ಟೋಕಿಯೋ: ಪ್ರತಿಭಾನ್ವಿತ ಆಟಗಾರ ಅವರ ಎತ್ತರ ಚಿಕ್ಕದಾದರೂ ಸಾಧನೆ ಮುಗಿಲೆತ್ತರದ್ದು. ಟೋಕಿಯೋ ಪ್ಯಾರಾ ಒಲಿಂಪಿಂಕ್ಸ್ ಕ್ರೀಡಾಕೂಟದ ಸ್ಪರ್ಧೆಯಲ್ಲಿ ಬಂಗಾರ ಗೆಲ್ಲುವ ಮೂಲಕ ಕೃಷ್ಣ ಮಿಂಚು ಮೂಡಿಸಿದ್ದಾರೆ. ಪುರುಷರ ಸಿಂಗಲ್ಸ್ ಬ್ಯಾಡ್ಮಿಂಟನ್ನ ಎಸ್ಎಚ್6 ವಿಭಾಗದಲ್ಲಿ ಕೃಷ್ಣ ನಗರ್ ಚಿನ್ನ ಗೆಲ್ಲುವುದರೊಂದಿಗೆ ಭಾರತಕ್ಕೆ ಪ್ಯಾರಾಲಿಂಪಿಕ್ಸ್ ಬ್ಯಾಡ್ಮಿಂಟನ್ನಲ್ಲಿ ಎರಡನೇ ಚಿನ್ನ ಹಾಗೂ ಟೋಕಿಯೋ ಕ್ರೀಡಾಕೂಟದಲ್ಲಿ 5ನೇ ಚಿನ್ನದ ಪದಕ ಲಭ್ಯವಾದಂತ್ತಾಗಿದೆ. ಫೈನಲ್ ಪಂದ್ಯದಲ್ಲಿ ನಡೆದ ಮೂರು ಗೇಮ್ಗಳ ಜಿದ್ದಾಜಿದ್ದಿನ ಹೋರಾಟದಲ್ಲಿ ಗರ್ಜಿಸಿದ ಜೈಪುರ ಮೂಲದವರಾದ 22 ವರ್ಷದ ಆಟಗಾರ ಕೃಷ್ಣ ನಗರ್, ಹಾಂಕಾಂಗ್ನ ಆಟಗಾರ ಚೂ ಮಾನ್ ಕಾಯ್ ಅವರನ್ನು 21-17, 16-21, 21-17 ಅಂತರದ ಗೇಮ್ಗಳಿಂದ ಮಣಿಸಿದರು. ಇದಕ್ಕೂ ಮುನ್ನ ಬ್ಯಾಡ್ಮಿಂಟನ್ನಲ್ಲಿ ಪ್ರಮೋದ್ ಭಗತ್ ಭಾರತಕ್ಕೆ ಮೊದಲ ಚಿನ್ನ ತಂದುಕೊಟ್ಟಿದ್ದರು. ಭಗತ್ ಎಸ್ಎಲ್3 ಕ್ಲಾಸ್ ವಿಭಾಗದಲ್ಲಿ ಶನಿವಾರ (ಸೆಪ್ಟೆಂಬರ್ 5) ಚಿನ್ನ ಗೆದ್ದರು. ಕನ್ನಡಿಗ ಸುಹಾಸ್ಗೆ ಬೆಳ್ಳಿಐಎಎಸ್ ಅಧಿಕಾರಿ ಕೂಡ ಆಗಿರುವ ಕನ್ನಡಿಗ ಸುಹಾಸ್ ಯತಿರಾಜ್, ಪ್ಯಾರಾಲಿಂಪಿಕ್ಸ್ನಲ್ಲಿ ಬೆಳ್ಳಿ ಪದಕ ಗೆದ್ದಿದ್ದಾರೆ. ಟೂರ್ನಿಯ ಎಸ್ಎಲ್4 ಕ್ಲಾಸ್ ವಿಭಾಗದಲ್ಲಿ ಫೈನಲ್ ತಲುಪಿದ್ದ ಸುಹಾಸ್, ಸ್ವರ್ಣ ಪದಕ ಸಲುವಾಗಿ ಅಗ್ರ ಶ್ರೇಯಾಂಕಿತ ಆಟಗಾರ ಫ್ರಾನ್ಸ್ನ ಲೂಕಾಸ್ ಮಝುರ್ ಎದುರು ಜಿದ್ದಾಜಿದ್ದಿನ ಪೈಪೋಟಿ ನಡೆಸಿ ನಿರಾಶೆ ಅನುಭವಿಸಿದರು. ನೊಯ್ಡಾ ಜಿಲ್ಲಾ ಮ್ಯಾಜಿಸ್ಟ್ರೇಟ್ ಆಗಿ ಸೇವೆ ಸಲ್ಲಿಸುತ್ತಿರುವ 38 ವರ್ಷದ ಸುಹಾಸ್, 21-15 17-21 15-21 ಅಂತರದ ಗೇಮ್ಗಳಿಂದ ಎರಡು ಬಾರಿಯ ವಿಶ್ವ ಚಾಂಪಿಯನ್ ಮಝುರ್ ಎದುರು ಸೋಲೊಪ್ಪಿಕೊಂಡರು. 