ಜೋಹಾನ್ಸ್ಬರ್ಗ್: ಸಮಕಾಲೀನ ಕ್ರಿಕೆಟ್ ಜಗತ್ತಿನಲ್ಲಿ ಇಂಗ್ಲೆಂಡ್ ಆಟಗಾರ , ಶ್ರೇಷ್ಠ ಆಲ್ರೌಂಡರ್ ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ ಪದೇ ಪದೇ ವಿವಾದದಲ್ಲಿ ಭಾಗಿಯಾಗುವ ಮೂಲಕ ಕೆಂಗಣ್ಣಿಗೆ ಗುರಿಯಾಗುತ್ತಾರೆ. ಈ ಹಿಂದೆ ಅನೇಕ ಬಾರಿ ತಮ್ಮ ವರ್ತನೆಗಾಗಿ ಟೀಕೆಗೆ ಗುರಿಯಾಗಿರುವ ಬೆನ್ ಸ್ಟೋಕ್ಸ್, ಬಳಿಕ ಭರ್ಜರಿ ಕಮ್ಬ್ಯಾಕ್ ಮಾಡಿ 2019ರಲ್ಲಿ ಇಂಗ್ಲೆಂಡ್ ಚೊಚ್ಚಲ ವಿಶ್ವಕಪ್ ಗೆಲ್ಲಲು ನಿರ್ಣಾಯಕ ಪಾತ್ರ ವಹಿಸಿದ್ದರು. ಈ ಮಧ್ಯೆ ದಕ್ಷಿಣ ಆಫ್ರಿಕಾ ವಿರುದ್ಧ ಸಾಗುತ್ತಿರುವ ಟೆಸ್ಟ್ ಸರಣಿಯ ಕೊನೆಯ ಪಂದ್ಯದಲ್ಲಿ ಅಭಿಮಾನಿಗೆ ನಿಂದನೆ ಮಾಡಿ ವಿವಾದಕ್ಕೊಳಗಾಗಿದ್ದಾರೆ. ಪ್ರಕರಣದ ಗಂಭೀರತೆಯನ್ನು ಅರಿತಿರುವ ಸ್ಟೋಕ್ಸ್, ಕ್ಷಮೆಯಾಚನೆ ನಡೆಸಿದ್ದಾರೆ. ಜೋಹಾನ್ಸ್ಬರ್ಗ್ನಲ್ಲಿ ನಡೆಯುತ್ತಿರುವ ಅಂತಿಮ ಟೆಸ್ಟ್ ಪಂದ್ಯದ ಮೊದಲ ದಿನದಾಟದಲ್ಲಿ ಇಂಗ್ಲೆಂಡ್ 54.2 ಓವರ್ಗಳಲ್ಲಿ ನಾಲ್ಕು ವಿಕೆಟ್ ನಷ್ಟಕ್ಕೆ 192 ರನ್ ಗಳಿಸಿದೆ. ಈ ಮಧ್ಯೆ ಆನ್ರಿಚ್ ನಾರ್ಟ್ಜೆ ದಾಳಿಯಲ್ಲಿ ವಿಕೆಟ್ ಒಪ್ಪಿಸಿದ ಸ್ಟೋಕ್ಸ್ ನಿರಾಸೆ ಅನುಭವಿಸಿದರು. ಕೇವಲ 10 ಎಸೆತಗಳನ್ನಷ್ಟೇ ಎದುರಿಸಿದ ಸ್ಟೋಕ್ಸ್ ಎರಡು ರನ್ ಗಳಿಸಿ ವಿಕೆಟ್ ಒಪ್ಪಿಸಿದ್ದರು. ಪೆವಿಲಿಯನ್ಗೆ ಹಿಂತುರುಗಿದ್ದ ವೇಳೆ ರೊಚ್ಚಿಗೊದ್ದ ಬೆನ್ ಸ್ಟೋಕ್ಸ್, ಅಭಿಮಾನಿಗೆ ನಿಂದನೆ ಮಾಡಿದರು. ಬಳಿಕ ಎಚ್ಚೆತ್ತುಕೊಂಡಿರುವ ಸ್ಟೋಕ್ಸ್, ಕ್ಷಮೆಯಾಚನೆ ನಡೆಸಿದ್ದಾರೆ. ನಾನು ಈ ರೀತಿಯಾಗಿ ಪ್ರತಿಕ್ರಿಯಿಸಬಾರದಿತ್ತು ಎಂದಿದ್ದಾರೆ. ನಾನು ಮೈದಾನ ಬಿಟ್ಟು ತೆರುಳುವಾಗ ಗ್ಯಾಲರಿಯಲ್ಲಿದ್ದ ಪ್ರೇಕ್ಷಕರು ನನ್ನನ್ನು ನಿಂದಿಸಿದರು. ಆ ವೇಳೆಯಲ್ಲಿ ನನ್ನ ರಿಯಾಕ್ಷನ್ ವೃತ್ತಿಪರ ಆಟಗಾರನಿಗೆ ಸೇರಿದ್ದಾಗಿರಲಿಲ್ಲ ಎಂಬುದನ್ನು ಒಪ್ಪಿಕೊಳ್ಳುತ್ತೇನೆ. ನಾನು ಬಳಸಿದ ಭಾಷೆಗಾಗಿ ಪ್ರಾಮಾಣಿಕವಾಗಿ ಕ್ಷಮೆ ಕೇಳುತ್ತಿದ್ದೇನೆ. ವಿಶೇಷವಾಗಿಯೂ ವಿಶ್ವೆದೆಲ್ಲೆಡೆಯ ಯುವ ಅಭಿಮಾನಿಗಳು ನೋಡುತ್ತಿರುತ್ತಾರೆ ಎಂದು ತಿಳಿಸಿದರು. ಸರಣಿಯುದ್ಧಕ್ಕೂ ಇತ್ತಂಡಗಳ ಅಭಿಮಾನಿಗಳ ಬೆಂಬಲವೂ ನಿಜಕ್ಕೂ ಅಮೋಘವಾಗಿದೆ. ಈ ಒಂದು ಘಟನೆಯಿಂದ ಧಕ್ಕೆಯಾಗುವುದಿಲ್ಲ ಎಂದವರು ಸೇರಿಸಿದರು. ಅಂದ ಹಾಗೆ ನಾಲ್ಕು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಇಂಗ್ಲೆಂಡ್ 2-1ರ ಅಂತರದ ಮುನ್ನಡೆ ಕಾಯ್ದುಕೊಂಡಿದೆ. ಸರಣಿ ಸಮಬಲಗೊಳಿಸುವ ನಿಟ್ಟಿನಲ್ಲಿ ಆತಿಥೇಯ ದಕ್ಷಿಣ ಆಫ್ರಿಕಾಗೆ ಈ ಪಂದ್ಯ ಮಹತ್ವದೆನಿಸಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/37rYPRk
