ಬೆಂಗಳೂರು: ನಿಮ್ಮ ಗುರಿ ಉನ್ನತವಾಗಿರಲಿ. ಆದರೆ, ಆ ಗುರಿ ಸಾಧಿಸುವ ನೀವು ಚಿಕ್ಕವರಾಗಿ ಸಾಮಾನ್ಯರಂತೆಯೇ ಇರಿ ಎಂದು ನೊಬೆಲ್ ಪುರಸ್ಕೃತ ಜರ್ಮನ್ ಭೌತಶಾಸ್ತ್ರಜ್ಞ ಸ್ಟೀಫನ್ ಡಬ್ಲ್ಯು.ಹೆಲ್ ವಿದ್ಯಾರ್ಥಿಗಳಿಗೆ ಕಿವಿಮಾತು ಹೇಳಿದರು. ಜಿಕೆವಿಕೆಯಲ್ಲಿ ನಡೆಯುತ್ತಿರುವ ವಿಜ್ಞಾನ ಸಮ್ಮೇಳನದಲ್ಲಿ 'ರಿಸಾಲ್ವ್ಡ್ ಫ್ಲೊರೋಸಿನ್ ಮೈಕ್ರೋಸ್ಕೋಪಿ'ಯ ಅಭಿವೃದ್ಧಿ, ಅನುಕೂಲಗಳು, ಎದುರಾದ ಸವಾಲುಗಳ ಕುರಿತು ಉಪನ್ಯಾಸ ನೀಡಿದರು. ಅಲ್ಲದೆ ತಮಗೆ ನೊಬೆಲ್ ಪ್ರಶಸ್ತಿ ದಕ್ಕಿರುವ ಕುರಿತು ಸಾವಿರಾರು ವಿದ್ಯಾರ್ಥಿಗಳ ಜತೆ ಕಿಕ್ಕಿರದ ಸಭಾಂಗಣದಲ್ಲಿ ಅನುಭವ ಹಂಚಿಕೊಂಡರು. ''ರೊಮೇನಿಯಾದಿಂದ ಜರ್ಮನಿಗೆ ನಮ್ಮ ಪೋಷಕರ ಜತೆ ವಲಸೆ ಬಂದೆವು. ಭೌತಶಾಸ್ತ್ರದಲ್ಲಿ ಡಾಕ್ಟರೇಟ್ ಪಡೆದ ಬಳಿಕ ಜರ್ಮನಿಯ ಮ್ಯಾಕ್ಸ್ ಪ್ಲ್ಯಾಂಕ್ ಸಂಸ್ಥೆಗೆ ನಿರ್ದೇಶಕನಾಗಿ ಸೇರಿದೆ. ಮೈಕ್ರೋಸ್ಕೋಪಿ ಸಂಶೋಧನೆಗೆ ಹಣಕಾಸಿನ ನೆರವಿನ ಅಗತ್ಯವಿತ್ತು. ನನ್ನ ಸಂಶೋಧನೆಯ ಪತ್ರಗಳನ್ನು ಸಲ್ಲಿಸಿ ಹಣಕಾಸಿನ ನೆರವು ಕೋರಿದೆ. ಹನ್ನೆರೆಡು ಜನ ತಜ್ಞರಿದ್ದ ಸಮಿತಿ, ನನ್ನ ಸಂಶೋಧನೆಯಲ್ಲಿಯಾವುದೇ ಮಹತ್ವದ ಹಾಗೂ ಹೇಳಿಕೊಳ್ಳುವಂತಹ ಅಂಶಗಳು ಇಲ್ಲ. ಹೀಗಾಗಿ, ಹಣಕಾಸಿನ ನೆರವು ಮಂಜೂರು ಮಾಡಲಾಗದು ಎಂದಿತು. ಆದರೆ, ಅಷ್ಟಕ್ಕೆ ಸುಮ್ಮನಾಗದ ನಾನು ಸಂಸ್ಥೆಯ ಡೀನ್ ಬಳಿ ಹೋದೆ. ನೆರವು ಬೇಕಾಗಿದೆ ಎಂದು ವಿಷಯ ಮಂಡಿಸಿದೆ. ಸಮಿತಿಯ ನಿರ್ಧಾರವೇ ಸರಿ ಇಲ್ಲ ಎನ್ನುವ ಅಂಶಗಳನ್ನು ನನ್ನ ಮುಂದೆ ಮಂಡಿಸಿದರೆ ನಾನು ಅಗತ್ಯ ಹಣ ಬಿಡುಗಡೆಗೆ ನೆರವಾಗುತ್ತೇನೆ ಎಂದರು. ಅದರಂತೆ ಎರಡು ಪುಟಗಳಲ್ಲಿಮಾಹಿತಿ ನೀಡಿದೆ. ವಿಶೇಷವೆಂದರೆ 2014ರಲ್ಲಿ ಯಾವ ಸಮಿತಿ ಹಣಕಾಸಿನ ನೆರವು ನಿರಾಕರಿಸಿತ್ತೋ, ಅದೇ ಸಂಶೋಧನೆಗೆ ನನಗೆ ನೊಬೆಲ್ ಪಾರಿತೋಷಕ ಬಂತು,'' ಎಂದು ಸ್ಟೀಫನ್ ಹೇಳಿದರು. ''ಸಾಮಾನ್ಯ ವಿಜ್ಞಾನದಲ್ಲಿ ಸಂಶೋಧನೆ, ಅವಿಷ್ಕಾರಗಳಿಗೆ ಸಾಕಷ್ಟು ಅವಕಾಶಗಳು ಇವೆ. ಆದರೆ, ಬಹಳಷ್ಟು ಜನ ತೀರಾ ಕ್ಲಿಷ್ಟ ಎನಿಸುವ ವಿಚಾರಗಳನ್ನು ಆಯ್ಕೆ ಮಾಡಿಕೊಳ್ಳುತ್ತಾರೆ. ಆದರೆ, ಸಾಮಾನ್ಯ ವಿಜ್ಞಾನದಲ್ಲೇ ಅಸಾಮಾನ್ಯವಾದುದನ್ನು ಸಾಧಿಸಲು ಅವಕಾಶಗಳು ಇವೆ. ಅವುಗಳನ್ನು ನಿಮ್ಮದೇ ದೃಷ್ಟಿಕೋನದಿಂದ ನೋಡಬೇಕು. ಸಂಶೋಧನೆಯಲ್ಲಿ ತೊಡಗಿಸಿಕೊಂಡರೆ ನೀವು ಕೂಡ ನೊಬೆಲ್ ಪುರಸ್ಕೃತರಾಗಬಹುದು,'' ಎಂದು ಅವರು ವಿದ್ಯಾರ್ಥಿಗಳಿಗೆ ಹೇಳಿದರು. ''ಭಾರತದಲ್ಲಿ ವಿಜ್ಞಾನ, ತಂತ್ರಜ್ಞಾನ ಕುರಿತು ಸಾಕಷ್ಟು ಆಸಕ್ತಿ ಇದೆ. ವಿಜ್ಞಾನ ಕ್ಷೇತ್ರದಲ್ಲಿ ಬೆಳವಣಿಗೆಯಾಗುತ್ತಿದ್ದು, ಇನ್ನೂ ಸಾಕಷ್ಟು ಬೆಳವಣಿಗೆಗೆ ಅವಕಾಶಗಳಿವೆ. ಯುವ ಜನತೆಗೆ ಉತ್ತಮ ವೇದಿಕೆ ಮತ್ತು ಅವಕಾಶಗಳನ್ನು ಕಲ್ಪಿಸಬೇಕು. ಉತ್ತೇಜನ ನೀಡಿದರೆ ದೇಶ ಮತ್ತು ಮಾನವ ಸಮುದಾಯದ ಸುಧಾರಣೆ ಸಾಧ್ಯವಾಗುತ್ತದೆ,'' ಎಂದು ಸ್ಟೀಫನ್ ಹೇಳಿದರು.
from India & World News in Kannada | VK Polls https://ift.tt/2ZUK9Y7
