ವಾಷಿಂಗ್ಟನ್: ನಕ್ಷತ್ರಗಳನ್ನು ವಿಶ್ವದ ಚಾಲಕ ಶಕ್ತಿಗಳು ಎನ್ನಬಹುದು. ಟ್ರಿಲಿಯನ್ಗಟ್ಟಲೇ ನಕ್ಷತ್ರಗಳು ಸೇರಿ ಒಂದು ಗ್ಯಾಲಕ್ಸಿ ರಚನೆಯಾಗುತ್ತದೆ. ಈ ಗ್ಯಾಲಕ್ಸಿಯಲ್ಲಿನ ಎಲ್ಲಾ ಚಟುವಟಿಕೆಗಳಿಗೆ ನಕ್ಷತ್ರಗಳೇ ಪ್ರೇರಣೆ. ನಕ್ಷತ್ರವೊಂದು ಸ್ಪೋಟಗೊಂಡಾಗ ಅದರಿಂದ ಬಿಡುಗಡೆಯಾಗುವ ಶಕ್ತಿ ಇಡೀ ಗ್ಯಾಲಕ್ಸಿ ಮೇಲೆ ಪ್ರಭಾವ ಬೀರುವುದು ಸಾಮಾನ್ಯ. ಸೂಪರ್ನೋವಾ ಎಂದು ಕರೆಯಲ್ಪಡುವ ಈ ವಿದ್ಯಮಾನ ಬ್ರಹ್ಮಾಂಡದ ಅಪರೂಪದ ಹಾಗೂ ಕುತೂಹಲಕಾರಿ ಘಟನೆ. ದೈತ್ಯ ನಕ್ಷತ್ರವೊಂದು ತನ್ನೆಲ್ಲಾ ಶಕ್ತಿಯನ್ನು ಒಟ್ಟುಗೂಡಿಸಿ ಸ್ಫೋಟಗೊಳ್ಳುವುದುನ್ನು ನೋಡುವುದೇ ಸೌಭಾಗ್ಯ. ಅದರಂತೆ ಸ್ಪೋಟಗೊಂಡಿದ್ದ ಬೃಹತ್ ನಕ್ಷತ್ರವೊಂದರ ಸುಮಾರು 300 ವರ್ಷಗಳಷ್ಟು ಹಳೆಯ ಅವಶೇಷಗಳ ಅದ್ಭುತ ಫೋಟೋವೊಂದನ್ನು, ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ಬಿಡುಗಡೆ ಮಾಡಿದೆ. ಭೂಮಿಯಿಂದ ಸುಮಾರು 11,000 ಜ್ಯೋತಿರ್ವರ್ಷ ದೂರದಲ್ಲಿದ್ದ 'ಕ್ಯಾಸಿಯೋಪಿಯಾ ಎ'(Cas A) ಹೆಸರಿನ ಈ ನಕ್ಷತ್ರ ಸ್ಪೋಟಗೊಂಡ ಬಳಿಕ ರಚನೆಯಾದ ಅವಶೇಷಗಳನ್ನು ಈ ಫೋಟೋದಲ್ಲಿ ಸೆರೆಹಿಡಿಯಲಾಗಿದೆ. ಈ ಚಿತ್ರದಲ್ಲಿ ಕಾಣುವ ನೀಲಿ ಮತ್ತು ಹಸಿರು ಬಣ್ಣದ ಅವಶೇಷಗಳನ್ನು ನಾಸಾದ ಚಂದ್ರ ಎಕ್ಸ್-ರೇ ವೀಕ್ಷಣಾಲಯದಿಂದ ಸಂಗ್ರಹಿಸಿದ ದತ್ತಾಂಶವಾಗಿದೆ. ಸುಮಾರು 10 ಮಿಲಿಯನ್ ಡಿಗ್ರಿ ಸೆಲ್ಸಿಯಸ್ ತಾಪಮಾನ ಹೊಂದಿರುವ ಈ ಅವಶೇಷ, ಗಂಟೆಗೆ 10 ಮಿಲಿಯನ್ ಮೈಲು ವೇಗದಲ್ಲಿ ಸುತ್ತಲಿನ ಅನಿಲ ಮತ್ತು ಧೂಳಿನ ಅವಶೇಷಗಳೊಂದಿಗೆ ಡಿಕ್ಕಿ ಹೊಡೆದಿದೆ ಎಂದು ನಾಸಾ ವಿಜ್ಞಾನಿಗಳು ತಿಳಿಸಿದ್ದಾರೆ. ಇನ್ನು ಕೆಂಪು ಬಣ್ಣವು ಸ್ಪಿಟ್ಜರ್ ಸ್ಪೇಸ್ ಟೆಲಿಸ್ಕೋಪ್ನಿಂದ ಸ್ವೀಕರಿಸಿದ ದತ್ತಾಂಶವಾಗಿದ್ದು, ಹಳದಿ ಬಣ್ಣವು ಹಬಲ್ ಬಾಹ್ಯಾಕಾಶ ದೂರದರ್ಶಕ ಯಂತ್ರ ಸಂಗ್ರಹಿಸಿದ ದತ್ತಾಂಶವಾಗಿದೆ. ನಾಸಾ ತನ್ನ ಇನ್ಸ್ಟಾಗ್ರಾಮ್ನಲ್ಲಿ ಪೋಸ್ಟ್ ಮಾಡಿರುವ ಈ ಫೋಟೋ ಭಾರೀ ವೈರಲ್ ಆಗಿದ್ದು, ಇದುವರೆಗೂ ಸುಮಾರು 1.3 ಮಿಲಿಯನ್ ಜನ ಇದನ್ನು ವೀಕ್ಷಿಸಿದ್ದಾರೆ.
from India & World News in Kannada | VK Polls https://ift.tt/2WGx478
