ಟೋಕಿಯೋ: ಇಲ್ಲಿ ನಡೆಯುತ್ತಿರುವ ಟೋಕಿಯೋ ಪ್ಯಾರಾಲಿಂಪಿಕ್ಸ್ ಕ್ರೀಡಾಕೂಟದ ಹೈಜಂಪ್‌ ಟಿ64 ವಿಭಾಗದಲ್ಲಿ ಭಾರತದ ಎರಡನೇ ಸ್ಥಾನ ಪಡೆಯುವ ಮೂಲಕ ಬೆಳ್ಳಿ ಪದಕ ಮುಡಿಗೇರಿಸಿಕೊಂಡಿದ್ದಾರೆ. 18ರ ಪ್ರಾಯದ ಪ್ರವೀಣ್‌ ಕುಮಾರ್‌ ತಮ್ಮ ಚೊಚ್ಚಲ ಪ್ಯಾರಾಲಿಂಪಿಕ್ಸ್ ಕ್ರೀಡಾಕೂಟದಲ್ಲಿಯೇ 2.07 ಮೀಟರ್‌ ಜಂಪ್ ಮಾಡುವ ಮೂಲಕ ಬೆಳ್ಳಿ ಪದಕವನ್ನು ತನ್ನದಾಗಿಸಿಕೊಂಡಿದ್ದಾರೆ. ಪ್ರವೀಣ್‌ ಕುಮಾರ್‌ಗೆ ತೀವ್ರ ಪೈಪೋಟಿ ನೀಡಿದ್ದ ಗ್ರೇಟ್‌ ಬ್ರಿಟನ್‌ನ ಜೊನಾಥನ್‌ ಬ್ರೂಮ್‌-ಎಡ್ವಾರ್ಡ್ಸ್ ಅವರು 2.10 ಮೀಟರ್‌ ಜಂಪ್ ಮಾಡುವ ಮೂಲಕ ಚಿನ್ನದ ಪದಕ ತನ್ನದಾಗಿಸಿಕೊಂಡಿದ್ದಾರೆ. ಇನ್ನು ರಿಯೋ ಪ್ಯಾರಾಲಿಂಪಿಕ್ಸ್ ಚಾಂಪಿಯನ್‌ ಪೊಲೆಂಡ್‌ನ ಮ್ಯಾಕೀಜ್ ಲೆಪಿಯಾಟೊ 2.04 ಮೀಟರ್‌ ಜಂಪ್ ಮಾಡುವ ಮೂಲಕ ಕಂಚಿನ ಪದಕಕ್ಕೆ ತೃಪ್ತರಾಗಿದ್ದಾರೆ. ಆಗಸ್ಟ್‌ 29 ರಂದು ಪುರುಷರ ಕ್ರೀಡೆಯ ಟಿ47 ವಿಭಾಗದಲ್ಲಿ ನಿಶಾದ್‌ ಕುಮಾರ್‌ ಏಷ್ಯಾದ ನೂತನ ದಾಖಲೆಯೊಂದಿಗೆ ಬೆಳ್ಳಿ ಪದಕಕ್ಕೆ ಕೊರಳೊಡ್ದಿದ್ದರು. 21 ವರ್ಷದ ಭಾರತೀಯ ಅಥ್ಲೀಟ್‌ 2.06 ಮೀಟರ್‌ ಎತ್ತರಕ್ಕೆ ನೆಗೆಯುವ ಮೂಲಕ ಏಷ್ಯಾದ ನೂತನ ದಾಖಲೆಯೊಂದಿಗೆ ಬೆಳ್ಳಿ ಪದಕ ಗೆದ್ದರು. ಅಮೆರಿಕದ ಡಲ್ಲಾಸ್‌ ವೈಸ್‌ ಕೂಡ ಅಷ್ಟೇ ಎತ್ತರಕ್ಕೆ ನೆಗೆದ ಕಾರಣ ಅವರಿಗೂ ಬೆಳ್ಳಿ ಪದಕ ಲಭ್ಯವಾಗಿದೆ. ಅಮೆರಿಕದ ಮತ್ತೊಬ್ಬ ಜಂಪರ್‌ ರೋಡೆರಿಕ್ ಟೌನ್‌ಸೆಂಡ್ ವಿಶ್ವ ದಾಖಲೆಯೊಂದಿಗೆ 2.15 ಮೀ. ಎತ್ತರಕ್ಕೆ ನೆಗೆದು ಸ್ವರ್ಣ ಪದಕ ಬಾಚಿಕೊಂಡಿದ್ದರು. ಅವನಿ ಲೆಖಾರಾಗೆ ಎರಡನೇ ಪದಕ: ಇದೇ ದಿನ ಭಾರತದ ಅವನಿ ಲೆಖಾರಾ ಅವರು ಮಹಿಳೆಯರ 50 ಮೀಟರ್‌ ರೈಫಲ್‌ 3ಪಿ ಎಸ್‌ಎಚ್‌1 ವಿಭಾಗದಲ್ಲಿ ಕಂಚಿನ ಪದಕ ಮುಡಿಗೇರಿಸಿಕೊಂಡಿದ್ದಾರೆ. ಶುಕ್ರವಾರ ನಡೆದಿದ್ದ ಅಂತಿಮ ಸುತ್ತಿನಲ್ಲಿ ಲೇಖಾರ 50.8, 50.3 ಹಾಗೂ 48.4 ಸೇರಿದಂತೆ ಒಟ್ಟು 149.6 ಪಾಯಿಂಟ್ಸ್‌ಗಳನ್ನು ಕಲೆ ಹಾಕುವ ಮೂಲಕ ಕಂಚಿನ ಪದಕವನ್ನು ತನ್ನದಾಗಿಸಿಕೊಂಡಿದ್ದಾರೆ. ಇದಕ್ಕೂ ಮುನ್ ಅವನಿ ಲೆಖಾರಾ ಅವರು ಮಹಿಳೆಯರ 10 ಮೀಟರ್‌ ಏರ್‌ ರೈಫಲ್‌ ಎಸ್‌ಎಚ್‌1 ವಿಭಾಗದಲ್ಲಿ ಚಿನ್ನದ ಪದಕ ಮುಡಿಗೇರಿಸಿಕೊಂಡಿದ್ದರು. ಆ ಮೂಲಕ ಪ್ಯಾರಾಲಿಂಪಿಕ್ಸ್ ಕ್ರೀಡಾಕೂಟದಲ್ಲಿ ಚಿನ್ನದ ಪದಕ ಗೆದ್ದ ಭಾರತದ ಮೊದಲ ಮಹಿಳೆ ಎಂಬ ಖ್ಯಾತಿಗೆ ಅವನಿ ಪಾತ್ರರಾಗಿದ್ದರು. ಒಟ್ಟಾರೆ 19 ಪ್ರಾಯದ ಶೂಟರ್‌ ಪ್ರಸಕ್ತ ಕ್ರೀಡಾಕೂಟದಲ್ಲಿ ಎರಡು ಪದಕಗಳನ್ನು ಮುಡಿಗೇರಿಸಿಕೊಂಡು ದೇಶಕ್ಕೆ ಕೀರ್ತಿ ತಂದಿದ್ದಾರೆ. ಇಲ್ಲಿಯವರೆಗೆ ಭಾರತದ ಪದಕಗಳ ಸಂಖ್ಯೆ 12ಕ್ಕೇರಿದೆ. ಇದರಲ್ಲಿ ಎರಡು ಚಿನ್ನದ ಪದಕಗಳು, 6 ಬೆಳ್ಳಿ ಪದಕಗಳು ಹಾಗೂ ನಾಲ್ಕು ಕಂಚಿನ ಪದಕಗಳು ಒಳಗೊಂಡಿವೆ. ಒಟ್ಟಾರೆ ಟೋಕಿಯೋ ಪ್ಯಾರಾಲಿಂಪಿಕ್ಸ್ ಕ್ರೀಡಾಕೂಟದ ಪದಕಗಳ ಪಟ್ಟಿಯಲ್ಲಿ ಭಾರತ 36ನೇ ಸ್ಥಾನದಲ್ಲಿದೆ. ಪ್ಯಾರಾಲಿಂಪಿಕ್ಸ್ ಇತಿಹಾಸದಲ್ಲಿಯೇ ಭಾರತಕ್ಕೆ ಇಷ್ಟೊಂದು ಪದಕಗಳು ಬಂದಿರುವುದು ಇದೇ ಮೊದಲು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3gZgcjf
