ಬೆಂಗಳೂರು: ಮಾದಕ ವಸ್ತು ಸರಬರಾಜು ಹಾಗೂ ಮಾರಾಟ ಪ್ರಕರಣ ಸಂಬಂಧ ಬಂಧಿಸಲಾಗಿದ್ದ ರೂಪದರ್ಶಿ ಮತ್ತು ಆಕೆಯ ಗೆಳೆಯ ನೀಡಿದ ಮಾಹಿತಿ ಆಧರಿಸಿ ಫುಡ್ ಡೆಲಿವರಿ ಸೋಗಿನಲ್ಲಿ ಮಾದಕ ವಸ್ತು ಮಾರಾಟ ಮಾಡುತ್ತಿದ್ದವನನ್ನು ಗೋವಿಂದಪುರ ಠಾಣೆ ಪೊಲೀಸರು ಬಂಧಿಸಿದ್ದಾರೆ. ಬಿಟಿಎಂ ಲೇಔಟ್ನ ಖಾದರ್ ಬಂಧಿತ ಆರೋಪಿಯಾಗಿದ್ದು, ಈತನಿಂದ ಲಕ್ಷಾಂತರ ರೂ. ಮೌಲ್ಯದ ಎಕ್ಸ್ಟೆಸಿ ಮಾತ್ರೆಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಪೂರ್ವ ವಿಭಾಗದ ಡಿಸಿಪಿ ಶರಣಪ್ಪ ತಿಳಿಸಿದರು. ಆರೋಪಿ ಖಾದರ್ ಹೊಸ ಬಟ್ಟೆಗಳನ್ನು ಮಾರಾಟ ಮಾಡುವ ಸೋಗಿನಲ್ಲಿ ಆ ಬಟ್ಟೆಗಳಲ್ಲಿ ಮಾದಕ ವಸ್ತು ಇಟ್ಟು ನೀಡುತ್ತಿದ್ದ. ಇನ್ನು ಆಹಾರ ಸರಬರಾಜು (ಫುಡ್ ಡೆಲಿವರ್ ಬಾಯ್) ನೆಪದಲ್ಲೂ ಮಾದಕ ವಸ್ತು ಮಾರಾಟ ಮಾಡುತ್ತಿದ್ದ ಎಂದು ತಿಳಿಸಿದರು. ಫುಡ್ ಡೆಲಿವರಿ ಬಾಯ್ ಸೋಗಿನಲ್ಲಿ ಮಾದಕ ವಸ್ತು ಮಾರಾಟ:ಕಾಸ್ಮೆಟಿಕ್ ವ್ಯವಹಾರ ನಡೆಸುತ್ತಿದ್ದ ರೂಪದರ್ಶಿ ಸೋನಿಯಾ ಅಗರ್ವಾಲ್ ಮತ್ತು ಆಕೆಯ ಗೆಳೆಯ ದಿಲೀಪ್ ಕೇರಳ ಮೂಲದ ಅಬ್ದುಲ್ ಖಾದರ್ನಿಂದ ಡ್ರಗ್ಸ್ ತರಿಸಿಕೊಳ್ಳುತ್ತಿದ್ದರು. ಯಾರಿಗೂ ಅನುಮಾನ ಬರಬಾರದೆಂದು ಇಬ್ಬರಿಗೂ ಡಂಝೋ ಡೆಲಿವರಿ ಮಾಡುವ ಸೋಗಿನಲ್ಲಿ ಮಾದಕ ವಸ್ತು ಸರಬರಾಜು ಮಾಡುತ್ತಿದ್ದ. ಸ್ಮೈಲ್ ಚಿಹ್ನೆ ಬಳಕೆ:ಮಾದಕ ವಸ್ತು ಮಾರಾಟ ಮಾಡುವಾಗ ಯಾರಿಗೂ ತಿಳಿಯಬಾರದೆಂದು ಮಾದಕ ವಸ್ತು ಖರೀದಿಸುವವರು ಅವರಿಗೆ ಡ್ರಗ್ಸ್ ಬೇಕೆಂದರೆ ಖಾದರ್ಗೆ ವಾಟ್ಸ್ಯಾಪ್ನಲ್ಲಿ ಸ್ಮೈಲ್ ಚಿಹ್ನೆ ಕಳುಹಿಸಬೇಕು. ಈ ಚಿಹ್ನೆ ಕಳುಹಿಸಿದರೆ ಮಾದಕ ವಸ್ತು ಬೇಕೆಂದು ಅರ್ಥ. ವಿಚಾರಣೆ ವೇಳೆ ಮಾದಕ ವಸ್ತು ಮಾರಾಟಕ್ಕೆ ಸ್ಮೈಲ್ ಚಿಹ್ನೆಯನ್ನು ಕೋಡ್ವರ್ಡ್ ಆಗಿ ಬಳಸಲಾಗುತ್ತಿತ್ತು ಎಂದು ಆರೋಪಿ ತಿಳಿಸಿದ್ದಾನೆ. ಹೊಸ ಶರ್ಟ್, ಪ್ಯಾಂಟ್ಗಳಲ್ಲಿ ಡ್ರಗ್ಸ್ ಸಾಗಾಟ:ಆರೋಪಿಯು ಬಟ್ಟೆ ಅಂಗಡಿಗಳಲ್ಲಿ ಕಡಿಮೆ ದರದಲ್ಲಿ ಶರ್ಟ್ ಮತ್ತು ಪ್ಯಾಂಟ್ ಖರೀದಿಸಿ ಈ ಬಟ್ಟೆಗಳೊಳಗೆ ಎಕ್ಸ್ಟೆಸಿ ಮಾತ್ರೆಗಳನ್ನು ಇಟ್ಟು ಸಾಗಿಸುತ್ತಿದ್ದ. ಶರ್ಟ್ನ ತೋಳಿನ ಭಾಗ, ಪ್ಯಾಂಟ್ನ ಕಾಲಿನ ಭಾಗದಲ್ಲಿ ಮಾದಕ ವಸ್ತು ಇಟ್ಟು ಕಳುಹಿಸುತ್ತಿದ್ದ. ಈ ರೀತಿ ಬಟ್ಟೆ ಸಾಗಿಸುವಾಗ ಪೊಲೀಸರು ದಾಳಿ ನಡೆಸಿ ಕೃತ್ಯ ಬಯಲಿಗೆಳೆದಿದ್ದಾರೆ. ಹೈ ಎಂಡ್ ಪಾರ್ಟಿಗಳಲ್ಲಿ ಮಾದಕ ವಸ್ತು ಸರಬರಾಜು ಮಾಡಲಾಗ್ತಿದ್ದು, ಸೆಲೆಬ್ರಿಟಿಗಳು, ಉದ್ಯಮಿಗಳು, ರಾಜಕಾರಣಿ ಮಕ್ಕಳು ಆಯೋಜಿಸುತ್ತಿದ್ದ ಹೈ-ಎಂಡ್ ಪಾರ್ಟಿಗಳಲ್ಲಿ ಈತ ಮಾದಕ ವಸ್ತುಗಳನ್ನು ಸರಬರಾಜು ಮಾಡುತ್ತಿದ್ದ ಎಂದು ಪೊಲೀಸರು ತಿಳಿಸಿದರು. ಆರೋಪಿ ಪತ್ತೆ ಹೇಗೆ?ನೈಜಿರೀಯಾ ಪ್ರಜೆ ಜತೆ ನಿಕಟ ಸಂಪರ್ಕ ಹೊಂದಿದ್ದ ಆರೋಪದಡಿ ರೂಪದರ್ಶಿ ಸೋನಿಯಾ ಅಗರ್ವಾಲ್, ಆಕೆಯ ಸ್ನೇಹಿತ ದಿಲೀಪ್, ಉದ್ಯಮಿ ಭರತ್, ಡಿಜೆ ವಾದಕ ವಚನ್ ಚನ್ನಪ್ಪ ಎಂಬುವರ ಮನೆ ಮೇಲೆ ದಾಳಿ ನಡೆಸಲಾಗಿತ್ತು. ಈ ವೇಳೆ ರೂಪದರ್ಶಿ ಹಾಗೂ ದಿಲೀಪ್ ಮನೆಯಲ್ಲಿ ಮಾದಕ ವಸ್ತು ಪತ್ತೆಯಾಗಿತ್ತು. ಇವರನ್ನು ವೈದ್ಯಕೀಯ ಪರೀಕ್ಷೆಗೊಳಪಡಿಸಿದಾಗಲೂ ಮಾದಕ ವಸ್ತು ಸೇವನೆ ಮಾಡಿರುವುದು ದೃಢಪಟ್ಟಿತ್ತು. ಈ ಆಧಾರದ ಮೇಲೆ ಸೋನಿಯಾ ಅಗರ್ವಾಲ್ ಹಾಗೂ ದಿಲೀಪ್ನನ್ನು ಬಂಧಿಸಿ, ಪೊಲೀಸ್ ವಶಕ್ಕೆ ಪಡೆದು ವಿಚಾರಣೆ ನಡೆಸಲಾಗಿತ್ತು. ಈ ವೇಳೆ ಖಾದರ್ ಎಂಬ ವ್ಯಕ್ತಿ ಮಾದಕ ವಸ್ತು ಸರಬರಾಜು ಮಾಡುತ್ತಿರುವುದಾಗಿ ಮಾಹಿತಿ ನೀಡಿದರು. ಈ ಮಾಹಿತಿ ಆಧರಿಸಿ ಬಿಟಿಎಂ ಲೇಔಟ್ನಲ್ಲಿರುವ ಖಾದರ್ ಮನೆ ಮೇಲೆ ದಾಳಿ ನಡೆಸಿದಾಗ ಆತನ ಮನೆಯಲ್ಲಿ ಮಾದಕ ವಸ್ತು ಪತ್ತೆಯಾಗಿದ್ದು, ಅದನ್ನು ಜಪ್ತಿ ಮಾಡುವುದರೊದಿಗೆ ಆತನನ್ನು ಬಂಧಿಸಿದ್ದಾರೆ.
from India & World News in Kannada | VK Polls https://ift.tt/3DK8kfj
