ಬೆಳಗಾವಿ ಪಾಲಿಕೆ ಚುನಾವಣಾ ಫಲಿತಾಂಶದ ಕಾತರ: ಕಡಿಮೆ ಮತದಾನದಿಂದ ಪಕ್ಷಗಳು ಕಂಗಾಲು..!

: ಮಹಾನಗರ ಚುನಾವಣೆಯ ಫಲಿತಾಂಶ ಸೋಮವಾರ (ಸೆಪ್ಟೆಂಬರ್ 6) ಪ್ರಕಟವಾಗಲಿದೆ. ಚುನಾವಣೆಯಲ್ಲಿ ಇತಿಹಾಸ ಸೃಷ್ಟಿಸಲು ಮುಂದಾಗಿದ್ದ ರಾಜಕೀಯ ಪಕ್ಷಗಳು, ಕಡಿಮೆ ಮತದಾನದಿಂದ ಕಂಗಾಲಾಗಿವೆ. ಮೊದಲ ಬಾರಿಗೆ ಮೇಯರ್‌ ಆಯ್ಕೆಯಲ್ಲಿ ಶಾಸಕ, ಸಂಸದರೂ ಪಾಲ್ಗೊಳ್ಳಲಿದ್ದು, ಮ್ಯಾಜಿಕ್‌ ಸಂಖ್ಯೆ ಬದಲಿಸಲು ಸಿದ್ಧರಾಗಿದ್ದಾರೆ. 58 ವಾರ್ಡುಗಳಿರುವ ಬೆಳಗಾವಿ ಮಹಾನಗರ ಪಾಲಿಕೆಯ ಮೇಯರ್‌ ಆಯ್ಕೆ ವಿಚಾರದಲ್ಲಿ ರಾಜಕೀಯ ಪಕ್ಷಗಳ ಶಾಸಕ, ಸಚಿವರು, ಸಂಸದರು ಎಂದೂ ಒಂದಾಗಿ ಪಾಲ್ಗೊಂಡಿಲ್ಲ. ಎಂಇಎಸ್‌ನ (ಮಹಾರಾಷ್ಟ್ರ ಏಕೀಕರಣ ಸಮಿತಿ) ಭಾಷಾ ಸಂಘರ್ಷದಲ್ಲಿ ಕನ್ನಡ ಅಸ್ಮಿತೆಯ ಸವಾಲು ಎದುರಾದಾಗಲೂ ಪಾಲಿಕೆ ವ್ಯಾಪ್ತಿಯ ಶಾಸಕ, ಸಂಸದರು, ವಿಧಾನ ಪರಿಷತ್‌ ಸದಸ್ಯರು ಒಂದಾಗಿ ನಿಂತು ಕನ್ನಡಕ್ಕೆ ಕೈ ಎತ್ತಿದ್ದು ತೀರಾ ಕಡಿಮೆ. ಈ ಬಾರಿ ಪಕ್ಷಗಳ ಮೂಲಕ ಚುನಾವಣೆಯಲ್ಲಿ ಪಾಲ್ಗೊಂಡ ಜಿಲ್ಲೆಯ ಶಾಸಕ, ಸಂಸದರಿಗೆ ಕಡಿಮೆ ಆಘಾತ ಕೊಟ್ಟಿದೆ. ದೊಡ್ಡ ಸಂಖ್ಯೆಯ ಸ್ಥಾನಗಳನ್ನು ಗೆಲ್ಲುವ ಗುರಿ ಹೊಂದಿದ್ದ ಪಕ್ಷಗಳೆಲ್ಲ ಗೆಲುವಿನ ಸಾಧ್ಯತೆಯನ್ನು ಬೆರಳಿನಲ್ಲಿ ಎಣಿಸುವ ಸ್ಥಿತಿಗೆ ತಲುಪಿವೆ. ಇದಕ್ಕೆ ಎಂಇಎಸ್‌ ಕೂಡ ಹೊರತಾಗಿಲ್ಲ. ಪಕ್ಷಗಳ ಗಲಾಟೆಯಲ್ಲಿ ಪಕ್ಷೇತರ ಅಭ್ಯರ್ಥಿಗಳಿಗೆ ಅದೃಷ್ಟ ಖುಲಾಯಿಸುವ ಸಾಧ್ಯತೆಯೇ ಹೆಚ್ಚಾಗಿದೆ ಎನ್ನುವ ಚರ್ಚೆ ಎಲ್ಲೆಡೆ ಜೋರಾಗಿದೆ. ಅದೇನೇ ಇದ್ದರೂ, ಅಂತಿಮವಾಗಿ ಬೆಳಗಾವಿ ಪಾಲಿಕೆ ಅಧಿಕಾರ ಹಿಡಿಯಲು ಯಾರಿಗೆ ಅವಕಾಶ ಇದೆ ಎನ್ನುವುದು ಕುತೂಹಲ ಪ್ರಶ್ನೆ. ಹೆಚ್ಚಿನ ಕ್ಷೇತ್ರಗಳಲ್ಲಿ ಸ್ಪರ್ಧೆ ಮಾಡಿರುವ ಕಾಂಗ್ರೆಸ್‌, ಬಿಜೆಪಿ ಮತ್ತು ಎಂಇಎಸ್‌ಗೆ ಮ್ಯಾಜಿಕ್‌ ಸಂಖ್ಯೆ ತಲುಪಲು ಭಿನ್ನ ಸ್ಥಾನಗಳ ಅಗತ್ಯ ಇದೆ. ಆಮ್‌ಆದ್ಮಿ, ಜೆಡಿಎಸ್‌ ಮತ್ತು ಎಐಎಂಐಎಂ ಪಕ್ಷಗಳು ಚುನಾವಣೆಯಲ್ಲಿ ಖಾತೆ ತೆರೆದರೂ, ಇತರರೊಂದಿಗೆ ಮೈತ್ರಿ ಮೂಲಕವೇ ಪಾಲಿಕೆ ಆಡಳಿತದ ಭಾಗವಾಗಬಹುದು ಅಥವಾ ಪಕ್ಷೇತರರ ದೊಡ್ಡ ಸಂಖ್ಯೆಯ ಬೆಂಬಲ ಅಗತ್ಯ ಇದೆ. ಒಟ್ಟಾರೆ, ಸೆಪ್ಟೆಂಬರ್ 6ರ ಫಲಿತಾಂಶದ ನಂತರ ಗದ್ದುಗೆ ಸಮೀಕರಣಗಳ ದಾಳ ಉರುಳಲಿರುವುದು ಖಚಿತ. ಮೂರು ಮತಗಟ್ಟೆಗಳಲ್ಲಿ ಶೇ.10ಕ್ಕಿಂತ ಕಡಿಮೆ ಮತದಾನ: ಈ ಬಾರಿಯ ಬೆಳಗಾವಿ ಮಹಾನಗರ ಪಾಲಿಕೆ ಚುನಾವಣೆಯಲ್ಲಿ ಅತ್ಯಂತ ಸುಶಿಕ್ಷಿತರು, ಉದ್ಯೋಗಸ್ಥರು ಇರುವ ಮೂರು ಮತಗಟ್ಟೆಗಳಲ್ಲಿ ಶೇ.10ಕ್ಕಿಂತ ಕಡಿಮೆ ಮತದಾನವಾಗಿದೆ. ಸರಕಾರಿ ನೌಕರರೇ ಹೆಚ್ಚಾಗಿರುವ ವಾರ್ಡ್‌ ಸಂಖ್ಯೆ 26ರ ಮತಗಟ್ಟೆ 171, 172 ಮತ್ತು ವಾರ್ಡ್‌ ಸಂಖ್ಯೆ 33ರ ಮತಗಟ್ಟೆ 222ರಲ್ಲಿ ಅತ್ಯಂತ ಕಡಿಮೆ ಮತದಾನವಾಗಿದೆ. ಮನೆಗೊಬ್ಬರು ಮತದಾನ ಮಾಡಿದ್ದಕ್ಕಿಂತ ಕಡಿಮೆ ಮತದಾನ ನಡೆದಿದೆ. ಇದು ಬಹಳ ಆತಂಕಕಾರಿ ಬೆಳವಣಿಗೆ. ಬಡವರು, ಮಧ್ಯಮ ವರ್ಗದ ಜನರು ಇರುವ ವಾರ್ಡುಗಳಲ್ಲಿ ಶೇ.75ರವರೆಗೆ ಮತದಾನ ನಡೆದಿದೆ. ಚುನಾವಣಾ ಆಯೋಗವು ಮತದಾನ ನಡೆದಿರುವ ಮತಗಟ್ಟೆಗಳ ಪಟ್ಟಿ ಬಿಡುಗಡೆ ಮಾಡಿದೆ. ಅದರಲ್ಲಿ 26ನೇ ವಾರ್ಡ್‌ನ 171ನೇ ಮತಗಟ್ಟೆಯಲ್ಲಿ ಕೇವಲ ಶೇ.7.04 ಮತದಾನ ನಡೆದಿದೆ. ಅಂದರೆ, 994 ಮತದಾರರ ಪೈಕಿ 70 ಜನರಷ್ಟೇ ಮತದಾನ ಮಾಡಿದ್ದಾರೆ. ಅದರಲ್ಲಿ60 ಜನ ಮಹಿಳೆಯರು. ಅದೇ ವಾರ್ಡ್‌ನ 172ನೇ ಮತಗಟ್ಟೆಯಲ್ಲಿ ಶೇ.6.51ರಷ್ಟು ಮತದಾನ ನಡೆದಿದೆ. 998 ಮತದಾರರ ಪೈಕಿ 65 ಜನರಷ್ಟೇ ಹಕ್ಕು ಚಲಾಯಿಸಿದ್ದಾರೆ. ಅದರಲ್ಲಿ 37 ಮಹಿಳೆಯರೇ ಇದ್ದಾರೆ. ವಾರ್ಡ್‌ ಸಂಖ್ಯೆ 33ರ 222ನೇ ಮತಗಟ್ಟೆಯಲ್ಲಿ ಶೇ.9.65 ರಷ್ಟು ಮತದಾನ ನಡೆದಿದೆ. 1026 ಮತದಾರರ ಪೈಕಿ ಕೇವಲ 99 ಜನ ಮಾತ್ರ ಮತದಾನದಲ್ಲಿ ಪಾಲ್ಗೊಂಡಿದ್ದಾರೆ. ಸುಶಿಕ್ಷಿತರು ಹೆಚ್ಚಾಗಿರುವ ಇತರ ವಾರ್ಡುಗಳ ಮತಗಟ್ಟೆಗಳಲ್ಲಿಯೂ ಶೇ.20, ಶೇ.30 ರಷ್ಟು ಮತದಾನ ನಡೆದಿದೆ.

from India & World News in Kannada | VK Polls https://ift.tt/3kQnZkG