ಟೋಕಿಯೋ: ಭಾರತದ ಶೂಟರ್ಗಳಾದ ಹಾಗೂ ಸಿಂಗರಾಜ್ ಅಧಾನ ಅವರು ಪಿ4 ಮಿಶ್ರ 50ಮೀ ಪಿಸ್ತೂಲ್ ಎಸ್ಎಚ್1 ವಿಭಾಗದಲ್ಲಿ ಕ್ರಮವಾಗಿ ಚಿನ್ನ ಹಾಗೂ ಬೆಳ್ಳಿ ಪದಕಗಳನ್ನು ಮುಡಿಗೇರಿಕೊಂಡಿದ್ದಾರೆ. ಇಲ್ಲಿನ ಅಸಾಕ ಶೂಟಿಂಗ್ ರೇಂಜ್ನಲ್ಲಿ ಶನಿವಾರ ಬೆಳಗ್ಗೆ ನಡೆದ ಮಿಶ್ರ 50 ಮೀಟರ್ ಎಸ್ಎಚ್1 ಅಂತಿಮ ಸುತ್ತಿನಲ್ಲಿ 19ರ ಪ್ರಾಯದ ಮನೀಷ್ ನರ್ವಾಲ್ 218.2 ಅಂಕಗಳನ್ನು ಕಲೆ ಹಾಕುವ ಮೂಲಕ ಪ್ಯಾರಾಲಿಂಪಿಕ್ಸ್ ದಾಖಲೆಯ ಜೊತೆಗೆ ಚಿನ್ನದ ಪದಕವನ್ನು ತನ್ನದಾಗಿಸಿಕೊಂಡರು. ಇನ್ನು ಇದೇ ಸ್ಪರ್ಧೆಯಲ್ಲಿ 216.7 ಪಾಯಿಂಟ್ಸ್ಗಳನ್ನು ಕಲೆ ಹಾಕಿ ಎರಡನೇ ಸ್ಥಾನ ಪಡೆದ ಸಿಂಗರಾಜ್ ಬೆಳ್ಳಿ ಪದಕದ ಸಾಧನೆ ಮಾಡಿದ್ದಾರೆ. ಇನ್ನು ರಷ್ಯಾದ ಸೆರ್ಗೆ ಮಾಲಿಶೇವ್ ಅವರು ಕಂಚಿನ ಪದಕಕ್ಕೆ ತೃಪ್ತಿಪಟ್ಟುಕೊಂಡರು. 50ಮೀಟರ್ ಎಸ್ಎಚ್1 ಅಂತಿಮ ಸುತ್ತಿನಲ್ಲಿ ಮನೀಷ್ ನರ್ವಾಲ್ ಆರಂಭಿಕ 10 ಶಾಟ್ಗಳಲ್ಲಿ 92.1 ಅಂಕಗಳೊಂದಿಗೆ ಮುನ್ನಡೆಯಲ್ಲಿದ್ದರು. ಆದರೆ, ಅರ್ಹತಾ ಸುತ್ತಿನಲ್ಲಿ 7ನೇ ಸ್ಥಾನ ಪಡೆದಿದ್ದ ಮನೀಷ್ ನರ್ವಾಲ್ 87.2 ಪಾಯಿಂಟ್ಸ್ ಕಲೆ ಹಾಕುವ ಮೂಲಕ ಹಿನ್ನಡೆ ಅನಭವಿಸಿದ್ದರು. 18ನೇ ಶಾಟ್ ಬಳಿಕ ಮನೀಷ್ ನರ್ವಾಲ್ ಅವರು ಅನಿರೀಕ್ಷಿತವಾಗಿ ನಾಲ್ಕನೇ ಸ್ಥಾನಕ್ಕೆ ಕುಸಿದಿದ್ದರು. ಆದರೆ, 19 ಹಾಗೂ 20ನೇ ಶಾಟ್ಗಳಲ್ಲಿ 19ರ ಪ್ರಾಯದ ಶೂಟರ್ ಕ್ರಮವಾಗಿ 10.8 ಹಾಗೂ 10.5 ಪಾಯಿಂಟ್ಸ್ಗಳನ್ನು ಕಲೆ ಹಾಕುವ ಮೂಲಕ ತಮ್ಮದೇ ದೇಶದ ಸಿಂಗರಾಜ್ ಅವರನ್ನು ಹಿಂದಿಕ್ಕಿ ಪ್ರಥಮ ಸ್ಥಾನ ಪಡೆದರು. ಮೊದಲ ಸ್ಥಾನಕ್ಕಾಗಿ ಸ್ವದೇಶಿ ಶೂಟರ್ ವಿರುದ್ಧ ಹೋರಾಟ ನಡೆಸುವ ಮೂಲಕ ಮನೀಶ್ 8.4 ಮತ್ತು 9.1 ರೊಂದಿಗೆ ತಮ್ಮ ಅಭಿಯಾನವನ್ನು ಅಂತ್ಯಗೊಳಿಸಿದರು. ಆದರೆ, ಸಿಂಗರಾಜ್ ತಮ್ಮ ಕೊನೆಯ ಎರಡು ಶಾಟ್ಗಳಲ್ಲಿ 8.5 ಮತ್ತು 9.4 ಗುರಿ ಹೊಂದಿದ್ದರು. ಇದಕ್ಕೂ ಮುನ್ನ ಮನೀಷ್ ಹಾಗೂ ಸಿಂಗರಾಜ್ ಅವರು ಅರ್ಹತಾ ಸುತ್ತಿನಲ್ಲಿ ಕ್ರಮವಾಗಿ 533-7* ಮತ್ತು 536-4* ಪಾಯಿಂಟ್ಸ್ ಕಲೆ ಹಾಕಿದ್ದರು. ಇದರ ಫಲವಾಗಿ ಈ ಇಬ್ಬರೂ ಅಂತಿಮ ಸುತ್ತಿಗೆ ಪ್ರವೇಶ ಮಾಡಿದ್ದರು. ಅರ್ಹತಾ ಸುತ್ತಿನಲ್ಲಿ ಸಿಂಗರಾಜ್ 4ನೇ ಸ್ಥಾನ ಪಡೆದಿದ್ದರೆ, ಮನೀಷ್ ನರ್ವಾಲ್ 7ನೇ ಸ್ಥಾನ ಪಡೆದಿದ್ದರು. ಅಂದಹಾಗೆ ಸಿಂಗರಾಜ್ ಅಧಾನ ಅವರ ಪ್ರಸಕ್ತ ಟೋಕಿಯೋ ಪ್ಯಾರಾಲಿಂಪಿಕ್ಸ್ ಕ್ರೀಡಾಕೂಟದ ಎರಡನೇ ಪದಕ ಇದಾಯಿತು. ಇದಕ್ಕೂ ಮುನ್ನ ಅವರು ಪಿ1 ಪುರುಷರ 10ಮೀಟರ್ ಏರ್ ಪಿಸ್ತೂಲ್ ಎಸ್ಎಚ್1 ವಿಭಾಗದ ಫೈನಲ್ನಲ್ಲಿ ಮೂರನೇ ಸ್ಥಾನ ಪಡೆಯುವ ಮೂಲಕ ಕಂಚಿನ ಪದಕ ಮುಡಿಗೇರಿಸಿಕೊಂಡಿದ್ದರು. ಇಲ್ಲಿಯವರೆಗೆ ಭಾರತದ ಪದಕಗಳ ಸಂಖ್ಯೆ 15ಕ್ಕೇರಿದೆ. ಇದರಲ್ಲಿ 3 ಚಿನ್ನದ ಪದಕಗಳು, 7 ಬೆಳ್ಳಿ ಪದಕಗಳು ಹಾಗೂ 5 ಕಂಚಿನ ಪದಕಗಳು ಒಳಗೊಂಡಿವೆ. ಒಟ್ಟಾರೆ ಟೋಕಿಯೋ ಪ್ಯಾರಾಲಿಂಪಿಕ್ಸ್ ಕ್ರೀಡಾಕೂಟದ ಪದಕಗಳ ಪಟ್ಟಿಯಲ್ಲಿ ಭಾರತ 34ನೇ ಸ್ಥಾನದಲ್ಲಿದೆ. ಪ್ಯಾರಾಲಿಂಪಿಕ್ಸ್ ಇತಿಹಾಸದಲ್ಲಿಯೇ ಭಾರತಕ್ಕೆ ಇಷ್ಟೊಂದು ಪದಕಗಳು ಬಂದಿರುವುದು ಇದೇ ಮೊದಲು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3BxWp2q
