ರಾಜು ನದಾಫ : ಎಲ್ಲವೂ ಅಂದುಕೊಂಡಂತೆ ನಡೆದಿದ್ದರೆ ಜನವರಿ 2022ರಲ್ಲಿ ಹಾವೇರಿ ಮೆಡಿಕಲ್‌ ಕಾಲೇಜ್‌ ಪ್ರವೇಶ ಪ್ರಕ್ರಿಯೆ ಮುಗಿದು ಭೌತಿಕ ತರಗತಿಗಳು ಆರಂಭಗೊಳ್ಳುತ್ತಿದ್ದವು. ಕೋವಿಡ್‌ ಕಾರಣದಿಂದಾಗಿ ಒಂದು ವರ್ಷ ಮುಂದೂಡಲ್ಪಟ್ಟಿದ್ದು, ಜಿಲ್ಲೆಯ ಶಿಕ್ಷಣ ಪ್ರೇಮಿಗಳಿಗೆ ನಿರಾಸೆಯಾಗಿದೆ. ಇದರಿಂದಾಗಿ ಅಭಿವೃದ್ಧಿಗೂ ಹಿನ್ನಡೆಯಾಗಲಿದೆ. ಜಾಗ ಗುರುತಿಸುವ ಸಂದರ್ಭದಲ್ಲೇ ವಿಘ್ನಗಳು ಎದುರಾಗಿದ್ದರೂ, ರಾಜಕೀಯ ಚಾಣಾಕ್ಷತನದಿಂದಾಗಿ ನ್ಯಾಷನಲ್‌ ಮೆಡಿಕಲ್‌ ಕೌನ್ಸಿಲ್‌ ಅಂತಿಮವಾಗಿ ದೇವಗರಿ ಯಲ್ಲಾಪೂರದ ಸರಕಾರಿ ಜಾಗದಲ್ಲೇ ಕಟ್ಟಡ ನಿರ್ಮಾಣಕ್ಕೆ ಹಸಿರು ನಿಶಾನೆ ತೋರಿತ್ತು. ಆಡಳಿತಾತ್ಮಕ ಮಂಜೂರಿ ದೊರೆತು ಅಗತ್ಯ ಅನುದಾನ ಸಹ ಬಿಡುಗಡೆಯಾಗಿತ್ತು. ಮೊದಲ ಹಂತದ ಕಾಮಗಾರಿಗಳು ಸಹ ಸಮರೋಪಾದಿಯಲ್ಲಿ ನಡೆದಿದ್ದವು. ಅತ್ತ ಕಾಮಗಾರಿ ನಿರಾತಂಕವಾಗಿ ನಡೆಯುತ್ತಿದ್ದರೆ, ಇತ್ತ ಜನವರಿ 2022ರ ವೇಳೆಗೆ ಭೌತಿಕ ತರಗತಿ ಆರಂಭಿಸಲು 70ಕ್ಕೂ ಅಧಿಕ ಸಂಖ್ಯೆಯ ಬೋಧಕರನ್ನು ನೇಮಕ ಮಾಡಲು ಮತ್ತು ಸರಕಾರಿ ತಾಂತ್ರಿಕ ಮಹಾವಿದ್ಯಾಲಯ ಹಾಗೂ ಜಿಲ್ಲಾ ಸರಕಾರಿ ಆಸ್ಪತ್ರೆಯಲ್ಲಿ ತರಗತಿ ಆರಂಭಿಸುವ ಪ್ರಕ್ರಿಯೆ ಸದ್ದಿಲ್ಲದೇ ನಡೆದಿದ್ದವು. ಈ ಎಲ್ಲ ಬೆಳವಣಿಗೆ ಬೆನ್ನಲ್ಲೇ ಕೋವಿಡ್‌ ಮಹಾಮಾರಿ ಮತ್ತು ಅತಿವೃಷ್ಟಿ ಕಾರಣಕ್ಕೆ ಕಂಪನಿ ನಿರ್ಮಾಣ ಕೆಲಸ ಸ್ಥಗಿತಗೊಳಿಸುವುದು ಅನಿವಾರ್ಯವಾಯಿತು. ಕಾರ್ಮಿಕರೂ ಕೋವಿಡ್‌ ಆತಂಕದಿಂದ ತಮ್ಮ ರಾಜ್ಯಗಳಿಗೆ ಹೋಗುವಂತಾಗಿ ಕಾಮಗಾರಿ ಅರ್ಧಕ್ಕೇ ನಿಲ್ಲುವಂತಾಯಿತು. ಈ ನಡುವೆ ಮುಖ್ಯಮಂತ್ರಿ ಬದಲಾವಣೆ ಜತೆಗೆ ಉಪ ಚುನಾವಣೆ ಹಿನ್ನೆಲೆಯಲ್ಲಿ ನೀತಿ ಸಂಹಿತೆಯೂ ಜಾರಿಗೊಂಡು ಬೋಧಕ / ಬೋಧಕೇತರ ಸಿಬ್ಬಂದಿ ನೇಮಕಕ್ಕೂ ಅಡ್ಡಿಯಾಯಿತು. 2022ರಲ್ಲಿ ಹಾವೇರಿ ಜಿಲ್ಲೆ ಮಾತ್ರವಲ್ಲದೇ ಚಿಕ್ಕಬಳ್ಳಾಪುರ, ಚಿಕ್ಕಮಗಳೂರು ಜತೆಗೆ ಯಾದಗಿರಿ ಜಿಲ್ಲೆಗಳಲ್ಲೂ ಮೆಡಿಕಲ್‌ ಕಾಲೇಜ್‌ ಪ್ರವೇಶ ಪ್ರಕ್ರಿಯೆಗೂ ಚಾಲನೆ ದೊರೆಯಬೇಕಿತ್ತು. ತರಗತಿ ಆರಂಭಕ್ಕೂ ಮುನ್ನ ವಿದ್ಯಾರ್ಥಿಗಳಿಗೆ ಒದಗಿಸುವ ಮೂಲ ಸೌಕರ್ಯಗಳ ಪರಿಶೀಲನೆಗೆ ನಾಲ್ಕೂ ಜಿಲ್ಲೆಗಳಿಗೆ ಭೇಟಿ ಕೊಟ್ಟಿದ್ದ ದಿಲ್ಲಿಯ ನ್ಯಾಷನಲ್‌ ಮೆಡಿಕಲ್‌ ಕೌನ್ಸಿಲ್‌ ತಂಡ ವಾಸ್ತವಾಂಶ ಪರಿಶೀಲಿಸಿ ಅತೃಪ್ತಿ ವ್ಯಕ್ತಪಡಿಸಿತು. ಶೈಕ್ಷಣಿಕ ವರ್ಷದಲ್ಲಿ ತರಗತಿ ಆರಂಭಕ್ಕೆ ನಿರ್ಬಂಧ ವಿಧಿಸಿತ್ತು. ಮೊದಲ ಹಂತದಲ್ಲೇ 135 ಸೀಟ್‌ಗಳಿಗೆ ಅವಕಾಶ ಸಿಕ್ಕಿತ್ತು. ಪ್ರವೇಶ ಪ್ರಕ್ರಿಯೆ ಜುಲೈ ತಿಂಗಳಲ್ಲೇ ಆರಂಭಗೊಳ್ಳಬೇಕಿತ್ತು. ಕೋವಿಡ್‌ ಮತ್ತು ಮಳೆಯ ಕಾರಣಕ್ಕೆ ಎಲ್ಲ ಪ್ರಕ್ರಿಯೆಗಳಿಗೂ ಅಡ್ಡಿಯಾಗಿ ಮೆಡಿಕಲ್‌ ಕಾಲೇಜ್‌ ಭೌತಿಕ ತರಗತಿಗಳ ಕಾರ್ಯಾರಂಭದ ಕನಸು ನನಸಾಗದೇ ನಿರಾಸೆಯನ್ನುಂಟು