ಕ್ರೈಸ್ಟ್ಚರ್ಚ್: ಯಾಕೋ ಟೀಮ್ ಇಂಡಿಯಾ ಕಪ್ತಾನ ಟೈಮ್ ಸರಿಯಿಲ್ಲ ಅನ್ನಿಸುತ್ತಿದೆ. ಅತ್ತ ಬ್ಯಾಟಿಂಗ್ ಕೈಕೊಟ್ಟಿದ್ದು, ಕೆಟ್ಟ ಫಾರ್ಮ್ನಿಂದ ಬಳಲುತ್ತಿದ್ದಾರೆ. ಇನ್ನೊಂದೆಡೆ ತಂಡದ ಪ್ರದರ್ಶನವು ಹೀನಾಯವಾಗಿದೆ. ಕಿವೀಸ್ ನೆಲದಲ್ಲಂತೂ ಟೆಸ್ಟ್ ಸರಣಿ ಸೋಲಿನ ಮುಖಭಂಗಕ್ಕೊಳಗಾಗಿದೆ. ಇವೆಲ್ಲದರ ನಡುವೆ ತವರಿನ ಹುಲಿಗಳು ವಿದೇಶದಲ್ಲಿ ಕಾಗದದ ಹುಲಿಗಳು ಎಂಬ ಅಪವಾದವನ್ನು ಕಟ್ಟಿಕೊಳ್ಳುವಂತಾಗಿದೆ. ಈ ಎಲ್ಲದರ ಮಧ್ಯೆ ಮೈದಾನದಲ್ಲಿ ತಮ್ಮ ಅತಿರೇಕದ ವರ್ತನೆಗಾಗಿ ಕೆಂಗಣ್ಣಿಗೆ ಗುರಿಯಾಗಿರುವ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ, ಇದೀಗ ಈ ಘಟನೆ ಬಗ್ಗೆ ಪ್ರಶ್ನೆ ಎದ್ದಾಗ ಪತ್ರಕರ್ತನ ವಿರುದ್ಧವೂ ರೊಚ್ಚಿಗೆದ್ದಿರುವ ಪ್ರಸಂಗ ನಡೆದಿದೆ. ಕ್ರೈಸ್ಟ್ಚರ್ಚ್ನಲ್ಲಿ ನಡೆದ ಅಂತಿಮ ಟೆಸ್ಟ್ ಪಂದ್ಯದಲ್ಲಿ ಏಳು ವಿಕೆಟ್ ಅಂತರದ ಗೆಲುವು ಬಾರಿಸಿರುವ ನ್ಯೂಜಿಲೆಂಡ್, ಎರಡು ಪಂದ್ಯಗಳ ಟೆಸ್ಟ್ ಸರಣಿಯನ್ನು 2-0 ಅಂತರದಲ್ಲಿ ಕ್ಲೀನ್ಸ್ವೀಪ್ಗೈದಿದೆ. ಈ ನಡುವೆ ಎರಡನೇ ದಿನದಾಟದಲ್ಲಿ ವಿರಾಟ್ ಕೊಹ್ಲಿ, ಕಿವೀಸ್ ಆಟಗಾರರು ಹಾಗೂ ಪ್ರೇಕ್ಷಕರನ್ನು ನಿಂದಿಸಿದ್ದರು. ನ್ಯೂಜಿಲೆಂಡ್ ನಾಯಕ ಕೇನ್ ವಿಲಿಯಮ್ಸನ್ ಔಟಾದಾಗ ಅತಿಯಾಗಿ ಸಂಭ್ರಮಿಸಿದ ವಿರಾಟ್ ಕೊಹ್ಲಿ ಕೆಂಗಣ್ಣಿಗೆ ಗುರಿಯಾಗಿದ್ದರು. ತದಾ ಬಳಿಕ ಟಾಟ್ ಲೇಥಮ್ ವಿಕೆಟ್ ಪತನಗೊಂಡ ಸಂದರ್ಭದಲ್ಲಿ ಪ್ರೇಕ್ಷಕರತ್ತ ಅಸಭ್ಯ ಹೇಳಿಕೆಗಳನ್ನು ನೀಡಿದ ವಿರಾಟ್ ಕೊಹ್ಲಿ ಬಾಯಿ ಮುಚ್ಚುವಂತೆ ಸನ್ನೆ ಮಾಡಿದ್ದರು. ಏಕಾಏಕಿ ವಿರಾಟ್ ಕೊಹ್ಲಿ ವರ್ತನೆಯು ಭಾರಿ ಟೀಕೆಗೆ ಗ್ರಾಸವಾಗಿತ್ತು. ಇಲ್ಲಿಯ ವರೆಗೆ ನ್ಯೂಜಿಲೆಂಡ್ ಆಟಗಾರರ ಬಗ್ಗೆ ಗೌರವ ತೋರುತ್ತಿದ್ದ ವಿರಾಟ್ ಕೊಹ್ಲಿ ಈ ಬಗ್ಗೆ ಬಹಿರಂಗ ಹೇಳಿಕೆಯನ್ನು ನೀಡಿದ್ದರು. ಅಲ್ಲದೆ ಸ್ಪಿರಿಟ್ ಆಫ್ ಕ್ರಿಕೆಟ್ ಬಗ್ಗೆ ಕಿವೀಸ್ ಆಟಗಾರರಿಂದ ಸಾಕಷ್ಟು ಕಲಿಯಲಿಕ್ಕಿದೆ ಎಂದು ಹೇಳಿಕೆ ನೀಡಿದ್ದರು. ಈ ನಡುವೆ ಅಂತಿಮ ಟೆಸ್ಟ್ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಅಸಭ್ಯ ವರ್ತನೆ ಬಗ್ಗೆ ಪತ್ರಕರ್ತ ಪ್ರಶ್ನೆ ಎತ್ತಿದ್ದರು. 'ಮೈದಾನದಲ್ಲಿ ಉತ್ತಮ ಉದಾಹರಣೆ ನೀಡಬೇಕೆಂದು ನೀವು ಯೋಚಿಸುವುದಿಲ್ಲವೇ?' ಎಂದು ಪತ್ರಕರ್ತರೊಬ್ಬರು ಪ್ರಶ್ನಿಸಿದ್ದರು. ಈ ಸಂದರ್ಭದಲ್ಲಿ ರೊಚ್ಚಿಗೆದ್ದ ವಿರಾಟ್ ಕೊಹ್ಲಿ 'ನಿಮಗೇನು ಅನ್ನಿಸುತ್ತಿದೆ' ಎಂದು ಮರು ಪ್ರಶ್ನೆಯನ್ನು ಕೇಳಿದರು. ಈ ಸಂದರ್ಭದಲ್ಲಿ ಪತ್ರಕರ್ತ 'ನಾನು ನಿಮ್ಮ ಬಳಿ ಪ್ರಶ್ನೆಯನ್ನು ಕೇಳುತ್ತಿದ್ದೇನೆ' ಎಂದರು. ಈ ಸಂದರ್ಭದಲ್ಲಿ ವಿರಾಟ್ ಕೊಹ್ಲಿ, 'ನಾನು ನಿಮ್ಮಲ್ಲಿ ಉತ್ತರವನ್ನು ಕೇಳುತ್ತಿದ್ದೇನೆ ಎಂದರು. ಈ ವೇಳೆ ಪತ್ರಕರ್ತ, ನೀವು ಒಳ್ಳೆಯ ಉದಾಹರಣೆಯನ್ನು ನೀಡಬೇಕು' ಎಂದರು. ಈ ಸಂದರ್ಭದಲ್ಲಿ "ಆಕ್ರೋಶಭರಿತವಾಗಿ ಉತ್ತರ ನೀಡಿದ ವಿರಾಟ್ ಕೊಹ್ಲಿ, ಏನಾಯಿತು ಎಂಬುದನ್ನು ನೀವು ನಿಖರವಾಗಿ ಕಂಡುಹಿಡಿಯಬೇಕು. ತದಾ ಬಳಿಕವಷ್ಟೇ ಉತ್ತಮ ಪ್ರಶ್ನೆಗಳೊಂದಿಗೆ ಬರಬೇಕು. ಅರ್ಧ ಪ್ರಶ್ನೆಗಳೊಂದಿಗೆ ಅಥವಾ ಘಟನೆಯ ಬಗ್ಗೆ ನಿಖರ ವಿವರವಿಲ್ಲದೆ ನೀವಿಲ್ಲಿಗೆ ಬರಬಾರದು. ಹಾಗೊಂದು ವೇಳೆ ನೀವು ವಿವಾದವನ್ನು ಮಾಡಲು ಬಯಸುವುದಾದರೆ, ಇದು ಸೂಕ್ತ ಪ್ರದೇಶವಲ್ಲ. ನಾನು ಮ್ಯಾಚ್ ರೆಫರಿಯೊಂದಿಗೂ ಮಾತನಾಡಿದ್ದೆ. ಏನಾಯಿತು ಎಂಬುದರ ಬಗ್ಗೆ ರೆಫರಿಗೂ ಯಾವುದೇ ಸಮಸ್ಯೆಗಳಿಲ್ಲ. ಧನ್ಯವಾದಗಳು!" ಎಂದು ತಮ್ಮ ಮಾತುಗಳನ್ನು ಕೊನೆಗೊಳಿಸಿದರು. ಅಂದ ಹಾಗೆ ನ್ಯೂಜಿಲೆಂಡ್ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ವೈಯಕ್ತಿಕ ವೈಫಲ್ಯ ಅನುಭವಿಸಿರುವ ವಿರಾಟ್ ಕೊಹ್ಲಿ 38 ರನ್ ಗಳಿಸಲಷ್ಟೇ ಶಕ್ತವಾಗಿದ್ದರು. ಈ ಮೂಲಕ ಭಾರಿ ಮುಖಭಂಗ ಎದುರಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/38eFHWT
