ಟೋಕಿಯೋ: ಮಹಿಳಾ ಸಿಂಗಲ್ಸ್ ಬ್ಯಾಡ್ಮಿಂಟನ್ನಲ್ಲಿ ಹಾಲಿ ವಿಶ್ವ ಚಾಂಪಿಯನ್ ಆಗಿರುವ ಭಾರತದ ತಾರೆ , ಸೂರ್ಯೋದಯದ ನಾಡು ಜಪಾನ್ನಲ್ಲಿ ನಡೆಯುತ್ತಿರುವ ಕ್ರೀಡಾಕೂಟದಲ್ಲಿ ಶುಭಾರಂಭ ಮಾಡಿದ್ದಾರೆ. ರಿಯೋ ಒಲಿಂಪಿಕ್ಸ್ನ ಫೈನಲ್ನಲ್ಲಿ ಸ್ಪೇನ್ನ ಕ್ಯಾರೊಲಿನಾ ಮರಿನ್ ಎದುರು ಜಿದ್ದಾಜಿದ್ದಿನ ಪೈಪೋಟಿಯಲ್ಲಿ ಸೋತು ವೆಳ್ಳಿ ಪದಕಕ್ಕೆ ತೃಪ್ತಿ ಪಟ್ಟಿದ್ದ ಸಿಂಧೂ, ಟೋಕಿಯೋ ಅಂಗಣದಲ್ಲಿ ಚಿನ್ನದ ಪದಕಕ್ಕೆ ಗುರಿಯಿಟ್ಟಿದ್ದಾರೆ. ಮಂಡಿ ನೋವಿನ ಸಮಸ್ಯೆಗೆ ಶಸ್ತ್ರಚಿಕಿತ್ಸೆ ಪಡೆದಿರುವ ಮರಿನ್ ಟೋಕಿಯೋ ಒಲಿಂಪಿಕ್ಸ್ನಿಂದ ಹೊರಗುಳಿದಿದ್ದಾರೆ. ಇನ್ನು ಭಾನುವಾರ ನಡೆದ ಮಹಿಳಾ ಸಿಂಗಲ್ಸ್ ವಿಭಾಗದ ಜೆ ಗುಂಪಿನ ಮೊದಲ ಸುತ್ತಿನ ಪಂದ್ಯದಲ್ಲಿ ನಿರೀಕ್ಷೆಯಂತೆ ಅಧಿಕಾರಯುತ ಆಟವಾಡಿದ ಸಿಂಧೂ, ಇಸ್ರೇಲ್ನ ಆಟಗಾರ್ತಿ ಸೆನಿಯಾ ಪೊಲಿಕಾರ್ಪೊವಾ ಅವರನ್ನು 21-7, 21-10 ಅಂತರದ ನೇರ ಗೇಮ್ಗಳಿಂದ ಸುಲಭವಾಗಿ ಮಣಿಸಿ ಟೂರ್ನಿಯಲ್ಲಿ ಶುಭಾರಂಭ ಮಾಡಿದ್ದಾರೆ. "ಮೊದಲ ಸುತ್ತಿನ ಪಂದ್ಯ ಅತ್ಯಂತ ಸುಲಭವಾಗಿತ್ತಾದೂ, ನಾನದನ್ನು ಸುಲಭವಾಗಿ ಪರಿಗಣಿಸಿರಲಿಲ್ಲ. ಈ ಪಂದ್ಯಕ್ಕಾಗಿ ನಾನು ಅಗತ್ಯದ ತಯಾರಿ ನಡೆಸಿದ್ದೆ. ಪ್ರತಿ ಪಂದ್ಯ ಮತ್ತು ಪ್ರತಿ ಅಂಕಗಳಿಸಲು ಪೂರ್ವ ತಯಾರಿ ಅತ್ಯಂತ ಮುಖ್ಯವಾಗುತ್ತದೆ. ಪಂದ್ಯ ಸುಲಭವಾಗಿತ್ತು. ಆದರೂ ಹೆಚ್ಚಿನ ರಾಲಿಗಳನ್ನು ಆಡುವ ಪ್ರಯತ್ನ ಮಾಡಿದೆ. ಈ ಮೂಲಕ ಅಂಗಣಕ್ಕೆ ಹೊಂದಿಕೊಳ್ಳುವುದು ನನ್ನ ಪ್ರಯತ್ನವಾಗಿತ್ತು," ಎಂದು ಪಂದ್ಯದ ಬಳಿಕ ಮಾತನಾಡಿದ ಸಿಂಧೂ ಹೇಳಿದ್ದಾರೆ. ವಿಶ್ವದ 58ನೇ ಶ್ರೇಯಾಂಕಿತ ಆಟಗಾರ್ತಿ ಎದುರು ಸುಲಭದ ಜಯ ದಾಖಲಿಸಿರುವ ವಿಶ್ವದ 7ನೇ ಶ್ರೇಯಾಂಕಿತೆ ಸಿಂಧೂ, ಇದೀಗ ಎರಡನೇ ಸುತ್ತಿನ ಪಂದ್ಯದಲ್ಲಿ ಹಾಂಕಾಂಗ್ನ ಆಟಗಾರ್ತಿ ಹಾಗೂ 34ನೇ ಶ್ರೇಯಾಂಕ ಹೊಂದಿರುವ ಚೆಯುಂಗ್ ಗಾನ್ ಯಿ ವಿರುದ್ಧ ಪೈಪೋಟಿ ನಡೆಸಲಿದ್ದಾರೆ. ರಿಯೋ ಒಲಿಂಪಿಕ್ಸ್ನಲ್ಲಿ ಬೆಳ್ಳಿ ಗೆದ್ದಿರುವ ಸಿಂಧೂ, ಟೋಕಿಯೋ ಅಂಗಣದಲ್ಲಿ ಉತ್ತಮ ಆರಂಭ ಕಂಡರು. ಆರಂಭದಲ್ಲಿ ಹೆಚ್ಚೇನೂ ಆಕ್ರಮಣಕಾರಿ ಆಟವಾಡದೆ ಎದುರಾಳಿಯೊಂದಿಗೆ ರಾಲಿಗಳಲ್ಲಿ ತೊಡಗಿ 3-4ರಲ್ಲಿ ಹಿನ್ನಡೆ ಅನುಭವಿಸಿದ್ದರು. ಬಳಿಕ ಪೊಲಿಕಾರ್ಪೊವಾ ಅವರ ಸತತ ಸ್ವಯಂಕೃತ ತಪ್ಪುಗಳಿಂದಾಗಿ 11-5ರ ಮುನ್ನಡೆ ಸಿಕ್ಕಿತು. ಮೊದಲ ಗೇಮ್ನಲ್ಲಿ ಸತತ 13 ಅಂಕ ಗಳಿಸಿದ ಸಿಂಧೂ 21-7 ಅಂತರದಲ್ಲಿ ಗೇಮ್ ವಶಪಡಿಸಿಕೊಂಡರು. ಮಂಡಿ ನೋವಿಗೆ ಪಟ್ಟಿ ಧರಿಸಿಯೇ ಆಡುತ್ತಿದ್ದ ಪೊಲಿಕಾರ್ಪೊವಾ ಅಂಗಣದಲ್ಲಿ ಓಡಾಡಲು ಕಷ್ಟ ಪಡುತ್ತಿರುವುದು ಮೇಲ್ನೋಟಕ್ಕೆ ಕಾಣಿಸುತ್ತಿತ್ತು. ಹೀಗಾಗಿ ಎರಡನೇ ಗೇಮ್ನಲ್ಲೂ ಅವರಿಂದ ಹೆಚ್ಚೇನೂ ಪೈಪೋಟಿ ಮೂಡಿಬರಲಿಲ್ಲ. ಆರಂಭದಲ್ಲೇ 9-3ರ ಮುನ್ನಡೆ ಗಳಿಸಿದ ಸಿಂಧೂ, ಮತ್ತೊಮ್ಮೆ ಸತತ 13 ಅಂಕಗಳಿಸಿ ಪ್ರಾಬಲ್ಯ ಮೆರೆಯುವ ಮೂಲಕ 21-10 ಅಂತರದಲ್ಲಿ ಪಂದ್ಯ ಗೆದ್ದುಕೊಂಡರು. "ಕೆಳ ಶ್ರೇಯಾಂಕಿತರ ಜೊತೆ ಆಡುತ್ತಿರುವ ಸಂದರ್ಭದಲ್ಲಿ ಅಂಗಣಕ್ಕೆ ಹೊಂದಿಕೊಳ್ಳುವ ಕಡೆಗೆ ಹೆಚ್ಚು ಗಮನ ಕೊಡಬೇಕು. ಎಲ್ಲ ರೀತಿಯ ಹೊಡೆತಗಳನ್ನು ಬಳಕೆಗೆ ತಂದು ಅದ ಮೇಲೆ ಹಿಡಿತ ತಂದುಕೊಳ್ಳಬೇಕು. ಏಕೆಂದರೆ ಅಗ್ರಶ್ರೇಯಾಂಕಿತರ ಜೊತೆ ಆಡುವ ಸಂದರ್ಭದಲ್ಲಿ ಕೂಡಲೇ ಇವುಗಳ ಮೇಲೆ ನಿಯಂತ್ರಣ ಕಂಡುಕೊಳ್ಳಲು ಸಾಧ್ಯವಾಗುವುದಿಲ್ಲ. ಹೀಗಾಗಿ ಈ ರೀತಿಯ ಸುಲಭದ ಪಂದ್ಯಗಳಲ್ಲಿ ಅಭ್ಯಾಸ ಮಾಡಿಕೊಳ್ಳಬೇಕು. ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳುವ ಪ್ರಯತ್ನ ಮಾಡಬೇಕು," ಎಂದು ಪಂದ್ಯಾನಂತರ ಸಿಂಧೂ ಹೇಳಿದ್ದಾರೆ. ಡಬಲ್ಸ್ನಲ್ಲಿ ಭರ್ಜರಿ ಆರಂಭಇದಕ್ಕೂ ಮುನ್ನ ಪುರುಷರ ಡಬಲ್ಸ್ ವಿಭಾಗದಲ್ಲಿ ಭಾರತದ ಸಾತ್ವಿಕ್ ರೆಡ್ಡಿ ಮತ್ತು ಚಿರಾಗ್ ಶೆಟ್ಟಿ ಜೋಡಿ ವಿಶ್ವದ 3ನೇ ಶ್ರೇಯಾಂಕಿತ ಜೋಡಿಗೆ ಆಘಾತ ನೀಡುವ ಮೂಲಕ ಭರ್ಜರಿ ಆರಂಭ ಕಂಡಿದೆ. ಮೂರು ಗೇಮ್ಗಳ ಜಿದ್ದಾಜಿದ್ದಿನ ಹೋರಾಟದಲ್ಲಿ ಚೈನೀಸ್ ತೈಪೆಯ ಯಾಂಗ್ ಲೀ ಮತ್ತು ಚಿನ್ ಲಿನ್ ವಾಂಗ್ ಅವರಿಗೆ ಭಾರತೀಯ ಜೋಡಿ ಸೋಲುಣಿಸಿತು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3iJ4zwX