ಮಾಡಿತು. ಎಷ್ಟೇ ಪ್ರಯತ್ನಿಸಿದರೂ ಪ್ರವೇಶ ಮತ್ತು ತರಗತಿ ನಡೆಸುವುದು ಅಸಾಧ್ಯ ಎನ್ನುವುದು ಸ್ಪಷ್ಟಗೊಂಡ ಹಿನ್ನೆಲೆಯಲ್ಲಿ ಸರಕಾರ ಅನಿವಾರ್ಯವಾಗಿ ಈ ನಾಲ್ಕು ಜಿಲ್ಲೆಗಳಲ್ಲೂ ಒಂದು ವರ್ಷ ಮುಂದೂಡಲ್ಪಟ್ಟ ಸಂದೇಶ ರವಾನಿಸಿತು. ಕೋವಿಡ್‌ ಮತ್ತು ಅತಿವೃಷ್ಟಿ ಹಿನ್ನೆಲೆಯಲ್ಲಿ ಒಂದು ವರ್ಷ ಮುಂದೂಡಲ್ಪಟ್ಟಿರುವ ಮೆಡಿಕಲ್‌ ಕಾಲೇಜ್‌ ಆರಂಭ 2023ರ ವೇಳೆಗಾದರೂ ಚಾಲನೆಗೊಳ್ಳುವುದೇ? ಎನ್ನುವುದೇ ಸಾರ್ವತ್ರಿಕ ವಲಯದ ಪ್ರಶ್ನೆಯಾಗಿದೆ. 'ಸೆಪ್ಟೆಂಬರ್‌ 2021ರಿಂದಲೇ ದೇವಗಿರಿ ಸರಕಾರಿ ಎಂಜಿನಿಯರಿಂಗ್‌ ಕಾಲೇಜ್‌ನಲ್ಲಿ ಮೆಡಿಕಲ್‌ ಕಾಲೇಜ್‌ ತರಗತಿ ಆರಂಭಿಸಲು ಎಲ್ಲ ಸಿದ್ಧತೆ ಮಾಡಿಕೊಳ್ಳಲಾಗಿತ್ತು. ಕೋವಿಡ್‌ ಹಿನ್ನೆಲೆಯಲ್ಲಿ ಎಂಟ್ರೆನ್ಸ್‌ ಟೆಸ್ಟ್‌ ಮುಂದೂಡಲ್ಪಟ್ಟ ಕಾರಣಕ್ಕೆ ಜನವರಿ 2022ರ ವೇಳೆಗೆ ಶೈಕ್ಷಣಿಕ ಚಟುವಟಿಕೆ ಆರಂಭಿಸಲು ಯೋಜಿಸಲಾಗಿತ್ತು. ಆದರೆ ನೇಮಕ ಪ್ರಕ್ರಿಯೆ ಹಾಗೂ ಮೆಡಿಕಲ್‌ ಕಾಲೇಜ್‌ ಕಟ್ಟಡ ನಿರ್ಮಾಣ ಸ್ಥಗಿತಗೊಂಡ ಹಿನ್ನೆಲೆಯಲ್ಲಿ 2023ರ ವೇಳೆಗೆ ಕಾರ್ಯಾರಂಭಗೊಳ್ಳುವ ಸಾಧ್ಯತೆಗಳಿವೆ' ಹಾವೇರಿ ವೈದ್ಯಕೀಯ ವಿಜ್ಞಾನ ಮಹಾ ವಿದ್ಯಾಲಯ ಆಡಳಿತಾಧಿಕಾರಿ ಡಾ. ಉದಯ ಮುಳಗುಂದ ತಿಳಿಸಿದ್ದಾರೆ.
from India & World News in Kannada | VK Polls https://ift.tt/3r6qT9S
