ನಾಗರಾಜು ಅಶ್ವತ್ಥ್‌, ಬೆಂಗಳೂರು ಗ್ರಾಮಾಂತರ ದೊಡ್ಡಬಳ್ಳಾಪುರ: ಎತ್ತಿನಹೊಳೆ ನೀರು ಸಂಗ್ರಹಕ್ಕೆಂದು ಜಿಲ್ಲೆಯ ದೊಡ್ಡಬಳ್ಳಾಪುರದ ಸಾಸಲು ಹೋಬಳಿಯಲ್ಲಿ ನಿರ್ಮಾಣಗೊಳ್ಳಲಿರುವ ಭೈರಗೊಂಡ್ಲು ಜಲಾಶಯದ ಪೈಪ್‌ಲೈನ್‌ನ ಅಡ್ವಾನ್ಸ್‌ ಕಾಮಗಾರಿ ಸೃಷ್ಟಿಸಿದೆ. ಭೂಸ್ವಾಧೀನ ಪ್ರಕ್ರಿಯೆಗಳ ಬಗ್ಗೆ ಯಾವುದೇ ಮಾಹಿತಿಯನ್ನು ನೀಡದೆ, ಕಾಮಗಾರಿ ಮಾಡುತ್ತಿರುವ ಖಾಸಗಿ ಕಂಪನಿಯ ಗುತ್ತಿಗೆದಾರರು ಮುಂಚಿತವಾಗಿ ಕಾಮಗಾರಿ ಆರಂಭಿಸಿದ್ದಾರೆ. ರೈತರಿಂದ ಪಹಣಿ, ಆಧಾರ್‌ಕಾರ್ಡ್‌ ದಾಖಲೆ ಪಡೆದು 1 ಗುಂಟೆ ಭೂಮಿಗೆ ಕೇವಲ ₹1 ಸಾವಿರ ತಾತ್ಕಾಲಿಕ ಪರಿಹಾರ ನೀಡುತ್ತಿರುವುದರಿಂದಾಗಿ ರೈತರಲ್ಲಿ ಆತಂಕ ಮನೆಮಾಡಿದೆ. ರೈತರಿಗೆ ಮಾಹಿತಿ ನೀಡದೆ ! ಚಿಕ್ಕಬಳ್ಳಾಪುರ ಜಿಲ್ಲೆಯ ಗೌರಿಬಿದನೂರಿನಿಂದ ತಾಲೂಕಿನ ಮಧ್ಯೆ ಎತ್ತಿನಹೊಳೆ ನೀರು ಸಂಗ್ರಹಕ್ಕೆಂದು ಪೈಪ್‌ಲೈನ್‌ ಅಳವಡಿಕೆ ಕಾಮಗಾರಿಯನ್ನು ಖಾಸಗಿ ಏಜೆನ್ಸಿಯೊಂದು ಆರಂಭಿಸಿದೆ. ಪೈಪ್‌ಲೈನ್‌ ಅಳವಡಿಕೆಗೆಂದು ಸರಕಾರ ಭೂಸ್ವಾಧೀನ ಪ್ರಕ್ರಿಯೆ ಆರಂಭಿಸುತ್ತಿದ್ದು, ರೈತರಿಗೆ ಈ ಬಗ್ಗೆ ಮಾಹಿತಿಯಿಲ್ಲ. ಆದರೆ, ಈ ಮಧ್ಯೆ ಏಜೆನ್ಸಿಯ ಗುತ್ತಿಗೆದಾರರು ಮುಂಚಿತವಾಗಿ ಕಾಮಗಾರಿ ಆರಂಭಿಸಿದ್ದಾರೆ. ಗೌರಿಬಿದನೂರಿನ ಡಿಪಾಳ್ಯ, ಮಂಚೇನಹಳ್ಳಿ ಭಾಗದಿಂದ ಕಾಮಗಾರಿ ಸಾಗುತ್ತ ಬಂದಿದ್ದು, ದೊಡ್ಡಬಳ್ಳಾಪುರದ ಸಾಸಲು ಹೋಬಳಿಯ ಹಾರೋಹಳ್ಳಿ ವ್ಯಾಪ್ತಿಗೆ ಬಂದಿದೆ. ರೈತರಿಗೆ ಗುತ್ತಿಗೆದಾರರು ಯೋಜನೆಯ ಮಾಹಿತಿ ನೀಡುತ್ತಿದ್ದು, ಸರಕಾರದ ಪರಿಹಾರದ ಬಗ್ಗೆ ತಿಳಿಸುತ್ತಿದ್ದು