62 ನಿಮಿಷಗಳ ಕಾಲ ನಡೆದ ಪಂದ್ಯದ ಕೊನೆಗೆ ಸುಹಾಸ್ ಕೊರಳಿಗೆ ಬೆಳ್ಳಿ ಪದಕ ಲಭ್ಯವಾಯಿತು. ಮನೋಜ್ಗೆ ಕಂಚಿನ ಪದಕಬ್ಯಾಡ್ಮಿಂಟನ್ ಸಿಂಗಲ್ಸ್ನ ಎಸ್ಎಲ್3 ವಿಭಾಗದಲ್ಲಿ ಸ್ಪರ್ಧಿಸಿದ್ದ ಮನೋಜ್ ಸರ್ಕಾರ್ ಕಂಚಿನ ಪದಕ ಗೆದ್ದಿದ್ದಾರೆ. ಜಪಾನ್ನ ಡೈಸುಕೆ ಫುಜಿಹಾರ ಎದುರು ಕಂಚಿನ ಪದಕಕ್ಕಾಗಿ ನಡೆದ ಪಂದ್ಯದಲ್ಲಿ ಗೆದ್ದ ಮನೋಜ್ ಕಂಚಿನ ಪದಕಕ್ಕೆ ಕೊರಳೊಡ್ಡಿದರು. 19 ಪದಕ ಗೆದ್ದ ಭಾರತಕ್ರೀಡಾಕೂಟದಲ್ಲಿ ಸಾರ್ವಕಾಲಿಕ ಶ್ರೇಷ್ಠ ಸಾಧನೆ ಮೆರೆದಿರುವ ಭಾರತ, ಟೋಕಿಯೋ ಅಖಾಡದಲ್ಲಿ ಒಟ್ಟು 19 ಪದಕಗಳನ್ನು ಬಾಚಿಕೊಂಡಿದೆ. ಐದು ಚಿನ್ನ, 8 ಬೆಳ್ಳಿ ಮತ್ತು 6 ಕಂಚಿನ ಪದಕಗಳೊಂದಿಗೆ ಭಾರತ ಒಟ್ಟು 19 ಪದಕಗಳ ಸಂಪಾದನೆ ಮೂಲಕ ಪದಕಪಟ್ಟಿಯಲ್ಲಿ 24ನೇ ಸ್ಥಾನದೊಂದಿಗೆ ತನ್ನ ಅಭಿಯಾನ ಅಂತ್ಯಗೊಳಿಸಿದೆ. ಮುಂದುವರಿದ ಚೀನಾ ಪ್ರಾಬಲ್ಯ, ಬ್ರಿಟನ್ಗೆ 2ನೇ ಸ್ಥಾನಕೂಟದಲ್ಲಿ 95 ಚಿನ್ನ, 60 ಬೆಳ್ಳಿ ಮತ್ತು 51 ಕಂಚಿನ ಪದಕಗಳೊಂದಿಗೆ ಒಟ್ಟು 206 ಪದಕಗಳನ್ನು ದೋಚಿಕೊಂಡ ಚೀನಾ ಅಂಕಪಟ್ಟಿಯ ಅಗ್ರಸ್ಥಾನದಲ್ಲಿ ರಾರಾಜಿಸಿದರೆ, ಮನಮೋಹಕ ಪ್ರದರ್ಶನ ನೀಡಿರುವ ಗ್ರೇಟ್ ಬ್ರಿಟನ್ 41 ಚಿನ್ನ,38 ಬೆಳ್ಳಿ ಮತ್ತು45 ಕಂಚಿನ ಪದಕಗಳೊಂದಿಗೆ ಒಟ್ಟು 124 ಪದಕಗಳೊಂದಿಗೆ ಅಮೆರಿಕಕ್ಕೆ ಅಡ್ಡು ಹೊಡೆದು 2ನೇ ಸ್ಥಾನ ಪಡೆದಿದೆ. ಅಮೆರಿಕಾ (37 ಚಿನ್ನ, 36 ಬೆಳ್ಳಿ, 31 ಕಂಚು, 104 ಒಟ್ಟು) ಮೂರನೇ ಸ್ಥಾನ ಪಡೆದಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3n3wrje
