ಸಿಡ್ನಿ: ಆಸ್ಟ್ರೇಲಿಯಾ ಆತಿಥ್ಯದಲ್ಲಿ ನಡೆಯುತ್ತಿರುವ ಟೂರ್ನಿಯಲ್ಲಿ ಒಂದೂ ಪಂದ್ಯದಲ್ಲಿಯೂ ಸೋಲು ಕಾಣದೆ ಸಾಕಷ್ಟು ವಿಶ್ವಾಸದೊಂದಿಗೆ ಸೆಮಿಫೈನಲ್ ತಲುಪಿರುವ ಭಾರತ ತಂಡವನ್ನು ಆಸೀಸ್ ಮಾಜಿ ವೇಗಿ ಬ್ರೆಟ್ ಲೀ ಗುಣಗಾನ ಮಾಡಿದ್ದಾರೆ. ಮ್ಯಾಚ್ ವಿನ್ನರ್ಗಳಾದ ಹಾಗೂ ಪೂನಮ್ ಯಾದವ್ ಅವರನ್ನೊಳಗೊಂಡಿರುವ ಹರ್ಮನ್ಪ್ರೀತ್ ಕೌರ್ ಪಡೆಯನ್ನು ಮಣಿಸಲು 'ಬಲಿಷ್ಠ ತಂಡ'ದ ಅಗತ್ಯವಿದೆ ಎಂದು ಹೇಳಿದ್ದಾರೆ. ಟೂರ್ನಿಯ ಆರಂಭಿಕ ಪಂದ್ಯದಲ್ಲಿ ಬಲಿಷ್ಠ ಆಸ್ಟ್ರೇಲಿಯಾವನ್ನು ಮಣಿಸುವ ಮೂಲಕ ಭಾರತ, ಚುಟುಕು ವಿಶ್ವಕಪ್ನಲ್ಲಿ ಶುಭಾರಂಭ ಕಂಡಿತ್ತು. ನಂತರ, ಅದೇ ಲಯ ಮುಂದುವರಿಸಿದ ಕೌರ್ ಪಡೆ ಬಾಂಗ್ಲಾದೇಶ, ನ್ಯೂಜಿಲೆಂಡ್ ಹಾಗೂ ಶ್ರೀಲಂಕಾ ತಂಡಗಳ ವಿರುದ್ಧ ಗೆಲುವು ಸಾಧಿಸಿ ಎ ಗುಂಪಿನ ಅಂಕಪಟ್ಟಿಯಲ್ಲಿ ಅಗ್ರ ಸ್ಥಾನವನ್ನು ಅಲಂಕರಿಸಿತು. ಈ ಬಗ್ಗೆ ಐಸಿಸಿ ಅಂಕಣದಲ್ಲಿ ಮಾತನಾಡಿರುವ ಬ್ರೆಟ್ ಲೀ," ಇದುವರೆಗೂ ಭಾರತ ಟಿ20 ವಿಶ್ವಕಪ್ ಟೂರ್ನಿಯಲ್ಲಿ ಫೈನಲ್ ಪ್ರವೇಶ ಮಾಡಿಲ್ಲ. ಆದರೆ, ಈ ಬಾರಿಯ ತಂಡ ಸಂಪೂರ್ಣ ವಿಭಿನ್ನವಾಗಿದ್ದು, ಹಲವು ಪ್ರತಿಭಾವಂತ ಆಟಗಾರ್ತಿಯರನ್ನು ಹೊಂದಿದೆ. ಇದನ್ನು ಗಮನಿಸಿದರೆ ಈ ಬಾರಿ ಫೈನಲ್ ಪ್ರವೇಶ ಮಾಡುವ ಎಲ್ಲ ಲಕ್ಷಣಗಳು ಭಾರತ ವನಿತೆಯರಿಗೆ ಇದೆ,'' ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಭಾರತ ಮಹಿಳಾ ಕ್ರಿಕೆಟ್ ತಂಡದ ಆರಂಭಿಕ ಬ್ಯಾಟ್ಸ್ವುಮೆನ್ ಶಫಾಲಿ ವರ್ಮಾ ಅವರನ್ನೂ ಆಸ್ಟ್ರೇಲಿಯಾ ತಂಡದ ಮಾಜಿ ವೇಗಿ ಶ್ಲಾಘಿಸಿದ್ದಾರೆ. ಶಫಾಲಿ ಭಯರಹಿತ ಬ್ಯಾಟಿಂಗ್ ಭಾರತಕ್ಕೆ ಶಕ್ತಿ ತುಂಬಲಿದೆ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. 16ರ ಪ್ರಾಯದ ಆಟಗಾರ್ತಿ,ಇದೀಗ ನಡೆಯುತ್ತಿರುವ ಮಹಿಳಾ ಟಿ20 ವಿಶ್ವಕಪ್ ಟೂರ್ನಿಯ ನಾಲ್ಕು ಇನಿಂಗ್ಸ್ಗಳಿಂದ 161 ರನ್ ಬಾರಿಸಿದ್ದಾರೆ. 