ಬೆಂಗಳೂರು: ಆ್ಯಪಲ್‌ ಕಂಪನಿ ಲ್ಯಾಪ್‌ಟಾಪ್‌ ಉಡುಗೊರೆ ಕೊಡುತ್ತೇವೆಂದು ಕರೆ ಮಾಡಿದ ಅಪರಿಚಿತರ ಮಾತಿಗೆ ಮರುಳಾದ ಮಹಿಳೆ, ಬರೋಬ್ಬರಿ ₹5.55 ಲಕ್ಷ ರೂ. ಕಳೆದುಕೊಂಡಿದ್ದಾರೆ. ಬೆಂಗಳೂರಿನ ಸ್ಮಿತಾ (32) ಎಂಬುವರಿಗೆ ಅಪರಿಚಿತ ಫೋನ್‌ ನಂಬರ್‌ನಿಂದ ಕರೆ ಬಂದಿತ್ತು. ನಾನು ಪೋಲೆಂಡ್‌ನಿಂದ ಮಾತನಾಡುತ್ತಿದ್ದು, ನಿಮಗೆ ಆ್ಯಪಲ್‌ ಕಂಪನಿಯ ಲ್ಯಾಪ್‌ಟಾಪ್‌, ಐ ಫೋನ್‌, ಬ್ಲೂಟೂತ್‌ ಏರ್‌ಪಾಡ್‌, ಶೂ, ಬಟ್ಟೆ ಮತ್ತು ಚಿನ್ನ ಉಡುಗೊರೆ ಕಳುಹಿಸುತ್ತೇನೆ. ಅದಕ್ಕಾಗಿ ನೀವು ಕೇವಲ ಕಸ್ಟಮ್ಸ್‌ ಶುಲ್ಕ ಪಾವತಿಸಬೇಕು ಎಂದು ಹೇಳಿದ್ದಾರೆ. ಅಪರಿಚಿತರ ಮಾತು ನಂಬಿದ ಸ್ಮಿತಾ, ದುಬಾರಿ ಬೆಲೆಯ ಉಚಿತ ಉಡುಗೊರೆ ಪಡೆದುಕೊಳ್ಳಲು ನಿರ್ಧರಿಸಿದ್ದರು. ಟ್ಯಾಕ್ಸ್‌ ಆಫೀಸರ್‌ ಹೆಸರಿನಲ್ಲಿ ಕರೆ ಮಾಡಿದ್ದ ವ್ಯಕ್ತಿಯೊಬ್ಬ, ನಿಮಗೆ ಬಂದಿರುವ ಉಡುಗೊರೆ ಪಡೆದುಕೊಳ್ಳಲು ಸರ್ವೀಸ್‌ ಚಾರ್ಜಸ್‌, ಕಸ್ಟಮ್ಸ್‌ ಚಾರ್ಜಸ್‌ ಕಟ್ಟಬೇಕು ಎಂದು ಕೇಳಿದ್ದ. ಅದರಂತೆ ಸ್ಮಿತಾ ಬೇರೆ ಬೇರೆ ಬ್ಯಾಂಕ್‌ ಖಾತೆಗಳಿಗೆ ಆನ್‌ಲೈನ್‌ ಮೂಲಕ ಒಟ್ಟು 5.55 ಲಕ್ಷ ಪಾವತಿಸಿದ್ದರು. ಮತ್ತೆ ಮತ್ತೆ ಶುಲ್ಕ ಕೇಳುತ್ತಲೇ ಇದ್ದ ಕಾರಣ ಅನುಮಾನಗೊಂಡು ವಿಚಾರಿಸಿದಾಗ ಆನ್‌ಲೈನ್‌ ಖದೀಮರ ಕೆಲಸ ಎಂದು ಗೊತ್ತಾಗಿದೆ. ಈ ಸಂಬಂಧ ಸೈಬರ್‌ ಕ್ರೈಂ ಪೊಲೀಸ್‌ ಠಾಣೆಗೆ ದೂರು ನೀಡಿದ್ದಾರೆ.
from India & World News in Kannada | VK Polls https://ift.tt/2MaaNKb
