ಬೆಂಗಳೂರು: ತಂತ್ರಜ್ಞಾನ, ನ್ಯಾನೋ ಟೆಕ್ನಾಲಜಿ, ಎಂಜಿನಿಯರಿಂಗ್, ಭೂ ವಿಜ್ಞಾನ, ಕೃಷಿ, ತೋಟಗಾರಿಕೆ, ಬಾಹ್ಯಾಕಾಶ, ವೈಮಾನಿಕ ಕ್ಷೇತ್ರ, ಸೌರಮಂಡಲ, ಯಂತ್ರೋಪಕರಣಗಳೂ ಸೇರಿದಂತೆ ಹತ್ತು ಹಲವು ಕ್ಷೇತ್ರಗಳ ಅನ್ವೇಷಣೆಗಳು, ಉತ್ಪನ್ನಗಳನ್ನು ನೇರವಾಗಿ ನೋಡುವ ಅವಕಾಶ ವಿದ್ಯಾರ್ಥಿಗಳು ಮತ್ತು ಸಾರ್ವಜನಿಕರಿಗೆ ಉಚಿತವಾಗಿ ದೊರಕಿದೆ. ಬಳ್ಳಾರಿ ರಸ್ತೆಯ ಗಾಂಧಿ ಕೃಷಿ ವಿಜ್ಞಾನ ಕೇಂದ್ರದಲ್ಲಿ(ಜಿಕೆವಿಕೆ) ಶುಕ್ರವಾರದಿಂದ ಆರಂಭವಾಗಿರುವ ಐದು ದಿನಗಳ '107ನೇ ಭಾರತೀಯ ವಿಜ್ಞಾನ ಸಮ್ಮೇಳನ' ಈ ಅವಕಾಶ ಕಲ್ಪಿಸಿದೆ. ವಿದ್ಯಾರ್ಥಿಗಳಲ್ಲಿ ವಿಜ್ಞಾನದ ಕುರಿತು ಆಸಕ್ತಿ, ಪ್ರೇರಣೆ ಮೂಡಿಸುವ, ಹೊಸದನ್ನು ನೇರವಾಗಿ ನೋಡಿ ಜ್ಞಾನ ಸಂಪಾದನೆಯ ಅವಕಾಶ ಸಿಕ್ಕಿದೆ. ಹೀಗಾಗಿ, ಮಕ್ಕಳನ್ನು ಕರೆದುಕೊಂಡು ಪಾಲಕರು ವಿಜ್ಞಾನ ಸಮ್ಮೇಳನಕ್ಕೆ ಆಗಮಿಸುವಂತೆ ಭಾರತೀಯ ವಿಜ್ಞಾನ ಕಾಂಗ್ರೆಸ್ ಅಸೊಸಿಯೇಷನ್ನ ಅಧ್ಯಕ್ಷ ಪ್ರೊ.ಕೆ.ಎಸ್ ರಂಗಪ್ಪ ಮನವಿ ಮಾಡಿದರು. ಶನಿವಾರ ಮಕ್ಕಳ ವಿಜ್ಞಾನ ಸಮ್ಮೇಳನ ಮತ್ತು ಮಹಿಳಾ ಕಾಂಗ್ರೆಸ್ ಸಮ್ಮೇಳನಗಳು ಆರಂಭವಾಗಲಿವೆ. ಜಿಕೆವಿಕೆ ಆವರಣದಲ್ಲಿ ವಿಜ್ಞಾನ, ತಂತ್ರಜ್ಞಾನದ ಹೊಸ ಲೋಕವೇ ಸೃಷ್ಟಿಯಾಗಿದೆ. ದೇಶದ ಹಲವು ಪ್ರಮುಖ ವಿಶ್ವವಿದ್ಯಾಲಯಗಳು, ತರಬೇತಿ ಕೇಂದ್ರಗಳು, ಸರಕಾರಿ ಸಂಸ್ಥೆಗಳು ಭಾಗವಹಿಸುತ್ತಿವೆ. ಕೇಂದ್ರಗಳಲ್ಲಿನ ಚಟುವಟಿಕೆಗಳು, ಸಂಶೋಧನೆಗಳು, ಉತ್ಪನ್ನಗಳನ್ನು ಪ್ರದರ್ಶನಕ್ಕೆ ಇಡಲಾಗಿದೆ. ಮಾತನಾಡುವ ರೋಬಾಟ್: ವಸ್ತು ಪ್ರದರ್ಶನದಲ್ಲಿ ಸಿರೇನಾ ಟೆಕ್ನಾಲಜೀಸ್ನ ಮಾತನಾಡುವ 'ನಿನೋ' ರೋಬಾಟ್ ಪ್ರಮುಖ ಆಕರ್ಷಣೆಯಾಗಿದೆ. ರಸಾಯನಶಾಸ್ತ್ರದ ಪ್ರಯೋಗಾಲಯವನ್ನೇ ತೆರೆಯಲಾಗಿದೆ. ವಿವಿಧ ಕೆಮಿಕಲ್ಗಳ ಮಿಶ್ರಣದಿಂದ ಹೊರ ಹೊಮ್ಮುವ ರಿಯಾಕ್ಷನ್, ಅಪಾಯ, ಅನುಕೂಲಗಳನ್ನು ನೇರವಾಗಿ ನೋಡಲು ಇಲ್ಲಿ ಅವಕಾಶವಿದೆ. ಸೌರಮಂಡಲದಲ್ಲಿನ ಭೂಮಿ ಮತ್ತು ಗ್ರಹಗಳ ಚಲನೆ ಕುರಿತು ಪರದೆ ಮೂಲಕ ಕಿರುಚಿತ್ರ ವೀಕ್ಷಣೆ ಮಾಡಬಹುದು. ಭಾರತೀಯ ರಕ್ಷಣಾ ಮತ್ತು ಸಂಶೋಧನಾ ಸಂಸ್ಥೆಗಳ ಅನ್ವೇಷಣೆ ಮತ್ತು ಉತ್ಪನ್ನಗಳನ್ನು ಪ್ರದರ್ಶನಕ್ಕೆ ಇಡಲಾಗಿದೆ. ಅಲ್ಲದೆ, ಅವುಗಳ ಕುರಿತು ವಿವರಣೆಯೂ ಇದೆ. ಸಮ್ಮೇಳನದಲ್ಲಿ ಸುಮಾರು 100 ಮಾದರಿಯ ಕಲ್ಲುಗಳನ್ನು ಇರಿಸಲಾಗಿದ್ದು, ಇಷ್ಟೊಂದು ಮಾದರಿ ಕಲ್ಲುಗಳು ಇವೆಯೇ ಎಂದು ನೋಡುಗರು ಬೆರಗುಗೊಳ್ಳುವಂತೆ ಮಾಡುತ್ತದೆ. ಸಮ್ಮೇಳನದೊಳಗೆ ಹೋಗಿ ಬರುವವರಿಗೆ ಹೊಸ ಅನುಭವ ನೀಡುವುದು ಖಚಿತ. ಸಮ್ಮೇಳನದಲ್ಲೇ ಊಟದ ವ್ಯವಸ್ಥೆ ಇರುವ ಕಾರಣ ಆತಂಕಪಡುವ ಅಗತ್ಯವಿಲ್ಲ. ವಿದ್ಯಾರ್ಥಿಗಳು ತಮ್ಮ ಹೆಸರುಗಳನ್ನು ನೋಂದಾಯಿಸಿಕೊಳ್ಳಬೇಕು.
from India & World News in Kannada | VK Polls https://ift.tt/2MUCofr
