ವಾಷಿಂಗ್ಟನ್‌: ತನ್ನ ಅಧಿಕಾರವಧಿ ಮುಗಿಯಲು ಕೇವಲ ಒಂದು ವಾರ ಮಾತ್ರ ಬಾಕಿ ಇರುವಾಗ ಅಮೆರಿಕ ಅಧ್ಯಕ್ಷ ವಾಗ್ದಂಡನೆಗೆ ಗುರಿಯಾಗಿದ್ದಾರೆ. ಆ ಮೂಲಕ ಅಧಿಕಾರವಧಿಯಲ್ಲಿ ಎರಡೆರಡು ಬಾರಿ ವಾಗ್ದಂಡೆನೆಯ ಅವಮಾನಕ್ಕೆ ಗುರಿಯಾದ ಅಮೆರಿಕದ ಮೊದಲ ಅಧ್ಯಕ್ಷ ಎಂಬ ಅಪಕೀರ್ತಿಗೆ ಟ್ರಂಪ್‌ ಭಾಜನರಾಗಿದ್ದಾರೆ. ಬುಧವಾರ ಅಮೆರಿಕ ಸಂಸತ್‌ನ ಕೆಳಮನೆ ಹೌಸ್‌ ಆಫ್‌ ರೆಪ್ರೆಸೆಂಟೇಟಿವ್ಸ್‌ನಲ್ಲಿ ದಂಗೆಗೆ ಪ್ರಚೋದನೆ ನೀಡಿದ ಆರೋಪದಡಿ ಟ್ರಂಪ್‌ ವಿರುದ್ಧ ಮಂಡಿಸಲಾಯ್ತು. ಇದಕ್ಕೆ ಟ್ರಂಪ್‌ ಅವರ ರಿಪಬ್ಲಿಕನ್ ಪಕ್ಷದ 10 ಮಂದಿ ಸಂಸದರು ಬೆಂಬಲ ಸೂಚಿಸಿದ್ದಾರೆ. ವಾಗ್ದಂಡನೆ ಪರವಾಗಿ 232 ಮತಗಳು ಬಿದ್ದರೆ ವಿರುದ್ಧವಾಗಿ 197 ಮತಗಳು ಚಲಾವಣೆಯಾದವು. ಆ ಮೂಲಕ ಅಮೆರಿಕದ ಕೆಳಮನೆ ಟ್ರಂಪ್‌ ಅವರನ್ನು ಅಧ್ಯಕ್ಷ ಗಾದಿಯಿಂದ ಕಿತ್ತು ಹಾಕುವುದಕ್ಕೆ ಅಸ್ತು ಎಂದಿದೆ. ಕೆಳಮನೆ ಅನುಮೋದಿಸಿದ ಈ ನಿಳುವಳಿಗೆ ಸ್ಪೀಕರ್‌ ನ್ಯಾನ್ಸಿ ಪೆಲೋಸಿ ಸಹಿ ಹಾಕಿದ್ದು, ಭಾರೀ ಭಾರವಾದ ಮನಸ್ಸಿನಿಂದ ರುಜು ಹಾಕಿದ್ದಾಗಿ ಬೇಸರ ವ್ಯಕ್ತ ಪಡಿಸಿದ್ದಾರೆ. ಅಲ್ಲದೇ ದೇಶದ ಹಿತ ದೃಷ್ಠಿಯಿಂದ ಇದು ಅಗತ್ಯವಾಗಿತ್ತು ಎಂದು ಹೇಳಿದ್ದಾರೆ. ಕೆಳಮನೆಯಲ್ಲಿ ಒಪ್ಪಿಗೆ ಪಡೆದಿರುವ ಮಸೂದೆಗೆ ಮೇಲ್ಮನೆ ಸೆನೇಟ್‌ ಕೂಡ ಒಪ್ಪಿಗೆ ನೀಡಿದರೆ ಡೊನಾಲ್ಡ್‌ ಟ್ರಂಪ್‌ ಅಧ್ಯಕ್ಷಗಾದಿಯಿಂದ ವಜಾಗೊಳ್ಳುವ ಮುಖಭಂಗ ಎದುರಿಸಲಿದ್ದಾರೆ. ಆದರೆ ಸೆನೇಟ್‌ನಲ್ಲಿ ರಿಪಬ್ಲಿಕನ್ ಪಕ್ಷಕ್ಕೆ ಬಹುಮತ ಇರುವುದರಿಂದ ವಾಗ್ದಂಡನೆ ನಿಳುವಳಿಗೆ ಜಯ ಸಿಗುವ ಸಾಧ್ಯತೆ ಕಡಿಮೆ. ಅಲ್ಲದೇ ಜ.20ರಂದು ಅಧಿಕಾರವಧಿ ಮುಗಿಯುವುದರಿಂದ ಅಷ್ಟು ತ್ವರಿತವಾಗಿ ಪ್ರಕ್ರಿಯೆ ನಡೆಯುವುದೂ ಕೂಡ ಅನುಮಾನ. ಒಂದು ವೇಳೆ ಅಧಿಕಾರವಧಿ ಮುಗಿದ ಬಳಿಕ ಸನೇಟ್‌ನಲ್ಲಿಯೂ ವಾಗ್ದಂಡನೆಗೆ ಜಯ ಸಿಕ್ಕರೆ ಮುಂದಿನ ಚುನಾವಣೆಗೆ ಸ್ಪರ್ಧಿಸುವ ಅವಕಾಶವನ್ನು ಡೊನಾಲ್ಡ್‌ ಟ್ರಂಪ್‌ ಕಳೆದುಕೊಳ್ಳಲಿದ್ದಾರೆ. ಅಮೆರಿಕ ಇತಿಹಾಸದಲ್ಲಿ ಇದುವರೆಗೆ ಯಾವುದೇ ಅಧ್ಯಕ್ಷರು ವಾಗ್ದಂಡನೆ ಮೂಲಕ ಅಧಿಕಾರ ಕಳೆದುಕೊಂಡಿಲ್ಲ. ಟ್ರಂಪ್‌ ಅವರಿಗಿಂತ ಮುಂಚೆ 1868 ರಲ್ಲಿ ಆ್ಯಂಡ್ರ್ಯೂ ಜಾನ್ಸನ್‌ ಹಾಗೂ 1998 ರಲ್ಲಿ ಬಿಲ್‌ ಕ್ಲಿಂಟನ್‌ ವಾಗ್ದಂಡನೆ ಅವಮಾನಕ್ಕೆ ಗುರಿಯಾಗಿದ್ದರು. ಆದರೆ ಡೊನಾಲ್ಡ್‌ ಟ್ರಂಪ್‌ ಮಾತ್ರ ಎರಡೆರಡು ಬಾರಿ ಈ ಅವಮಾನಕ್ಕೆ ತುತ್ತಾಗಿದ್ದಾರೆ. ಈ ಹಿಂದೆ 2019ರಲ್ಲಿ ವಾಗ್ದಂಡನೆಗೆ ಗುರಿಯಾಗಿದ್ದ ಟ್ರಂಪ್‌ ಅವರನ್ನು ಸೆನೇಟ್‌ ಬಚಾವು ಮಾಡಿತ್ತು.
from India & World News in Kannada | VK Polls https://ift.tt/3nItHEK