ತಾತ್ಕಾಲಿಕವಾಗಿ ಪಹಣಿಗಳ ಆಧಾರದಲ್ಲಿ ಒಂದು ಗುಂಟೆಗೆ ₹1 ಸಾವಿರ ಪರಿಹಾರವನ್ನು ನೀಡಲಾಗುತ್ತಿದೆ. ಈ ಬಗ್ಗೆ ಸಂದೇಹ ಮೂಡಿದ ರೈತರು, ಜಮೀನು ವ್ಯಾಜ್ಯಗಳಿರುವವರು ಮಾತ್ರ ಜಮೀನಿನಲ್ಲಿ ಪೈಪ್‌ಲೈನ್‌ ಅಳವಡಿಕೆಗೆ ಅನುಮತಿಗೆ ನಿರಾಕರಿಸುತ್ತಿರುವೆಡೆ ಮಾತ್ರ ಕಾಮಗಾರಿ ನಿಂತಿದೆ. ಸಭೆಗಳನ್ನು ಮಾಡದೆ ನಿರ್ಲಕ್ಷ್ಯ..!ಆರಂಭದ ದಿನಗಳಿಂದಲೂ ಭೈರಗೊಂಡ್ಲು ಜಲಾಶಯಕ್ಕೆ ಸಂಬಂಧಿಸಿದಂತೆ ರೈತರಿಗೆ ಮಾಹಿತಿಯ ಕೊರತೆ ಎದ್ದು ಕಾಣುತ್ತಿದೆ. ಇಲ್ಲಿನ ಗರುಡಗಲ್ಲು, ಕನಕೇನಹಳ್ಳಿ, ಮಚ್ಚೇನಹಳ್ಳಿ ಸುತ್ತಲಿನ ಗ್ರಾಮಸ್ಥರಿಗೆ ತಮ್ಮ ಗ್ರಾಮಗಳ ಮುಳುಗಡೆ ವಿಚಾರಕ್ಕೆ ಸಂಬಂಧಿಸಿದಂತೆ ಅನೇಕ ಗೊಂದಲಗಳಿದ್ದವು. ಇದೀಗ ಇದೇ ವ್ಯಾಪ್ತಿಯ ಹಾರೋಹಳ್ಳಿ, ಮಲ್ಲಯ್ಯನಪಾಳ್ಯ, ಉಪಾಸಪುರ, ಮಚ್ಚೇನಹಳ್ಳಿ, ಬನಾವತಿ ಸಮೀಪ ಪೈಪ್‌ಲೈನ್‌ ಅಳವಡಿಕೆ ಕಾಮಗಾರಿಯ ಮಾಹಿತಿಯನ್ನು ರೈತರಿಗೆ ನೀಡದೆ ಇರುವುದು ರೈತರ ಆಕ್ರೋಶಕ್ಕೆ ಕಾರಣವಾಗಿದೆ. ಸರಕಾರದ ನಿಯಮಾನುಸಾರ 1:4ರ ಪರಿಹಾರ ಮೊತ್ತದ ಮಾಹಿತಿಯನ್ನು ಒದಗಿಸಿ, ಕಾಮಗಾರಿಗಳನ್ನು ಆರಂಭಿಸದೆ 1ಸಾವಿರ ಹಣವನ್ನು ಕೈಗಿಟ್ಟು ಪೈಪ್‌ಲೈನ್‌ ಅಳವಡಿಕೆಗೆಂದು ಜಮೀನು ಅಗೆದರೆ ಪುನಃ ಇಲಾಖೆಗಳ ಸುತ್ತ ಅಲೆಯುವವರಾರು ಎನ್ನುವುದು ಕೆಲ ರೈತರ ಪ್ರಶ್ನೆಯಾಗಿದೆ. ರೈತರಿಗೆ ಸಮರ್ಪಕ ಮಾಹಿತಿ ಒದಗಿಸದೆ ಅಧಿಕಾರಿಗಳು ನಿರ್ಲಕ್ಷ್ಯ ಭಾವನೆ ತೋರುತ್ತಿದ್ದಾರೆಂದು ಸ್ಥಳೀಯರು ಆರೋಪಿಸಿದ್ದಾರೆ.
from India & World News in Kannada | VK Polls https://ift.tt/38FGAuJ