18 ಬೌಂಡರಿ ಹಾಗೂ 9 ಸಿಕ್ಸರ್ಗಳನ್ನು ಇದರಲ್ಲಿ ಒಳಗೊಂಡಿವೆ. ಭಾರತ ಅಂತಿಮ ನಾಲ್ಕರ ಘಟ್ಟಕ್ಕೆ ಪ್ರವೇಶ ಮಾಡುವಲ್ಲಿ ಶಫಾಲಿ ಮಹತ್ತರ ಪಾತ್ರ ವಹಿಸಿದ್ದಾರೆ. "ಶಫಾಲಿ ವರ್ಮಾ ಅಗ್ರ ಕ್ರಮಾಂಕದ ಅದ್ಭುತ ಬ್ಯಾಟ್ಸ್ವುಮೆನ್ ಆಗಿದ್ದಾರೆ. ಇವರ ಭಯರಹಿತ ಬ್ಯಾಟಿಂಗ್ ಭಾರತ ತಂಡಕ್ಕೆ ಶಕ್ತಿ ತುಂಬಲಿದೆ. ಇವರ ಬ್ಯಾಟಿಂಗ್ ನೋಡುವುದೇ ಒಂದು ಅದ್ಭುತ," ಎಂದು ಬ್ರೆಟ್ ಲೀ ಆರಂಭಿಕ ಆಟಗಾರ್ತಿಯನ್ನು ಕೊಂಡಾಡಿದ್ದಾರೆ. "ಶಫಾಲಿ ವರ್ಮಾ ಟೂರ್ನಿಯಲ್ಲಿ ಇನ್ನೂ ಆಫ್ ಸೆಂಚೂರಿ ಗಳಿಸಿಲ್ಲ. ಆದರೆ, ಖಂಡಿತ ಅವರು ಮುಂದಿನ ಪಂದ್ಯಗಳಲ್ಲಿ ದೊಡ್ಡ ಮೊತ್ತ ಕಲೆಹಾಕಲಿದ್ದಾರೆಂಬ ವಿಶ್ವಾಸ ಅವರ ಸ್ಪೋಟಕ ಶೈಲಿಯ ಬ್ಯಾಟಿಂಗ್ ನಮಗೆ ಮನವರಿಕೆ ಮಾಡಿಕೊಡುತ್ತದೆ,'' ಎಂದು ಹೇಳಿದರು. ಈ ಹಿಂದೆ 2018ರಲ್ಲಿಯೂ ಭಾರತ ಸೆಮಿಫೈನಲ್ಗೆ ತಲುಪಿತ್ತು. ಆದರೆ, ಪ್ರಶಸ್ತಿ ಸುತ್ತಿಗೆ ಪ್ರವೇಶ ಮಾಡುವಲ್ಲಿ ವಿಫಲವಾಗಿತ್ತು. ಆದರೆ, ಈ ಬಾರಿ ಸೋಲು ಕಾಣದೆ ಮುನ್ನಗ್ಗುತ್ತಿರುವ ಭಾರತ ವನಿತೆಯರು, ಮೊದಲ ಬಾರಿ ಚುಟುಕು ವಿಶ್ವಕಪ್ ಫೈನಲ್ ತಲುಪುವ ತುಡಿತವನ್ನು ಹೊಂದಿದ್ದಾರೆ. "ಬ್ಯಾಟಿಂಗ್ ಹಾಗೂ ಬೌಲಿಂಗ್ ಎರಡೂ ವಿಭಾಗಗಳಲ್ಲಿ ಕ್ರಮವಾಗಿ ಶಫಾಲಿ ವರ್ಮಾ ಹಾಗೂ ಪೂನಮ್ ಯಾದವ್ ಸ್ಥಿರ ಪ್ರದರ್ಶನ ತೋರುತ್ತಿದ್ದಾರೆ. ಇದು ತಂಡದ ಪಾಲಿಗೆ ಪ್ಲಸ್ ಪಾಯಿಂಟ್ ಆಗಿದೆ. ಇದಲ್ಲದೇ ವಿಶ್ವ ಶ್ರೇಷ್ಠ ಆಟಗಾರ್ತಿಯರನ್ನು ಹೊಂದಿರುವ ಭಾರತ, ಯಾವುದೇ ಹಂತದಲ್ಲಿ ಎದುರಾಳಿ ತಂಡವನ್ನು ಕಟ್ಟಿಹಾಕುವ ಸಾಮರ್ಥ್ಯವನ್ನು ಹೊಂದಿದೆ,'' ಬ್ರೆಟ್ ಲೀ ಅಭಿಪ್ರಾಯ ವ್ಯಕ್ತಪಡಿಸಿದರು. ಭಾರತ ತಂಡ ಎ ಗುಂಪಿನ ಎಲ್ಲ ನಾಲ್ಕು ಪಂದ್ಯಗಳಲ್ಲಿ ಜಯ ಸಾಧಿಸಿದೆ. ಮಾರ್ಚ್ 5 ರಂದು ನಡೆಯುವ ಸೆಮಿಫೈನಲ್ ಹಣಾಹಣಿಯಲ್ಲಿ ಇಂಗ್ಲೆಂಡ್ ಅಥವಾ ದಕ್ಷಿಣ ಆಫ್ರಿಕಾ ವಿರುದ್ಧ ಸೆಣಸಲಿದೆ. ಇದಕ್ಕಾಗಿ ಭಾರತ ವನಿತೆಯರು ಅಂಗಳದಲ್ಲಿ ಕಠಿಣ ತಾಲೀಮು ನಡೆಸುತ್ತಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2TfxX2p
