ಶ್ರೀನಗರ: ಬರೋಬ್ಬರಿ ಐದು ತಿಂಗಳುಗಳ ನಂತರ ಕಾಶ್ಮೀರಿಗರಿಗೆ 2ಜಿ ಮೊಬೈಲ್ ನೆಟ್ವರ್ಕ್ ಬಳಕೆಗೆ ಸಿಕ್ಕಿದೆ. ಆದರೆ ಆಡಳಿತ ಮಂಡಳಿ ಅನುಮೋದನೆ ಮಾಡಿರುವ 301 ವೆಬ್ಸೈಟ್ಗಳಿಗಷ್ಟೇ ಭೇಟಿ ನೀಡಬಹುದಾಗಿದೆ. ಕಣಿವೆ ರಾಜ್ಯದಲ್ಲಿ ಹೇರಲಾದ ಇಂಟರ್ನೆಟ್ ಮತ್ತು ಇತರ ನಿರ್ಬಂಧಗಳ ಕುರಿತು ಒಂದು ವಾರದೊಳಗೆ ಪುನಃ ಪರಿಶೀಲಿಸುವಂತೆ ಸುಪ್ರೀಂ ಕೋರ್ಟ್ ಜನವರಿ 10ರಂದು ಆದೇಶಿಸಿತ್ತು. ಇಂಟರ್ನೆಟ್ ಹೊಂದುವುದು ನಾಗರಿಕ ಮೂಲಭೂತ ಹಕ್ಕು ಎಂದು ಸುಪ್ರೀಂ ಪ್ರತಿಪಾದಿಸಿತ್ತು. ಕಾಶ್ಮೀರ ಕಣಿವೆಯಲ್ಲಿ ಜನವರಿ 25 ರಿಂದ 2ಜಿ ಸ್ಪೀಡ್ ಮೊಬೈಲ್ ನೆಟ್ವರ್ಕ್ ಸೇವೆಯನ್ನು ಪುನರಾರಂಭಿಸುವುದಾಗಿ ಜಮ್ಮು ಮತ್ತು ಆಡಳಿತ ಮಂಡಳಿಯ ಗೃಹ ಕಚೇರಿ ಸುತ್ತೋಲೆಯನ್ನು ಹೊರಡಿಸಿತ್ತು. 2ಜಿ ಇಂಟರ್ನೆಟ್ ಸೌಲಭ್ಯ ಸಿಕ್ಕಿದ್ದು, ಕೇವಲ ಆಡಳಿತ ಮಂಡಳಿ ಅನುಮೋದನೆ ಮಾಡಿರುವ ವೆಬ್ಸೈಟ್ ಮತ್ತು ಸಾಮಾಜಿಕ ತಾಣಗಳನ್ನಷ್ಟೇ ಬಳಕೆ ಮಾಡಬಹುದಾಗಿದೆ. 2ಜಿ ಸೇವೆ ಪೋಸ್ಟ್ಪೈಡ್ ಮತ್ತು ಪ್ರೀಪೈಡ್ ಎರಡೂ ಸಿಮ್ ಕಾರ್ಡ್ಗಳಿಗೆ ಸಿಗಲಿದೆ. ಬ್ಯಾಂಕಿಂಗ್, ಶಿಕ್ಷಣ, ಸುದ್ದಿ, ಸಂಚಾರ/ಪ್ರವಾಸ ಮತ್ತು ಉದ್ಯೋಗಕ್ಕೆ ಸಂಬಂಧಿಸಿದ ವೆಬ್ಸೈಟ್ಗಳನ್ನು ವೈಟ್ಲಿಸ್ಟ್ನಲ್ಲಿ ಸೇರಿಸಲಾಗಿದೆ. ಜಮ್ಮು ಮತ್ತು ಕಾಶ್ಮೀರಕ್ಕಿದ್ದ ವಿಶೇಷ ಸ್ಥಾನಮಾನವನ್ನು ತೆರವುಗೊಳಿಸಿ, ಕೇಂದ್ರಾಡಳಿತ ಪ್ರದೇಶಗಳನ್ನಾಗಿ ಪ್ರತ್ಯೇಕಿಸಿದ ಬಳಿಕೆ ಆಗಸ್ಟ್ 5, 2019ರಂದು ಇಂಟರ್ನೆಟ್ ಸೇವೆಗಳು, ಲ್ಯಾಂಡ್ಲೈನ್ ಮತ್ತು ಮೊಬೈಲ್ ಫೋನ್ಗಳ ಬಳಕೆಗೆ ನಿರ್ಬಂಧ ಹೇರಲಾಗಿತ್ತು. ಒಂದು ವಾರದ ನಂತರ ಮೊಬೈಲ್ ನೆಟ್ವರ್ಕ್ ಹೊರತು ಪಡಿಸಿ ಉಳಿದ ನಿರ್ಬಂಧಗಳನ್ನು ತೆರವುಗೊಳಿಸಲಾಗಿತ್ತು. ಆಸ್ಪತ್ರೆ ಸೇರಿದಂತೆ ತುರ್ತು ಸ್ಥಳಗಳಲ್ಲಿ ಮೊಬೈಲ್ ಅಥವಾ ಲ್ಯಾಂಡ್ಲೈನ್ ಬಳಕೆಗೆ ಅವಕಾಶ ಮಾಡಿಕೊಡಲಾಗಿತ್ತು.
from India & World News in Kannada | VK Polls https://ift.tt/2tPhhF8