ ಕಲ್ಪನೆಯನ್ನು ಸೆರೆಹಿಡಿದಿದ್ದಾರೆ. ನಮ್ಮ ಹಾಕಿ ತಂಡದ ಬಗ್ಗೆ ಭಾರತ ಹೆಮ್ಮೆ ಪಡುತ್ತದೆ," ಎಂದು ಮೋದಿ ಟ್ವೀಟ್ ಮಾಡಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3ly4YFy
